صدمة غير متوقعة

[الصبر طيب]

السلام عليكم جميعا
اخواني وخواتي اعضاء المنتدى العظيم
قبل اسبوع بعثت اميل للiom وتصلو بينا وكالو الموافقة الامنية وصلت وانتظرو منا موعد تحديد دورة تثقيفية وسفر
خوش يابة
اليوم خابرت عليهم وجانت الصدمة قوية
كالو ملفكم بالتجيك الامني بالمرحلة الاخيرة
بس اريد اعرف الغلط ويييييييييييييييييييييييييييييييييييييييين
اخوكم الصبر طيب جماعة 11\7 عمان

[volca]

اخي العزيز
حاول ان تتصل مره اخرى و تتاكد لان هذوله دايخين مدري فايخين هاي لو ينتظرون الامنيه جان شسوو هل موضفين 
وانشاء الله خير

تحياتي

[عكعك التطوى]

الغلط ب iom عمان

اخويه ولد نفس حالتك وبعمان ايضا عرف موافقته الامنيه طالعه ومتأكد من المعلومه 100% ومن يتصل بيهم يكلوله الامنيه مطالعه  اخي حاول تخابر مكتب مصر للتاكد من الحاله

تحياتي

[angie-dawood]

اخي العزيز لازم تعرف انه كل فترة الموظفة تتغير وكل وحدة تحجي بكيفها مثل شغلة الوفد الي قسم يكولون موجود بسوريا وقسم يكولون ما موجود واني متاكدة كل التاكيد عائلة سوت مقابلة الوفد يوم الاربعاء الي مضى فمقصد كلامي لا تعتمدون على كلام الموظف الي يجاوب على التلفون لازم تروحون بنفسكم تتاكدون من الاشياء الي تريدون تعرفوها هذول الموظفين يريدون بس يبعدوكم  عن راسهم  مثل باقي الدول سوريا وغيرها وانشاءللة تكون الموظفة ما متاكدة من جوابها ارجع اتصل بيهم مرة اخرى لو روح بنفسك اسال وانشاءللة يكون خير

[ام فائز]

اخونا الصبر طيب
اويلييييييييي هاي نفس العضه ونفس الجلب على كوله حجي راضي
هاي مو بس وياك اخويا الضاهر والله اعلم هاي سياسه ديتبعوها مؤخرنا مال المرحله الخيره اتريد تفتهم منهم شنو يعني ما ينطون ريك الطيبوللعلم هاي صارت الاسبوع الماضي ويا اصدقائنا  لانهم من شهرين كلولهم الموافقه بالمرحله الاخيره وقبل اسبوع كلولهم جتي الموافقه وبعد بس ختم الملف وقبل يومين خابرو كلولهم مجايه الامنيه بس بالمرحله الاخيره من سالوهم انتو كلتو جايه وباقي ختم الملف اتجاوبهم يعني تقدرون اتقولون هي ابختم الملف
رجاء من الي عنده معلومات حول هالوضوع يجاوب وخصوصا الاخ عكعك التطوى

[drlexa]

اني نفس الشي اخويه
شويه يكولولي ختم الملف وشويه يكولولي المراحل الاخيره والله احتارينه وياهم
كتلهه عيني شنو يعني المراحل الاخيره؟ تكولي يعني ختم الملف...كتلهه زين يعني الامنيه جايه معناهه تكولي لا....كتلهه زين المراحل الاخيره هي يمكم بلمنظمه لو من اميركا؟ كالت هي هيجي وهيجي ...المعاملات يمنه بلمنظمه تمشي بسرعه بس الكليرنس بعده مجاي ميه بلميه من اميركا.
واني جنت دازه ايميل اسبوع الماضي...فخابروني الاحد من صباحيات الله ديبشروني انه ملفي على  نفس الحطه...اصلا مو نفس الحطه راجع ليوره يمكن....ووره نص ساعه رجعو خابروني دينطوني نفس البشاره التعبانه.

اختكم من عمــّــان drlexa

[drlexa]

سؤال الى الاخ عكعك اذا يسمح
صديقك شلون متأكد 100% من الامنيه جايه...اكو طريقه نكدر نتاكد من عدهه؟

وهي المشكله شنو الفايده اذا واصله لمصر ولعمان مواصله....معناهه هم رح يصير تاخير بلختم وبلسفر

مادري ضجنه والله

اختكم من عمــّــان drlexa

[ستروبري]

الله يكون بعونك اخوية الصبر طيب ان شاء الله تفرج عليك وعينة والله يسهل امورنة

[bee bee]

هاي بلتيقة جديدة امطلعيلنا اياها
أشو قبل ماكنا نسمع بهذا المصطلح :
التجييك بالمراحل الأخيرة ؟؟؟؟
وهسه اي واحد يخابرهم يكولوله : معاملتك بالمراحل الأخيرة
منين جابوا هذي الشغلة مادري ؟ على أساس احنا ناقصين دوخه
وماينطون نجده ويخلون الواحد دايخ لآخر لحظة
الظاهر هاي سياسة جديدة دتتبعها ال آي أو أم  ويجوز جاييتهم تعليمات
انه مايحجون شي ...
ومن هسه وغاد ح يبدي يسمعها الكل بالمستقبل

حسب الله ونعم الوكيل ...شنسوي الله كريم
ويصبرنا ويصبركم...آمين


تحياتي
ب ب