الفرق بين مترجمي الجيش الامريكي ومترجمي بقية القوات المشاركة معهم

[echo 9]

السلام عليكم اخوان
يمكن يكون موضوع هذا نابع من الضوجة اللي احس بيها هسه من خلال تجربتي القصيرة جدا لتجارب بعض الاخوة والاخوات منكم
يجوز انا ما صار لي حتى شهر من قدمت على الاي او ام واقل من ثلاثة اسابيع على الاس اي في ولكن من خلال مقارنة بسيطة بين ما يحصل لنا نحن مترجمي الجيش الامريكي وما حصل مع بقية زملاؤنا الذين عملوا مع القوات الاخرى كالاسترالية والبولندية مثلا يجعل الواحد منا حقيقة يضوج من هاي الوضعية
اولا اخواني الاعزاء
كان لدي بعض الاصدقاء ممن عملوا مع القوات الاسترالية وحين انسحاب الاستراليين من العراق قاموا بالطلب من مترجميهم وعمال الخدمة والنظافة الذين عملوا معهم وحتى اليمشي بالشارع وسلم عليهم وكال لهم هاي بيوم من الايام نفسهم للسفر لاستراليا وخلال ايام وفعلا خرج الكثير من جماعتنا اللي اشتغلوا مع الاستراليين ومن غير الفورم 157 ولا الفورم الذي يليه 360 ولا ريكومنديشن ولا دياولو ؟؟؟ حلوة موووووووو؟؟؟ بكل سهولة وتيسير امر
القوات البولندية عملت نفس الشي
البريطانيين عرضوا على جماعتهم التعويض او المغادرة لبريطاني
بحسبة بسيطة ومن خلال ضوجتي هاي اسال ليش احنا اللي اشتغلنا ويا الامريكان ولهس مستمرين وياهم يمرمرونا بهالطريقة وكل خمس دقائق ايميل نقص فورم معلومة خطا بنت تزوجت لا والله بنتك طلقوها
مرتك حامل لا خطية جابت وجيب ليل وخذ عتابا واذا المسالة تاخذ لها سنين خو ماكو شي سالمين ؟؟؟؟
ليش الامريكان يسوون بينا هيج ؟ واحنا لو بلدنا تعبان وراح يتعب اكثر ولو مو الواحد وراه عائلة تشك الحلك لا والله كان الواحد يضحي له بعشرة الاف دولار ويصبح باستراليا ويفتك من هاللغوة والا انتم شنو رايكم
echo 9

[chaos]

 :)الي اريد الحلووووووووووو يصبر على مرة


تحياتي الك

حــــــمودي الكــــــرادي

[Safaa Alkhrkhy]

والله اخي اسألتك خوش اسئلة لكن.....
اعتقد ان الفرق بين الامريكان وباقي البلدان هو انهم امريكان وهؤلاء ليسوا أمريكان!!!!!!!!

[echo 9]

والله عمي صدك اللي يريد الحلو يصبر على مره
بس هم انا عندي ملاحظة زغيرونه ( اشو الضايجين بس انا وجماعة الكرخ - حمودي وصفاء )؟؟؟؟ ليش جماعة الرصافة لازم شغلتهم ما تطول مثلنا !!!!!!!!!!!!!!!!!!!!!!!!!!!
الله يصبرنا على بلاوي الاي او ام والاس اي في واليو ان بعد خطية الله يساعدهم ويصبرهم لان انتظارهم ينحسب بالسنين مو بالاشهر ؟
الله كريم ويسهلها عالجميع
Echo 9

[ابو عبد الله التكساسي]

عمي ايكو انت شفت بعينك هذولي المترجمين الي جانو يشتغلون ويا القوات البريطانيه لو بس سوالف
لان اعرف ولد جان يشتغل بالبصره ويا الانكليز كاللهم اريد اروح لبريطانيا
ولحد الان ملطوع بسوريا لا منا ولا منا
شو هذا حجي يختلف ودا اكلك هذا الحجي عن معرفه شخصيه بالاخ

[storm2000]

 الاخ echo 9 كلامه صحيح
الامريكان مسوو لجوء للعراقيين الا بعد ماشافت باقي الدول مثل استراليا او بولندا والضغوط الدولية يلا سوت لجوء للعراقيين يعني ( من وره خشومهم ) .
بالنسبة لبريطانيا ماعندي علم

[CYRANO]

 اخي كلامك صحيح لان قوانين ومعاملات بيها تشديد هوايه من قبل امريكا اكثر من بقية الدول  فمثلا الدنماركيين بالبصره فتحت هذا الباب قبل اي دوله وانا اعرف هذا الشي لاني من البصره واصدقائي طلعوا وي الدنماركيين بليله ظلمه حيث تم تسريحهم من العمل قبل حوالي شهر من موعد السفر وفي احد الايام اتصلوا بيهم وكالوله يالله اليوم تجون وبالفعل راحوا للقاعده وتم نقلهم جوا من البصره للدنمارك لا معامله لجوء ولا روحه لبلد ثالث ولا هم يحزنون واللي ما راد السفر انطوه تعويض عشرين الف دولار واخذوا المتزوج هو وعائلته وحتى المشتغل وياهم يوم واحد من مترجمين او طباخين او عمال ...

اما الاستراليين ففعلوا نفس الشي وتم اخذ المترجمين مع عوائلهم من الناصريه بطائرات للاردن ومناك لا ستراليا واللي ما لحك يقدم او يسافر بس يتصل بيهم بأي سفاره وينطوف رأسا فيزا لاستراليا بعد التاكد من هويته وحتى عمال النظافه والطباخين والعمال وحتى اكو شرطه جان يطلعون وياهم دوريات اخذوهم وحتى اللي مصور وياهم صوره...

ام البريطانيين وبعد ضغوط قاموا بقبول المترجمين ولكن بشروط منها ان يكون قد عمل اقل شي سنه وياهم وعنده سجل نظيف ولم يفصل بسبب العمل وخيروا المقبول باللجوء او التعويض وتم رفض الكثير حتى من اكمل سنه ولكن مع مرور الوقت تم قبول الكثير وحتى المرفوضين ولكن لم يقبلوا من عمل اقل من سنه ..هذا بالنسبه للذين تركوا العمل حيث كان عليهم الانتضار ثم السفر الى بلد ثالث وهو سوريا او الاردن وهناك انتظار من شهرين الى عشر اشهر وحتى سنه ويقدم تقديم عادي على الامم ولكن طلبه مقبول مئه بالمئه مع راتب شهري يستلمه من السفاره البريطانيه نظير انتظاره ..اما المستمرين بالعمل فتم سفرهم مباشر من البصره وترانزيت بالاردن الى بريطانيا.

          اما الامريكان فالله يكون بعونكم اخواني....

[echo 9]

عمي ابو عبودي
وداعة الاخوة اخوك ايكو ان شاء الله ما يفتح موضوع الا متاكد من معلوماتي وللتاكيد روح لموضوع الالخ Iraqibird ( المترجمين مع القوات البريطانية )  وشوف بعينك وعلى فكرة انا كنت اعمل بشركة امنية بريطانية وبمنصب كلش رفيع بس حاشاك الانذال من انسحبوا وتحولت على العمل الحكومي رفضوا ينطونا امبلويمنت فيرفيكيشن لذلك قدمت على اساس شغلي مع الجيش الامريكي وابن خالي استلم تعويض من الجيش البريطاني وكمل شغل لهسه مع الامريكان اما بالنسبة للاستراليين فمتاكد الف بالمية والبولنديين ابن عمي هسه بلندن طلع مع البولنديين ومن غير فورمات ولا هوسسسسسة وهسه تركت بولندا واستقر بلندن
تقبل تحياتي ابو عبودي وشوف الاس اي في شمسوين باخوك ايكو صار شهرين مكالب وياهم جيب الفورم وودي الفورم ووين كنت وشنو كنت والله يمكن انا لو امين سر فرع بزمن الاغبر كان هسه لاجئ سياسي بامريكا موووووووووووووووووو؟؟؟؟؟
اخوك
Echo 9

[عيني بغداد]

السلام عليكم

مراح اكول شي غير "بأن اللي ايده بالمي مو مثل اللي ايده بالنار".

ليش هم شلون جانوا يعاملون المترجمين علمود هسه يسهلون امورهم ويطلعوهم بسرعة وبدون تعقيد.


تقبل ردي
عيني بغداد

[Revolver]

أي والله عيني بغداد,

صحيح الي اتفضلت بي, والله هواية اصدقائي داسمع بيهُم, يكلك المعاملة مال المُترجمين خاصتاً هسة, كولش كولش محلوة ماعرف شنو السبب ؟ وشنو الي يقصدون بي انو المعاملة موزينة ؟

او ولد صديقي انطرد من الشُغل مالتة هوة و 20 نفر ويا, يكول حشاكم لأسباب ( سخيفة ) بس علمود يلكون حجة علمود يطلعونة, ومنا سمعت انو GLS ديقلصون بلكادر وهيجي ديسوون . يعني والله حيرة ..

ياريت الاخوة الي عدهُم معلومات عن هذا الشي ينورونة بيها, ولكم جزيل الشُكر .

ريفولفر

[عيني بغداد]

والله يا اخي ريفولفر اكو سوالف سووها بالمترجمين تكول عبالك هذوله الناس لا اشتغلوا وياهم ولا تعرضوا لنفس الخطورة بالشارع ولا شبعوا قهر من وراهم.

الله يعين الجميع

تحياتي
عيني بغداد

[Revolver]

اني وياك حبيبي انت,

بس انت هم احجيلي اكو مُترجمين دمروا السُمعة مال المُترجمين الباقين وحركوا الاخضر بليابس, صح لو لا ؟

الله يعين الجميع, والف شُكر الك اخوية العزيز, وياريت اي احد عندة معلومات عن المعاملة مال الجيش للمُترجمين يكدر يكللنياها, لأن اني امفكر اداوم مُترجم بس مترردد, اروح لو لا من ورة هاي الاخبار  ...

ريفولفر

[عيني بغداد]

عيني ريفولفر

أكيد بعض الاخوان ما قصروا بس بالمقابل هم جانوا كل يوم يطلعون قرار شكل واتوقع بعض القرارات لحد الان سارية المفعول.

بخصوص دوامك توكل على الله واكيد رح تكون معاملتهم ألك مثل ما انت تعاملهم واكيد رح تعكس حسن اخلاقك وطيبة نفسك.
ولك مني نصيحة لتحاول تندفع في خارج عن حدود الترجمة وخلي دائما في بالك هو ايصال المعلومة بشكل حقيقي وبدون الميل الى طرف.

تقبل ردي
عيني بغداد

[Revolver]

تحياتي الك اخوية ( عيني بغداد )

واشكرك جزيل الشُكر على النصائح وتسلملي وبارك الله بيك .. اتمنالك كل الموفقية .

ريفولفر

[echo 9]

حبيبي ريفو اذا حصلت لك للشغل مترجم توكل على الله واشتغل لان الجماعة الجي ال اس وصلوا تعليمات للوحدات الامريكية بتقليص اعداد المترجمين . وانا من قصدت سوء المعاملة لم اقصد الجي ال اس ولا الوحدات اللي اشتغلنا بيها لان بصراحة انا لهس مرتاح بشغلي والوحدة الاشتغل بيها كلهم ضباط ومراتب يمتلكون اخلاق عالية وعدهم انسانية مو طبيعية وكلهم ذوق بس الكنت اقصده موضوع الهجرة والاي او ام والاس اي في وشلعت القلب من وراهم ولو السالفة مال الهجرة بيد الوحدة مالتي كان انا من باجر بامريكا بس كان القصد اجراءات اس اي في واي او ام التشلع المرارة .
توكل على الله ريفو واشتغل لان سالفة الطلعة تاخذ وكت مبين .... ربي يوفقك ويوفق الجميع
Echo 9

[أ.ج.ت]

حبيبي رفولفر توكل على الله واشتغل انت من طريقة تعاملك بالمنتدى اكلك راح ترتاح بالشغل لان همة يحبون الشخص النشط اهم شي من تروح تشوف قوانين القاعدة مالتك ونفذه بحذافيرها .بالنسبة لسؤالك المعاملة الغير جيدة تجي من القوانين الي خاليهه بالقاعدة والي راح تقهرك بالبداية لان تكول شنو قابل اني ارهابي بس ورة فترة راح تتعلم عليها اما الوحدة الي تشتغل وياها فمن النادر تشوف المعاملة السيئة منهم ومثل ماكال الاخ عيوني بغداد لتطلع عن حدود الترجمة لان ميحبون هذا الشي . اما بخصوص سؤالك عن الي انفصلوا فخلي اكلك شي ماكو واحد انفصل بدون سبب مثلا لو ملتزم بالقوانين الي خاليهه للمترجمين لو واحد نفسيته ضعيفة وباك لو حجالة حجاية متنحجي وخله عليه مؤشر امني توكل على الله وربي يحفظك.

[Revolver]

حبيبي انت ايكو,

ربي يحفظ انت والاهل ان شاء الله وميحرمنة منك ومن اخلاقك العالية, اني افتهمت قصدك تاج راسي, بس اخوية العزيز ( عيني بغداد ) جاب طاري المٌعاملة السيئة الي ديتعاملون بيها وبة المٌترجمين, واني تدرون بية ممشتغل كبل مُترجم, فشوية جريت ايدي مثل ميكلون علمود افتهم السالفة لأن الي كالة اخوية عيني بغداد سمعتة من هوااااية مُترجمين واستغربت الحقيقية, والحمدلله والشُكر جاوبتوني ورحم الله والديكم, وان شاء الله بس اتصير الشغلة مثل ميكلون ( طابـو ) ابلغكم وأبلغ الادارة الكريمة بهذا الشي .

تحياتي الك حبيبي ايكو واشكرك جزيل الشُكر .

ريفولفر

[Revolver]

أغاتي وتاج راسي أ.ج.ت

حبيبي انت, اشكرك جزيل الشُكر وممنون منك كُل الامتنان على ردك بلموضوع وسويت عليك زحمة عيوني انت, ان شاء الله بس يتصلون بية ويكلولي تعال, راح اتوكل على رب العالمين واروح , بس عندي سؤال عنوني وهوة شنية القوانين العامة الي بلقواعد, لو كُل قاعدة والهة قوانين ؟ اني الي اعرفة القواعد البرية تختلف عن القواعد الجوية من حيث القوانين, حسب تجربة شخصية لأن جنت اداوم بلأسد اني (I.T ) وجان ممنوع احد ياخذ اللابتوب مالتة للُغُرفة وومنوع احد يشيل فلاش رام اذا ممسجل ( U.S Government Property ) وممنوع تفتر وحدك اذا مو ايسكورت  ووووو كومة قوانين كُلها ممنوع .. بحيث جنة متقيييدين كولش . فهل هاي الأمور كلهة موجودة بكُل القواعد ؟

وشنية الشغلات الي اكدر اخذها وياية للشُغل ؟ مثلاً لابتوب مسموح بي ؟ ايبوت ؟ هارد اكستيرنال ؟ هاي الشغلات يعني مسموح بيها لو ممنوعة ؟ ولكم جزيل الشُكر .

تعبتك وياية حبيبي أ.ج.ت

مشكور عزيزي


ريفولفر

[echo 9]

اخوية الغالي ريفولفر
شكرا على سؤالك عني وعن عائلتي ربي يحفظك احنا كلنا بخير وعافية
وردا على سؤالك عن قائمة الممنوعات بالقواعد اعتقد كل القواعد متشابهة بهذا القانون
عدم ادخال الكامرات - عدم ادخال التلفونات - الفلاش والرام  اذا السيارة مالتك تشتغل بالريمونت ممنوع تخل الريمونت - اللابتوب ممنوع - الادوية والكحول كفانا الله واياكم شر الكحول - الساعات الالكترونية - الاسلحة بانواعها البيضاء والحمراء والصفراء - )
واهم شيئ عند الذهاب للقاعدة ان تجلب معك الجنسية الاصلية ام الفسفورة حلوة هاي ام الفسفورة مو ما ادري منين جابوها هاي لان ام الختم المثلث الازرق ما تاكل ؟؟؟؟؟
وهاي هيه وتسلم يا الغالي
اخوك
Echo 9

[أ.ج.ت]

حبيبي ريفولفر لاتعب ولاشي انت اخ عزيز .
حبيبي القوانين كله تقريبا نفس الشي ومثل ماكال الاخ ايكو وتختلف على الوحدة ال تشتغل بيها وعلى المنطقة من ناحية الكومبيوتر والتلفون يعني اخر وحدة اشتغلت بيها كبل ماافلت من العراق جاوبولي موافقة تلفون وبالنسبة للاسكورد هاي اكيدة بس ورة فترة من يعرفوك زين واذا مسؤل المترجمين مال الوحدة نشط يسويلك الباج البرتقالي وحتتحرك بحرية اكبر .
ان شاء الله من تبلش وتكون علاقتك بالجنود قوية حيخلوك تستعمل الانترنيت وتبقي التلفون يمهم يعني مو فد مشكلة بس انت بلش وكلشي يصر سهل وراها.
ان شاء الله عن قريب تشتغل وحتشوف الشغلة شكد ماهي متعبة شكد مراح تتونس بيها ربي يحفظك ان شاء الله. 

[ابو عبد الله التكساسي]

عمي ايكو الله ايساعدك واعتذر عن كلامي السابق
والله يكون بالعون ويصبرك على طلايب السفارات والدوائر الامريكيه التابعه للهجره

اخي الغالي رفولفر والله مشتاقين حبييب
شخبارك واخبار الاهل ؟؟
يا رب تكونون بخير

تحياتي للجميع وبدون استثناء لمن كتب وشارك بهذا الموضوع الي جمع كل المترجمين بمكان واحد

Long Live All the Terps 

[/color]

an old interpreter
recent Immigrant
 
ابو عبد الله التكساسي

[Revolver]

اخي الغالي رفولفر والله مشتاقين حبييب
شخبارك واخبار الاهل ؟؟
يا رب تكونون بخير

تحياتي للجميع وبدون استثناء لمن كتب وشارك بهذا الموضوع الي جمع كل المترجمين بمكان واحد

Long Live All the Terps 

[/color]

an old interpreter
recent Immigrant
 
ابو عبد الله التكساسي

تااج راسي ابو عبدالله, الحمدلله والشُكر, والاهل بخير والحمدلله والشُكر ربي, ربي يجفظ عوائلكم ان شاء الله ويمن عليها بلخير والبركة, رحم الله والديك على السؤال اخوية العزيز , وربي ميحرمنة من عطفك وكرمك, ان شاء الله نسمع منك كل الاخبار الحلوة والمُفرحة ان شاء الله .

ريفولفر