اريد رقم الامم المتحده بعمان

[احمد عباس]

مرحبااا شباب شلونكم

شباب السالفه ومابيها اني صارلي سنتين مقدم على اليو ان وعدي ورقه مال الحمايه

بس لحد هسه كلشي ماكو بخصوص التوطين اخر مره من رحنه انجدد ورقه الحمايه اني واهلي

كالو ملفكم قيد الدراسه وهاي صار 5 اشهر لو 4 ماذكر بالضبط

هسه دزيت ايميل على هذا الايميل ic@iom.int خابروني كالو ملفك مواصل النه

لازم تخابر اليو ان يشوفو من يمهم

واليو ان من اخابرهم يطلعولي موضفين كلشي ميفتهمون ولا عبالك همه مسؤلين عن لجوء وهل شغلات

ها شنو منو منعرف وعلى هل رنه

اني هسه اريد رقم مال المسؤلين عن التوطين باليو ان يعني اتصل بيهم يفتهمون مو يصفنون بوجهي



اني بالاردن

[احمد عباس]

شباب اني اتصلت على المعلومات هسه

وكتله اريد توطين كلي اي ندري انت طالب توطين بس انتضر لحد هسه ماكو شي جديد

كتله صارلي سنتين انتضر وملفي بعده يمكم منقل للتوطين كلي انتضر

شكله يكلي انتضر


زين ماعرف شباب يعني انتو صارت وياكم هيج ضليتو سنتين على اليو ان يعني على ورقه الحمايه ؟

وكل متتصلون يكولون الكم انتضرو

[abu shahed]

اخي العزيز احمد ارسل لهم مناشده وشرح لهم حالتك والافضل ان كل اسبوع ترسل لهم مناشده يعني لضل ساكت لان هذوله خلكهم كلش طويل وخصوصا ملفك حاليا قيد الدراسه يعني المناشدات ممكن تحرك ملفك ويتحول على التوطين

رقم المفوضيه عمان
5502141


                                                  اخوك
                                             79 النرجس

[chicho]

اخي العزيز احمد ارسل لهم مناشده وشرح لهم حالتك والافضل ان كل اسبوع ترسل لهم مناشده يعني لضل ساكت لان هذوله خلكهم كلش طويل وخصوصا ملفك حاليا قيد الدراسه يعني المناشدات ممكن تحرك ملفك ويتحول على التوطين

رقم المفوضيه عمان
5502141


                                                  اخوك
                                             79 النرجس

اخونا الترجس

ياريت تحجيلنا شلون نسوي مناشدة يعني على الايميل لو شلون واذا على الايميل ممكن تنطونا عنوان الايميل اللي نرسل عليه المناشدة ومشكورين مقدما

[بغداد بقلبي]

السلام عليكم اخي الغالي احمد عباس اني اخوك صارلي بالاردن 6 سنين بالنسبه للتوطين طبعا اني امسجل بالمفوضيه سنة 2004 وانقبلت بسنة 2008 والحمد لله يعني اتوطنت المهم بالنسبه للتوطين مو كل الملفات تمشي اب سرعة طبعا الملفات الي بيها اثباتات جيده وقويه واصليه وقصة قويه هاي الملفات تمشي اب سرعه وما اتطول واني اعرف ناس صارلهم 6 سنين واكثر واقل واحد ارعفه صارله 5 سنين وماكو توطين ولا مقابله حمايه بس لمن تنتهي الورقة ايروحون ايجددوها يعين بالنسبه الك انته لسه جديد وماكو كدامك غير الانتظار والاستعانه بالصبر لان ملفك اذا كان قوي وجيد كان همه اول متسجل وره شهرين تتوطن او خلال 6 اشهر يعني مو همه امقرين بس اكو ملفات اقوى من ملفك واكو ناس امقدمين اشياء انته ما امقدما اني اسف جدا لانني حسيت صرت قاسي وياك بس اريدك تعرف المفوضيه اشلون تشتغل وانته حاليا اشلون وضعك ولاتستغرب من انتظار سنتين ومدام ملفك بالدراسه يعني شغلتك بيها مجال وهسه اكو ناس عائله اتصلت بالمفوضيه وهمه طبعا صارلهم 6 سنين تعرف شنو كان رد المفوضيه الهم كلولهم انتو ماالكم توطين لان المعايير لاتنطبق عليكم الكم حمايه بالاردن وبس اتخيل والنا س خطيه اعصابهم ادمرت انته هسه ما كلولك هيج انتظر والله كريم ما ينسه عبده ولا يكطع بيه وتقبل مروري واي سؤال اني بالخدمه بالنسبه للمفوضيه الي بالاردن وهاي تلفوناتهم
5502140
5502141 تتصل يوم الاحد اذا كان ملفك بالتوطين ويوم الاتنين اذا كان ملفك بقسم الحمايه ويوم الثلاثاء للخدمه الاجتماعيه المساعدات ويمو الاربعاء لقسم التسجيل  ويكون سؤالك هل من جديد بخصوص ملفي واذا كنت تملك اوراق او وثائق جديده اوقديمه واتحس انها اتساعدك بقضيتك حطها اب ظرفواكتب عليه رقم ملفك وتلفونك وروح لمكتب المفوضيه وحطها بصندوق البريد والله ولي التوفيق

[الضايع]

اخويه بغداد بقلبي تحيه الك اريد أسألك سؤال؟
الناس اللي جايين قبل السقوط بسنوات وطلعلهم اللجوء وسافروا لامريكا هم عدهم قصه قويه وملف قوي؟؟؟؟؟ طبعا هاي المعلومه لناس اعرفهم شخصيا لانه اني منهم بس ملفي بعده بالحمايه والف عافيه لكل واحد سافر ويارب الفرج للجميع

[احمد عباس]

شكراً شباب على ردودكم

بس بالنسبه للناس الي جاين قبل الحرب وسافرو اي همين عدهم اسباب


قبل الحرب جانو يكولون مثل عدنه مشاكل ويه النضام او عدي احد نعدم وهيج

هسه الي يردون توطين يكولون مهددينه او عدنه واحد نخطف يعني كل مرحله الها اسبابهة

____

وسؤالي الثاني عمي بكندا مثل اذا دزلهم رساله وكلهم اني اكفلهم ويطيهم معلومات عليه

تفيد هاي ؟ لو ميديرون بال لهل امور يعني همين ممكن يكولون الي انت متحتاج توطين ؟

[мαяyαи]

الى الاخ احمد عباس اني هم من الناس الي مقدمة بالمفوضية من سنة 2004 وما اجانة توطين غير قبل شهرين بس اخي لازم يكون عندك صبر ولا تفقد الامل وانصحك مثل ما كالو الاخوة تكتب مناشدات دائما وتكتب معاناتك حتى بعمان وهما توصلهم ويضيفوها على ملفك لان احنا بصراحة هم هيجي سوينا وخابرونا ولما سوينا المقابلة كانت المناشدات كلها موجودة بملفنا بلكت يحرك ملفك وتذبها  لو بصندوق البريد الموجود خارج المفوضية لو بالايميل الموجود بورقة اليو ان وان شاء الله تبشرنا بتوطينك عن قريب اختك ماريان

[angie-dawood]

ammaninfocenter@iom.int
AmmanInfoCenter@iom.int   
قسم التوطين في الاردن

[بغداد بقلبي]

السلام عليكم اخي الغالي بالنسبه الى سؤالك بخصوص الناس الذين موجودين خارج العراق قبل السقوط وسجلوا وانقبلوا اني اكلك اكو فد شغله دوليه انه الشخص اذا ظل خارج بلده الام وما رجعلها مدة 8 سنين هذا طبعا بس ايسجل ينقبل واكو اهواي ناس اني اعرفهم هم همه قبل السقوط وسافروا وانقبلوا بس همه اخذوا اوراق ووثائق جديده تثبت تعرضعه للموت او الاظطهاد اذا رجعوا للعراق ومنها مثلا مقتل احد افراد عائلتهم بالعراق او الاستيلاء على بيوته او ايه امور اخرى ومن ضمنها حتى اذا كان تهديد قبل 12 سنه مثلا ومن قبل النظام السابق وطبعا الوفود اتحب هاي الحالات وتطلب من المفوضيه توطينهم اي شخص معارض للحكومه السابقه  وطبعا ما راح انسى العنصر الاهم وهوقسمة رب العالمين والحمد لله رب العالمين والله ولي التوفيق

[احمد عباس]

اي همه صح يردون اسباب حتى يسفرون بسرعه

بس ابويه البطل عباله هذوله مثل الهجره كلوله وضعك شلونه كلهم زين

بعدين كتله الابويه ليش تكول زين كال مو علمود يقبلون يسفرونه لا عبالهم احنه راح نروح عاله


شحجي ويا هذا وهيه من وره هل حجي لا سفرونه لا يطونه راتب كلشي ماكو


وهسه يريد يرجع لبغداد مره ثانيه واني خايف تنلاص شغله التوطين بالزايد

[الحديقه]

أخويه احمد عباس أني والله هم نفس سالفتك وهم أبويه البطل كللهم وضعنه زين وحتى اني مقدم من زمان وبس دااجدد الورقه وبالشهر الثالث خابرونه همه الامم المتحده (UNHCR) وكالونه عدكم مقابله عدهم ورحنه وهم ابويه اخر شي بالمقابله لاصه بس احنه وقعنه على التوطين وكالت القابلتنه اخابركم علمود اتاكد من قراركم النهائي للتوطين لان شافت ابويه متردد المهم خابرتنه وره يوم وكناله اوكي ووره اسبوعين هم اتصلت بينه وكلتنه انتو وين تريدون التوطين المانيا لو اميركا كناله اميركا وكالتنه خلال ثلاث اشهر يخابروكم التوطين (IOM) حتى تكملون اجراءاتكم يمهم ومااحجيلك من خلصت الثلاث اشهر وليهسه صارت ثمانية اشهر ومحد كلبنه ولاخابرنه طبعا اني مشتغل ايميلات عليهم وتلفونات حتى صندوق الشكاوي ترسته الموجود بره يم الامم المتحده وقدمت ثلاث شكاوي عن طريق التلفون (الرد الالي) الى ان رد عليه واحد من الامم المتحده قبل اسبوعين كلي بعد ملفكم مطول وبعد عدكم مقابله باليوأن (UNHCR) شوكت محد ميدري والله كريم بس شسوي اخويه احنه ماعدنه اله الصبر.

النرجس 79  رحمه على والديك شلون الصيغه مال مناشده تصير اذا تكدر توضحلنه شلون صيغته او اذا عدك نموذج نكدر نمشي عليه وعلى اي ايميل ندزه مع جززززززززززززززيل الشكر أخويه.....



تقبلوا مروري...........
الحديقه-عمان