السفر داخل الاردن وموضوع الاقامة

[osama5477]

السلامة عليكم اخواني ،

بس حبيت اسئل على موضوع السفر داخل الاردن من محافظة الى اخرى ، اني دخلت للأردن بفيزا عن طريق ال IOM واني تقديم مباشر يعني ما عندي ورقة مال يو ان ، واقامتي خلاصنة ، هل يوجد مشكلة من السفر داخل الاردن مثل الذهاب الى العقبة او المناطق السياحية داخل الاردن ، حسب معلوماتي لم يتم ترحيل احد في حالة عدم تجديد الاقامة وهواية عراقين اقامتهم منتهية ، اني عندي الموافقة الاولية ( موافقة المحلف ) وهية بالانكليزي ممكن اتفيديني مع الجواز في حالة سئلوني عن الاقامة في احد السيطرات الي على الطريق ، ارجوا من الاخوان اصحاب الخبر النصيحة علماً اني حالياً بأنتضار الموافقة الامنية منذ ثلاثة اشهر

وشكراً جزيلاً

[الحياوي]

اخويه العزيز
البارحه مسكوني الشرطه مرتين ومعي العائله
لكن اني عندي الورقه مال اليو ان ومعاها البطاقه الزرقاء التي تصدر من الداخليه
والله ستر
ما انصحك تتجول  كثيرا وما اعرف الورقه الي عندك
راح اتنفعك لولا  _والشرطي يعرف انكليزي لو لا حتئ يفتهم مضمونها_
انشاء الله اخواني بالمنتدئ ما راح يقصرون وياك

[الحديقه]

أخويه العزيز ماانصحك تطلع لاي محافظه تروح وخاصه العقبه لان حيل بعيده وموجوده على الطريق مفارز لان طريقه بعيد ويجوز من تفوت للعقبه يجيكون جوازك لانها تعتبر منطقه حره واني اشوف لو تروح لل IOM حتى يطوك البطاقه الزرقاء وأنشاءالله يارب متحتاج تسوي سياحه بالاردن أو تاخذ البطاقه ويكون سفرك قريب .........باموفقيه.

تقبل مروري....

أخوك
الحديقه-عمان

[bee bee]

أخوية العزيز
ماأنصحك تفتر خارج عمان بدون اقامة
وخصوصا العقبة وأم قيس اللي هي أصلا مسموحه بس للي عدهم اقامة سنوية
عاد كيف باللي ماعدهم كلشي؟؟؟
وباقي المكانات مثل البحر الميت أو المغطس او جبل نيبو
مابيها سيطرات تسأل .. خصوصا اذا عائلة
وهم تعتمد انت وحظك

ومثل ماشفت الأخ حياوي لزموه مرتين علما انه ويه عائلته
فه أحسن شي الواحد يبتعد عن هيجي مكانات
علما انه التقديم المباشر مابي لابطاقة زرقاء ولا وثيقة

والله الحافظ

تحياتي
ب ب

[اريد وطن]

والله خويه الاخوان جاوبوك كفايه وزياده

اخويه العقبه قبل دخولها الها مثل حدود حتى لو رحت بالجت بالطريق قبل دخول العقبه يوجد نقطه تفتيش للجنط واذا عراقي  يودوك غرفه المخابرات يعني اني عندي اقامه وكلشي عادي ودوني غرفه المخابرات وتقريبا ربع ساعه وين ساكن بعمان وكم يوم كاعد بيالعقبه وين حاجز طبعن اني وعائلتي وبقى باص جت منتضر هذا الحجي العام الماضي بس بدايه هذا العام ردت اروح سياحه وبصراحه عندي ورقه يوان وماعندي اقامه بصراحه ابو الحجز للفندق كلي خويه متاكد يرجعوك وميدخلوك ويروح عليك حجز الفندق هاي احسن الضروف اذا ماكو فلسفه ويكعدك فرد ساعه ويسويلك دوخه انته بغنه عنها

عمي خليك بعمان احسن واحد مناقس مشاكل والله متسوى خاصه بالعيد كلشي مابيها
عمي تعال اني وياك نروح لزاد وملح مشاوي وكباب احسن والله وداعتك اول اليوم العيد نروح يلله فكر وردلي خبر

اخوك اريد وطن - عمان ( عايش بيها وزهكانه من 19 عام واتمنى الساعه الي اطلع بيها )

[حمودي ابن زيونه]

حبيبي تكدر تروح للعقبه والبحر الميت وجرش واي مكان

اشو ظلمتوها ... عندك ورقه مال يو ان كافي

اني رحت والكل ينسأل بالسيطرة مال عقبه سواء المقيم او لا.

[nana1972]

اخونا العزيز osama5477  مثل ما كال الاخ بيب بيب
لا ام قيس ولا العقبه بيها مجال تطلعلها اذا مو ورقة اليو ان او اقامه اما الباقي احتمال بيها مجال الا هالمكانين اشوف اتكون حذر بيها احنا باقامتنا ومن انروح جانو يستفسرون . فالحذر واجب
والله يبعدك عنك الشرطه ويسهل امرك
نانا / سان دييكو

[حمودي ابن زيونه]

اني منتبهت انه ماعندك ورقه يو ان

اي لازم عندك لان المخابرات بالعقبة مباشره سئلوني عندك ورقه مال يو ان من عرفوا اني ممقيم

الله يسهل ونخلص

[اينشتاين العراقي]

عيني انت تكدر تتنقل بس بيه مخاطره يعني مخهم وما كطع
لان انت ما عندك الكارت الازرك الي موقع من الداخليه
فحسب الي يلزمك يريد يرحلك لو لا
فنصيحه لتخرج خارج عمان
وخاصه للعقبه
لان بيه سيطره قبل العقيه بكيلو يفتشون حتى الذبانه اذا تريد تفوت



واي استفسار اني حاضر


اخوك اينشتاين

[ام فائز]

اخونا يعني شلك بيها الفره بالاردن هي اشبيها
اذا ما عندك ورقه مال يو ان تره الافضل لا تفتر هوايه

اذا عندك البطاقه الزرقاء او الورقه البيضاء الي بيها انت لاجئئئئئئئئئئئ فالافضل ان تتجفا الشر وتكعد

[salah-eng]

السلام عليكم اخوان
والله هية مرات حضوض بحالة عندك اوراق un والبطاقة الزرقة ومرات حتى لو كانن عندك اتطيح بواحد ما متريق وطالعة الدنيا من عينه ويطلع ضيمه بيك
احسن شي انسى العقبة عندك اربد وجرش وعندك مادبا وحمامات ماعين وجبل نيبو بيهة مواقع جميلة ومطلة على البحر الميت وعائلية وراح ترتاح بيهة لاني ساكن بمادبا وجميلة جدا واذا كان عندك سيارة راح ترتاح انت وعائلتك اكثر واكثر واي شغاة تحتاجهة مني هنا اني بخدمتك عن اي استفسار واصلا تبعد عن عمان نص ساعة بسيارة خاصة
اخوك صلاح

[حمودي ابن زيونه]

اخوان ليش احد بيكم صار بقريبه او صديقه انه ذبوا على الحدود لان مقدم على الـ UN ؟

[2B or not 2 B]

الأخوة والأخوات في هذا المنتدى سواء أكانوا داخل أو خارج العراق

سلام من الله عليكم جميعاً ورحمة الله وبركاته

بادىء الأمر أود أن أشكركم على مشاركاتكم والرأي والرأي الاخر في المنتدى. جل مواضيعكم تصب بإهتمام مشترك رغم أن بعضها تقف كرأي اخر.  وهذه هي روح الحوار الديموقراطي البناء.  أنا على إطلاع بكتاباتكم منذ زمن ولكني لم أسجل دخولاً الا اليوم كيما أشارككم أرائكم إن احببتموني ضيفاً في منتداكم هذا. لكم مني فائق التقدير...أخوكم تو بي ئور نوت تو بي (إما ان تكون او لاتكون)

[osama5477]

مشكورين اخواني الاعزاء على اجاباتكم ، واني قررت ورة العيد اروح لليو ان على مود موضوع ورقة الحمياة علماً اني ملفي مع ال IOM كامل بس الامنية باقية ، اروح لدير غبار واشوف اشلون الوضع ، واني مراح اخطوا اي خطوة لأن ان شاء الله مابقه شي ما اريد اضيع الفرصة مال السفر ، وبالنسبة للاخ حمودي ابن زيونة نعم اعرف ولد عندة ورقة الحماية مال اليو ان وعنده كارت ازرق ورحلوه على الحدود قبل شهرين ، همة بكيفهم ان شاء الله نسافر ونخلص من بلاويهم

[حمودي ابن زيونه]

وبالنسبة للاخ حمودي ابن زيونة نعم اعرف ولد عندة ورقة الحماية مال اليو ان وعنده كارت ازرق ورحلوه على الحدود قبل شهرين ، همة بكيفهم ان شاء الله نسافر ونخلص من بلاويهم

اكيد سوى مسكوره ترى مسامع انه واحد يلكوه بالشارع ويذبوه على الحدود وهسا جنت يم ولد اخوه بالمخابرات مال عقبه ... كال مفد يوم رجعنا عراقي جاي للعقبه بس للتطمين

[osama5477]

والله اخوية حمودي حسب علمي لزموه يشتغل بمطبعة ، بس يا ترى المطبعة مسوية مشكلة لو لا لو رحلوة لأن كان يعمل ، والله اني فقد الاتصال وياه بعد مارجع لبغداد

[حمودي ابن زيونه]

والله اخوية حمودي حسب علمي لزموه يشتغل بمطبعة ، بس يا ترى المطبعة مسوية مشكلة لو لا لو رحلوة لأن كان يعمل ، والله اني فقد الاتصال وياه بعد مارجع لبغداد

اي طبعا ممنوع العمل وانت لاجى يعني هما يلكون اي حجه علمود يخلصون منا