شمزعلك حبيبي ؟؟؟
ماقلت لي : يا ريتني
لمن قلت إنك إلي ؟؟؟
ما قلتلي :
ماكو أملْ
ماكو بحكايتنا بطلْ
غير الحزن بين الجملْ
حتى الغزلْ...
منك دموع ؟؟؟
شمزعلك ؟؟؟
ما قلتلك : بعد البكا ماكو رجوع
ما قلتلك :
حبك لهب وآني جمر
ما قلتلك : قلبي رهف
ما يحتمل منك كسر
وانت كسرته بالغدر
ما يلتصق هسه بعذر ْ
شمزعلك ؟؟؟
ما قلتلي مات الحنين
ما هزتك عشرة سنين
شغير احوالك
قلبها
جيتني عاشق حزين
متخيل بلحظة أسامح
انسى الخناجر بالقلب
أنسى المرار
شمزعلك ؟؟؟
انت اخترت...
وهسه ندم بالاختيار ؟؟؟
لا تحايلني بكلامك
ولو دمع شايف بعيني
ما تحسبه دمع الغرام
ابجي علي
مابجي عليك
قلبي كسرته بين اديك
شمزعلك ،لمن بدل ؟؟؟
انت بعت...
هسه زعلت ، لمن تركتك بالزعل ؟
بالله ما يسوى حبيبي
هذا نوع من "الخبل"
ماكو بحكايتنا بطلْ
غير الحزن بين الجملْ
حتى الغزلْ
منك دموع ؟؟؟
