شكد المدة بين مقابلة المحلفين وتحديد موعد السفر؟

[Manosa]

شلونكم اخواني وخواتي

عندي سؤال اريد من المجربين ومارين بهاي المراحل يفيدوني

عندي مقابلة يوم /12 هي المقابلة الثانية مالت المحلفين والاولى جانت بشهر الثامن
اريد اعرف شكد ورا مقابلة المحلفين يكون تحديد موعد السفر ؟
اني صراحة اريد اعرف علمود الواحد يعرف يدبر اموره ويتحضر لان اخاف فجاة يكولون يلا سفر

فأريد اعرف اكو احد يعرف تقريبا المدة ؟؟؟؟

واكون كلش شاكرة للي يجاوبون

اختكم
منوسا

[drlexa]

الاخت العزيزة منوسا..

هذي الشغله محد يعرفهه غير ربنا....عزيزتي ماكو قياس هي كلهه تعتمد عل الموافقة الامنيه والي كثير من الاعضاء ناطيهه اسم دلع (المهجومه)... اكو ناس جتيهم الموافقة الامنيه خلال شهر وسافرو واكو ناس من ال 2008 تنتظر. فاختي محد يدري بس انتي ان شاء الله بعد استلام الظرف(نتيجة المحلفين) كل فتره اتصلي بلمنظمه حتى تعرفين وين وصلت الشغله.

تمنياتي بلموفقيه وسرعة وصول الامنيه

اختكم من عمـــّـــان drlexa

[أبن خير]

الله يذكره بالخير أخونا الكبير ( أبو دجلة ) سماها ( المحروسة ) .. حقيقة لا أحد يستطيع
معرفة التوقيت الحقيقي لها .. هناك أمور لا يعلمها إلا الله .. أن شاء الله خير
ونتمنى أن تأتي المحروسة بأسرع وقت ممكن وتسافرين والكل يارب ..
تحياتي

أبن خير

[ابو خالد]

اهلا بيج اختي العزيزه منوسا ...

 ومثل ماجاوبتك اختنا الغاليه  drlexa يعني ماكو زمن محدد والتسهيل من رب العالمين ولله يسهل عليج بأقصر فتره الي هيه 3 شهور وانشالله تتيسر امرج وحظج حلو

[جورجيا]

عيني منوسا انشاء الله ربنا يسهلها عليج وميطول المحروسه مالتكم يعني الامنيه وتجيكم باسرع وقت ممكن لان هي الاول والاخير وهي الي اتخليهم يتصلون بيكم ويكولوكم حضروا الجنط سفركم حيكون بفلان يوم انشاء الله.
الي عليج كل فتره تتصلين بيهم وتسئليهم وين وصل ملفي ومن يكولولج انو وصلت المحروسه الامنيه حطي ابطنج بطيخه صيفي وحضري الجنط وهاي تبقى بيد الله اتوكلي عليه ولتفكرين.
جورجيا

[ام فائز]

اختنا منوسه الحقيقه مثل ما اتفضلوا كل الاخوات والاخوان ماكو مده محدده اقلها ثلاثه اشهر هذا الي كلش محظوظ
بس نصيحتي الج ان تنسين الموضوع يعني ما اتعلقين اي خطوه تخطيها بالموضوع لان راح تتعبين احنا النا حوالي عشر اشهر ننتظر الامنيه الي لان امنيه زوجي واصله من زمان والعشر اشهر هي بعد استلام الظرف من المحلفين
فكولي يا الله

[starxb]

بس ربنا يعلم اختنا منوسا بس هيه من 3 اشهر فما فوق  بعد وراج  استلام الضرف والفحص الطبي وتحديد الولايه والموافقه الامنيه وختم الملف والدوره التثقيفيه وتحديد موعد السفر . هاي كل الامور الي تجري على ملفج بعد مقابلت المحلفين او المحلف وبعض الاحيان ايكون تقديم وتئخير امر عن الثاني .واتمنالج اقرب وقت بئتمام كل هذه الامور البسيطه . بالتوفيق اختنا الغاليه.




                                                ابو مريم

[ريم عبد]

اختي منوسه
انت لتستعجلين على ترتيب امورج لان راح ينطوج وقت كلش كافي
بالنسبه النا احنا عائله وحدنا قسمونا كيسين
الكيس الاول بعد 3 اشهر من المحلفين حددولهم موعد سفر وهسه همه بامريكا
واحنا صارلنه 6 اشهر ننتضر الامنيه وبعد الحبل على الجرار الله اعلم شوكت تخلص
يعني ماكو قياس حتى العائله الوحده كل واحد معاملته شكل
واذا وصلت الامنيه يله تبدين اتحضرين نفسج واتصفين امورج
وان شاء الله التسهيل من رب العالمين

[عاشق تراب العراق]

طبعا اختي هذا من اصعب الاسئلة بحيث الواحد شكد ميفكر ميلكالة حل و ميفتهم همة شلون يشتغلون بيهة بس هية من 3 اشهر فما فوق و ان شاء الله تكونين مو من جماعة فما فوق مثلنة دخلنة بالشهر السابع من مقابلة المحلف و ليهسة ماكو شي