فيز شنكل او شنكن استفسار

[اسد النهرين]

السلام عليكم اخوتي

حبيت اسئلكم سؤال .. قبل كم يوم اجاني ولد صديق ببغداد وقال اكو شخص عنده فيز اصليه من نوع شنكل او شنكن وسعرها بسيط 1200$ بس بصراحه اني ما اعرف بيهن شلون اعرف مزورات او اصليه وهو يقول ينطيها الي فارغه واني امليها بأسمي ومعلوماتي .... اكو هيجي شي اذا احد يعرف بيهن او يعرف طريقة التأكد منهن ولو زحمة عليكم ...

طبعا اني قبل اسبوع قدمت على الملكية الاردنيه علمود فيزا وابشركم اليوم اجاني الرفض وما اعرف شسوي

شكرا

[جاوين اهلنة]

غالبا ماكو هيجي شي , الفيز الاصلية تطلع بالاسم ومن السفارة , وبعدين هسج سعر ماكو ب 1200 دولار !!! اذا هي فيزة مصر صايرة ب 3000 الاف دولار , اخوية لاتتورط بهاي الشغلة لان تروح عليك فلوسك , الفيز الاصلية تبدي من 13 الف الى 15 الف دولار للشخص الواحد وهم مو كولها مضبوطة مية بالمية حسب الشخص الي تتعامل معا , رغم هذا لاتتورط باي فيز شنكن الى اذا تاخذ الفيزة وتتاكد منها من السفارة يالله تنطي الفلوس واني داقصد الفيز الي تبدي من 13 الة 15 الف دولار.

تحياتي الك اخوية وبالتوفيق ان شاء الله ...

[ابو الحسن]

عمي السلام عليكم
عمي لاتورط حالك
هاي لو الفيزة ب12 ورقة جان لكيت كل جماعتنا باوربا
عمي من جنا بسوريا قبل كم سنة  جانو جماعتنا يسولفون على هاي الفيزة ينطوك لزكة وانته الزكها بجوازك
عمي هنا من مطار ماليزيا فيزة صحيحة وياخرون االجواز العراقي كم ساعة الى ان يخابرون السفارة المصدرة الفيزة صحيح هاي صادرة منكم لو لا
وخصم الكلام هاي ماتوكل خبز عمي
الله يسهل عليكم وعلينا وعلى كل العراقيين ومانحتاج لافيزة ولا تهريب ولادوخة الراس
ابو الحسن - ماليزيا

[اسد النهرين]

شكرا الك اخوية العزيز على المعلومات .... زين هو هم قال تأكد منها بالسفارة ... زين اذا رحت للسفارة وطلعت مزوره توكع براسي لو شنو الاجراء ؟؟؟ ياريت تفيدوني اخوتي والله حالتي صعبه كلش بس اريد اطلع لتبخلون علي بالمعلومات

[عبد العولمه]

تحياتي
الفيزا هي شنكن و لكي تتأكد هناك فورما كاملة يجب ملئها يعني استمارة تقديم  ووعلى كل حال عدد السفارات التي تمنحها في العراق محدودة وممكن تقديم الطلب بنفسك واستلام الفيزا بنفسك وقد يكون الامر صحيح جزئيا اي تكون فيزة اوربية بس مو شنكن يعني  لبيلاروسيا  يعني روسيا البيضاء....اغلب الظن موضوع به نصب وخداع وبالمناسبة رسوم الفيزة الفعلية لا تتجاوز 60 يورو  لكنها ليست لنا...تحياتي وخذ حذرك.

[Baghdady73]

اخي العزيز...مع الاسف اكو نفسيات تعبانة جدا بحيث ايصورون الامور بهالشكل البسيط والساذج..الفيزا هي شنكن وتشمل فيزة دخول 23 دولة اوروبية ضمن فيزا واحدة وهذي اتحصل عليهة بواسطة اخذ نسخة الطلب من احد السفارات الاوروبية المانحة للشنغن وتعبئة الطلب بالمعلومات المطلوبة وتسليمه الى السفارة مع مبلغ يعادل 40 دولار غير مرجع سيتم طلب كشف حساب مصرفي لاخر 6 اشهر بالاضافة الى سند ملكية والدخل الشهري والعنوان الوظيفي ويرسل الطلب الى بروكسل حيث المفوضية الاوروبية وياتي الرد خلال فترة 2-3 اسابيع ..هذي بالنسبة للاجراءات حتى تعرف الشخص اللي اجاك شلون نصاب..مثلما تفضل الاخوان الحصول على هذه الفيزا صعب جدا وسعرها من جهة مضمونة لا يقل عن 12000 دولار

بغدادي

[koka75]

اخوية العزيز اولا ماكو هيجي شي لاتتورط بهيجي سالفة هاي مزورة مية بالمية لان ابن خالي سواها وحاول يطلع بيها من مصر ونلزم بمطار القاهرة ورجعوه الى العراق العضيم وطلع بفيزة اصلية وراها الى لندن ومازال موجود في لندن منذ ثلاث سنوات اما عن الفيزا الشنكن فهي موجودة ومن العراق العضيم عن طريق سفارة فرنسا وسفارة ايطاليا وبسعر 12000 الف دولار  ومتندفع الفلوس الا بعد ان تحصل عالفيزا ونصيحة من اخوووك ابد ابد لاتدفع شي مقدما علهيجي شي والفيزا اذا متدخل برجليك للسفارة وتستلمها من السفارة فمعناها تزوير
اخووك ابو محمود