الله يخليكم ساعدوني لان المحلف رفضني

[ابو وسن العاني]

السلام عليكم اني منتسب جديد لهذا المندى الجميل والي عرفني عليه بعض الاصدقاء وكالولي انشالله ميقصرون وياك  واتمنى هذا الشي واهنيك على الانجاز الرائع الي بالمنتدى ..... اني مشكلتي انو سويت اعادة للمحلف من عمان يوم 15 _11 وطبعا اني كانت عندي محكومية بالعراق مدة سنة بسجن ابو غريب  وهذا كان ابسنة 2000  المهم مااطولهة اني هذا الشي ابصراحة مكلتة بالمقابلات لان خفت ليجيني رفض من ورة المحكومية مالتي  وطبعا من رحت للمقابلة طلبني وحدي وكلي انت عندك محكومية بالعراق كتلة لا ماعندي واصريت على هذا الشي لان خفت اذا اعترفلة   راح اطلع كذاب  ابصراحة ضليت متمسك ابرائي ومعترفت   وبالحقيقة كلش كنت خايف وهو ضل يلح وياية وكلي اكتشفنة انو عندك محكومية بالعراق  وانتهت المقابلة واجاني الرفض   اليوم خابروني وكالو المحلف رفض  زين اشلون اني هسة شسوي مااعرف اللله يخليكم ساعدوني    اذا اقدم استئناف شراح اكول بيه   وزين تتوقعون اذا اعترف يكون ابصالحي لو لا  اللله يخليكم اني بانتضار اجاباتكم على احر من الجمر

[بغداد بقلبي]

السلام عليكم اخي الغالي انته يعني ابدا ماذاكر انك كنت مسجون اب سنه 2000 باليو ان او بالمقابله التانيه لان الي اعرفه انو الملفات مال كل العراق  احتركت وزذبوها بالزباله امنين هو عرف المهم انته تكدر تستانف وتكول انك مريض وتاخذ ادويه وهاي الادويه سببتلك ضعف بالذاكره وتروح لطبيب وتاخذ تقرير طبي بين قوسين اعتراف منك بالحقيقه بس بطريقه مسكينه او طريق اخر بس لاتكول انك انكرت والله كريم لاتضوج بس اذا امكن تذكر النا انته باي بلد حاليا وهل تقديمك مباشر او عن طريق اليو ان والله ولي التوفيق

[أ.ج.ت]

الله يساعدك والله حاسس بيك وان شاء الله تفرج عليك وعلى كل العراقيين بصراحة اني مااعرف اجاوب على موضوعك بس لان كلش اثر بيه حبت اكتبلك وادعيلك بالفرج ويارب يفرج عنك غمك وهمك.

[عكعك التطوى]

اخويه انته باي بلد ؟؟؟

والله يا اخي هيجي شغلات ماكان المفروض تخفيها لان الملفات كلها عدهم وكان اكو ولد اعرفه نفس شغلتك كان محكوم اسبوع بالامن وطلع  سنه 1979 (تسعه وسبعين) بشغله كيديه اتهمو بحزب الدعوه وهو  من الاخوه المسيح وبالمقابلات مذاكرها وبمقابله المحلفين كله بيها المحلف وانرفض لان همه بصراحه يقدرون الصراحه بس هم مو دائما تفيد وياهم بس بعد ميفيد الحجي بس واحد من حركه قلبه يحجي اخويه حاول تشوفلك محامي باليو ان وتاخذ رايه وشوف راي الاخوه واتمنالك التوفيق والفرج

تحياتي

[abo abo]

لسلام عليكم اخوية والله شغلة تقهر بس ولله لو حاجي وية المحلف بصراحة وشارحلة حالتك بصورة يكون هوة يتعاطف بية وياك احسن من السويتة لان همة كلشي يعرفون وهاي شغلة مو سهلة همة اهمشي عدهم الصراحة وعدم الكذب لان لو حاجي الصراحة جان احتمال اجاك قيد الدراسة الى ان يتاكدون هاي بعد ميفيد الحجي دز ايميل الهم واشرح ضرفك بس احجي الصح احسن بلكت يرجعون يدرسون فايلك بس انت تكول قابلت 15 -11 شبسرعة اخذت نتيجة المحلف غير بعد شهر فهمنة الله يخليك شكرااااااا والله يسهل امرك

[ابو وسن العاني]

اولا اشكركم جزيل الشكر واني امقدم من عمان بس قبل السجن كنت متوقف واني هذا الشي ذكرتة وكلت اتوقفت بس موضوع السجن مجبت طاريه زين شنو يعني افقد الامل شون والله مفتهمت  واني بالنسبة الي مو من اليو ان  بل كان مباش على اي  او  ام  

[ابو وسن العاني]

بالنسبة للرد من الاخ abo abo اني هاي جانت اعادة للمحلف وصار تقريبا 10 ايام اليوم يلة انطوني خبر  زين بس كولولي يعني افقد الامل لو شلون

[untitled.man]

اخي العزيز ابو وسن...

من خلال معرفتنه للامريكان وتعاملهم انه صراحة الشخص هي اهم معيار.
لذلك، ومثل ما تعرف الحقيقة مره وتوجع، اني انصحك انه فكرة اللجوء تنساها، وخصوصا امريكا، لانه مهما راح تحاول راح تكون هذه نقطة سلبيه بفايلك، وتعرف فايلك من يوكع بيد الامريكان ماراح يضيع حتى لو بعد 100 سنه.

الله يساعدك على هاي المحنه اللي وكعت نفسك بيهه...

تحياتي

[ال رداد]

الاخ العزيز مشكلتك سهلا ارسل لي ايميلك وانا اجاوبك وادليك الطريق الصحيح  تحياتي للجميع

[cooliraqi80]

اخوان مو دمرتوه للرجال اخويا العاني لاتتندم حتى لو كلت الصراحة اكييييد ماراح يقبلوك يمعود مو كلنا الصراحة وشفنا يعني جان يحطوك قيد الدراسة ماتعرف كم سنة وبالاخير احتمال رفض روح على محامي واشرحلة وضعك علمود تسرع بالتحويل على دولة لخ ترى هذولة احسن صار وياك هيجي لان مالت اميركا ياتصير نكرة سلف او تحول احسنلك

[عراقي وراسي مرفوع]

السلام عليكم

اخوية ابو وسن العاني الطيب

اخوية هية جتي من صالحك لين امريكا هسة صفر لا مستقبل ولا اي شي بلد فاشل من كل شي
صدك اني بسوريا وبيت كرايبي سافرو لامركا صدك ايحلفون انو سوريا احسن بكل شي وهم نادمين حيل
وعلى فكرة مو بس كرايبي تقريبا كل العراقيين راحو هسة الى لامريكا ادبهدلو
ونشاء الله ايحولوك الدولة احسن مثل كندا او اوربا او استراليا
اتذكر هاي من صالحك اجتي الله سبحانه وتعالى ميريدك تدبهدل
والله ميسد باب اذا ميفتح باب احسن

تقبل تحياتي

[المهاجر الجديد]

اخي العزيز ابو وسن برائي تقدم استئناف وتكوللهم الحقيقه والصراحه   بس همه شلون عرفو بمحكوميتك اذا انت  ماكايللهم عليها  بس لازم  انت ذاكرها ترى همه  مو هيج  كل شي يعرفوه  المهم اخويه  انت كللهم اني جماعه  حذروني وخوفوني من اذكر  قصه السجن وكللولي ترى تنرفض اذا كتلهم وبعدين انت مذكرتها ونكرتها  وماكدرت  تقول الحقيقه  وحاول اقناع المحلف  والامر متروك الك اخويه وانت صاحب الشان وبكيفك  واتمنالك  التوفيق  والقبول انشاء الله   الله يسهل    امرك                                                                                                                                                                                                                                                                                                                                                                                                                                                                                                                                                                                                                                                             ابو حارث

[ام عبداللة العراقية]

كل عام وانت بالف خير اخويه
الله ان شاءالله يفرجه عليك ويسهل امرك
وان شاءالله تمر شغلتك على خير
                                             اااااااااااااااااااااااااااامين
                                                    يا
                                               رب العالمين

[ابو وسن العاني]

اشكر الجميع على الردود الطيبة والله يوفقكم ويسهل اموركم واني اشوف ورة العيد احاول اشوف محامي مختص بالهجرة وانشالله يصير خير  بس والله يابة اتاكدت هذولة الامريكان ماكو شي ينضم عليهم واعتقد من خلال البصمة عرفو انو عندي محكومية لان متقبل غلط ماكو غير هة

[الحياوي]

اخويه يعني انته ما امقدم علئ اليو ان
لو تم تحويلك من اليو ان
اذا تم تحويلك
سوف تتم اعادة توطينك  مره ثانبيه
واذا مقدم مباشره
 الئ اي او ام
يمكن ان تطلب محامي من قسم التوطين وتساله انو هل بستطاعتك التقديم علئ اليو ان
وهاي مساله عاديه
وعسئ ان تكرهو شيا وهو خير لكم

[عاشق تراب العراق]

و اله يا اخوية الله يكون بعونك و فعلا مو دائما قول الحقيقة يفيد وياهم بس لو محاول تطرح موضوع المحكومية باسلوب تخلي المحلف يتعاطف وياك اعتقد كان احسن بس مثل مكالو الاخوة حاول تستشير محامي هجرة  ,زين انت اخوية بالاردن اكيد مقدم على اليو ان حاول هم تلكة فد منفذ عن طريق اليو ان و الله يوفقك