سؤال من فضلكم ؟ يتعلق بنوع الفحص الطبي

[sattory]

السادة والسيدات الكرام

ارجو من يمتلك معلومات عن الفحص الطبي ان يساعدني

لانني عندي موعد يوم الخميس المقبل في بغداد ابن البيطار

المستسمكات المطلوبة ونوع الفحص وطريق الدخول الى اين البيطار لانني من محافظة اربيل

وشكرا مقدما على تعاونكم وجزاكم الله خير جزاء

مع تحياتي وتقديري للجميع

[ريم عبد]

اخويه العزيز sattory
انت بس تاخذ وياك هويتك او جوازك
ممطلوب منك شي لان فايلك موجود يمهم
اذا متندل المستشفى هيه بالصالحيه يم الكراج مالت العلاوي والمدخل الوحيد من جهة الصالحيه
اول يوم اتروح ياخذون منك دم للتحليل مالت الايدز وفحص بصر وضغط فقط
ايدزوك العصر للحارثيه لمختبر ابن البيطار ياخذولك اشعه
ينطوك موعد وره يومين حتى تضهر نتائج الفحوص مالت اليوم الاول
وايسولك فحص سريري اله هوه بس اسائله عن حالتك الصحيه واذا عندك اي تقارير طبيه تاخذها وياك وحتى اذا تتناول ادويه هم تاخذها وتنطيهم نبذه عن تاريخك الطبي
يعني اذا جاي من محافضات احسب حسابك اتطول الشغله فد 3 ايام
وياربي ايسهل عليك

[ام فائز]

اخونا اني اشوف اتروح البغداد قبل ابيوم وتبات ابغداد حتى ما تاخر عن موعد الفحص

[ammarbattal]

السلام عليكم .... اخي انا في سوريا بس ردت اضضيفلك معلومه على الفحوصات الطبية انها جدا سهله وما اطول وعلما انا سويت كل الفحوصات خلال ساعتين في الشام رغم في ثلاث مناطق ........... وعندي استفسار شون التقديم من العراق للتوطين

اخوووك عمار

[ريم عبد]

اخي عمار
اول شرط اتكون مشتغل مع الامريكان
اذا اتوفر بيك هذا الشرط
انكملك طريقة التقديم
اختك ريم

[ammarbattal]

انا في سوريا ودقابل حاليا في السفاره الكنيدية بس ردت استفسر عن تقديم التوطين من العراق لان بيت اختي عايشين بالعراق لكن همه ما عندهم عذر غير الوضع الامني يعني ما مشتغلين مع الامريكان ولا اي شي ثاني ... عمارر

[ريم عبد]

اخي عمار
التقديم من العراق يشمل بس العاملين مع القوات الامريكيه
ولا يشمل اللجوء الانساني

[sattory]

الاخت الفاضلة ريم العبد
الاخت الفاضلة ام فائز
الاخ الكريم عمار

اشكركم كثيرا وربي يحفظكم وينور خطاكم

سؤال الى الاخت العزيزة ريم الموقع بالنسبة الى مختبر اشعة ابن البيطار ؟؟؟ اقرب نقطة دالة ؟؟؟ ماهي
  2- هل استلم النتيجة ضروري بقائي بعد 3 ايام  او بالبريد ؟؟

شكرا جزيى لك وتقبلي فائق الاحترام

[ريم عبد]

اخي sattory
المختبر بالحارثيه اول متدخل للحارثيه اكو سيطره بالبدايه هيه يمها يعني من تدخل من جهة معرض بغداد الدولي هيه راسا اتصير على جهة اليمين واذا تسال الكل ايدلوك بس هيه متييه

اما بالنسبه للنتيجه هيه مو الك من تطلع النتيجه بعد يومين ايرجعوها للطبيب المختص
يعني انت اذا اتروح الخميس راح ايكولوك راجعنا يوم الاحد حتى توصلهم النتائج مالت الخميس وايسوولك الفحص السريري
نتائج الفحوصات انت متستلمها ولا تلزمها بايدك هيه تنحط بالملف مالتك ومتنفتح الا بامريكا عند المنظمه
والله ايسهل امرك

[Abo Andrew]

انا في سوريا ودقابل حاليا في السفاره الكنيدية بس ردت استفسر عن تقديم التوطين من العراق لان بيت اختي عايشين بالعراق لكن همه ما عندهم عذر غير الوضع الامني يعني ما مشتغلين مع الامريكان ولا اي شي ثاني ... عمارر

التقديم من العراق

http://arabic.iraq.usembassy.gov/refugee_office4.html

http://arabic.iraq.usembassy.gov/root/pdfs/refugee-factsheet_instructions_-july2008---arabic.pdf