سلام محبة و بعد الى جميع اعضاء المنتدى
اني من جماعة المحلفين الشهر 6 في مصر و كان موعد سفري اني و عائلتي يوم 23 - 11 الى ولاية كاليفورنيا
احب ابتدي الموضوع من صباح يوم 22: رحنا الى المنظمة و دخلنا بيدينا بطاقات الصليب الاحمر و وقعنا على بعض الاوراق مال تذاكر السفر و تعتبر مثل تعهد اننا راح ندفعها فيما بعد و كال تجون الساعة 1 منتصف الليل للمطار صالة رقم 3, و رجعنا و بدينا بالتحضيرات الاخيرة و احنا كنا قلقين من ناحية الاوزان لان قسم منهم كان اكثر من 26 كيلو بس كنا حاطين بعض الاغراض الغير ضرورية لي فوك حتى اذا تنحسوا نشيلهم و نذبهم
رحنا للمطار شوية من وقت خوفا من حصول ازدحامات او تنسد الشوارع بس وصلنا قبل الموعد
بعدين اجه موظف المنظمة و بدا يوزع التذاكر و الاكياس مال اي او ام و بدينا ندخل واحد ورة الثاني على الاوزان و التفتيشات
بصراحة كان اكو ناس اوزانهم اقل من عدنا يعني 25 و تنحسوا وياهم لانهم كانو دا يتكلمون وية موظف الوزن بصورة غير لائقة فبالتالي الموظف اكيد راح يعاند و ماراح يدخل الجنطة
والله اشو احنا خفنا و كلنا انلاصت و اجه دورنا, طلعت جنطة 24 و 3 جنط 26 و اربع جنط 28 فالمجموع 8 جنط لان احنا اربع نفرات
بدينا نحجي وياه بصورة العيني و الاغاتي و يالله و مشيها و هاي كل اغراضنا ماعدنا غيرها الخ
والله اشو كال يالله جيبوهم, الحمد لله عبرت هاي المشكلة
بعدين اجينا على الجوزات و ختمولنا المغادرة و رحنا على البوابة مال الطائرة الي هيه lufthansa و شوية تاخرت على موعد الاقلاع لان مكتوب انها تطير 4:30 و هيه طارت 4:50 دقيقة الصبح بس الشي الغريب انه احنا الاربع نفرات كلنا متفرقين يعني كل واحد كاعد مقعد وحده بس مو مشكلة المهم وصلنا الى مطار فرانكفورت المانيا بعد 4 ساعات ونص و ما احجيلكم عنه لان شي خرافي و شي عملاق
استقبلنا موظف من اي او ام و كام يوجهنا على البوابة الثانية مال الطيارة الي تروح ميامي فلوريدا
بس ما احجيلكم شكد مشينا يعني كل الرحلة كوم و المشي ال مشيناه كوم ثاني اضافة الى الهاند باك و الابتوبات يعني وزن على الاكتاف فكان متعب
المهم وصلنا الى الطائرة كانت عملاقة بوينغ 747 المهم طارت على الموعد زين و استغرق الوقت 9 ساعات و نص بس كانت هلاك و تعب
المهم وصلنا مطار ميامي فلوريدا و كان الاخر بعد اروع و اكبر و كانت بالاستقبال همين موظفة من اي او ام و اخذتنا الى الجوازات و انطونا بادجات مكتوب عليها كل التفاصيل مال الرحلة و الاسم و الكيس الخ
المهم خلصنا شوية اجراءات بعد تقريبا 4 ساعات و بدينا كل مجموعة تروح الى الطيارة مالتها و تفرقنا و اكو قسم منهم باتو ليلة لان ما كان اكو طيارة هذاك اليوم
المهم اجتي مندوبة من الاي او ام ويانة كمرافقة و اخذتنا الى مكان الجنط و اخذناهم الى الجمارك و بعدين مشينا ما يقارب ساعة بس مشي حتى نوصل مكان شحن الجنط, المهم انطينا الجنط مرة ثانية حتى تنشحن داخلي و اخذنا الهاند باك و الباقيين و مشينا ما يقارب نصف ساعة حتى نوصل الى البوابة الطائرة الي تروح لوس انجلس
وصلنا الطائرة هلكانين من المشي و الجنط و بعدين سابتنا الموظفة يم باب الطيارة و احنا طرنا تقريبا 2 ساعة و نص و وصلنا الى مطار لوس انجلس الدولي و بصراحة احنا كنا تايهن و ما دا نعرف بس بصراحة الموضفين و الشرطة بالمطار دائما في الخدمة يعني لازم يساعدون الواحد حتى يوصل الى النتيجة المهم دلونا على مكان الجنط و الخروج و بعدين شفنا الكفيل مالتنا بالاستقبال الحمد لله و اخذنا يمه الى ان نلاقي شقة او بيت
الي اريد اكوله انه الرحلة موفقة كانت و ناجحة و ما بيها اي عراقيل و ما ضجنا ابد الحمد لله
اتمنى من الله ان يفرجها على اللي دا ينتظر موعد سفر و ان شاء الله تكون سفرته ناجحة و مريحة باذن الله
و اي سؤال اني حاضر و بالخدمة
و كل عام و انتم بالف خير
اخوكم م ن ج
