شنو اخبار ال IOM و ال SIV

[echo 9]

السلام عليكم اخواتي واخواني الطيبين
اخوان رجاءا شنو اخبار البرنامجين الممتعين IOM واخوه البرنامج SIV
انا قدمت على الاي او ام بشهر التاسع 2009 ولحد هسه بطرك ال IZ NUMBER داعتكم لا مقابلة ولا اتصال لهسه بس اول رسالة منهم البيها الرقم ما الحالة وبيها ملاحظة تكول اذا حضرتي مستعجل كلش وما عاجبني انتظر وعندي خدمة سنة مع الامريكا يمكن لحضرتي انه اقدم على الاس اي في ؟؟؟؟
انا اخذت بنصيحتهم ولانه حضرتي مستعجل على الخروج من هاي جهنم الحمره وعندي خدمة اكثر من سنة ولازلت اعمل فقدمت على الاس اي في لانه كلش مستعجل المهم قدمت على الاس اي في بشهر العاشر 2009 ولحد هاي اللحظة كل شي ماكو منهم لا حس ولاخبر ولا جفية ولا حامض حلو ولا شربت بس يا الله نقص بالفورم ووين كنت من تاريخ كذا لتاريخ كذا والبنت اللي تزوجت بيا تاريخ وطلعها من الحالة وهاي لا وين الله اعلم ؟؟؟؟
المهم رحمات لوالديكم اذا اكو احد منكم مقدم على البرنامجين بنفس تواريخ تقديمي او قريب منها لا يقصر بالاجابة اذا مقابل لو لا وخصوصا حبيبي اخوية ريفولفر لانه اللي افتهمته انه لهسه ما مقابل ؟؟؟؟
ارجو الرد ربي يسعدكم
اخوكم
echo 9

[Revolver]

حبيبي, واخوية ايكو العزيز الغالي,

بلبداية احب اكولك, كل عام وانت بألف خير, واسعد الله ايامك انت والعائلة الكريم الله يحفظها ويحميها ويحرسها ويعافيها, واتمنالكم السعادة والطمئنينة وربي يفرج همكم ومتشوفون غير الخير والبركة .


احب اكلك ياحبيبي انو اني قدمت يوم : Thu, 10/1/09 بلضبط, واحد اكتوبر ... ولحد هاي اللحظة ممستلم الكوم ابروفل, لحد الان الجنرال الي ديشتغلي بلسالفة مالتي ديتلاطم وية الـ SIV UNIT TEAM LEADER  وانت اتخيل ليوين موصلها, اخر شي راح يدكولي منع هههههههه, لأن ماكو ايميل اذا ماهاجهم بيهة, فعادي عُمري هية تاخذ وقت هواية فلتنزعج ولتضوج, انت كل اسبوعين دزلهم ايميل كللهم شنو الابديت الي بخصوص الكيس مالتي وان شاء الله يجاوبوك .

اما بلنسبة للـ اي او ام فتعذرني اخوية العزيز ترة كلشي ماعرف .

اخوك ريفولفر

[echo 9]

شكرا اخوية الغالي ريفولفر
ربي يحفظك ويرعاك
كل عام وانت بخير وسلامة ويعيده عليك ان شاء الله تعالى بالامان والصحة والعافية
عمي انت تاج عالراس باخلاقك وقيمك ومبادئك والاواحد صدك يتشرف من يكون له اخ مثلك والله ما تتاخر بالرد وهاي عوايدك مو غريبة عليك ريفو الوردة
ربي يسهل امرك وامرنا وامر الجميع وانا والله مو ضايج بس متحسف على شغلة وحدة ريفو انه ما اشتغلت ويا الاستراليين كان انا هسه اتلعبط بسيدني ومفتك من دوخة الريكومنديشن والفورم 157 وداعتك الله يرزقهم جماعتي الراحوا ويا الاستراليين تلكوهم ببهبهانات سود من باب القاعدة لباب الطيارة لا اس اي في ولا اي او ام . هيه هاي المتحسف عليها وبس
ربي يسهل امورك وان شاء الله مقبول والابواب كلها مفتوحة بوجهك وما تسمع كلمة منع طول العمر يا رب

[ريم عبد]

اخونا العزيز
اخي ريفولفر حجالك على ال اس اي في واني احجيلك على ال اي او ام
اني قدمت من شهر السابع وهسه يله حصلت الاي زيد نمبر ومكييييييييييييفه لان حصلت رقم
وشغلة المقابله اصلا ولا اتوقعها قبل شهر شباط الجاي
وكلولك خلي اعصابك بثلاجه بس اشو ثلاجتكم كلسى الا مايعه
 وهاي احنا بعدنا بالشته لعد من يجي الصيف شلووووووووووووووون يبووووووو
عمي صبر زائد صبر وخلي عليها صبر وبس الله ايصبرنا
احسن وصفه اتعوفها وخليهم همه ايركضون وراك

وياربي ايسهلها عليك وعلينا وعلى كل الصابرين

[echo 9]

تسلميلي اخت ريم ربي يحفج ويرعاج
والله يا اختي العزيزة الاعصاب لحد هاي اللحظة بالثلاجة بس انتي تعرفين انا بالعراق مو بغير بلد والكهرباء ما مخلية شي بالثلاجة الا وخرب من وراها ها اجت ها راحت وابو المولدة الله يحفظه ما مقصر ويانا يشغل خمسة ويطفي عشرة وشكر بالكمية ما كو فمنين نجيب اعصاب ...
انا اللي صدك مدوخني ليش اللي يطلع من العراق للاردن او تركيا شغلته ما تطول ومو اس اي في لا بعد على اليو ان واحنا لطمنا وياهم وتحملنا رزالتهم طبعا مو كلهم وخطر دوريات وها ولك بالك عبوة وعمي خللي بالك من القناص وهيج يجازونا والله هاي اللي مدوختني
وداعتكم تجيني لحظات اريد ادز لهم ايميل تسفيل بحضراتهم وعندي الامكانية اروح لاستراليا لو للندن بدفتر ونص ومستعد احاول عشر مرات لما اوصل بس الكاظني الجهال ما اكدر على فراقهم اولا وثانيا اخاف اخرب على الاخوان الباقين اللي مقدمين اس اي في واي او ام والا والله انا حوصلتي كلش صغيرة وما اتحمل ...
هسه لو مخلينهم على الكات 2 يسمطون بيهم ب العالية مو احسن ... بس شنو نسوي امرنا لله الواحد القهار نتحملهم بلكي يحسون بينا
على العموم شكرا للرد وربي يسهل اموركم ونخلص من هاي الدوخة
echo 9

[osama5477]

اني قدمت من شهر السابع 2009 ولحد الان كوم ابروفل ماكو ، وعندي ابن خالتي مترجم وقدم شهر الخامس ولحد الان ماكو الكوم ابروفل ، من اندزلهم ايميل ايجاوبون ورة 4 ايام الى اسبوع واخر ايميل كالولي انه كل الاوراق الي يحتاجوه على مود الكوم ابروفل كملت وهسه الملف يم السفارة الامريكية في بغداد للمراجة هاي الحجي قبل اسبوعين ولسا ماكو شي بالنسبة للاي او ام اني قجمت بشهر 9-2008 وبعدين من شفت شغلة بغداد سكتة كلتلهم حولولي الكيس الى عمان ، وبالفعل حولوني الى عمان وساعدوني بالحصول على الفيزا للدخول الى عمان ( الفيزا كانت عن طريق ال IOM) الى وللعائلة ، كملنة المقابلات كله خلال ثلاثة اشهر واستلمت نتيجة المحلف بالمافقة في يوم 5-9-2009 وهاي راح ايصير ثلاثة اشهر بأنتضار الموافقة الامنية ، والله كريم

[echo 9]

شكرا اخوية العزيز osama5477 على الرد والمعلومات القيمة
اخي العزيز يا ريت تكول لي اشلون طريقة الحصول على الفيزا لعمان عن طريق الاي او ام على مو انقل حالتي للاردن انا وعائلتي علما انه عددنا 10 اشخاص انا والمدام والجهال
اكون منك ممنون
ربي يحفظك ويسهل امرك وتسمع بشارة حلوة بالقريب العاجل يا رب
Echo 9

[ابو عبد الله التكساسي]

السلام عليكم اخوان
شلون لمه حلوه
الله يحفضكم ويرعاكم
ريم عبد ايكو 9
ريفولفر
والله يا اخوان الموضوع جان يطول اسبوعين بالزايد بالنسبه للجيف اوف مشن ابروفل
وراها من نبراسكا الى نيو هامشير الى السفاره في بغداد بالزايد بالزايد اسبوعين

وراها المقابله والفحص والفيزه اتطول تقريبا سبوع
اكثر التاخير ايصير بين المقابله والفيزا سنتر يطول حوالي شهر الى شهرين


الله يساعدكم اخوان وينطيكم الصبر على هاي الشده

تحياتي للجميع

[echo 9]

كل عام وانت بخير حبيبنا واخونا ابو عبودي التكساسي
عمري لا تنسانا بدعائك ربي يبارك بيك ولا يحرمنا من هاي اللمة الحلوة اخوة واخوات سواءا بالمنتدى او خارج نطاق المنتدى ما النا غير بعض
ربي يحفظك ويرعاك

[osama5477]

عمري ايكو اني طلبت من الاي او ام بغداد ان انقل الكيس مالتي الى عمان الاردن ، وراه اجاني ايميل من ال IOM بعمان كالوا انته تريد تنقل الكيس مالتك ، كلتلهم نعم واريد مساعدة بالحصول على الفيزا لأن اني قدمت واجاني رفض ، ليعني انته لازم تكون مقدم وجايك رفض ياله ايساعدوك ويسون الفيزا وبالفعل بعد شهرين سولي الفيزا ، واي معلومات تحتاجه اني جاهز

[ريم عبد]

بعد اذنك اخويه اسامه
بس تعقيب زغير
يحق لاي واحد في بغداد ايقدم وينقل فايله من بغداد الى عمان اذا راد ايسرع يعني اذا مرفوض او غير مرفوض

بس عمي echo 9 الله ايخليك اذا انت ابغداد والحمد لله كاعد ابيتك وشغلك لازال ماشي واولادك مدارسهم ماشيه ومستقرين واعصابك موعت الثلاجه ومبردت ويوميه زهكان وشاعل ابو ابوهم
زين اذا اخذت الجوقه الموسيقيه كلها وحصرتهم بعمان وماعدهم شي ايسوواا بس الانتضار لاشغل ولا مدارس ولا راتب ماشي بالعكس صرف وبس
 واذا اتسرعت المعامله بالبدايه فهيه بالنهايه هم توكف على الامنيه وهاي محد ايسرعها لا عمان ولا تركيا ولا غيرهم
استهدي بالرحماااان واحسبها زين قبل متتورط بقرار متسرع وانت حملك ثكيل لو وحدك جان مو مشكله
والنتيجه هيه كلها مابيها قانون لا التسريع ولا التاخير
يعني افتر على الجمعيات شوف هم كلهم من عمان وسوريا وتركيا
واكو واحد قدم بشهر الرابع  من بغداد وهسه سافر
يعني كلها بايد الله وان شاء الله ايسهل عليكم وايريح بالكم
اتقبل مروري وردي وعسى ميكون راي ايضوجك بس اني احب سوالفك ويعجبني ارد عليك

[silver_d]

في بديايه الكلام احب انو اكوول كل عام والاسلام بألف خير وانشالله ينعاد عليكوم بالافراح ... وشهر ميلاد مجيد على كل المسيحيين في العالم تحت رايه الصليب ..

اخواني الاعزاء اني اعمل كمترجم في احدى القواعد الامريكيه وقدمت على الا اس اي في .. وراح اذكر التواريخ الكوم اعلاه .
شهر الثامن -07-2009-ارسال الاوراق على ان في سي لاستحصال كوم ابروفل .
شهر العاشر-05-2009-استلمت الكوم ابروفل من السفاره
شهر العاشر-06-2009-دزيت اوراقي الى نبراسكا عن طريق البريد العسكري الامريكي .
وفي يوم 13-11-2009-استلمت الكيس نمبر .
وفي يووم 25-11-دزيت اوراق المطلوبه مني دي اس  230-234-الى مركز الفيزا الوطني ..
والصبر مفتاح الفرج .اي سؤال اني حاضر

اخوكوم سلفر