العراقيين في سورية

[عراق للأبد]

مرحبا

هااي اول مشاركة في المنتدي و اتمني أتواصل و ما تكون اخر مشاركة الي...

يارب تتواصلون ويايه و توصلوني الي حل و محتاج مشاركتكم و مساعدتكم يا اهل الخبرة....

اني هسه حاليا ساكن بلعراق و اريد اجي لسورية و اقدم علي الامم المتحدة و اريد اسئلكم شلون اقدم علي سورية و بلنسبة للاقامة بسورية شنو اجرائاتهم و شكد مدة الاقامة و يمددون الاقامة لو لازم ارجع للعراق و ادخل مرة اخري...؟

بصراحة قبل سنتين نويت اروح لسورية و بوقتا انسدت الحدود اذا تذكرون و ما سمحوا للعراقيين يدخلون سورية و اني من وقتها بعد ما حاولت ادخل و التهيت بشغلي بس هسه نويت اروح لسورية و أقدم علي الامم المتجدة و اطلب لجوء لان وضعي هنا كلش تعبان من ناحية نفسية و الاوضاع الحالية ..

بس اريد منكم شوي معلومات حول الفيزا و المدة و معلومات حول الاقامة و من اوصل سورية وين لازم اقدم علي لجوء و شنو اجرائاتهم يارب تفيدوني و ما انساكم بلدعاء ....


منتظر ردودكم علي احر من الجمر ... شكرااا

[القرش الاسود]

اخي العزيز اولا اذا كان عندك اطفال بالمدرس فتستطيع ان تاخذ اقامة على ضوء الاطفال بس كل ثلاثة اشهر اتراجع دائرة الاقامة السورية للتجديد وبالنسبة لليوان اكيد انت تعرف اهويه عراقيين في سوريا وعندهم زخم كبير وهوايه ناس اتاخروا في سوريا مو مثل الاردن اهنه الاجراءات اسرع واحسن بس غلاء المعيشة وصعوبة حصول الفيزا مال الاردن  اتوكل على الله وان شاء الله الاخوان الي بسوريا مايقصرون وياك واتمنالك كل الخير


اخوك

القرش الاسود

[rafid82]

أخي الكريم
الاقامة تعطى كل ثلاث أشهر  أذا كان عندك أطفال في المدارس   اما الاقامة على الحالة المرضية يعني اتسوي تقرير طبي فاتصور الغت كما انه سمعت قبل فترة ولو مامتاكد انه بعد سوري لاتسمح للعراقيين الى بفيزا سياحية  فقط والله أعلم تكدر تستفسر من مكاتب السفر اللي بالعراق هناك
اخي الكريم اول شئ انت من تقدم على الامم لازم تخلي أبالك فقرة مهمه انه بعد رجعه للعراق ماكو لان كثرة الدخول والخروج من الحدود أثر على قضيتك ويمكن ترفض هاي اولا
 ثانيا اذا تريد السرعة من ناحية الامم المتحدة ترة سوريا ما اتفيد لان اطول ويمكن سنة و سنتين وانت بعدك ما محوليك توطين 
وهاي عن تجربة شخصية لان عشت بسوريا سنتين  و قدمت على الامم وماكو شئ طبعا كان عندي اقامة سنوية مما ساعدني على التقديم على فيزا للاردن و طلعت من سوريا و هسة بالاردن قدمت من جديد و حتى ماقلت لهم عندي فايل واني هسة سويت الفحص و خلصت كل المقابلات القصد انه الاردن أفضل واسرع فنصيحة أشتغل على فيزا مال الاردن اما كيفية اخراجها فلا اعلم كيف من العراق تكون
طبعا لاتنسى الاردن غالية
طبعا من تقدم للامم المتحدة لازم يكون عندك قصة قوية وأثباتات انه انت مهدد بالعراق  وماتكدر ترجع
مقر الامم المتحدة ما كاعد اتذكر وين بالضبط بس هو أي ابو تكسي يندلها  وتروح بالبداية لوحدك و تاخذ الجوازات و همة ينطوك موعد اني في وقتها سنة 2007 أعطوني 6 أشهر على المقابلة الاولى 
هسة فلا اعلم يمكن شهر  و بعدين تروح تقابل انت والعائلة و سجلوك بعدها يعطوك ورقة مال لامم المتحدة هاي الورقة طبعا ماالهه علاقة بالاقامة ولايعترفون بها  وهنا لازم تبقى تنتظر انت وحظك و قصتك  شهر سنة سنتين الله اعلم
وهاي من ادزون عليك قسم التوطين وراح يقابلك واحد امريكي و هم يأخذ منك معلومات والثائق مالتك و قصة التهديد مالتك وهم لازم تنتظر الفترة غير معلومة طبعا و بعدها يحولوك هجرة و من ثم اتقابل مقابلة المحلف و بعدها هو بيده القرار اما قبول واما رفض
اخي الكريم الاجرائات العادية  والطبيعية للهجرة في الاردن تاخذ هنا من 6 أشهر الى سنة و نص  أما في سوريا  حسب الحالة والله اعلم انت و حظك
اخي الكريم لازم يكون عندك فد عذر قوي وسبب مثلا متهدد او محاولة اختطاف لان من راح تقول لهم اوضاع العراق تعبانة و كهرباء ماكو او ماء ماراح ترة يقتنعون بكلامك فحضرلك قصة جيدة
اني اعطيتك السلبيات و الايجابيات  ولك القرار
اخوك رافد
الاردن \ بانتظار موافقة المحلف يوم 5\12

[ابو خالد]

اهلا وسهلا بيك اخونا ونورت المنتدى
بالنسبه الى اجابة اخواني اليك جميعها صحيحه وفقط اريد اضيف الك شيء في حالة تريد المجيء الى سوريا
بالنسبه الى سوريا بالوقت الحاظر لاتعطي اقامات فقط اذا كان عندك اطفال بالمدارس او تجلب لهم تقرير طبي مصدق من الصحه وكذلك تجلب لهم بقية الاوراق من عقد ايجار شقه مصدق وحتى لو اعطوك الاقامه يكتبون باللون الاحمر في اعلى الصفحه لايمكنك الخروج والعوده وانا واحد من الناس راجعتهم قبل اسبوعين لكي اجدد الاقامه كتبولي لايمكنك الخروج والعوده يعني بحالة اذا سافرت للعراق تلغى الاقامه وبالنسبه للفيزه السياحيه الك حق تجديدها ثلاث شهور لا اكثر...ولكن لاتنسى ان معاملات سوريا تأخذ وقت طويل وانت وحظك يعني انا عندي اخوي وزوجته مقدمين من الشهر الرابع 2007 ولحد الان لم يأتيه اتصال توطين علما انا تقديمي معه في نفس التاريخ واتصلو علي توطين في 18/12/2008 والى الان بانتظار الاجرآت الاخيره من الموافقه الامنيه والله اعلم متى تكمل فانا اكول لو تذهب الى الاردن حسب مانصحوك الاخوان افضل بكثير واسرع الك

[عراق للأبد]

سلام عليكم

اخواني اولا اشكركم , وضحتولي هواي اشياء ما كنت اعرفها فليجعلها الله في ميزان حسناتكم جميعا و اتمني الله يفرجها علي الجميع ...

اني ان شاءالله راح احاول علي الاردن مثل ما نصحتوني و سالت مكاتب في بغداد بلنسبة للفيزا مال الاردن محد انطاني معلومات حول كيفية الحصول علي فيزا الاردنية ...

لازم اسئل شخص عراقي ساكن في الاردن يقدر ينطيني معلومات حول الفيزا و راح اكتب موضوع جديد و اتمني الشباب في المنتدي يساعدوني ...

و اشكركم مجددا علي المعلومات حول السورية و التوفيق للجميع...