سؤال لكل من سيسافر من مطار بغداد قريبا

[حسين علي كاظم]

السلام عليكم اخوان
طبعا اني موعد سفري انشاء الله يوم 10/1/2010 بس احب اعرف بعض الامور
1. هل هناك مكان للتجمع قبل الذهاب الى المطار وكم الساعه ؟
2. الفحص الطبي قبل السفر هل يشمل الاطفال ام لا؟
وشكرا جزيلا لكم

[ســـرى]

مرحبا اخونا

اني من جماعة الsiv احنا فحصنا بمركز الشفاء بالمنطقة الخضراء يعني مونفس مركزكم بس بوقتها الاطفال ما انشملوا بفحص اشعة الصدر وسحب الدم ولكن تم فحصهم من قبل الاطباء (الذكور يفحصون من قبل طبيب والاناث من قبل طبيبة ) مثل البالغين واللي عنده دفتر لقاحات ياخذه وياه ضروري علمود يعرفون موقفه التلقيحي وبالنسبة للي مسوي عملية أو عنده مرض مزمن ياخذ تقاريره الطبية كاملة وياه احتمال يسألوه عليها والادوية المزمنة إن وجدت

تقبل مروري

اختك szsz

[y.a.r.a]

اخي العزيز حسين
ان شاء الله اتسافر بالف سلامه
قبل يوم او يومين من السفر حسب ميحددولكم
اتروح لمستشفى ابن البيطار
ايسوولك فحص شكلي بس قياس ضغط وينطوك حبايتين للمعده تبلعها كدامهم وهاي هيه تخلص الشغله
اما بالنسبه للسفر
نعم اكو تجمع في ساحة الوفود الي صايره يم عباس ابن فرناس على طريق المطار واتكون هناك الساعه 6 صباحا
وشرحت لاخ الي قبلك تفصيلات عن وصول المطار
وراح انقللكم تجربة اخوانا الي قبلنا سافروا وشرحوا الموضوع بتفصيل اكثر
وياربي طريق السلامه ان شاء الله

[y.a.r.a]

اخويه العزيز حسين
راح انقلك الكلام بالتفصيل الي ورد من اخونا العزيز بلاك ووتر
وحبيت اخليه كله بدون رابط لان حتى كل الاخوان الي طالعين من بغداد يقروا ويطلعون عليه


اولا التجمع راح يصير خارج المطار وابو المنظمة راح ينتضركم وياخذكم في باص خاص الى داخل المطار ...

الخطوة الاولى راح تجينا الجيك بوينت الاولي ..هنا راح يجيكون جوازاتكم و تذاكركم وانتوا بداخل السيارة والمسالة تطول حوالي 3 دقايق فقط

الخطوة الثانية ..

راح تمشي السيارة 400 متر لحين ما توصل لحارس يفتش السيارة ..يضرب السيارة مراية ...طبعا انتو داخل السيارة والمسالة ما تطول اكثر من 3 دقايق

الخطوة الثالثة ..

راح تمشي السيارة 200 متر تقريبا لما توصل سقيفة ...راح تصطف السيارات بسرة واحد انتوا راح تنزلون طبعا كلشي ماكو بايديكم لازم اقصد الحقائب ..حتى الحقيبة اليدوية للنساء تضل على المقعد مال السيارة ...


راح يجي (اجلكم الله) كلب يفتر ويشتم حول السيارات ...وانتو راح توكفون على جنب ...والمسالة تطول اقل من 10 دقايق ...

من يخلص الكلب ..رااح تصعدون السيارة و تمشون 300 متر اخرى راح تجي سقيفة اخرى ..الكل ينزل من السيارة ...وينزل وياه الحقائب مالتة ...يروح لكرفان بيه مفتشين راح يفتحون الحقائب للتفتيش السريع ...من يخلص التفتيش تروح انت والحقائب للسيارة واللي راح تنتضركم على صفحة ...

تسحل الحقائب مالتك بالحر ...طبعا راح تشوف عزرائيل من الحر ....وراح انت هم تتفتش يدويا من قبل حارس امني والنساء تتفتش بواسطة النساء ...


تروح تركب السيارة و انت تفكر تكول الحمد لله خلصت راح اطير ...ههههه عبالك خلص ؟ ؟ ؟

راح تمشي السيارة 10 دقايق بطريق طويل جدا جدا على شكل نصف دائرة كبيرة جدا طريق حول المدرج ...


الخطوة الاخرى

توصل جيك بوينت يجيكون بيه التذاكر والجوازات على السريع وانتوا بداخل السيارة وهاي طبعا قبل الصالة بنص دقيقة ....


راح تصعد جسر لما توصل مرحلة النزول ...الباص راح يذبكم بصف العربانات ....

طبعا اكو ملاحظة كلش مهمة .... سعر العربانة مال الجنط الف دينار عراقي ...ألف دينار فقط اذا انت تاخذها وتدفعها ...

اني افضل انت تنطي الف دينار و تدفع العربانة بايدك ...خلي هاي على بالك لان اذا ابو العربانة دفعها ما راح يهدك الا يخمطك اقل شي 20 الف دينار ...و فوكاها يروح زعلان عليك .....

حملت الحقائب بالعربانة ..انطلق الى صف ..هذا الصف مرات طويل جدا ..ومرات عادي بيه 30 شخص فقط

راح تروح لمكان بين صبات 2 تخلي الحقائب سرة واحد بس الجنطة النسائية اوكي تكدر تاخذها وياها وتروحون توكفون ورة الصبات ...راح تتفتش انت يدويا ...والنساء تفتشها نساء في مكان مغلق طبعا ....


من حطينا الحقائب بالسرة واتفتشنا راح يجي جلب يشتم الحقائب ....وتطول المسالة 20 دقيقة ...

تروح تاخذ حقيبتك ...و تتجه نحو باب الصالة ...


توكف سرة اخر ....اخ يابة متت ....

راح تسحل الحقائب مالتك بالعربانة لو سحب بايديك ...وتتجه نحو الباب ...راح يجيكون التذكرة والجواز مرة اخرى ...صار مليون مرة يجيكون التذكرة والجواز ...

المهم ..توصل لماكنة السكرين ..اي الاكس راي x-ray ...انتبه رجاءا لسلامتك ولسرعة دخولك ....اتبع النصائح التالية ....

* تحط كل الحقائب اولا ...كلها دون استثناء ...حقائب الخصر ..اليدوية الصغيرة ..

* كلشي معدن عندك تنزعة مثل الساعة ...سوار حديدي ...حزام بيه قوبجة جبيرة كلش ...

* الموبايل ...المفاتيح ..الاقلام الحديدية ...الجداحة ...الجكاير ...تحطها بسلة بلاستك ...

* من تدخل الى جهاز walk trhough هذا جهاز كشف المعادن ...مثل الباب بالضبط ...اذا دك الجهاز راح يفتشك تفتيش روتيني سريع و تروح تاخذ حقائبك و ترجع كلشي لمكانة ...اخخخخخ


بعدين تتمشة داخل الصالة (بابل) المغلقة حاليا ..انت تتركها وتروح كبل الى صالة نينوى ..تسحل الحقائب وتمشي 5 دقايق للصالة الاخرى ....


راح توصل هناك وبايديك علاكة مال اي او ام حتة يكدر الموضف يتعرف عليك مرة اخرى ...

راح يلمكم ويشرحلكم على الحقائب و السفر ومنو ينتضرك بعمان وبامريكا الخ ...

راح يصير نداء على طيارة الملكية الاردنية وعادة النداء يكون الساعة 8 ونص الى التاسعة ..توكف سرة اخر ....اووووووووووووووووووف من السرة ...


راح موضف الكمارك يجيك تذكرتك وجوازك

تدخل توصل الى جهاز اكس راي x ray ..وانت تعرف الاجراء بعد ..ما يحتاج اشرح لان شرحتة اعلاه ..وتدخل بجهاز الولك ثروو walk through ...تستلم حقيبتك من الجهة الاخرى ...تتوجه الى كاونتر الملكية الاردنية ...

عادة الكاونتر رقم 405 -406 ....عادة من دائما ....


هم سرة عل الكاونتر ..توصل الكاونتر تحط حقائبك على الميزان ...وتنطي الجواز والتذكرة و تنتضر لا تحجي ولا ابد ..انتضر ابو الكاونتر يسالك ..اذا ما سالك لا تحجي اي شي لان الموضف صاير طرشي وتعبان ...اهم شي تبتسم ..حتى تروح الضوجة مال تفتيش ..

تخلص كاونتر ؟؟ راح تنطيك البوردنك باس boarding pass تروح الى كاونتر رقم 421 تدفع ضريبة المطار ...

الف دينار على كل شخص فقط راح تلزكلك طابع صغير بضهر البوردنك بااس ...

وبعدين تروح للجوازات توكف سرة هههههههههههههههههههه هم سرة ..تختم خروج وكالعادة ..لا تتكلم مع موضف الجوازات ...الا اذا هوة سالك ..لان ماكو داعي اكو ناس داخل صالة الترانزيت هواي راح تحجي وياهم ...

تكمل ...قبل ما تدخل صالة الانتضار اكو اكس راي اخرى x-ray يعني اخاف شايل حقيبة ..وهاي المنطقة بس للحقائب اذا ما عندك شي ادخل وعوف الجهاز لا تباوع اصلا ...

يشمل حقائب النساء واللابتوب ...الخ الخقائب اليدوية ....

تدخل صالة الانتضار تشرب تنكر ماء ...وترتاح وتشرب بعدين جاي ..من الكافتريا ....ومن ثم تكعد لو تفتر تباوع على النسوان هههههههههههههههه

تدخل السوق الحرة اللي اسعارهم اغلى اسعار بالعالم ....كلة كلاوات ...ببس بيه خوش حاتات ..المهم ...


تنتضر نداء الطائرة من يصير النداء تتوجه الى البوابة رقم 43 ...لان هنة ماكو غيرهن هههه بس بوابتين ...

وحدة على اليمين ووحدة على اليسار ...

تحضر الجواز والبوردكك باس ..اذا تريد تسهلها على ابو الجوازات افتح الجواز على صفحة ختم الخروج تصير اسهل ...

ووراها موضف الطيران راح يقطع البوردنك باس مالتك ...وتدخل الى البوابة ....

طبعا x-ray اخر ...جداحة.جنطة ...الخ ...تخليها بالسلة البلاستك ...

تدخل جهاز الوولك ثروو walk through

تكمل تنزل درج لحد ما توصل للباص ....

الباص ينملي ياخذكم للطيارة ..

هنا لازم تتنبه


من توصل الطائرة هناك اجراء اسمة التعرف على الحقائب ...طبعا الحقائب اللي شحنتهم مو اللي بايديك ...


راح تروح جوة الطيارة تشوف الحقائب مسفطة ...تروح على حقيبتك و تكلة لابو امن الطائرة هاي حقيبتي ..راح يلزك عليها لزكة و تروح توكف سرة يم الدرج مال الطيارة لان اكو تفتيش اخر


راح يفتشك رجل امن تابع للملكية الاردنية ...يفتح الحقيبة اللي بايديك ....لابتوب ..حليب اطفال ..المهم يكلب شوية ويكلك يلا اتفضل اصعد ...

تروح بالسلامة ...

انتهى و تعبت من الكتابة ..لان ماكو هيج مطار بالعالم بي هلكد تفتيش ...


ملاحظة ..اهم شي بهاي الاجراءات لازم تطول بالك ولاتتنرفز لان مو بصالحك ...خلي روحك رياضية ...واتوكل على الله سبحانه وتعالى


اخوكم ....
منقول عن اخونا بلاكووتر

[حسين علي كاظم]

الف شكر اخوان على ردودكم بس حبيت بعد اعرف شي ثاني هل يردون الجوازات مالتنا الان لو ميحتاجوها هسة ؟ لأن اني سألت الموظفة لمن خابرتني انه ادزلكم الجوازات قالت لا جيبها وياك للمطار بس

[ريم عبد]

اخويه الجوازات تبقى يمك
وبيوم السفر تاخذها وياك بايدك تجييك

[حسين علي كاظم]

شكرا اخت ريم على ردج وشكرا لكل من رد على موضوعي