شوكت يحتاجون جوازاتنا انا وعائلتي ؟؟ افيدوني

[echo 9]

السلام عليكم اخواتي واخواني الاعزاء
مثل ما يعرف البعض منكم انه آني مقدم على ال SIV من شهر العاشر 2009 وعلى ال IOM شهر التاسع
الاس اي في لهسه ما حصلت الكوم بروفل والاي او ام حصلت على الاي زد نمبر 111XXX ولهسه الحمد لله كلشي ماكو بس عندي سؤال ارجو اجابتكم عليه وهو :
هل يحتاجون جوازاتنا انا وعائلتي بالمقابلة الاولى او قبلها او بعدها علما انه انا لدي جواز G بس زوجتي واولادي ال 8 ما عدهم جوازات لهسه القصد ابلش بمعاملة جوازاتهم من هسه لو انتظر حتى احصل على الموافقة من السفارة الامريكية ارجوكم افيدونا ؟؟؟؟؟
اخوكم
Echo 9

[Revolver]

اخوية ايكو,

انت من هسة بلش بلمعاملات مال الجوازات حبيبي انت, لأن كلشي يصير دنية هاية, يجوز يجيك ايميل على المٌقابلة والعراق ينكلب على راسة مثل كل يوم, ولتنسى الانتخابات جاية, فياأخي اني انصحك اتروح اتسويها لأن بهذا البلد كلشي يصير ويجوز ايأخر الجوازات عليك, وحتى لو كانت ممطلوبة, انت روح امشي بيها, الجواز هوة الشغلة الوحيدة الي يعترفون بيها الامريكان حتى قبل هوية الاحوال المدنية .

اخوك

ريفولفر

[echo 9]

شكرا حبيبي واخوية ريفولفر
دائما سباق كالعادة ربي يحفظك ويرعاك بس هم عندي سؤال لك وياريت تجاوبني عليه شنو نصيحتك لي اكمل مع الاس اي في لو اظل على الاي او ام يعني منو الاحسن لي وما يحتاج تشرح لي الاسباب يكفيني منك ومن الاخوان ان تكولون لي هذا الاحسن علمود اكمل بيه واعوف الاختيار الثاني ؟؟؟؟

[Abo Andrew]

عزيزي لحك سوي الجوازات

انت متعرف حكومتنا الرشيدة شكد اتعصمص الامور ؟؟
اني بوكتهة مالتي ومال زوجتي مطول ومال ابني اخذ 6 اشهر يلة خلص وجنت كلش خايف بوكتهة كلش لان التفاصيل ومجان ابني عندة جواز

 سويهة واخلص من عدهة باسرع وقت

تحياتي

[y.a.r.a]

اخويه العزيز
الجوازات تحتاجها بالمقابله الاولى اصلا تدخل بيها للمنطقه
يعني اسرع وسويها من هسه
اما اذا دتسال على ياهو تستمر
فاني اكلك استمر على الي اي او ام حتى تشمل كل الربع مالتك
وخصوصا هذا القانون مالت المساعدات ميخدمك وانت عندك جيش ما شاء الله
الله يحفضهم يعني خدمات ال اي او ام تخدم قضيتك اكثر
وتره هيه اذا على السرعه محد يدري شكد تستغرق
ايجوز هاي تمشي احسن
اني اخويه سوه الاثنين تالي خلصت ال اي او ام وسافر عليها وعاف ال اس اي في
وبعد انت هم شوف الي اصلحلك
وان شاء الله موفق بيها

[echo 9]

شكرا جزيلا اخوية وابن اخوية العزيز ابو اندرو
ان شاء الله انا مكمل الجناسي مالتهم والشهادة مال الجناسي من هاي ام الفسفورة وعلى كولتكم خل الحك اسويهن من هسه احسن لا تنلاص ويطلعون النا جناسي ام الخط والنخلة
رحمات لوالديكم وشكرا لكم والله يساعدني ويعينني ينراد لي بال 250000 بس صكوك غير الاذنك خشمك والهيه ببلدنا عشر اضعاف قيمة الصكوك

[echo 9]

شكرا اختي العزيزة الغالية يارا
ربي يحفظج ويحفظ كل عائلتج
صدك والله انا نسيت هذا الجيش الجرار لان حسبت بس زوجتي واولادي ونسيت الفاركونات الثانية البيها الوالد والوالدة والاخوة والاخوات
راح استمر ويا الاي او ام ان شاء الله واعوف الاس اي في وعلى بركة الله

[Revolver]

اتروحلك فدوة الـ 250000 سويهن واتوكل بالله .

ريفولفر

[echo 9]

حبيبي ريفو يسلم عمرك الواحد مستعد يدفع نص عمره بس يشوف له يوم حلو وينام مرتاح من يحط راسه على المخدة وما يفكر ها اجاك الذيب بالك من ال ....؟؟؟؟ ما نكدر نكول عبيد ؟؟؟؟؟
والله الشفناه بدنيانا خصوصا احنا جيل الستينات ما شافه بشر ولا مر ببال واحد شفنا الضيم ومن حقنا نرتاح شوية وانا والله هنا بالعراق ما خذ راحتي بس المصيبة انا واثق كل الثقة بانه الجهال مالهم مستقبل بالعراق دوم ( هالبلد من داهية لدولاب على كولت امي ) هاي امي دوم ترددها

[ابو عبد الله التكساسي]

عمي ايكو الله يساعدك
حتاج الجواز مالك بكل الخطوات
حتاج الجوازات مال الجماعه من تبدي راسل الفيزا سنتر يعني قبل المقابله لا ايطلبون الجوازات مال كل افراد العائله

حياتي
اخوك ابو عبد الله