علي الاسدي\ سفري 6\1\2010 اريزونا فينكس\ وبعد اللي قريتا انا متردد ومحتار, شأسوي؟؟؟

[Leo_friend]

اخوان انا احس بروحي صاعد عربة الموت ساعة اصعد وساعة انزل معلومات متضاربة وتجارب مختلفة وهذ الشي طبيعي. بس انا هسه احتاريت, انا خريج كلية الزراعة واحجي انكليزي بشكل منتاز واعرف فرنسي بشكل مبتداء وعازب ومامرتبط ولا احب واهلي يشجعوني على الطلعة وانا بقرارة نفسي حاب اطلع ومحاب اطلع بنفس الوقت جانب كبير مني يريد الطلعة وجانب اخر متردد. كلت وندعيت الربي وكلت اذا بيها صالح الي كون تسهاها يارب واذا مو زينة ابعدها عني وكون متصير. بس مشت الشغلة وهسه عندي موعد سفر وانا بعدني الصبح اتشجع وباليل تهبط معنوياتي والله شي يضحك
اخوكم علي الاسدي

[y.a.r.a]

اخويه العزيز علي
اترك عنك هاي الوساوس وخلي كلبك قوي واتوكل على الله واتوجه للسفر وان شاء الله بالف سلامه
لتصدك احد من الي سافروا مراوده هذا الشعور خصوصا باخر ايام وكلما يقرب يوم السفر كلما ايزيد هذا الشعور
تره هاي السفره هيه مو نهاية العالم ولا تنضرالها كأنما رايح للمجهول

اتصور نفسك محصل زماله دراسيه ومحد من زملائك بالعمل حصلها غيرك جان شنو ايكون شعورك
اكيد راح تفرح بيها وتعتبرها فد مكسب جبير
فكيف هاي احسن من الزماله وسفره مدفوعة الثمن وتوصل تلكي من يهتم بيك وايرتبلك الشقه والاوراق ومصاريف الفتره الاولى
واعتبرها فتره كليه تستمر 5 سنوات تشتغل بيها وتدرس واتحصل جنسيه بيها واتحصل خبره ومعلومات اتاهلك ان تروح لاي بلد عربي تشتغل او اذا عجبك الوضع ورتبت وضعك بعد ميعجبك اصلا تطلع منها
اخويه العزيز تره هاي رحله اقل ما ياقال عنها انها اتزيدك خبره واتقوي امكانياتك الثقافيه والشخصيه
والحياة فرص والي من تجي الفرصه يعرف شلون يستغلها وميضيعها من ايده
اتوكل على الله وخلي ثقتك بنفسك وبامكانياتك قويه وكول اني شاب معايزني شي والي سافر واتوفق مو احسن مني ولازم احقق شي احسن من الي اني هسه بي واذا بقيت بمكانك راح اتضل رجل ليكدام ورجلتين ليوره
ياربي ايوفقك بكل خطوه

[Leo_friend]

اختي العزيزة الله يبرد قلبج ويهنيج ويريح بالج مثل ماريحتي بالي,
ممكن اعرف انتي وين موجودة باي دولة؟
بس مرات انا اكول خاف واحد يضيع عمرة مع العلم انا عمري 25 سنة
مع الشكر الجزيل
علي الاسدي

[ethan texas]

 اخوية العزيز  اترك كل شي الحياة هنا حلوة والحياة هنا عبارة عن  عدة صناديق فرص وانت اخيارك يا اما تفتح صندوق الحض والسعادة يا اما تفتح عليك صندوق جهنم وترجع للعراق لان الحياة هنا جدا عملية وجدا حلوة 

فة يا اخي عوف كل الي سمعتة بس خلي ابالك انو الشغل ثم الشغل ثم الشغل والتعلم الانكليزية

واني صارلي شهر وشوية با امريكا واي شي تحتاج اني حاضر وانشاء الله من توصل لا امريكا وتحب تتصل بية كلي على وادزلك رقمي على الخاص حتى  لتكون وحدك وخاصة اذا كنت انت سنكل

اخوك جوزيف

[cricket]

اخي علاوي
انته بيك كل المميزات الي تاكد انك مستعد لتجربه اسمها امريكا لان مثل ما كلت عمرك 25 ما مرتبط وتجيد الانكليزيه اذا قدومك ما راح يسببلك خساره تعال وشوف واحكم بنفسك راح تشوف الحلو والمر بس ثق ما راح تخسر شي ما عجبك الوضع اكو كدامك خيارات عديده من ضمنها خيار العوده بس وركز على كلمة اذا ما جيت لهنا راح تبقى طول عمرك تفكر قرارك صح لو خطا وما راح تلكه الجواب توكل على الله امريكا حلوه وخلي اضحكك شكد افتريت اني دول وخصوصا العربيه اهنا عرفت صدك معنى الشرطه في خدمة الشعب جنت دا امارس الرياضه الصباحيه يوم العطله (الهروله ) وكفت فجاة يمي سياره مال الشرطه باوعوا على وجهي وانصرفو مسرعين واني فكرت ويه نفسي شنو الاخوان علاسه تعرف بعدني جدي اهنا وره دقيقه وكفت يمي دوريه اخرى كلت ما بيها مجال انعلست وترجل ظابط الدوريه وكال انهو الدوريه السابقه الي وكفت يمي كانت دا تلاحق مشتبه به وانها وقفت خطا يمي وظنا منهم انهم خوفوني استمروا بملاحقتهم للمشتبه بس طلبوا من دوريه اخرى ان تجي وتطمني بانه خطا غير مقصود وعندما عرف الظابط اني ساكن جديد في لاس فيغاس اعطاني خريطه للمدينه تحوي على اسماء الاماكن العامه الي اكدر امارس بيها الرياضه مجانا وبقي يعتذر بالنيابه عن تلك الدوريه يمكن ربع ساعه ... القصد ان اكلك اكو الحلو وال مر بس صدكني ما راح تخسر شي بالعكس راح تطلع على مفهوم الحياة الانسانيه ( يضميرك شلون شرطه مو مثل جماعتنا )

[Leo_friend]

اشكركم اخوياني(( واخواتي جوزيف العراقي وكركت ويارا)) الغالين الله يريح بالكم ويوفقكم يا اخوني الغالين واتمنى من اخواي جوزيف العراقي ان تراسلني على الخاص وترسلي رقم تليفونك حتى اكدر اتصل بيك اذا ممكن ياغالي
اخوك علي الاسدي

[Leo_friend]

اااااا

[y.a.r.a]

اخويه العزيز
اني لازلت بالعراق ومنتضره الامنيه المخضرمه
بالرغم من تمسكي بالبقاء بالعراق  ولولا ضروف خاصه مجان افكر بالطلعه
بس اشجع كل واحد يطلع وايشوف وايجرب لان هاي الفرصه متجي غير بالعمر مره والعراقي محتاج يطلع عليها ويطلع كل امكانيته الي جمدها طول الوقت بسبب الوضع بالعراق
هناك راح يلكي مناخ نقي وصحي والشاطر هناك يثبت جداراته ويطور نفسه
ولتخاف العمر ميضيع بس بالعراق
هنا بالعراق عدنا العدادات كلها عاطله.. عداد الوقت وعداد الفلوس.. الوقت ايمر بله حساب والفلوس تنصرف بله حساب
بينما هناك العدادات كلها شغاله وكل شي اله ثمن واله قيمه والشاطر الي ايضل ايلاحقها ويمشي بنفس التردد مالتها حتى يكدر ينجح
وان شاء الله انتوا الشباب بيكم الخير والبركه
وماكو شي ايخوفكم
والله ايوفقك