بالنسبة للبنوك في امريكا ( citizens bank)

[ethan texas]

 السلام عليكم اخواني يارب اتكونون بخير وصحة وسلامة يارب واعتذر عن انقطاعي هذة المدة بس الله واعلم وكعت بمشكلة صغيرة والحمدالله انحلت

طبعا  محد يتعلم ابلاش دائما الثمن بالدولارات في امريكا 

اليوم احب انصح اخواني واخواتي الي رح ايجون لا امريكا  في شغلة معينة

بالبداية رح اكوللكم شنو صار وياية وانتو رح تعرفون


اني اجيت لا امريكا وفتحت حساب بالبنك بنك ( citizens bank) 

وحطيت بالسيفنك مبلغ معين وبلشيكنك مبلغ وهذا لازم حتى تفتح حسابك

المهم اول ايام العيد طلعت ابن خالتي  فة اشتريتلة شغلات وملاعيب  طلعت اني خلصانة فلوسي ودا اسحب من الدبت كارت ( من حساب البنك ) يعني البنك غطتلي المصروفات بعد مخلصت فلوسي

فة اتفاجئت انو يجيني بريد للبيت علية ضربة 286 دولار  طبعا اني معرفت السالفة شنو

رحت للبنك انطوني قائمة بالمشتريات الي غطتهة الي البنك بعد مخلصت فلوسي

وعرفت انو كل ماتستخدم الكارت الفيزا كارت بعد انتهاء فلوسك ( ينزل تحت الصفر )  باي مبلغ تشتري اصير عليك ضربة 39 دولار فة اني مستخدمة اكثر من مرة فة صارت علية هذة الضربة

وانطوني مهلة 6 ايام ورة ال 6 ايام رح تضاعف 39 دولار فوك المبلغ والحمدالله سديتهة

بس سولي تخفيض لل 200 دولار ودفعتها 

والي انصحى لا اخواني الاعزاء هنا

انو من تفتح رصيد بالبنك حاول انو تصرف وتبقى على الاقل 5 دولار بحسابك حتى ليصير عليك ضرائب مثلي ودائما جيك حسابك حتى لتوكع بالغلط مثلي ويارب محد يوكع بالغلط الي غلطتة اني

اخوكم جوزيف

[Revolver]

حبيبي جوزيف,

معذور اخوية العزيز والف هلة بيك مرة لُخ وبمواضيعك المُتميزة والي كُلها نصائح مُفيدة واخبار حلوة, اتمنالك كل الموفقية ان شاء الله وفدوة الميتين دولار المُهم الحمدلله مشت على خير الف الحمدلله, مشكور حبيبي جوزيف ربي يوفقك .

ريفولفر

[ethan texas]

اخوية العزيز ريفولفر دائما انتة السباق وتسلم وبارك الله بيك اخوية العزيز

ويارب تحقيق جميع الاماني


اخوكم جوزيف

[أبو يوسف]

تحية للأخ جوزيف وتقبل مروري أخي العزيزي الحالة الي صارت معك صارت ويايه حيث طلع عليه غرامات تقريبا 108 $ بخلأل ستة ايام وبدون تبليغ أخر يوم بلغوني عن طريق الميل بوكس لكني مرحت دفعت رحت للمدير وقدمت شكوى بأني مأ أخذت أي تعليمات على النظام الخاص بالبنك ولم يتم تبليغي عن طريق التلفون بانوا لديك تجاوز بعدين أحنا بالعراق ما عندا مثل هذا النظام , فالرجل تفهم وخلأني أدفع شي رمزي وقدره 5 دولأرات فقط بس بصراحه مبلغ الي دافعه يعني كبير بالنسبه لكونك متعرف بالنظام وممكن النقاش معهم بهاي أمور عموما أحنا نتعلم بفلوس أحيانا وأحيانا أخرى نتعلم بجهد وووقت مهم نتعلم ومنكرر خطأ تحياتي الك ولكل الأخوة الأعضاء .

[نهاد احمد]

اشكرك اخويه العزيز  جوزيف على هذه المعلومه
وبارك الله بيك
والموفقيه للجميع

اخوك نهاد ابو علي

[Abo Andrew]

انت ما معذور تعرف ليش؟؟

لانه من واجب البنك اينبهك على هاي الشغلة ومستحيل اصدكك اذا اتكلي همة مكايليلك

لان اني اجتني بوكتهة رسالة اتضوح هذا الشي وهذا ايسمو Over draft protection

يعني حساب الجيكينك ايكون محمي من قبل حساب التوفير والكردت كارد

واذا انت ما مبلغيك فالك حق تمسح بيهم الكاع

هاي البنوك التجارية متقصدين ايسون هيج لذلك اني اختارين بنك ويلس فاركو لان من احسن البنوك بامريكا

تحياتي وبعد لا اتسويهة

[ethan texas]

 مشكوريين اخواني الاعزاء وبارك الله بيكم

ويارب انشاء الله يحمينى ويحميكم يارب

اخوية العزيز ابو اندرو صدكني محد كالي واني هم كذالك كتلهم   ليش مكتولي بس يلة الواحد يتعلم بفلوس ماكو ابلاش


اخوك جوزيف

[untitled.man]

اخوية العزيز...

طبعا اني مع رأي اخويه ابو اندرو، انه انت الخطأ خطأك وما بيهه اي عذر. ولكن ما اتفق وياه بسالفة انه ما كايليلك، لانه ماكو شي اسمه ما كالولي او ما عندي علم بقانون ونظام البنوك في امريكا، والمثل يكول "القانون لا يحمي المغفلين"، وحاشاك من الغفلة، بس كلشي مدون وموجود ومو بالضرورة يكولولك، المفروض انت تقرأ، او على الاقل تسأل اذا ما فاهم فقرة معينة.

كل شي مذكور بموقع البنك وبالتفصيل الممل، ومن تفتح حساب كل الاوراق اللي وقعت عليهه المفروض عندك نسخة منهه، بس انت جيب خلك واكعد اقره، واتصور هو هذا الخطأ اللي وقعت بي، وهوايه من اخوتنه الواصلين الجدد من يشوف التعليمات 5 لو 6 صفحات وكتابه بالكوه تنقري، يغلس ويباوع على النسب المئويه، وحتى هي مرات ميعرفون شنو تعني، فلازم الواحد يكعد يقراهه وعلى كيف كيفه، وكل شخص عنده هذي الفرصة (فرصة القراءة والاطلاع) حتى قبل لا يفتح الحساب، لانه ينرادلك اسبوعين اذا مو اكثر علمود تستلم السوشيل ويله تكدر تفتح حساب، فيكدر الواحد يستغل هذا الوقت بالتعمق بهاذي القوانيين...

الشغلة الثانية اللي اريد اذكرهه انه انت ما عندك كردت كارد علمود كل شهر توصلك ستيتمنت والمبلغ المطلوب منك تدفعه للبنك. انت عندك دبت كارد، وقيمته هي المبلغ اللي حطيته بحساب الجيكنك، يعني بصورة اوضح، انت بجيبك 300 دولار وطلعت للسوك، شكد اقصى شي تكدر تصرف بدون ما تصير عليك تبعات؟؟؟ 300 دولار، مو لو مو مو؟؟

والشغلة الثالثه هي انه ماكو بنك بامريكا اذا انت فاتح حساب وياه ما ينطيك يوسرنيم وباسوورد علمود تفوت وتشوف حسابك اونلاين، فبهاي الحالة صار تقصير منك انه ما تجيك شكد عندك وشكد باقي برصيدك، واني انصح كل شخص يفتح حساب انه يجيكه على الاقل مرة باليوم، لانه لا سامح الله اذا صار اي نقص بالاموال اللي بالرصيد بدون علم صاحب الحساب وتم تبليغ البنك بهذا النقص، فهو (البنك) راح يتحمل هذا النقص، بس اكيد ضمن ضوابط محددة.

تحياتي وتقبلوا مروري...

[ethan texas]

 اخوية العزيز اني كلت الغلط مني لان اني مشفت حسابي

وحبيت انو انصح اخواني الاعزاء انو دائما ايكونون ورة حسابهم ويشوفون اشكد حتى ميوكعون بالغلط الي غلطتة اني

اخوكم جوزيف

[الله...محبة]

مشكور اخوية جوزيف على النصيحة
وهاي احنة صرنا خبراء من ورة مواضيعكم وبعدنا مطالعين من سوريا

الف شكر يا وردة والله يبعدك عن الخطأ

████████
    الله   محبة
████████

[Abo Rami]

اخي جوزيف
شكرا لهذا التنبيه المهم وفعلا راح تخلينه نحسب لكل شغلة نقد عليه مستقبلا
الف كر اغاتي

[ام فائز]

اخونا جوزيف
الاخوان الاعضاء جميعا
احب ان اضيف الى المعلومه الي ذكرها اخونا جوزيف
انو من المهم جداااااااااااا ان الواحد يسويلا تاريخ ناصع بالنسبه للكرت كارد يعني هو مو المشكله انو اخذوا ضريبه على التغطيه المشكله انو  اذا بعد فتره اتريد تشتري عقار او سياره ابقرض وانت عندك هيجي تاريج خلي نعتبره مو زين بالبنك فالبنك مراح يكفلك ومراح يقدم الك التسهيلات
بالاضافه لى ان مبلغ التغطيه راح ما يتطور ويجوز بالاخير يرفضون التغطيه للتالي
فيا اخوان خلي الواحد ينتبه الى حسابه وما يصرف الا من المبلغ الي عنده ولو المغريات هناك كثيره
تحياتي
اختكم ام فائز

[echo 9]

شكرا اخونا العزيز جوزيف العراقي على مساهماتك الفيدة لنا كلنا والله يا اخ جوزيف من خلال متابعتي لكتاباتك ومواضيعك وردودك خلليتني اعيش وضع امريكا الفعلي وانا لسه بعدني بالعراق
بارك الله بيك
اخوك
Echo 9

[abomagid]

السلام عليكم
اليوم الصبح من كعدت داروح للشغل فتحت الحاسبه اتذكرتك كلت اشو ماكو جوزيف العراقي ؟ شلون صدفه شفتك كاتب هذا الموضوع  .... اشلونك انشاء الله بخير اخويه العزيز

اخوكم
ابو ماجد
تحياتي

[الدكتور هندسه]

مشكورين الاخوة الاعزاء جوزيف العراقي الجزء2 و Abo Andrew و untitled.man على هذه المعلومات القيمة التي طرحتموها في هذا الموضوع لانها تساعد اللاجيء على الالتزام بالضوابط والقوانين التي تساعد اللاجيء وفي حالة اساءه استخدامها فانها تضره

[ريم عبد]

عاشت ايدك ابو الزوز على هاي الملاحظه الحلوه
واكيد هوايه من الي راحوا وكعوا بهاي الورطه اذا متابعوا شغلاتهم بدقه
والحمد لله الي فضت الخساير بالفلوس
ودائما مواضيعك حلوه وتنقل شغلات جديده وباسلوبك الحلو
ياربي ايوفقك

[ethan texas]

 السلام عليكم اخواني وخواتي اشونكم يارب بصحة ممتازة

اخواني الاعزاء  هذا اقل واجب اكدر اقدمة لا اخواني لا اعزاء الي بيوم من الايام ساعدوني واني بمصر

اخوية العزيز ابو ماجد مشكور وبارك الله بيك لان دائما تذكرني ويارب يحفضك

 ومشكورة اختي العزيزة ريم وبارك الله بيج وهذا من حسن اخلاقج الطيبة ياوردة

ومشكوريين جميع اخواني

اخوكم جوزيف

[ethan texas]

مشكورة اختي العزيزة ام فائر على الاضافة المفيدة وفعلا هذا جدا مفيد للكردت كارت

حتى ايكون عندكم ماضي مفيد حتى اتفيدك بالمستقبل

واول شي تبديين بة هوة دفع قرض الطيارة وهوة هذا اول نقطة الج مفيدة لتاريخ الكردت كارت مالتج

اخوكم جوزيف

[ابو يويو]

السلام عليكم

اخوية جوزيف شكرا على النصيحة وانت دائما سباق بمواضيعك الحلوة الي كل المنتدى يستفاد منها

اخوكم ابو يويو  (عمان)