الى اصحاب الخبرة في الشهادات

[MAGGIC]

الاخوان الاعزاء

كيف يمكن معادله شهادة الطب في كندا وما هي الخطوات التي يجب ان تتخذ لمعادله هذة الشهادة

فرجاء الي عندة معلومان عن طريقه المعادله لايبخل بيها علينا


تقبلو تحياتي

[MAGGIC]

ها اخوان شو محد رد وينكم



تحياتي

[عبسي]

اخي العزيز معادلة الطب في كندا كما هي في اميركا حصبة وجدري

اول خطوة اكو شي اسمة medical council of canada لازم تجتاز 3 امتحانات صعبة الى حد ما وهي mccee و  mccq1 و mccq2 هسة كل امتحان ينرادلة تحضير اشهر وتكاليف فوك ال 1200 دولار لكل امتحان لحد هنا الامور ماشية يعني تقرة والله يوفقك وتنجح

المشكلة الحقيقية انه لازم تسجل بموقع اسمه الpcrc هذا شيسوي تدزلة نسخ من شهاداتك اللي هية الجدارية مال الكلية والترانسكربت مال الدرجات و جدارية مال النقابة وطبعا هسة حتى ينطوك الجدارية مال النقابة لازم هويتك تكون مجددة والشغلة الاخيرة والمعضلة هي خلاصة الخدمة اللي لازم تحوي انه انت مشتغل نفسية شهرين و طب مجتمع شهرين خلال اقامتك الدورية بالعراق وهاي اولا نادرا ما كان اكو احد يداوم شهرين نفسية واصلا محد ينطيك خلاصة خدمة
طبعا شنو فائدة الموقع انه راح يخاطب الجهات اللي اصدرت الشهادة بطرقه الخاصة لكي يتاكد من صحة الصدور فشغلة انه اي واحد يطلع خلاصة خدمة من مريدي انسه
وطبعا انتة تكدر تبدي باول امتحانين بدون حاجة ان يكون التاكد وصل لكندا لان هوة ينام بالعراق اشهر بس لمن تجي للامتحان الثالث يريدون التاكد واصل لكندا
طبعا مو تنسة التوفل بدرجة عالية 
هسة هاي الحلقة الاولى وبعدين اكمل الحلقة الثانية لان تعبت

اخوك عبسي

[MAGGIC]

اخي العزيز عبسي

الف شكر لهذة المعلومات والله يوفقك

بس تقصد شهرين طب مجتمع يعني بالمراكز الصحيه ؟؟

والنفسيه طبيعي لانها فرع من الباطنيه فهاي سهله

بس شغله الجداريه ما نقابه هاي جديدة مشكله وانا مامجدد الهويه من السقوط

انتضرك بالجزء الثاني ههه


تحياتي الك ياورد

[اريد وطن]

اخونا عبسي

سويتلك نداء انشاء الله تقراى وتكلي رائيك ويارب يجعلك سعيد ومرتاح

كلي مكتلي صوبه علاء الدين شلونها وياك تريد اجيبلك فتيله كستانه كلي واني حاضر واذا تريد شويه نفط يعني تنكه ام 10 لتر تكفيك حاضر تعرف اني عندي وزن ماكدر اجيب اكثر من هيج

اخوك اريد وطن / عذرا اخونا MAGGIC دخلنا على موضوعك بس عمي عبسي السفير ومنكدر نتستغنى عنى

[عبسي]

اخي العزيز MAGGIC
بالنسبة لشغلة النقابة فحضر فلوسك السنة الوحدة التجديد ب50 دولار فانتة بالوجه مطلوب 350 دولار اضافة الى انه حسن سيرة وسلوك من النقابة هم فد 50 والجدارية 50 واليسويلكياها هم تنطيه جم فلس مال الريوك فاحسب حسابك زين
الموضوع الثاني انه بكندا بعد ما تخلص الامتحان الاول وتكون واصلة الفرفيكيشن مال الجدارية والترانسكربت و الجدارية مال النقابة وخلاصة الخدمة تبدي تقدم على اقامات وكل مقاطعة تختلف عن الاخرى يعني وحدة يجوز ما تريد خلاصة خدمة وحدة ما تريد مال النقابة بس الكل يريدون الجدارية مال الكلية والترانسكربت مال الدرجات والتوفل والنجاح بالامتحان الاول للتقديم وبعد ما تنقبل لازم تكمل الامتحانات الباقية
سوال يطرح نفسة ويتمرغل بالكاع اخي العزيز انتة خريج العراق؟
وشلون راح تحصل خلاصة خدمة اصولية من بغداد وهل انتة داومت باقامتك الدورية نفسية اكثر من شهرين لان اخوك واكفة شغلة خلاصة الخدمة هسة ما اعرف شلون ادبرها


اخي العزيز اريد وطن
يمعود وينة النداء اشو دا ادور بالمنتدى ومدا الكية وين مختلة
بالنسبة للنفط لا تكلف نفسك لان متفق وية ابو عربانة مال نفط هنا بتورنتو كل اسبوع يجيبلي جلكان ابو العشرين لتر بس سعر سوك السودة 
بس فتايل اصلية ما متوفرة هنا بالشورجة مال تورنتو

اخوكم عبسي

[MAGGIC]

حبيبي الغالي  عبسي

والله ماقصرت بالاجابه وتسلم وبارك الله بيك وان شاء الله الموفقيه

بالنسبه الي

انا خريج العراق صحيح بس قديم وعندي خلاصه خدمه مصدقه بس مامصدقه من الخارجيه ( خلاصه خدمه اصوليه )

بهذة الخلاصه مفصلين دوامي بالايام تفصيل ممل مو بس الفروع الرئيسيه لا حتى الفرعيات مثل النفسيه والجلديه والكلى الاصطناعيه والحروق والتجميليه والخخخخ

قبل كانو مضبوطين بالشغل

تبقى المشكله الوحيدة عندي بس ويه نقابه الاطباء ومن اتصلت بيهم رادو الهويه الاصليه بالنسبه للفلوس سهله بس المشكله اخاف يعرقلوها بالنقابه

وبالمناسبه انا الجداريه ممصدقها من الخارجيه

وباقي الاوراق مصدقه

[عبسي]

اخي العزيز maggic

بالنسبة لشغلة النقابة هسة صايرين كلش مرتبين اي واحد يكدر يراجعلك ويدفع الرسوم ويكدر يخلصلك كل الاوراق

اي مستمسك راح تقدمة للpcrc ميحتاج يكون مصدق من اي جهة لان همة اصلا مراح يعتمدون اي تصديق او اي ختم راح يتاكدون من الكلية او الدائرة اللي صدرتلك الشهادة او الكتاب مباشرة بمخاطبات رسمية وهذا اللي ياخر الموضوع حاليا

تقبل تحياتي وتمنياتي بالتوفيق

اخوك عبسي

[MAGGIC]

شكرا اخي العزيز عبسي

وبارك الله بيك على هذة المعلومات وان شاء الله التوفيق الك ويسهل امرك وتنحل عقدتك مال خلاصه خدمه

بارك الله بيك

تقبل تحياتي