هنا همينة رد من الاخ شبعت من الاهرامات ( تجربه شخصيه))
السلام عليكم
ولايتي هي تكساس مدينه اوستن
طبعا اوستن هي عاصمة تكساس الجو تقريبا مثل جو مصر بارد بالشتا ولا توجود ثلوج وبالصيف حار رطب واحيانا مطر .مدينه نظيفه اكثر من بقية مدن تكساس لانها تعتبر العاصمه يوجد عرب وعراقيين بيها بس اقل من هيوستن ودالاس ويوج محلات حلال هوايه واسعارها مو اغلى من المولات تقريبا نفس السعر واكو محلات باكستانيه اسعارها ارخص مثل شاهي سكانها امريكان ومكسيك بس حاليا اكو نزوح كبير للامريكا وهويه تحولوا وديتحولون لتكساس لان يتعبرونها ولايه غنيه وموهوايه متاثره بالازمه الاقتصاديه اسعار الايجارات لشقه غرفه وحده من 550 الى 700 دولار وغرفتين من 650 الى 1000 دولار حسب المنطقه ونظافة المجمع ,اكو منظمتين لاستقبال الاجئين هي الكريتاس وال ار اس تي اني شفت الكريتاس احسن بهوايه من المنظمه الثانيه .بالنسبه للفود ستامب للاعزب ينقطع في حالة يشتغل براتب همه يحددوا اله وللعائله ايضا ينقطع اذا صار دخل العائله رقم دائرة الفود ستامب تحدده بس يبقى للاطفال والتامين الصحي يبقى 8 اشهر فقط ولا يشمل الاسنان وللاطفال يبقى لسن ال 21 وشامل كلشي ,بالنسبه للعمل اكو يشتغلون ويه الجيش مترجمين وممثلين بقواعد واكو يشتغلون بمحطات غسيل السيارات واكو كاشير بمول واكو اشتغلوا بفنادق واكو اشتغلوا بمحلات عربيه واكو قسم التهوا يدروسون لمعادلة الشهاده واكو لحد الان بدون عمل (هذوله الي انكليزيتهم ضعيفه لان هنا من يريدون يشغلون شخص لازم اقل شي شويه يفتهم عليهم حتى لو ايطكطك وياهم بس الي ميفتهم ولا يعرف شويه ايجاوب هذا مشكله من يشتغل حتى المنظمه اتحيير وين اشغله.واكو هنا برنامج دراسي يطول 5 سنوات ويتخصص (مساعد طبيب اسنان_مساعد صيدلي _اشعه_سونر)بس لازم يتعاقد وياهم ابد ميترك الدراسه ورها همه يعينوا بمكان لازم ميرفضه وتكون الدراسه باجور رمزيه
بالنسبه للسكن ايضا موجود السكشن 8 والهاسنك بس منصحونه بي لان كالوا مناطق جدا تعبانه (خصوصا الي عنده اطفال بالمدرسه لان راح يختلط بيهم و واحد مامسموحله ايخلي اطفاله بمدرسه بغير منطقتنه) بس الي ماعنده اطفال بالمدارس مو مشكله (الي ساد بابه محد اله علاقه بيه ولا احد يتحارش بيه)
واتمنى الموفقيه للجميع
وهنا رد من
احلى بابليه اوستن \ تكساسالســـــــلام عليــــكم اخوان شلونكم اخباركم ان شاءالله تكونون بخير كلكم
بعد مرور شهر علينه في امريكا اتوضحت عدنا هوايه امور جانت مخفيه ومنها كانت غير مخفيه لكن التجربه
غير عن السمع ..
الحياة في امريكا -
الحياة بأمريكا تختلف هوايه عن العراق ودول الجوار وبكلشي اكو تفاصيل كلش هوايه لازم الشخص يعرفها ويتعلم عليها وبكل شي عدهم تفاصيل مثال على هذا الشقه بحد ذاتها تختلف خصصولنه دوره خاصه فقط علشقه و كيفية استعمال التبريد والتدفئه بصوره اقتصاديه و على جهاز تنبيه الحرائق وحتى عرفونه بلحشرات
مال الولايه ومتتخيلون ادق التفاصيل طبعا هاي كلها اكيد لصالحنا ...
الحياة هنانه اكثر جديه وحياتهم عمل ثمه عمل ثمه عمل ماكو سهر تالي الليل و بلويكيند يعزلون من ساعه 8 يعني كاعدين بلشقه وكئابه امريكا مو مال ونسه ابد جديه بمعنى الكلمه .. اخاف واححد حاط اباله يتونس من هسه خلي يعرف حتى متصير عنده ردة فعل واعتقد هنانه همه ونستهم بلشغل .
اللغه كلش مهمه طبعا اكو هنانه دورات ومجانيه ومدتها 5 سنوات يعلموك اللغه مجانا واكو 25 سنه حسب البرنامج و مدرسه التعليم..... بس الي ميعرف لغه يحس نفسه تايهه
طبعا اغلب البنات الي يجون وحدهم تكون كلش صعبه عليهم والاغلبيه يرجعون لحد الان اعرف 5 بنات وحدهم كانت صعبه ممكن البنيه تقاوم لو كانت اول سنه مع اقارب الها يعلموها على الحياة الجديده بين ما تتأقلم ..
مخصصين دورات حول كل المواضيع ومن ضمنها اكو دورات عن تربيه الاطفال و طريقه الكلام و الحديث مع الاطفال والكبار عموما الملاطفه و طولة البال والخلك الطويل و اكو برامج للاطفال حضانه او ما شابه اتهيء الطفل قبل المدرسه من عمر اعتقد 2 الى 6 سنوات واذا متكدر تودي للحضانه يدزولك بيبي ستر خاصه للطفل بلبيت اتعلمه وتكعد وياه ساعات طبعا هاي البرامج مجانيه هنا العنايه بالاطفال لا توصف
و هاي الدورات للمتزوجين وغير المتزوجين الي يحبون يروحون ويسمعون الحديث ويستفادون بلمستقبل ..
يعني بكد ما هنا الحياة ممله بمعنى الكلمه وجديه وضوجه وكئابه بس الانسان الطموح والانسان الي عنده قابليه وقدره على التحمل راح يتعلم على الوضع وراح ينجح ويكافح حتى يحقق كل اماله وطموحاته ومثل مكالو ويكولون هذا بلد الفرص واكيد مو من شهر وشهرين الانسان يحقق احلامه تحتاج اشهر وسنوات
وان شاءالله الكل توصل وترتاح ..
واحلى شي بامريكا الكل مبتسم وبشوشين و يحبون مساعدة الغير على قدر ميكدرون
طبعا هاي الاميركان ..والكل سواسيه يعني ماكو تفرقه مهما يكون و الكل نفس الحقوق ماكو طائفيه ماكو عنصريه وما الى ذلك
بلنسبه للامان اكو سرقه واكو واكو لكن على حسب المنطقه والمجمع والله يحفظنه من كل شر
اخيراً وليسه اخراً الي عنده هدف هنانه يكدر يحققه بس يحتاجله وقت والفرق بين امريكا وباقي الدول انه هنانه من تشتغل وتتعلم وتتعب يقدرون تعبك وعملك وتصعد يوم وره يوم .. وهاي الحاله صعب نشوفها ببلدنا
اختكم الي ما تنساااااااااااكم محتاجه دعائكمممم بلصبر والموفقيه ,, احلى بابليه
اولا اوستن هيه التابعه لولايه تكساس و احب اكول كل ولايه تختلف عن الاخرى مثلا الايجار ايضا يتراوح بين 600 الى 1000 هاي الشقق المي للعوائل عادتاً 40 - 50$ الكهرباء من 70 -100 وطبعا اكيد هاي نسب غير ثابته الانترنت اكو اشكال .. التلفون ايضا بي اشكال انظمه و تدفع شهريه 30$ او 40 او 50 كل شهر اجور السلع الاكل اسعاره مناسبه بس الخضار غالي ولحم الحلال غالي نسبةً للحم العادي
بس باقي المواد الغذائيه مناسبه واكو اشكال شركات شويه شويه واحد يتعلم ياخذ الشي الرخيص وبجوده لابأس بيها والملابس اكو اسعار مناسبه واكو غالي وبلمنتدى هواي تفاصيل على الاكل والملابس ..
اولا الله يسهل عليكم ان شاءالله و توصلون بلسلامه
بلتأكيد تكدر خصوصا اذا كان شغلك فول تايم تكدر تشتغل وتشتري سياره و تركض والعشا سوشييييييييييي مو خباز
بس شويه شويه الشغل قليل و بس الي عنده معارف او المنظمه يدبروله شغل وشويه شويه يكدر يستقر ويرتب اموره و يحط الفلس بمكانه طبعا غساله مو بكل مكان يسمحون الك تحط بلشقه مالتك
بلنسبه للاطفال اكيد اكو حضانات بس تكون غاليه ف هنانه اكو هواي انظمه مجانيه حلوه الاطفال الهم حصه الاسد بامريكا اكو منظمات انسانيه و منظمات مدعومه من الحكومه هاي الك الحق ان تخلي ابنك يمهم قبل دخوله المدرسه بلمجان مثل مذكرت واكيد ممنوع يبقون الاطفال بلبيت وحدهم
هوايه اكو شغلات ممنوع بس هيه كلها لصالح المواطن الاميركي
تفائل وتوكل على الله و تكساس ترحب بيك من هسه انت والعائله
واي شي تحتاجة عن تكساس تلكة بهذا الموضوع العملاق
http://www.ankawa.com/forum/index.php?topic=361332.0ريفولفر
