مشكله شويه غريبه او نادره

[حارث العبيدي]

اول شي احب أسلم على الكل لان اني جديد وبعدني ماعرف أحد فسلامي للجميع
ثاني شي اني عندي مشكله غريبه شويه أتمنى انو يكون الجواب عليه دقيق

ابدي القصه اني احب وحده وهيه تحبني وتقدمتلهه واهله رفضو فتزوجنه بدون ميدرون وسوينه عقد محكمه وصدقنا وجان كلشي نضامي حته طكينه صور بلستوديو يعني جان كلشي نضامي بس اهل البنيه جانو ميدرون وبعد 6 أشهر طلع سفرهم وسافرو واهل البنيه ميدرون وألامم المتحده هم متدري فهسه السوأل هوه  شنو الحل يعني البنيه تريد اجيبني بس تخاف تكول للأمم المتحده  لان تخاف ليكولون الاهلهه ويضربوه
فهسه اريد اعرف شنو الحل أرجوووو منكم تفهم الامر والرد بجواب صحيح ودقيق
وأكون شاكر الكم

أنتضر الرد

[ابو عبد الله التكساسي]

اخي مع احترامي
سؤالك موو في محله

[ابو خالد]

اولا ..اهلا بيك اخونا العزيز حارث العبيدي ونورت المنتدى
وبعدين احب اجاوبك اذا اهل البنيه مايدرون والمنظمه هم مايدرون اكيد جميع الاعضاء هم مايدرون

حاول ان تفهم البنت وتشرح الى اهلها الوضع وتقول اني تزوجت من هذا الشخص بدون علمكم وتاكل كم طراك مومشكله لان بامريكا القانون وياها ماراح يكدرون اهلها يذبحون ويصلخون وبنفس الوقت البنت الي هيه زوجتك على سنة الله ورسوله تقدم الك طلب لم شمل عن طريق محامي وانشالله تتسهل امورك والجميع يدري

[حارث العبيدي]

هههههههههههههههههههههههههههه
مشكور شباب بس والله الرد مجان المطلوب

[angie-dawood]

مساعدات وخدمات تقدم لاجئين يصلون الي امريكا====                                                                                                                                                                                                                                                                     http://arabic.iraq.usembassy.gov/refugee_office4.html

جرب هذة الموقع بلكن يفيد
 

[migrant]

اولا ..اهلا بيك اخونا العزيز حارث العبيدي ونورت المنتدى
وبعدين احب اجاوبك اذا اهل البنيه مايدرون والمنظمه هم مايدرون اكيد جميع الاعضاء هم مايدرون

هههههههههههه   عاشت ايدك ابو خالد..  اخوية يعني انت ينرادلك موافقة امنية دبل من المنظمة و من اهل المرة..
يا اخي الله يعينك بس شغلتك م يحلها الا التفاهم مع عائلة زوجتك اول شي  

تحياتي الك والله يسهلك

[AbU.SaRa]

 أخوية العزيز حلوها بالتفاهم.ولوراح تمر ببعض المشاكل مع أهلها ..بالأخير لازم يعرفون فحلوا المشكلة هسة أحسن ما أطول ....................

[AbU.SaRa]

 أخوية العزيز حلوها بالتفاهم.ولوراح تمر ببعض المشاكل مع أهلها ..بالأخير لازم يعرفون فحلوا المشكلة هسة أحسن ما أطول ....................

[violin]

مرحبا  اخونة حارث العبيدي .
والله شغلتك شغلة مو مال واحد يكلك شسوي لان شغلة داجة مثل مكلك migrant  يردلك دبل موافقة امنية.
ويرادلك كعدة وية اهل البنية بس لازم بوجود المحلفين  . الله يعين البنية انتة شكو عليك.

[violin]

مرحبا  اخونة حارث العبيدي .
والله شغلتك شغلة مو مال واحد يكلك شسوي لان شغلة داجة مثل مكلك migrant  يردلك دبل موافقة امنية.
ويرادلك كعدة وية اهل البنية بس لازم بوجود المحلفين   . الله يعين البنية انتة شكو عليك.

[جاك جيك جكجكه]

عزيزي حارث العبيدي

اتوقع واعتقد واجزم    اللي تكدر اتسوي كل هذا الشئ من ورا اهلها    تكدر  تلكى الحل

تحياتي

جاك جيك جكجكه - الاردن

[أ.ج.ت]

اهلا وسهلا بيك.
اخ حارث اكو شي مداافتهما همة وين هسة لان دتكول طلع سفرهم وبعدين تكول الامم المتحدة اذا همة بعدهم بدول الجوار تروح لامم المتحدة وتبلغهم وتفهمهم القصة وهمة مراح يكولون لاهلها لان يعرفون حساسية الموضوع او تنتظر الى ان تستقر بدولة وتروح للمنظمات الانسانية وتشرح موضوعها وهمة راح يساعدوها.
 

[Dallas]

أخويه أني اقترح ادز مشكلتك لفوزيه الدريع ام برنامج الدكتوره فوز بتلفزيون الراي و اذا ما لكتلك حل سويهه فلم صغير و دزهه لبرنامج أوبرا .

[عكعك التطوى]

اذا تزوجت قبل او بعد مقابلتك مع مسؤل الهجره والجنسيه (المحلف) من اللازم ان تعلم مكتب خدمات الجنسيه والهجره الامريكيه بزواجك قبل ان تغادر الى الولايات المتحده الامريكيه لتحديد مقابله جديده لكليكما

اذا تزوجت ورحلت الى الولايات المتحده الامريكيه دون اخطار مكتب خدمات الهجره والجنسيه
الامريكيه عن طريق المنظمه يمكن ان يتم انهاء حالتك كلاجيء ويتم ترحيلك من الولايات المتحده
وبناء عليه سوف يرفض مكتب خدمات الهجره والجنسيه الامريكيه اي طلب للتحاق الزوج وفق
فورم (I - 730 )

[حمودي ابن زيونه]

لهذا اني اكول اتزوج امريكية وراسي بارد

[MAGGIC]

اخي العزيز

مع احترامي الك ولاراء الاخوان الاعضاء

اولا هذا الزواج صحيح شرعي بس لنفرض انت حدثلك حادث البنيه وين راح تنطي وجها يعني اسم الله عليك لو متت انت وهذا شي مكتوب علينا كلنا شلون البنيه راح تاخذ حقوقها هجي زواج انت وهيه لوحدكم تتحملون المسؤليه
ولو نفرض البنيه صارت حامل من توصل لامريكا ومكايله لاهلها شراح يسوون ؟؟

المفروض اما تشهر الزواج علني ولاتخاف والي صير ايصير وتبقى وياك البنيه واهلها يسافرون لو تطلق ليش تبقون لامنا ولا منا

وانا اعتذر منك اذا كان كلامي قاسي بس هذة الحقيقه

وبالتوفيق

[المتمني]

اخي السلام عليكم
اولا انت مرديت ولا مرة على اجوبة الاخوان اثنان انت وين تزوجتها وانا متاكد قبل ان يرد الاخوان ومع احترامي لردود اخوانا اللي ردو يجب عدم الرد باي رد للمساعدة لان الموضوع شائك جدا لان الاخ لم يشرح التفاصيل ولم يقل لنا ماهي جنسيته اخي العزيز انا اراهن بانك لست عراقي وان هذه البنت تعرضت لخدعة كبيرة واراهن ايضا على شهادتي في القانون وفي مدرسة الحياة ان هناك لعبة كبيرة حدثت وانا اعرف الحل وهو في جعبتي وانا اعرف كيف تسافر الى زوجتك المغدور بها والتي هي ضحية من ضحايا مابعد الحرب والهجمة الشرسة التي حدثت على الاخلاق في العراق انت لست عراقيا وان كنت فانت ايضا لست عراقيا هل يقبل احدكم ان يساعد شخصا قاب باستغلال اخته لو كانت هذه احد اخوات من الاعضاء الذين هبو للمساعدة فما هو الرد لديه قبل ان تردو اعرفو من هذا وما يجول بداخله واين استغل هذه البنت اي دولة من دول الجوار والحوار والاقناع توقفو فكم جريمة ترتكب بحقك ايها السفر............اخوكم المتمني ان تعرفو من هو والى اين سيصل

[نخله عراقية]

انا اتفق وياك اخويه المتمني ...والله انا كتبت رد ورجعت حذفته لانه كنت عصبيه ..بس احتاريت وانقهرت ....لانه الموضوع فعلا شائك واعوج ...وبكل مكان وكل زمان المراه هي اللي تدفع الثمن..انا اريد اقول لاخونا شي واحد اتحمل مسؤولياتك كرجل وزوج حسب ماتقول والاهم من كيفية الوصول لهناك لازم تفكر بهاي المسكينه او المغفلة او ايا كانت ..لان هاي حياة بشر.

[angie-dawood]

اخوان رجاء لا نحكم  على الشخص ولا على البنت بدون ما نعرف شي محد ميعرف شنو هي ظروفهم وليش هيجي تصرفون السبب الرئيسة يكون للاهل قبل ما يكون من الاولاد او البنات الي يخلوهم يتصرفون مثل هيجي تصرف والولد ديكول تزوج البنت على سنة اللة ورسوله يعني هي بالمحكمة زوجتة سوى صار شي او ما صار شي وهو طلب من عندنا رائنا مو كلام جارح ولا كلام تصنيف رجاء روددكم تكون منصفة واحنا الي علينا ننصح الي يريد من عدنا النصيحة والمشورة ولا تخلون الشخص يتندم انه كتب هنا واني الولد كتب بموضوعي اسال وانا اجاوب ورديت عليه ارجوكم رجاء اخوية بدون كلام تجريح ولا كلام تصنيف واعتقد هما مو قاصرين وعرفوا انه هذا الشي الي سوو لازم يتحملون نتائجة واحنا هسى نريد ننصح الاخ والاخت بطريقة شون او تصارح اهلها او طريقة يجي الولد الى امريكا ويعلن زواجة من البنت وهنا طبعا الاهل ما يكدرون يسون اي شي حسب القانون الي موجود هنا وهو بالاول والاخير زوجتة وكلام اخير لاخي الغالي المتمني

اخي العزيز ماكو رجل يجبر البنت تسوي شي مو بارادتها ولا هو ضحك عليها هي بقناعتها تزوجت وبالمحكمة هم حسب ما هو كال المهم اخواني الاعزاء رجاء رجاء الي عنده نصيحة يكولها والي ما عنده اعتقد السكوت هو من ذهب  وارجوكم  ما اريد تزعلون من كلامي لانه هنا كلنا اخوة والواجب علينا كلنا واحد يساعد الثاني
وهو الي طلب من عندنا المساعدة وياريت نكون اهل هذا الطلب        رجاء بدون رد يجرح لاي شخص

[عكعك التطوى]

اخي العزيز المتمني

نحن عندما نرد على اي موضوع ناخذ منه حسن النيه بالدرجه الاولى بغض النظر بما يضمره صاحب الموضوع لانه لايزكي الانفس الا الله تعالى الا اذا كان الموضوع خارج عن نطاق الدين او علمنا بان نيته مبيته مسبقا وبصراحه انا اتفق معك بان ما قام به الاثنان خارج عن الاصول والاعراف وقد يكونوا بدور المراهقه الطائش عند اتخاذهم مثل هذا القرار ولم يفكروا بتبعاته المستقبليه ولكن لايمكن ان نحاسب الشخص على الظن واعتقد تتفق معي على ذلك واذا تبين من صاحب الموضوع غير ذلك فكلنا نتفق معك قلبا وقالبا وحتى اذا تبين ان الشخص يضمر بنفسه شيء فمن الواجب نصحه وتوجيه الى المسار الصحيح  افضل من توبيخه وذمه لانها لاتحل مشكله

تحياتي

[violin]

مرحبا اخواني .
اني مداشوف رد من قبل الاخ صاحب الموضوع. عالعموم اريد اكلة . اذا انت مزوجهه على سنة الله ورسولة بعد ليش خايف . خايف من اهلهه لازم تتحمل المسؤولية وتواجه الموقف وتحمي البنية من اي ردة فعل من قبل اهلهه لو عبالك الزواج من ورة اهلهه لعبة .ارجو ان تتخذ القرار بأشهار الزواج وان تكون رجل بمعنى الكلمة .وهذا هو الحل الوحيد وماكو غير حل مع احتراماتي لأراء الجميع لان هذا الموضوع مايتحمل اي نقاش ولا للتفكير .بس فكر ولو لحظات شرح يصير من يعرفون اهلهه . فأرجو منك ان تحمي البنية وتكون رجل وصاحب قرار . الله يكون بعونهه ولو هية هم قصرت بحق اهلهه .
تحياتي للجميع والله يحفظكم.

[عبدالوهاب الدوري]

حبي حارث انت شغلة مسلسل سجاد وغسق فتاليتهه حيصير حالك من حال سجاد


تحياتي

[المتمني]

السلام عليكم
اخواني اني راح اناقش الموضوع بطريقة اخرى واحترم راي الاخت انجي واخوية المتاخر مثلي بلسفر عكعك اولا هو مجان يعرف انه البنية ماشيا بمعاملة السفر اكيد يعرف هاي اذا مجان مرتب يتزوجها لعله تصير بوابة للسفر في المستقبل لان اني عشت حياتي برة وشفت هواية تزوجو عراقيات بللحظات الاخيرة من السفر والموضوع الثاني انه اذا كان عراقي فماراح يسويها لان احنا العراقيين معروفين شنو الطريقة المتبعة بلزواج الزواج بلسر ماعدنا ومحاكمنا متقبل بي الا بحظور وكيل مقرب جدا الام او الاب وحتى لو كانت مو قاصر واذا حظر غير هولاء لازم اسباب واثباتات لعدم وجودهم الزواج اذن ليس في العراق واذا كانت البنية وافقت فما اعتقد تركت زوجها وراحت ليش هي لعب جهال اني شخصيا اعرف شخص عراقي كان يحب بنية واهلها مقبلو لفرق الدين وبلاردن سنة 94 اتزوجها ولما اجى موعد سفرهم (البنية اقصد) الولد كال دقيقة اخوان انتو وين رايحين اني بنتكم زوجتي وشرفي وعرضي اني ما اعوفها فقررو بعد مفاوضات الذهاب معهم لانهم لم يتركو ابنتهم ولكن هذه الحادثة حدثت مع شاب متهور وعائلة بسيطة جدا اما في حالة الاخ فما اعتقد انه شجاع ولااعتقد ان عائلة البنت بسيطة وللاسف اسال وين جان فترة انتظار السفر ليش السفر وكلتنا نعرف بيوم ويومين يصير هاي سنة ودننتظر وماكو شي ولو تزوجنا بهاي الفترة هم الطفل اجى وراح يمشي اخوان ارجو تقبل ان ماحدث لن ولم يحدث بين عراقي وعراقية ولكن يحدث بين ؟؟؟؟؟؟؟وبنت عراقية وتحياتي واسفي الى الزمان اشكر اختي نخلة علراقية واكول حتى لو جنت عصبية عبري عن رايك لان هو من الوهلة الاولى كان نوبة من الغضب على زمن العراق اللي راح

اخوكم المتمني

[cricket]

السلام عليكم
اوافق الاخ المتمني على تفصيله للموضوع واويده بنسبه عاليه وخصوصا ما يخص نقطة استعداد اهلها للسفر لان كان الاجدر به ان يفكر بالحل قبل ما يسافرون ........ والله المستعان