رجعت للمنتدى يصير لو ميصير

[أبن زيونة]

السلام عليكم أخوتي وخواتي بالمنتدى الحلو
شلونكم شخباركم مشتاق لسوالفكم طبعا غبت عليكم هوايه لأسباب صحية وأنشغاليه وهسه رجعت أريد أشارك بجم موضوع
ولو أخر موضوعين كتبتهم انحذفوا من المراقيبن وصارت بالتواثي عليه بس عادي أني لا زعلت ولا ضجت أنقهرت شويه بس عادي يمونون أخواننا المراقبين ولأن أني أحترم كل وجهات النظر فكلت أرجع اشارك بهالمنتدى لأن أذا ماكو واحد يختلف وياك بالرأي شلون تتطور وتمشي الحياة المهم ماادوخكم أحب أسلم على أبو عبد الله واكوله رجعت على المنتدى وان شاء الله اطير لأمريكا طولت بس تفرج أبو عبد الله ولخاطر أبو مريم الحلو  وفروسي الوردة اصدقاء عمري وأخوتي اليوم راح أدخل بموضوع اني جربته وانلجعت بيه والي يحب يستفاد من تجارب الأخرين هلا بيه والي ميحب ميه هلا بيه وأنتظر تعليقاتكم الحلوة بعد ما الله يبعد عنا حذف اعزائنا المراقبين عمي ترى دأشاقه وياكم مراقبينه
طبعا أني رفضت أمريكا للأسباب الي ذكرته قبل بمواضيعي وهوايه لاموني وقليل ألي كالوا قرارك صح هاي أول بوري بس أحجي على نفسي الصدك ضيعت تجربة يجوز تكون زينة ويجوز تكون لا بس المفروض الواحد ميسمع لحجي الناس وهذا مو ندم مني ولا ضعف شخصية أنه أسمع  الناس وهي الي تمشيني بس لازم الأنسان يسمع تجارب الغير ويحسبها بعقله بس ثبتلي المثل العراقي الحلو (لتكول سمسم الأ لمن تلهم) يعني الواحد المفروض يسمع لتجارب الأخرين بس تبقى هو الي يشوفه والي يقدره بعقله وطبعا ظروفه همين تدخل بالحسبة بس ليش هيجي داحجي لأن صارت سالفة ويايه أني وزوجتي ظليت أضحك عليها تحملوني وسمعوها رحنا للأمم دنجدد الوثيقة مالتنه وطبعا سوالف العراقيين نفسها أمريكا تعبانه وأستراليا مو خوش وكندا صايره زباله المهم محد راضي بلي طلعله مو هاي السالفة كعدنه يم وحده زوجتي طبعا ذاكرتها توب بل حسد سلمت عليها بس قبلها ذكرتني بيها كالتلي هاي جانت ويانه عدها مقابلة بiomبمال امريكا حلو اتذكرتها طبعا سلمت عليها وذكرناها هي مريه بالأربعينات سألتنه ها شصار مال امريكا وياكم كتلها والله رفضتها بسبب ظروفي وصارت بسرعة وترددت المهم جتي أجابتها مثل الصاعقة على راسي كالت زين عفية عليكم وزين مطلعتوا وزين رفضتها ليش أجابتها صاعقة لأن نفس المرية قبل كم شهر بiomسبحان الله جان حجيها وين من كتلها دأفكر أرفضها قبل مقابلة المحلف كالت ليش وانتوا دتتبطرون واكو ناس تتوسل يكولوها يمكن طلعتلكم امريكا ولتسمعون حجي الناس واحسن دولة وكرابتي هناك ومحد يموت من الجوع المنظمات الأنسانية والكنائس والجوامع تنطي مساعدات المهم ساعة وهي تخرط براسنه بوكتها طلع الفلم العينتين رافضيها أمريكا فصارت امريكا كخه وطالعتلها أستراليا وصارت أستراليا جنة ومحاضرة على استراليا احسن دولة وبلكي تطلعلكم ولتضيعوها كتلها لمرتي هسه استراليا اذا رفضتها لتشعل سلف سلفات الأستراليين المهم مخلص الحجي أنه الواحد المفروض بعد تجربتي وهذا رأيي أنه ليستعجل بالرفض على أمريكا وهاي ترى مو دعايه لأمريكا لأن أني رفضتها  وماأحبها بس أحسن من الدول العربية لأن يجوز الله يوفقك ويصير عندك مستقبل بيها ونصيحتي لتسمعون الحجي او اسمعوا الحجي بس لتصدكون كلشي لأزم ترحون وتشوفون وتجربون
 والله يوفق الجميع ويسهلها علينه وعليكم لأن أني هسه بمعركة جديدة ويه الأمم على ملف التوطين ويوميه عركه وكتبت مناشدة علمود يشوفونه دولة الخ بس حجيهم أنه توطينك بعد صعب صعب صعب جدا ففكروا زين قبل متاخذون قرار مصيري شكرا الكم تحملتوني على طول الموضوع
 

[/b]

[angie-dawood]

واللة اخي حسب عنوان موضوعك ليش ما يصير هذا البيت بيت الكل وابوابة مفتوحة دائما للكل وكلنا عائلة واخوة ومليون هلا بيك اخي العزيز وانشاءللة ربي يفتحها بوجهكم وتسافرون وتستقرون كل واحد ياخذ نصيبة وانت شوف ربك وين مخلي نصيبك المهم هو الاستقرار وراحة البال وكل التجارب تصير عبر للانسان يتعلم منها
ومهما ملك الانسان يظل يطلب المزيد اللة كريم اخي انشاءللة ربك ينطيك على صبرك وطيب قلبك ربي يوفقك وكل الهلا بيك مرة اخرى

[ريم عبد]

كل الهلا بيك وبرجعتك وهذا البيت ابد ميرفض احد من بابه
وياربي ايسهل امرك وايسهل على كل المنتضرين وايهون عليهم
وربي ايوفقك

[الاسد الجامح]

ها خوتي ها  ..........


هلا بيك هلا وبجيتك هلا



 

[ابو عبد الله التكساسي]

اخي العزيز ابن زيونه الف هلا بيك مره ثانيه بالمنتدى الغالي عين كاوه وااكدلك انه المواضيع الي انحذفت اكيد بيهه شي ما يخص الهجره واللاجئين فلا دير بال ولا  تضوج واحنا كلنا بخدمتك بس كول وتدلل

طبعا من فتره وانت ما كاتب من ايام موضوع الي طلعتلكم ولايه ايرزونا والحقيقه اتوقعت انه من راح افتح رسالتك هاي راح اشوف انه انت بامريكا (( ولكل حادث حديث)) المهم انه انت بخير والحمد لله واي بلد راح تختار فاكيد بالامور الانسانيه راح ايكون افضل من امريكا من ناحيه المساعدات والامور الاخرى وانت صاحب عائله واكيد اعرف بضرفك من عدنا اذا القرار قرارك وحدك وبالتوفيق وحد يكدر يحجي وياك بهذا الموضوع لان انت جبير واعلم بمصلحة عائلتك
اخي الغالي اني سعيد انه ذكرتني بالاسم واشكر مشاعرك مره اخرى
اخي عوده حميده والف  هلا بيك بالمنتدىالي عمره  ما طرد احد منا الا ان كان الشخص مو اهل لان يكون اخ بهذا البيت الجبير واكيد انت اكثر من اهل لهذا الشي
اخي هاي المره الي حجيت عليهه بالمقابله (( تره مو اول عراقي يقيم الي يريده من منضاره الخاص وانما كل العراقيين يسوون هيج )) من يمنى غفور رحيم و يم غيرنا شديد العقاب وهم الله كريم لان احنه ما فد يوم عجبنا العجب ولاي شي شفناه والتارخ يحكم بهذا الموضوع
اخي الغالي اذا انت من زيونه احب اذكرك انه اني ابن الغدير ولمده خمس سنوات ومنذ تهجيري من الكرخ احنه بهاي الحاله جوارين من بغداد  واذا ما اجيت لامريكا اني اجيك لاستراليا وبيك خير وتدلل

تحياتي الك وللعائله الكريمه ولاولادك وان شاء الله ربنا يقدم ما بيه الخير الك ولاهلك لان انت انسان طيب ضاقت الدنيا بيه حالك حال العراقيين الي متهجولين في كل بقاع العالم
الله يساعدك واهلا من جديد

اخوك ابو عبد الله التكساسي  

[violin]

هلا بيك اخونة ابن الزيونة.
الله يعوضعك بغيرهه انشاءالله تطلعلك دولة زينة تخدمك وتخدم عائلتك الكريمة.
واريد اكلة لبو عبدالله التكساسي انته روعة وكتاباتك اروع اني متابع مواضيعك وردودك واستافديت من خبرتك.
الله يوفقك ويوفق الجميع.

[عكعك التطوى]

حبيبي اهلا بيك ابن زينونه مره اخرى بين ناسك واحبابك واتمنالك التوفيق والفوز في معركه التوطين

تحياتي لك

[Aram2003]

سلام عليكم الاخوة الاعزاء وتحياتي للجميع
صحيح كلشي الي كتبتها هوايه عراقيين  يكولون امريكا موزينة وامريكا تعبانة وكذا وكذا بس الي بالكلب يختلف قبل فترة عندي واحد صديق اخته بامريكا صارلها سنين سالته اشلون الوضع كال موزين وماكو شغل وماكو الي ماكو وانت ظروفك زينة وراها ابفترة خابرني ويسالني اشلون يقدم.....
وعندي صديق راجع من امريكا او عائدمن المهجرهو الرجال ما كال شي وكال العودة مالته بسبب زوجته وزوجته كلبت الدنيا او وكعت امريكا من عيننا واني اتندمت عل اليوم الي قدمت عل المعاملة وحاليا وقبل جم يوم
 سمعنا هي ندمانة وتريد هم ترجع لامريكا والسبب كهرباء يمنا ماكو
السفر الى امريكا هو حلم الملايين بس اكو شي واحد وهو القناعة الشخصية والدعاء لله عزوجل عسى اذا كان بيها خير  يصير
انشاءالله الكل يشوفون الخير  

[أبن زيونة]

السلام عليكم أخوتي وخواتي الاعزاء والغاليين
مشكورين على كل مشاعركم الي متعجبت منها لأن أنتوا أصلكم طيب مثل معظم العراقيين وأني أعرف هذا المنتدى مفتوح للكل وهو بيت الكل
أشكر أختي أنجي الوردة على دعائها الحلو وعلى مشاعرها الصادقة
ا لأخت ريم مشكورة على تعليقج الحلو والصادق
الأسد الجامح أنت فنان والله ضحكتني هوستك ورجعتنه لأيام العراق
أبو عبد الله التكساسي بارك الله بيك وأنت أنسان محترم ودره وأني متندم مجيت لأمريكا لأن راحت عليه فرصة التعرف على أنسان راقي مثلك وجنت قريب عليك بأريزونا الله يوفقك وأني بعدني بالأردن بس ادعي من الله اشوفك واتعرف بيك لأن هذا شرف الي وانت جيراني من الغدير ذكرتني بأيام الدروس الخصوصية استاذ بهنام  أبو الأنكليزي ومن جنه نبوك السيارة ونفتر بفروع الغدير ومحل التوت وصمون لبنان وديباج مشكور اخويه
فيلون مشكور او مشكورةمااعرف ولد لو بنيه وشكرا على دعائكم ومشاعركم الرائعة والله يوفقكم
عكك اخ عزيز أنت وردة مال الله والله يبارك بيك
ارام مشكور على تعليقك

[ابو عبد الله التكساسي]

اخي ابن زيونه
اكرر
الله يوفقك ويفتحهه بوجهك وين ما تروح
وبس الله اليدري اشلون الوجوه تتقابل وصدكني البارحه شفت شخص بالصدفه بشارعنا بهيوستن
والله يمكن اخر واحد اتوقع اشوفه اهنا
ف مو بعيده على رب العباد ان نتشاوف باي مكان
تحياتي

[القرش]

                                    السلام عليكم

ياكل الهلا بيك ويانه من جديد وهذا بيتك الثاني ونرحب بيك والمنتدى منور بعودتك .والله يوفقك واتمنالك كل السعاده والازدهار .

ابو انس
شيكاغو

[ام فائز]

اخونا ابن زيونه  وجيراني لان اني كنت ابزيونه بعد التهجير
تره التوفيق من عند رب العالمين وكلها اسباب يخليها كدام الشخص والشاطر يستفاد منها  والتوفيق تره مو بس بامريكا هو بكل مكان اذا الله يريد يوفقك يوفقك حتى لو كنت بالماو ماو وانت اكيد كانت الك وجهة نظر واسباب معينه خلتك ترفض امريكا صحيح امريكا مو سهله العيشه بيها بسسسسسسسسسس كوله واحد مغترب الا بامريكا اكثر من عشرين سنه يكول التعب بيها يسوى لان كلها خير  وهذا مو دفاعا عن امريكا  بس هذا كلام ناس عايشين هناك
المهم اهلا وسهلا بعودتك ونطلب الرب العزيز ان يوفقك بمعركتك ويكتب الك النصر
اختم ام فائز
عمان

[أبن زيونة]

السلام عليكم
هلا بأختي وجيراني ام فائز تسلمين والله يوفقج ويبارك بيج وكلامج أكيد صحيح مليون بالميه التوفيق من رب العالمين والمكتوب نشوفه وأني أبويه  الله يرحمه خريج أمريكا وعاش أكثر من 30سنة هناك وجان يحجي على أمريكا وشنو بيها وشنو الفرص الي بيها والي يتعب يلكه ومتفق ويه الكل أكو بيها مستقبل للي يريد مستقبل
أختي أسوود ممنون ألج والله يرزقج ويخليج وأنتي عالراس وحشاكم وأسف على لفظة زبالة بس حبيت أوضحلكم الناس البطرانه شنو حجيها
أبو انس الورده ممنون حبيبي والله يبارك بيك والمنتدى بنور بيكم والله يكتبلك السعادة والصحة ولكل أهلك

[مظلومه سوادي]

اخي ابن زيونه
هلا بيك عيني وكلامك عالعين والراس
ومايفيد اللوم بعد يعني مايرهم انكولك ليش ماقبلت بامريكا ومن هالسوالف لان انت اذيت نفسك ودتعرف شكد
كلفك هذا القرار
المهم اخي ان شاء الله يطلع توطينكم على احد الدول وبالتوفيق

[dark eyes]

لا ما يصير يلا برى









امزح ويااك لا اتصدق

هلا بيك هله وبجيتك هلا نورت المنتدى ابجيتك

وكل عاام وانت ابخير اخوي الفاضل (مقدما)

[الله...محبة]

كل الهلا ابن زيونة الورد
هاي هي الحياة... مدرسة (بس ما بيها فلتة وجكاير ورة الحمامات )
بس صدكني الامتحان اللي مريت بيه رح يفيدك بالمستقبل لان حساباتك رح تكون اكثر نضج يوم بعد يوم
وتأكد انه الله رح يعوضك بفرصة اكبر (وإن تتأخر قليلا) لانه الله ارحم واحن من ان نتصوره
اتركها على الله وهو صاحب الحلول الرائعة

الله محبة

[أبن زيونة]

السلام عليكم
مشكور أخوية الله...محبة وكلامك صح هي مدرسة ودنتعلم بيها ولو العراقيين أخذوا دكتوراة بالحياة من المصايب الي شافوها بس يبقى الله ارحم الراحمين والله يوفقك ويوفق الجميع
أويلي عليك أبو العيون السوده خرعتني داكول هذا شبيه ممنون أخوية والمنتدى بنور بيكم وأنت بألف خير حبيبي أن شاء الله سنة سعيدة عالكل
شكرا أختي مظلومة سوادي وحجيج ذهب أكيد الواحد ياخذ قرارات مرات غلط بس نتعلم والله يعوضنه مثل مكلتي مدام أكو خيرين مثلكم يدعولنه والله يوفقج ويبارك بيج