السلام عليكم,
للاخ الي قال ليش مدفعتوا 100 دولار ونزلتوا على الفندق اقول اخويه انته متوهم لان اني زوجتي حامل وكنت مبلغ الاي اوام والي صار انتظرنا في مطار عمان 14 ساعة, حاولت ويه موظف الاي او ام وكتله ادفع اجور فندق المطار بس نزلونه كال خلي اتصل والحراميه كالوا قد تكلفك 700 دولار للكم ساعة كلتهكم هوايه بعدين اتصلوا كالوا لا ممنوع كتلهم اوكي اني والطفلتين ابقى هنا بس خلوا زوجتي تنزل على اي مكان ممكن تتمدد بيه كالوا ما كو مكان الى بالجامع بصاله الترانزيت وعلى الكاع وبدون غطه ومع الرجال اللي ملكوا غير مكان, قسم من اللي طاروا معنا من بغداد نزالو عل الفندق مع العلم بان طيرانهم سيكون مباشر الى اميركا بينما احنا بعد الانتظار لمدة 14 ساعة طرنا الى فرانكفورت لمدة 6 ساعات ثم انتظرنا سبع ساعات وطرنا بعدها الى فرجينيا لمدة تسع ساعات وبعدها اجراءات الدخول يله ودونه عالفندق, الفرق بمطار فرانكفورت كان شاسع بس كتلهم زوجتي حامل كعدونه على كراسي بمكان خاص بالمحتاجين مساعدة بالتنقل واطونه تكت بعدين اثنين بنات حبابات كلش ودونه بالسيارات الصغيرة الداخليه ونزلونا وصعدونا بوحده ثانيه وبعدين بالاوفر هيد ترين الحد موصلونا للتيرمنل وكملنا تفتيش وكالولنا تحتاجون اي مساعده بعد كلناهم ما قصرتوا ابدا ومشكورين والله يرضا عليكم وحتى عرضوا يودونه على الطبيب( ودونه على مكان بيه اسره لاستلقاء) اذا انريد بس كلنالهم لا شكرا اخاف نتاخر على الطيارة. الفرق واضح وكبير بين البشر بمطار عمان من سئلت ليش قسم من المسافرين نزلتوهم على الفندق وناس لا جان جوابهم القبيح لان هما طاروا من بغداد لعمان على الملكيه الاردنيه وراح يطيرون لاميركا على الملكيه الاردنيه بيما احنه راح انطير لالمانيا على الوفتانزه الالمانية يعني ممحصلين من عنده زين شوفوا الحقارة وميكدرون يحجون ويه الي سووه الحجوزات بس يطلعوه بالعراقيين ويخلون الاي او ام تدفع فلوس وجبتين بالمطار علمود يستفادون. من تجادلت ويه الموظف وكتله اني ادفع اجره الفندق راد ايخوفني ويكلي ذاك ابو المخابرات يدسمعك ومي يقبل واشر لي على واحد ابو شوارب كثة كريه كتله اوكي صيحلياه ورفض اني صحته وكلي لا لا تكله اني كلت ابو المخابرات بعدين حجيت ويه ابو شوراب مكدر يكول اي شي ودار وجه وراح. اسف طولت عليكم بس فعلا جانت رحله صعبة مع طفلتين وزوجه حامل بس ردت ابين الفرق للاي ايكولون ما اكو فرق بين مطار عمان وباقي مطارات العالم.
