܀ ܠܐܘܼܦܩܵܐ ܕܚܹܐܪܘܼܬܼܵܐ ܀
ܒܲܣܵܐ ܡܓܕܝܼܠܘܼܬܼܵܐ ܘܣܦܲܪܬܵܐ ܠܝܲܘܡܵܢ̈ܐ
ܡܸܢ̄ܕܪܹܫ̄ ܠܹܐ ܗܵܘܸܢ ܓܠܝܼܕܵܐ ܠܛܘܼܪ̈ܢܹܐ
ܡܲܪܥܫܸܢ ܓܵܐܢܝܼ ܪܥܵܫܬܵܐ ܕܪ̈ܘܼܚܵܢܹܐ
ܕܒܵܢܸܢ ܩܘܼܦܪܵܢܝܼ ܒܫܟܘܼܪ̈ܐ ܪ̈ܵܡܵܢܹܐ،،
ܒܵܬ̄ܪ ܟܘܼܟܼܒܼܵܐ ܫܸܠܝܵܐ ܒܐܵܬܸܢ ܓܵܘ ܠܸܠܝܵܐ
ܩܠܝܼܕ̈ܐ ܒܐܝܼܕܵܬܝܼ ܕܦܲܬܚܸܢ ܠܬܲܪ̈ܥܵܢܹܐ
ܓܵܘ ܬܗܘ̇ܡܵܐ ܕܚܸܫܟܵܐ ܒܥܲܝܢܝܼ ܢܲܛܪ̈ܢܹܐ
ܣܲܚܒܪܸܢ ܠܥܲܦܪܝܼ ܘܚܲܝܪܸܢ ܠܡܲܪ̈ܙܵܢܹܐ
ܕܠܵܐ ܢܲܦܠܸܢ ܡܢ̄ܕܪܹܫ̄ ܒܩܥܘܼܠܬܵܐ ܕܟܡܹܐܢ̈ܐ
ܥܲܡ ܥܲܠܕܝܼܵܢ̈ܐ،،
ܦܲܣܥܸܢ ܠܲܩܲܕ̄ܡܵܐ ܠܫܒܼܝܠܵܐ ܕܩܘܼܝܵܡܵܐ
ܠܦܘܼܬܼ ܗ̇ـܝ ܐܝܼܬܼܘܼܬܝܼ ܡܠܸܠܝܵܐ ܠܐܝܼܡܵܡܵܐ
ܕܠܵܐ ܗܵܘܸܢ ܛܸܦܵܐ ܡܢ ܡܛܪܵܐ ܕܥܢܵܢܵܐ
ܠܐܘܼܦܩܵܐ ܕܚܹܐܪܘܼܬܼܵܐ ܗܵܘܸܢ ܡܣܲܝܒܪܵܢܵܐ،،
ܡܢ̄ܕܪܹܫ̄ ܠܹܐ ܥܲܪܩܸܢ ܡܡܲܘܬܼܵܐ ܕܢܘܼܚܵܡܵܐ
ܠܹܐ ܫܲܒܼܩܸܢ ܟܹܐܦ̈ܐ ܒܵܬ̄ܪܝܼ ܒܸܪܓܵܡܵܐ
ܡܐܲܝܟܼ ܪܘܼܡܚܵܐ ܒܗܵܘܸܢ ܒܨܲܕܪܵܐ ܕܣܲܠܒܵܢܵܐ
ܒܐܝܼܕܝܼ ܡܲܛܵܠܵܐ ܕܦܵܣܥܸܢ ܒܪܘܼܡܪܵܡܵܐ،،
ܒܐܵܓܼܘ̇ܢܵܐ ܪܘܝܼܚܵܐ ܒܟܼܠ ܗܲܝܡܵܢܘܼܬܼܵܐ
ܕܵܒܼܚܹܢܵܗ̇ ܓܵܐܢܝܼ ܠܨܒܘܼܬܝܼ ܫܲܪܝܼܪܬܵܐ،
ܐܸܕܝܘܼܡ ܒܸܪܝܵܐ ܝ̄ܘܸܢ ܕܡܲܚܠܦܸܢ ܕܵܪܵܐ
ܒܚܸܐܪܘܼܬܵܐ ܚܲܕ̄ܬܵܐ ܡܣܵܩܠܸܢ ܩܵܐ ܟܝܵܢܵܐ
ܦܲܓܼܪܝܼ ܥܡܝܼܕܼܵܐ ܝ̄ܠܹܗ ܥܡܵܕܵܐ ܫܲܪܝܼܪܵܐ
ܠܹܐ ܫܵܥܫܸܢ ܒܚܲܝܐ̄ܝܼ ܗܲܠ ܕܡܵܛܸܢ ܠܩܲܒܼܪܵܐ
ܠܢܝܼܫܝܼ ܪܵܡܵܢܵܐ ܕܵܡܟܸܢ ܒܗ̇ܘ ܣܲܒܼܪܵܐ،،
ܕܚܲܙܝܵܗ̇ ܟܠ ܥܲܝܢܵܐ ܠܣܸܪ̈ܛܹܐ ܕܬܲܫܥܝܼܬܵܐ
ܕܗܵܘܹܐ ܒܟܼܠ ܪܸܢܝܵܐ ܗܵܘ ܚܲܒܪܵܐ ܕܩܘܼܫܬܵܐ
ܫܡܝܼ ܠܹܐ ܛܵܠܸܩ ܟܡܵܐ ܕܗܲܘܝܵܐ ܫܝܵܦܬܵܐ
ܐܝܼܕܵܐ ܕܫܲܝܦܵܢܵܐ ܡܐܲܝܟܼ ܫܥܘ̇ܬܼܵܐ ܦܲܫܪܵܗ̇،،
ܡܬ̄ܚܘܼܬܼ ܥܲܦܪܵܐ ܦܵܠܛܸܢ ܥܲܠ ܦܵܬܼܵܐ ܕܒܪܝܼܬܵܐ
ܕܸܠܩܵܐ ܒܐܝܼܕܵܬܼܝܼ ܒܙܲܗܪܝܼܪܵܐ ܕܪܘܼܡܬܵܐ
ܚܲܝܠܵܐ ܕܪܸܥܝܵܢܝܼ ܟܡܵܐ ܕܗܵܘܹܐ ܪܕܝܼܦܵܐ
ܓܵܘ ܬܗܘ̇ܡܵܐ ܕܢܲܗܪܹ̈ܝܢ ܐܝܼܬܠܹܗ ܘܲܪܝܼܕܵܐ،،
ܙܵܟܸܢ ܠܥܸܠܕܒܼܵܒܼܝܼ ܒܝܲܕ ܡܣܲܝܒܪܵܢܘܼܬܼܵܐ
ܫܲܘܦܵܐ ܕܨܸܒܼܥܵܬܼـܝܼ ܢܲܨܒܸܢ ܒܟܼܠ ܦܢܝܼܬܼܵܐ
ܕܠܵܐ ܗܵܘܸܢ ܛܲܪܦܵܐ ܛܪܝܼܦܵܐ ܒܫܵܩܝܼܬܼܵܐ
ܕܡܲܪܕܝܼܠܝܼ ܡܲܝܵܐ ܠܬܗܘ̇ܡܵܐ ܕܪܵܓܼܘ̇ܠܬܵܐ
ܕܚܲܢܩܝܼܠܝܼ ܠܲܦ̈ܐ ܕܝܲܡܬܼܵـܐ ܬܲܚܬܲܝܬܼܵܐ،،
ܡܸܢ̄ܕܪܹܫ̄ ܒܸܕ ܣܵܛܸܢ ܒܓܘܼܠܦ̈ܐ ܚܲܝܠܬܼܵܢ̈ܐ
ܦܵܝܫܸܢ ܪܲܘܕܵܢܵܐ ܒܲܪܩܘܼܠ ܓܘܼܢܚܵܢ̈ܐ
ܟܸܬܒܼܵܐ ܚܲܪܘܼܦܵܐ ܒܥܲܝܢܵܐ ܕܛܲܪ̈ܕܵܢܹܐ
ܕܠܵܐ ܓܲܪܕܵܐ ܨܒܘܼܬܼܝܼ ܡܣܸܦܪܵܐ ܕܝܲܘܡܵܢ̈ܐ،،
ܕܓܲܪܫܵܐ ܐܝܼܬܘܼܬܝܼ ܒܣܛܘ̇ܢ̈ܐ ܪ̈ܡܵܢܹܐ
ܘܝܵܪܬܘܼܬܼܝܼ ܓܕܼܝܼܠܬܵܗ̇ ܡܒܲܪ̈ܩܹܐ ܢܘܼܗܪ̈ܢܹܐ
ܚܲܡܪܝܼ ܡܥܘܼܬܩܵܐ ܝ̄ܠܹܗ ܩܵܐ ܟܠܲܝܗ̈ܝ ܙܲܒܼܢ̈ܐ
ܟܡܵܐ ܕܥܲܬܝܼܩܵܐ ܝ̄ܠܹܗ ܒܸܫ ܪܵܘܝܼ ܡܕܝܼܢ̈ܐ،،
ܐܸܢ ܥܲܦܪܝܼ ܨܗܹܐܠܹܗ ܡܕܲܥܬܼـܝܼ ܡܲܫܬܸܢܹܗ
ܐܸܢ ܟܲܪܡܝܼ ܝ̄ܒܼܝܼܫܠܹܗ ܒܕܸܡܝܼ ܡܲܬܪܸܢܹܗ
ܟܠ ܥܸܩܪܵܐ ܒܪܝܼܙܵܐ ܡܢ̄ ܚܲܩܠܝܼ ܩܲܛܦܸܢܹܗ
ܒܝܼ ܘܲܪܕܵܐ ܣܡܘܼܩܵܐ ܐܲܬܼܪܹܗ ܡܣܲܩܠܸܢܹܗ،،
ܒܸܕ ܗܵܘܸܢ ܝܲܡܵܐ ܓܵܘ ܩܵܠܵܐ ܕܠܲܝܠܹܐ
ܢܲܛܪܸܢ ܠܐܝܼܣܵܪܝܼ ܒܥܲܝܢ̈ܐ ܨܲܠܝܼܠ̈ܐ
ܩܵܠܵܐ ܕܗܲܪܗܵܪܝܼ ܡܲܫܡܥܸܢ ܠܩܵܛܘܼܠ̈ܐ
ܒܪܲܩܵܠܝܼ ܒܟܼܠ ܐܘܼܦܩܵܐ ܐܲܦ ܒܥܘܼܡܩ̈ܐ ܚܠܘ̇ܠ̈ܐ،،
ܥܲܒܼܕܝܼܫܘܼܥ ܣܵܗ̄ܕܵܐ ܝܘܼܚܲܢܲܢ
