اخوان محتاج مشورتكم وخبرتكم

[الوطواط]

السلام عليكم ان شاء الله كل واحد يقرا موضوعي يكون بخير وعافية واتمنى من اي واحد عنده نصيحة تفيدني فاتمنى ما يبخل بيها عليا
هسة نجي لموضوعنا ولشغلتي اللي دوختني وحيرتني وهي
اني طلعت من العراق قبل سنتين اني وزوجتي و3 اطفال ووالدي ووالدتي وهسة احنا بسوريا وسبب طلعتنا انو اجاني تهديد بالقتل عن طريق التلفون . وهسه اني قررت اقدم على الاي او ام  بس المشكلة وين او بالحقيقة هي مو مشكلة وحدة هي اكثر من مشكلة
اول شي ان والدي جان قاضي بالثمانينات وطلع تقاعد قبل التسعين يعني قبل حرب الكويت بس خلال فترة وظيفته كقاضي اشتغل سنة او اثنين كمستشار قانوني باحدى دوائر الدولة الحساسة بس جانت دائرة مدنية مو عسكرية . فاني هسة اكول اخاف اقدم وما انقبل بسبب وظيفة والدي وبقيت حاير ادخل اسمه ويانا لو ابقيه خارج الكيس ومن يسفرونة اسويله دعوة ؟ لو منكول انه جان يشتغل بهاي الدائرة لو ننكشف بعدين ؟ زين وعلى فرض سجلنا اسمه ويانا واجاه رفض بسبب وظيفته فهل الرفض يكون بس اله يعني بس لوالدي والباقين يمشوهم لو كلنا ننرفض ؟ واذا انرفضنا كلنا فهل يسقط حقنا باللجوء والتوطين بغير دولة لو يحولون الملف مالتنا لدولة ثانية ؟
اما ثاني شغلة فهي شغلة التهديد مالتي اللي اجاني بالتلفون شلون راح اثبت اكو هيج شي يعني هيج شغلة تمشي عدهم  ؟ اكو ناس تعرفوهم اتهددوا بالتلفون ونطوهم لجوء لو لا ؟
وثالث شغلة اذا سالوني ليش صارلك سنتين تنتظر وهسة يله قدمت على طلب اللجوء والتوطين فشنو احسن جواب اجاوبهم بيه ؟
اني ادري دوختكم ويايا واسئلتي هواية كلش بس ادري العراقيين اهل مروة ومن واحد يستنجد بيهم الكل تفزعله .
وشكرا الكم يا اهلنا الطيبين

[freeman2]

اهلا وسهلا بك اخي الوطواط
اولا بالنسبة للوالد لو تخليه بعدين لا تضيفه وياك من الاول وهذا رأيي الشخصي
اما بالنسبة للتهديد فهو مو مشكلة شلون تثبت عملية التهديد ولكن الاهم انه انت تثبته هو انت ليش تم تهديدك وليش سافرت برة العراق ؟هو هذا بيت القصيد
وبالتوفيق يارب
اخوك
ابوهدى-مصر

[عكعك التطوى]

اخويه هم وطواط وباليل وفوكاها  سائل الف سؤال

اخويه الوطواط او شي عليكم السلام واهلا بيك وعلى الرحب والسعه

هسى نجي لاسئله الامتحان بس اول شي جاوب على هذه النقطه قبل ان اجيبك على البقيه؟؟؟

1-   التقديم على iom  يجب ان تكون مشتغل مع القوات الامريكيه او الشركات التي لها عقود واتفاقيات معها فهل هذا الشرط متوفر ؟؟؟؟ وعلى حد علمي لايوجد في سوريا تقديم مباشر على منظمه الهجره الدوليه فهذه النقطه يجب ان تاخذ بنظر الاعتبار ايضا ولكن مع ذلك لا تعتبر معضله

تحياتي

[ابو عبد الله التكساسي]

الله يسهل اموركم وبالنسبه لشغله ليش اتضرت سنتين بسيطه
كول ما جنت اعرف بالموضوع وهسه عرفت
وباقي الاجوبه تجيك من اخونا الغالي عكعك التطوى بس انت جاوب سؤاله اول

تحياتي

[الوطواط]

شكرا فري مان على النصيحة بس المشكلة اخاف اذا ابقي الوالد خارج الكيس وانقبل اني وعائلتي ونسافر هم ميقبلون على والدي من اقدمله طلب الحاق بينا

شكرا اخي اسود وشكرا للاخ شوقي على الدعاء والنصيحة

اما الاخ عكعك فله شكر خاص بس احب اكله يمعود على كيفك ويانه احنا تره هم من جماعتك كلنا طيور الطايرة بس اكو ناس تطير الصبح وناس تطير بالليل واحنا جماعة الليل 
اما جواب سؤال حضرتك فهو اني مامشتغل لا ويا امريكان ولا ويا غيرهم اني جنت استاذ جامعي لا الي ولا عليا ماشي جنب الحيط بس شنسوي اذا الزمن جار علينا
بس اني مسجل على الامم المتحدة وسمعت اكو ناس دتقدم طلبات توطين من خلالها يعني همه يحولونا على منظمة الهجرة الدولية وهي توزعنا لو على امريكا لو على كندا
واي اسئلة عندك الي اني حاظر اجاوبها كلها وبلا ترك بس شوفلي حل دخيلك عكعوكي انت

[عكعك التطوى]

وطواط متكلي وين رحت بهاليل انتظر هسه يجاوب هسه يجاوب وماكو وتره سهران على مودك
لان بس يطلع الصبح بعد منشوفك
اخي الفاضل اهم نقطه هي شمولكم  بالتوطين والباقي كله سهل ان شاء الله

خلال فترة وظيفته كقاضي اشتغل سنة او اثنين كمستشار قانوني باحدى دوائر الدولة الحساسة بس جانت دائرة مدنية مو عسكرية

اخي اكو حالات انشملت بالتوطين على الرغم من كونهم خدموا بمناطق حساسه ولكن يجب ان يثبتوا بان عملهم لم يكن له علاقه بقمع او اباده او محاكمه او اضطهاد فئه من الناس وان عملهم كان اداري او شيء
اخر

زين وعلى فرض سجلنا اسمه ويانا واجاه رفض بسبب وظيفته فهل الرفض يكون بس اله يعني بس لوالدي والباقين يمشوهم لو كلنا ننرفض

اذا حصل الرفض في مقابله التوطين لا سامح الله والكيس باسم والدك وجميعكم ب بكج واحد سوف يرفض الجميع اما اذا حصل الرفض في iom وبالتحديد في مقابله المحلف فسيكون الرفض لا سامح الله موجها الى والدك فقط  واني استبعد هذا الشي

اما ثاني شغلة فهي شغلة التهديد مالتي اللي اجاني بالتلفون شلون راح اثبت اكو هيج شي يعني هيج شغلة تمشي عدهم  ؟ اكو ناس تعرفوهم اتهددوا بالتلفون ونطوهم لجوء لو لا ؟

نعم اخي يجوز كثير من الاشخاص انقبلوا وماعدهم دليل او اثبات على كلامهم بس لازم تقنع المقابل بانك
مهدد ولا تستطيع الرجوع الى بلدك

وثالث شغلة اذا سالوني ليش صارلك سنتين تنتظر وهسة يله قدمت على طلب اللجوء والتوطين فشنو احسن جواب اجاوبهم بيه ؟

هاي بسيطه كلهم مجنت اعرف شلون الطريقه الي اوصل بيها الكم او جنت تصور انه مفتوح للحالات المرضيه فقط وغيره هاي مو مشكله


تحياتي

[الوطواط]

اشكرك اخوية عكعك فعلا انت عكعك اصيل بس متكلي شنو يعني تطوي تره مدا اعرف معناتها
بقى سؤال واحد بلا زحمة عليك اذا الامم المتحدة حولتني على التوطين يعني اكدر وراها اطمان واكول راح اتوطن هاهيه يعني متظمة التوطين بهالحالة غصبا عليها تلكالي موطن اذا مو امريكا فغيرها ؟
واسف لان خليتك تنتظر بس جنت طالع بجولة تفقدية ليلية بالمنتدى 

[angie-dawood]

نعم اخي مدام ينطوك التوطين يعني حتى اذا لا سامح اللة انرفضت من امريكا راح يتحول فايلك لغير دولة وبنسبة لاسئلتك السابقة اني برائي ليش ما تقدم على اليو ان وتخلي الكيس باسمك مو باسم الوالد حتى لو لا سامح اللة انرفض بس هو ينرفض مو كل اصحاب الكيس وبنسبة لشغلت التهديد ما يطلبون منك اثبات الا اذا كان التهديد والخطف سويه هسى اختي من قدمت على اليوان كانت القصة مالتها خطف ابنها ودفع فدية بس ما كان عدها اي مستمسكات مجرد كلام بالقصة هم سالها المحلف شون دفعتوا الفدية كالت اخت دزت فلوس من الخارج وعلى هاي القصة اخذت لجوء وهي هسى بكلفونيا مقصد كلامي ما كان عدها مستمسك مال خطف او تهديد اخي العزيز قدم المعاملة باسمك لا تكون باسم الوالد وقدمها على اليو ان الي ما مشتغلين مع الامريكان وربي يوفقك يارب

[الوطواط]

شكرا للاتخت انجي على الرد طمنتيني الله يطمنج ومثل ما قلتي راح اسوي باذن الله
وشكرا للاخت اسود على الدعوة واسف لان عبالي حضرتج ولد بس العتب على النظر