السلام عليكم اخواني الاعزاء
قبل ماابدي - اني زوجة باتي و لكثرة انشغاله اني رح اجاوبكم و طبعا من زمان اني ويا نفتح نفس الاسم بس حته ليصير خلط عدكم
مشكوره اخت ريم عالموضوع القيم و رح انزل معلومات ... و الي عنده اساله خلي يسال و اني اجاوب اي سؤال يجي بالكم ( خاصه عن مدينة كنساس ستي )
طبعا المعلومات اكيد تكون متقاربه عن بقية المدن من عدة نواحي من اسعار و تعامل الناس بس معلوماتي رح تكون بصوره دقيقه عن كنساس .....
من ناحية اسم المنظمة الي تستقبلكم في كنساس اسمهه JVS
و هذا موقعهم عالنت
http://www.jvskc.org/web/english/Center_for_New_Americans.html طبعا المنظمه تستلهم اسمك و تخلي بورقه ( على اللوحة الاعلانيه مال المنظمة داخل المكتب ) يعني كل شهر ينزلون لسته باسماء اللاجئين الجدد ( يسموهم نيو امريكانز ) يعني امريكان جدد و يخلوهه بنهاية كل شهر الاسم + البلد الي قادم منه يعني اذا عندك كفيل يكر بكل نهاية شهر يروح يشوف اسمك نازل بالقائمه لو لا و يكدر يخبرك بوصولك و تاريخ طيارتك من يشوف هذه اللسته قبل ما ال اي او ام يبلغوك بيوم سفرك و هذا ماصار ويايه اكثر من مره لانه كفلت ناس
يبدون ياجرولك شقه ( اذا ماعندك كفيل و تريدهم هم يختارولك المكان ) ياجرولك شقه بالداون تاون و مدة السكن بيهه ( اعتقد ) 4 اشهر ..... و يدفعولك ايجار لمدة اربع اشهر
ممكن يخلوك على برنامج ال ( ماج كرانت ) يعني يدفعولك ايجار و ينطون لكل فرد بالعائله 50 دولار كل اسبوع
و هو برنامج جيد بس شر من شروطه انه تكلهم اني اشتغل و اريد شغل يعني - اول شغله المفروض يلكولكياهه تقبل بيهه ( ملاحظه اذا جابولك شغله و جانت بعيده عنك و ماعندك سياره مثلا او مقتنعت بيهه تكدر ترفضهه كلش طبيعي ) و محد يلغي عنك البرنامج و هذا الي احنا شخصيا مرينا بي
المهم الشقه الي تختارلكياهه المنظمة حيكون موقعهه بالداون تاون - قريب عالمنظمة - قريب على الاسواق - قريب على ( العلوه الي موجوده بالداون تاون و اسمهه الستي ماركت - قريب عالمركز الصحي الي اول متوصل توديك عليه المنظمه حته تكمل لقاحاتك انت و عائلتك )
بالنسبه لهذه الشقق اني ممكن ادبر zip code مال المنطقه حته تطلعون عليهه
بس مفايته بيهه بالداخل ابدا و مااكدر احكم عليهه لانه احنه كان عدنا كفيل و سكنا بمنطقته
- ملاحظه ::::: ممكن اذا كان عندك كفيل يروح عالمنظمة و يسالهم شكد مخصصيلك مبلغ ايجار و يدورلك شقه على مزاجك و بالمنطقه الي تعجبه او تعجبك و يرجع عليهم و ينسق الموضوع وياهم ينطيهم عنوان الشقه و هم ياجرولكياهه
- الشقه رح يخلولك بيهه اثاث بسيط الفراش ( السراير و الدواشك و البطانيات و المخاديد ) على عددكم و تكون جديده و يفتحوهه كدامكم
بقية الاثاث ميز الطعام - قنفات - تيبل لامبات شي اكيد تكون مستعمله بس زينه و لا بأس بيهه و مرتبه -
يخلولكم مسواك بسيط - يوم وصولكم يجيبولكم عشه او غده حار و جاهز
و المنظمة الثانيه::::::: الي تعتني بالامريكان الجدد هي ( دون بوسكو ) و هذه شفت اكثر شي المكسيك يجون عليهه لاجئين ( اذا جاين بطريقه شرعيه طبعا ) لانه هنا اكثر المكسيك يجون قجغ بس ميسكنون بميسوري يسكنون في ولايه ( كنساس ) لانه ميحاسبوهم هوايه على شغلات الاقامه .....
هسه دور هذه المنظمة اكثر شي هو اعطاء دروس انكليزي مجانيه ESL - English as a second language للكل
http://www.donbosco.org/و هذا موقعم عالنت
بعد وصولك رح ياخك الكيس وركر يقدملك على الفود ستامب + المدكيد و موقعم ايظا بالداونتاون و هذا موقعم
http://dss.mo.gov/طبعا انت تكدر تروحلهم ويه كفيلك او وحدك بس هي من واجبات المنظمه ياخذوك عليهم ( القصد الي ينطوكيا بالفود ستامب و المدكيد و الكاش المنظمة ماله علاقه بي )
مبلغ الفود ستامب تقريبا 3 نفرات 700 دولار و خاصه اذا عندك اطفال
الكاش 450 او 300 مدااتذكر المبلغ بالضبط
المدكيد ايظا
طبعا هذه كله تطول وياك ( اذا عندك عائله ) و خاصه اذا كان عندك اطفال اقل من 18 سنه و الى ان يصيرون اكبر من 18 يلا ينقطع
بس اذا اشتغلت مثلا رح يقطعون شويه منهه حسب حساباتهم هم
مثلا اذا عائله متكونه من كذا نفر و اشتغلتوا و دخلكم وصل لكذا مبلغ رح نقطع عليكم المساعدات
تجديد ( المدكيد و الفود ستامب و الكاش ) يتحدث كل اربع اشهر تقريبا و اذا بهالفتره اشتغلت رح توديلهم اخر اربع جكات ( اربع رواتب ) الاخيره
ملاحظه _ هنا اذا اشتغلت الراتب تستلمه كل اسبوعين او كل اسبوع
نسبة عدد المسلمين كبيره جدا يعني يوم العيد متخيلون العدد الي موجود بالصلاة و اكثرهم هنود و افغان و باكستانيين و صوماليين و فلسطينيين
المحلات العربيه موجوده بس قليله يعني الي يجي و يفتحله مشروع مطعم او صالون حلاقه _ رح يمشي شغله هوايه و الرزق من رب العالمين طبعا
المحلات العربيه الموجوده اكثرهه اصحابهه فلسطينيين مسوين اسواق + كافتريا او مطاعم و اكو مطعم لبناني و ايراني و الباقي فلسطينيه بس اكلهم طيب
( العلوه ) الستي ماركت شي كلش حلو - تكدرون تتسوكون منه الخضار و بسعر ارخص من السوك و بدون ضاريب طبعا - بس لازم تدفع كاش يعني عيبهه متكدر تستحدم كارت الفود ستامب مالتك بالشرا ء لانه الفلاحيين يجيبون الخضار مالتهم فريش يوم السبت و الاحد و الكل تجي تتسوك منهم و بعد يوم السبت و الاحد الاسعار تبدي تقل حته يتخلصون من البضاعه حته يجيبون بضاعه جديده يوم السبت و هكذا
طبعا احلى شي يوم السبت و الاحد لانه يصير هوسه كلش و الناس تجي تاجر مثل الجمبر من العلوه و يبيعون كلشي مواد منزليه اثاث اي شي عدهم حلويات اي شي مصنوع منزليا - و حته سيارات اكو يبيعون بس سعر هالسيارات يكون غالي جدا لانه ( تعتبر انتيكات ) مثل سيارة الكيا ههههههه او الفورت لانه يحبون هالسوالف
هذا موقع الستي ماركت
http://www.thecitymarket.org/الايجارات ::::
رخيصه - رخيصه رخيصه
هذا الى اريد اكوله - يعني
شقه غرفه وحده + حمام = 400 الى 550
شقة غرفتين + حمامين = 550
شقه 3 غرف + حمامين = 600
هذه الاسعار بمنطقه زينه يعني المدارس مالتهه زينه و من احسن المدارس و مابيهه مشاكل سود و الاسواق قريبه عليك
اسعار ايجار بيت ( ارخص طبعا )
3 غرف اكيد موجود ( بيسمنت ) سرداب و صاله و مطبخ و حمامين = ممكن تلكي ب 650 الى 900 طبعا حسب المنطقه
شرا البيوت رخيص - ممكن تشتري البيت من البنك ( و هاى ارخص شي ) لانه يكون البنك راهنه لانه صاحبه ممكمل الدفوعات مالته
او من صاحب الملك نفسه و هاى تختلف الاسعار من منطقه لمنطقه
اسألوني و احنا مستعدين نجاوب باللي انعرفه و بمعلومات دقيقه و خاصه عن ميسوري - كنساس
ان شا الله ماكو نقصرت و تحياتي للكل
