ادور بس لطم ...

[yougannalikeit]

السلام عليكم يا اخواني ويا اخواتي الاعزاء... ان شاء الله الكل زينين ...

اني دائما ما اشترك بالمواضيع بس اقراها بدون تعليق... شغله لفتت انتباهي ان معظم الاعضاء يدورن على شغل ...

خلي اسولفلكم قصتي من اجيت لامريكا لسسه بس بارتي ... وين ما اروح الوادم عازميني على بارتي (حفله )...اخواني مشتاق الطم بلغوني يمتى ما اتكون قرايه يمكم ... بس يتحفلون ... (للضحك فقط)

المهم زين لسسه ما لكيت شغل واعتقد ان الكثير منكم جاي ايعاني من هاي المشكلة

اقتراحي ان الكل لازم يبقى على اتصال وي الاشخاص اللي بولايته و مدينته و اي ولايه و الكل يحاول ان يجد فرصه عمل ويبلغ الناس اللي موجودين قريب من مكانه, اذا فلان من الناس حصل شغل خلي يسحب صاحبه وياه او ايدليه على مكان يحصل شغل
 
بالنسيه لنفسي اني ساكن بجولا فيستا سان دييغو كاليفورنيا 

سلامي  للاخوان مراقبين المنتدى ارجو ان اتسون قسم الشغل " فرص عمل للمهجرين واللاجئين فقط"
... حتى الجميع يشترك بهذا القسم
والناس تبقى على علم بالامكان اللي ايصير بيه تعيين

اعرف ان الكثير راح يقترحون ويب سايتات لايجاد العمل ... الخ بس كل هاي الويب سايتات بدون فائده لان ما ايردون على الايميلات ولا على السي في 

احب اسمع منكم و اقتراحاتكم بهذا الموضوع وان شاء الله كنت واضح ...

اخواني اسمي سنفور حزين

[بغداد بقلبي]

السلام عليكم اخي الغالي اقتراحك جميل وان شاء الله بس ايصير راح ايساعد ناس اهواي وياريت اداره المنتدى تدرس الموضوع والف عافيه لك على البارتي اموفق وشايف الف خير

[مهند هادي]

والله خوش موضوع وياريت نخلي موضوع ثابت ويفيد الاعضاء ان شاء الله




اخوكم مهند هادي بغداد

[eng.a7med]

مقترح جيد و مفيد و اتمنى ان تاخذ بي الادارة الكريمة

تحياتي

[ريم عبد]

اخويه العزيز
اولا اهلا وسهلا بيك عضو جديد ونورت المنتدى
ثانيا هي صح فكره جميله للي بعده مواصل لامريكا
اما بالنسبه للواصلين اكو احتمالين
الاحتمال الاول هو الاجي يادوب مدبر حاله ومشكل بشغله وديركض بلكت ايزيدوله ساعاته وخاف ليجي موسم الكساد ويبطلوا وهوه اصلا ممقتنع هاي الشغله اتلائمه
بهاي الحاله شلون يكتب وايكول تعالوا اني لاكيلكم فرصة عمل
الاحتمال الثاني الشخص الي صارله فتره شويه اطول ومرتب حالته بشغله لاباس بيها وديشتغل فل تايم ومديحك راسه ونادر ما يدخل للمنتدى واذا حصل فد شاغر يمه هم ايشوف منو  اقرب شي علي يكدر سحبه
القصد هناك ماكو وضائف شاغره او كاعده تنتضر حتى واحد يحجزها وينزل بيها اعلان بالمنتدى ولما ايسافرون او يوصلون يقدمون عليها
وانما هي فرص قليله عادة تكون بالمواسم الي قبل نهاية السنه يطلبون بعض الوظائف البسيطه والي تنتهي بانتهاء الموسم
واني وياك باقامة العلاقات والتواصل بين الاعضاء وفي حالة اذا شخص حصل شغله زينه وصار بيها طلب على موظفين يرشح صاحبه
بس مال موضوع للاعلان عن الوظائف الشاغره يمه اتصور مراح تتوفر هيجي خدمه
وهم نطلب اراء الاخوان بامريكا وشنو الامكانيات الي يكدرون ايوفروها
وعاشت ايدك
بس رجاءا شبعنا لطم
انريد شغل مابي لطم

[دنفش]

واللة خوش فكرة يعني اللي موجودين مثلا في ولاية كالفورنيا ...سان دييغو  يخبر عن طريق المنتدى اذا اكو شغل في مدينتة واللي موجودين بنفس المدينة رح يعرفون وهكذا لبقية الولايات وهي رح تخدم هواية ناس   يرجى من الاعضاء ابداء الرأي    تحياتي

[راهب الحب]

حبيبي الغالي إقتراحك جداً ممتاز ويا ريت الإخوة يكتبون ويعلنون عن وظائف شاغرة حتى وإن كانت بسيطة ومثلنا العراقي يگول :: ( گـُوم إللي تعاونـت ما ذلـّت ) ...
تمنياتي إلك بالتوفيق ودُمت بألف الف خيــر ... †





                      أخــوكــُم / وسـام بهنـام داؤد الخابــوري

[Baghdady73]

اخي العزيز..
تحية طيبة

اهلا بيك بالمنتدى وانته ابن ولايتي جولا فيستا  كاعد بصفي..
بالنسبة للفكرة فاعتبرهة جيدة وبالامكان تنفيذهة ضمن اطار معين في حال استطاع الاشخاص الخروج من مبدا الفئوية ولن اتكلم عن ما موجود على الارض فالكل يعرف الوضع هنا وتحذثت عنه سابقا...

انا مع هذه الفكرة قلبا وقالبا وانشاءالله يتجاوب الاخوان كل ضمن مدينته..

تعليق بسيط على كلام الاخت ريم وهو ان الوضع ليس كما سردتيه وقد تم تصوير الامر كاننا في عنق زجاجة مغلق لا مخرج منه "الذي يعمل والذي لا يعمل سيان في هذه الصورة"..

للعلم هناك الكثير من فرص العمل الموجودة ضمن نطاق محدد من العراقيين هنا والذين يفضلون عدم البوح عنها لاي شخص خشية الاضرار بمصالحهم الشخصية ضمن نطاق العمل..
تحياتي

بغدادي

[سامسونغ]

اخي اللي يريد شغل يدور عليه وماينتظر واحد يجيبه اله ثم اللي 24 ساعه بالمنتدى يلكالك شغل خلي يلكه لروحه. عمي هذا المنتدى مال ناس بطاله وهوه كهوه بس مبيهه شاي وكهوه بس تنظير ومحد عارف حجمه يعرفون الخبر من البيت الأبيض وهمه يراوحوون بمكانهم واذا وصلوا امريكا ضاعوا بعد ماتخلص المساعدات وهذا حال اغلب العراقيين نفخه وبوخه لما صرنا اخر الأمم من افعالنا وشوف الصناديد شراح يردون........

[yougannalikeit]

اخواني الاعزاء بغداد بقلبي,مهند هادي,علي كاظم الربيعي, eng.a7med,دنفش ,راهب الحب, Baghdady73, سامسونغ ,واختي العزيزه  ريم عبد شكرا جزيلا على المرور بالموضوع والاطلاع عليه . ونورتوني بكلامكم الحلوه ... ان شاء الله خير واتمنى الموفقيه للجميع

[ابو عبد الله التكساسي]

اخي
المقترح حلو
بس اوعدك ماكو عراقي  يشتغل راح يجيبك ويشغلك وياه او يدليك عللى شغل
واي واحد يكلك غير شي ديجذب عليك
تعرف شنو السبب؟؟
ببساطه شديده
العراقيين الي بامريكا واحد يكره الثاني , واحد ميريد الخير للثاني , ومحد يحب يسوي زين للعراقيين من العراقيين لان ايخاف على مصلحته

شوف الاسبان . الهنود . الباكستانيين . الكولمبيين. وووووو كل القوميات واحد يساعد اللاخ الا العراقيين
ما اعرف ليش
؟

الف مره سالت هذا السؤال ((يابه اكو شغل يمكم )) يجيني الجواب التقليدي
(( ها والله ما ادري , ما اعرف والله يمكن ماكو , ما اتصور لان شغلتنه متعبه ومتفيدك, لا مو هسه بس ايصير شواغل اني اكلك )) وعلى كولت المصريين  ابئا ابلني - بالعراقي هسه يجي عالنار -

والي ديحجي وياك من المتفائلين جدا ولكن من الي دا اشوفه هالايام
طكت مرارتي من العراقيين

م\ مو طل العراقيين نفس الشي فقط للتوضيح ولكن الاغلبيه من النوع اليفوك

اخوك ابو عبد الله التكساسي

[الخالدي الاصيل]

ابو عبد الله الذهب مشتاقين عيني والله كلامك مظبوط 100 بالميه وعلى الراس
دعائي للجميع بالموفقيه
اخوكم ابو عادل الخالدي

[Baghdady73]

حبيبي yougannalikeit..على سالفة اللطمية بس اضحكك علمود انغير الجو شوية..

من كنت بسورية رحت للسيدة ادور على كاسيت شعر قديم لفؤاد سالم ودخلت احد مكاتب التسجيلات وسالته فجاوبه كان " احنة هنا بس كاسيتات مقتل ولطمية" كتله اسف والله ما انتبهت يعني اعذرنا فسالته كتله شعندك هسة اجدد شي كللي وهذا بالنص " هسة موجود عندي السمفونية التاسعة لباسم الكربلائي  " هذي حقيقة مو مزحة هههههههههههه
اني ادري السمفونية التاسعة مال بتهوفن بس يا اخي علماء احنا ايجوز طلعت اصلهة سومرية وبايكهة من عدنه 

تحياتي

[yougannalikeit]

هههههههههههههههههههه
هههههههههههههههههههه
هههههههههههههههههههه


 مشكور يا اخي البغدادي والله ضحكتني هواي ... اي مثل ما ايكول ابو المثل "عيش وشوف"
كلشي ايصير

[السومري]

والله كلش خوش فكرة واللي يريد المساعدة للاخرين يعلن على اي وظيفة تصادفه ويضع عنوانها وتاريخ طلب الوظيفة

[عاشق العراق الوفي]

والله كلام اخوية ابو عبد الله صحيح هنا بهيوستن يمنة اريد عراقي يساعد عراقي ماكو الا ماندر لان مو كلهة سوة مثلا تكلة هاي الشغلة وين اقدم عليهة ووين صاير المكان اللي اقدم بي ينطيك جواب عام ما يفيدك ولو تذبحة ما ينطيك العنوان بالتفصيل مثلا يكلك روح لشوكر لاند زين هاي المنطقة جبيرة وواسعة وين يعني لو يكلك هاي صايرة على طريق 610 زين هذا الطريق محزم هيوستن حزام وبي اربع جهات شمال وجنوب وشرق وغرب وين الله اعلم ههههههههه اني بالنسبة الي ساعدوني واحد سوداني والثاني هندي والعراقيين نو كومنت هههههه