السلام عليكم ورحمة الله وبركاته
طبعا بالبداية احب اسلم على جميع اعضاء وكادر المنتدى وابارك لاخوتنه اللي سافروا واللي طلعت امنياتهم بعد انتظار طويل والاخوة والاخوات اللي تحددلهم مواعيد سفر .
ولو تدرون شنو السبب اللي انقطعت بي عن المنتدى يمكن راح تضحكون علية بس شسوي ماعندي معرفة بهاي الشغلات الخاصة بالحاسبة كلما ادخل على المنتدى تطلعلي كلمة لايمكن تسجيل دخولك تاكد من اعدادات السكاكر واني حاير هاي السكاكر شنو سالفتهة ياهو لاسالة هنا محد يعرف وتالي ابن حلال صديقي تعرفت عليه قبل اسبوع كتلة عندي هاي المشكلة كال هاي بسيطة تدخل على الادوات tools وتختار الاختيار الاول اللي هو الغاء المحفوظات والكوكيز الخاص بالبروزر وتدخل للمنتدى عادي وصدك سويتهة ودخلت ههههههه الحمد لله هسة نجي على الاخبار المفيدة
1. طبعا اني بهيوستن بتكساس صارلي 9 اشهر وراح ادخل هسة بالشهر العاشر حتى تضيفوني لجدول الاعضاء اللي بهيوستن / تكساس
2. منظمتي الكنائس الكاثوليكية لكتلي شغل تنظيف بمول وبصراحة شغل كراب وتنظيف وجلي وتلميع الارضيات والممرات بمكائن متعبة تشتغل على انابيب غاز صغيرة ما اطولهة عليكم ما اتحملت شهر واحد وبطلت والمنظمة ما صدكو ا راسن كطعوا المساعدات علية لان بطلت من الشغل .
3. اكو ولد سوداني جيراني خوش ولد وخدوم ويساعد دلاني على اكاديمية مال خدمات امنية ودخلت دورة لمدة اسبوع واحد واديت امتحانين على الانترنت طبعا كل امتحان 40 سؤال ونجحت بيهن والحمد لله وبعدين اديت الامتحان الثالث والاخير اللي هوة 100 سؤال واخذت شهادة level 1,level 2, level 3 وتخرجت من عدهم سكيورتي اوفيسر نون كوميشن يعني غير مسلح لان ماعندي كرين كارد بس اكدر اشتغل بالشركات الامنية لحد ما اخذ الكرين كارد واطلع رخصة السلاح واصير كومشن يعني مسلح وذاك الوكت اكدر اشتغل باكثر من شركة امنية والاكاديمية انطتني اكثر من عنوان وتلفون لشركات اتصلت بيهم وشركة وحدة بس استقبلتني وشغلوني ب 8 دولارات بالساعة وطلعولي الرخصة او البوكيت كارد مال السكيورتي اوفيسر صادرة من dps تكساس وبعد ما طلعولي الرخصة زيدوا راتبي وهسة استلم 9 دولارات بالساعة وان شاءالله من اصير مسلح بعد الكرين كارد راح يصير راتبي 12 الى 14 دولار بالساعة واكدر اشتغل بمكانين يعني راتبين .
4. هنا الخبر الزين اتصلوا بية المنظمة بعد ان تخلوا عني كل هاي الفترة وكلولي انه تكدر تقدم اكو برنامج جديد هسة راح يطبق عدنه بهيوستن بتكساس لكل واحد يشتغل عندة عمل وراتبة ضعيف ما يكفي هذا البرنامج ينطي جزء من الاجار والكهرباء ويشوفولك شغل ثاني اضافة الى شغلك الاول وان شاءالله يوم الثلاثاء او الاربعاء القادم اروح للمنظمة واقدم لان همة اتصلوا بية مو اني رايح الهم
واي تفاصيل جديدة ان شاءالله افيدكم بيهة وتحياتي للجميع ...
اخوكم عاشق العراق الوفي /هيوستن / تكساس
