اخوتي باركووووووولي --- مقابلة اوللى وية IOM بغداد --- بعد سنة ونص

[المهندس سيوفي]

اخواني الاعزاء

مااعرف بصراحة شلون ابدي ومنين ابدي من الفرحة لاستلامي ايميل من المنظمة تبلغني بيها بتحديد موعد مقابلتي الاولى في منتصف الشهر المقبل ان شاء الله.
واخيرا --- وبعد مرور سنة ونصف على تقديمي للبرنامج ووصولي لحالة الاحباط بالفعل ---- الحمد لله اجاني الايميل قبل نص ساعة تقريبا --- وحبيت تكونون انتو اول الناس ابشرها بهذا الشي

الحمد لله مرة اخرى --- وبالتوفيق للجميع

تحياتي
المهندس

[angie-dawood]

الف مبروك يارب مقابلة سهلة ربي يوفقك بكل المقابلات بالتوفيق اخي العزيز

[ابو عبد الله التكساسي]

مشوار الهجره الى امريكا يبدا بالمقابله الاولى 

مثل
مشوار الاف ميل يبدا بخطوه

الف مبروك سيوفي الورد
اخوك ابو عبد الله التكساسي

[ريم عبد]

هااااااااااااااااااااااي وييييييييييييييييييييييين
لازم اندزلهم كتاب شكر للمنظمه لان سوولك مقابله اولى حتى ترجع اتطل على المنتدى
يمعود شنو حالف يمين متدخل المنتدى الا ببشاره
الف الف الف مبروووووووووووووووك وياربي يستحون شويه من نفسهم وايعوضوك عن هذا الانتضار
وبلكت ايمشولك الباقي ركض
وياربي ايسهل عليك المقابله
وتتبعها بمقابله اخرى وموعد سفر وطيرااااااان

[luay safar]

الف مبروووك سيوفي 

[مهند هادي]

الف الف مبروك

[show]

مبروك صديقي المهندس على موعد المقابله (جتي في اخر لحظه ههههه)

البقيه تركض ركض ان شاء الله

بالتوفيق للجميع

[عكعك التطوى]

الف مبروك اخي سيوفي وبالتوفيق ان شاء الله

تحياتي

[المهندس سيوفي]

الاخت انجي
الله يبارك بيج واتمنالج الموفقية

الاخ ابو عبد الله
اشكرك وبالفعل المشوار الى امريكا يبدا بالمقابلة الاولى

الاخت ريم
ضحكتيني بالفعل بردج وتكدرين تكولين جنت حالف شبه يمين ماادخل الا ببشارة وهاي بشرتكم بعد شتريدون 

اخوبة لؤي
ممنون منك صديقي وانت هم اتمنالك التوفيق وبطل حركان دم 

الاخ مهند
الله يبارك بيك وممنون منك وردة

اخوية شووووو
واخيرا ------ اتذكرتك من كتلي ان شاء الله هالشهر تبين ---- اشكرك على كل كلمة صبر وتشجيع قدمتها الي

اخوية عكعك
الله يباركلك واتمنالك التوفيق


تحياتي للجميع
المهندس

[Abo Rami]

الغ مبرووووووووووووووووووك اخي الله يسهله عليك
ابو رامي

[مها البغدادية]

مبروك المقابلة الاولى  ويوم نسمع منك تحديد يوم السفر


اني هم قابلت يوم 19/1 المقابلة الاولى واتمنى ان تستفاد من الي شفناه

اولا: وصلنا الى مكان المقابلة الساعه 7 وربع صباحا وحسب مامكتوب بالايميل مالتهم وطبعا احنه مقابلتنا في بغداد..
تقريبا دخلنا ساعه 9 لمكان المقابلة نصيحتي الاولى انه اذا انت عائلة ووياك اطفال تاخذ كلشي يحتاجوه من اكل وشرب لان اتطول المقابلة لان احنه عائلة مكونه من اربع اشخاص وطلعونا ساعه 4 تقريبا بعد ما خلصنا جميع اخذ المعلومات .

ثانيا: احفظ جميع المعلومات والتفاصيل والتواريخ الي صادفتك بحياتك شهر وسنة واذا كلش كلش السنة بس
ولتحاول ترتبك بأي تفصيل لان مرات يستفزون مثل مااني صار بية نسيت شلون اعبر عن كلمة تهديد وكالي شنو منو الي ملقنج الحجي وكالج احجي ؟؟

ثالثا: اخذ نسخة وحدة بس من كل ورقة ومستمسك لان يريدوها واذا ماعندك همة عدهم جهاز استنساخ هناك ويستنسخوها


وتدلل الى حد يوم المقابلة الي اتذكرة راح اكتبه الك واذا محتاج سؤال اني بالخدمة و راح اساعدك وتدلل والف مبروك

[المهندس سيوفي]

اخت مها
بصراحة مااعرف شلون اجازيج على هاي المعلومات القيمة والله يجعلها بميزان حسناتج ويسهلج امرج
بس عندي سؤال بخصوص المستمسكات اللي اخذتوها وياكم تحديدا شنو بالضبط جانت؟
ومعقولة هلكد اتاخرتوا --- اني السامعة انه المقابلة الاولى ماتتاخر هواية ؟
وهل انطوج علم على موعد مقابلة ثانية شوكت تقريبا لو لا ؟
واخيرا --- بالنسبة لقضيتي اني المتقدم الرئيسي وصاحب الكيس ---- اهلي راح ينشملون بنفس الاسئلة اللي راح توجه الي لو اسئلتهم تكون خفيفة؟

تحياتي وممنون مقدما
المهندس

[مها البغدادية]

شكرا جزيلا على الكلام الحلو ويمعود هية قابل شنو
 اولا: تاخذ وياك اصلي ومستنسخ جواز السفر وهويات الاحوال المدنية وشهادات الجنسية واذا جانت عندك جنسيات من دول اخرى هم تاخذ اصلي ومستنسخ  وشهادات الدراسة اصلي ومستنسخ  وعقد زواج الابوين او غيرهم ودفتر الخدمة العسكرية للي خادمين عسكرية اصلي ومستنسخ .

ثانيا : اذا جانت عندك ركمنديشنات وباجات تخص العمل مع القوات الامريكية مستنسخة او اي شي يثبت عملك مع القوات الامريكية واذا جان عندك باجات قديمة ترة بأول نقطة تفتيش تسلمها الهم واصلا همة ياخذوها رأسا لان يكولك منتهي الاكسباير مالتها .

ثالثا : اذا عندك احد مريض لاسامح الله بأمراض مزمنة تاخذ التقارير الطبية مالته هم نسخة واصلي

رابعا: اني اكولك ليش اتأخرنا لان جان عدد المقابلين بذاك اليوم اكثر من 10 عوائل تقريبا وعدد الموظفين قليل وتوزعوا العوائل عليهم
وبعدين اكتشفنا هناك انه اني مفصولة برقم كيس ثاني لان عمري فوق 21 سنة فصرنا بكيسين نمبر يعني كل واحد اخذو منه معلومات على حدة اني بوحد واهلي بوحد . وطبعا ماكو اي خبر عن المقابلة الثانية بس كالو انه المحلفين راح يجون للعراق خلال شهرين الى 3 اشهر والمقابلة الثانية كالولنا هية مقابلة محلفين بس شوكت الله اعلم .
اما بلنسبة للاسئلة فهية اسئلة شخصية عن اعمار وعن تواريخ وعن احداث صارت بحياتك وتشمل الكل وتوضح سبب خروجك من العراق والي ينشملون بلاسئلة بس البالغين من العائلة و الاطفال لا . واتكون الاسئلة نفسها للكل و الاجابة هم لازم تكون موحده نفسها يعني بدون زياده او نقصان


وتدلل وان شاء الله تستفاد ومااكون قصرت وياك 

[نهاد احمد]

الف مبروك اخويه العزيز  سيوفي وبالتوفيق ان شاء الله



نهاد  ابو علي
من مصر

[المهندس سيوفي]

الاخت مها
اشكرج الشكر الجزيل وممنون مرة اخرى

الاخ نهاد
اشكرك على مشاعرك الطيبة واتمنالك الموفقية


تحياتي
المهندس