سؤال الى اصحاب العوئل في امريكا مهم جدا

[امير البابلي]

اخواني اعضاء المنتدى السلام عليكم
اتصور ان هذا الموضوع مهم جدا بالنسبة الى كل صاحب عائلة يود الذهاب الى امريكا اكيد يحتاج مبلغ من المال ان ياخذه معه طبعا اكيد مو كل الذاهبين طاكين يعني كلمن وامكانيته واذا بالصدفة اتصل بيه احد اصدقائي من امريكا طبعا تكلمنا كثيرا عن امريكا فسالني ماهو المبلغ الي راح اجيبه وياك كتله الي اتمكن عليه هو 80 ورقة يعني 8000 دولار كلي لا هذا ميكفيك على الاقل يرادلك 20000 الف دولار علمود متتبهذل ومتتعب لان انت متزوج وعندك اطفال اثنين حقيقة" اني دخت وانصدمت واتوقع راح ابطل فكلت خلي اشوف اراء اخواني في المنتدى واستمع الى نصائحهم لعد شنو الي دا نسمعه المنظمة هي الي تساعدنه بالبداية ولمدة 8 اشهر بايجار السكن والطعام والصحة والله تحيرنا ارجو من لديه معلومات عن هذا الموضوع ليبخل علينه
لان هذا مصير عائلة مو لعبه واكيد انتو تعرفون انه الي يطلع رح يخسر وضعه بالعراق وان كان وضعه تعبان وشكرا

[angie-dawood]

اخي العزيز اولا اكو هواي ناس واصحاب عوائل جوي الى امريكا وهما ما كان عدهم غير 200 دولار وثانيا انت ما دام عندك عائلة واطفال المساعدات تستمر لغاية ما تشتغل بس انت مذكرت باي ولاية راح تكون ولايتك لانه كل ولاية الها نظامها بالمساعدات بس بكل الاحوال جيب المبلغ الي عدنك لاي ظرف طارئ بس واي سؤال اخر احنا بالخدمة

[شبعت من الاهرامات]

السلام عليكم
الاخ امير بالنسبه الى ولاية تكساس مدينة اوستن هذا الميلغ الي عندك كلش كافي ويمكن زايد .لان اكو برنامجيين مساعدان لو ينطوك لمدة اربعة اشهر ايجار ويدفعون الفواتير ومبلغ من المال وحتى بطاقات الباص هم ينطوها الكم(واكثر العوائل الي عدهم اطفال اثنين خلوهم على هذا البرنامج )والفود ستامب والتامين الصحي يستمر وياك الى ان يصير دخل عائلتك رقم يحدووا الك .والبارنامج الثاني ينطون مبلف من المال لمدة اربعة اشهر والاربعة اشهر الثانيه ينطون نص المبلغ (واعتقد المبلغ يكون 1000 دولار والاربعة اشهر الثانيه 500 دولار ).وانت خلال هاي الاربعة اشهر مشتغل ان شاءالله .بس بالنسبه لغير ولايات ما اعرف الوضعيه شلونها يمهم ان شاءالله الاخوان ميقصرون وياك
والتوفيق من الله

[سامسونغ]

اخي الضمان برب العالمين ولو انت لاسامح الله بقيت من غير شغل ماكومبلغ يكفيك ولوانت متعود على نمط معيشه هم مايكفيك شي بس سرعة التاقلم مع المجتمع الجديد والأندماج فيه يسهل كثيرا والتوفيق من الله ولو نحسبها مانعيش.

[um faisel]

الله يوفقكم ويفتحها بوجهكم يارب
توكل على الله
ومن توكل على الله ما خاب ابدا ان شاء الله

[ذاكر ابو فابيان]

عيني اخ امير كلام انجي صحيح مية مية وقبل ان يساعدك الاخوان يجب ان تذكر انت في اي ولاية سوف تذهب لان كل ولاية لها وضع خاص ومساعداتها تختلف عن الاخرى

                                                تحياتي
                                               ابو فابيان

[الحائرة]

السلام عليكم اخوية
طبعا الكلام هواية يكلك صديقك 8000 دولار متكفي لعد اني اختك اجيت اني وعندي ولد عمرة 14سنة معندي غير 500 دولار والحمد لله المنظمة تكفلت بكل شي فلا تسمع كلشي وهذي فلوسك انشاله ورة متوصل وتستقر بعد متخلص المساعدات تكدر تفتحلك مشروع زغير وتشتري سيارة تفيدك بالروحة والجية والله يوفقك يارب

[امير البابلي]

اخواني السلام عليكم اه لو تعرفون شكد ارتحت من سمعت بهاي الاجوبه الي تفرح مو الي تسد النفس وتهبط المعنويات اني اشكر كل اخواني بالمنتدى الي حاولو ان يعيدوا لي معنوياتي تدرون انه اني كنت متخذ قرار انه الغي موضوع سفرتي بس كلت هاي المحاولة الاخيرة اريد اسمعهة من اخواني قبل ما اتخذ قراري مع العلم انه مابقالي الى شيء بسيط واحصل على الفيزا وتحديد موعد السفر وشكرا

ملاحظة الى اخواني انه انا متوجه الى ولاية مشيكان ديربورن ستي

[angie-dawood]

اهلا وسهلا بك اخي الغالي في ولايتي اي شي تحتاج اختك بالخدمة بس راسلني وتدلل اخي الغالي انشاءللة السفر القريب يارب

[امير البابلي]

السلام عليكم اختي العزيزة انجي لا اقدر ان اوصف مدى شكري وامتناني لما تقدميه من مساعدة داعيا من الله ان يحفظكي من كل مكروه كل ما هو اريده منكي ان توضحيلي هل المبلغ الذي معي يكفي لاني لااملك غيره  واكون ممنون منج واشكرج مرة ثانية على كل شيء تقدميه لنا

[angie-dawood]

المبلغ الي عندك 80 ورقة يعني شكد بالدولار حتى اكول الك شنو هو قيمة المبلغ الي عندك هنا بمشكن


ملاحظة اسفة اخي ترى اني صدك مااعرف شنو الحسب مال ورقة مرة امي كانت بالعراق واني بمشكن خابرتها داسال عليهم كالت الي ياريت ادزين النا فد دفتر يعني فلوس هي تقصد بس اني مكنت اعرف شنو دفتر كتلها يوم شنو معقولة حتى دفاتر ما عدكم ببغداد كالت ولج يادفاتر ليش شعدنا مدرسة دفتر يعني فلوس هاي كول تعلمتها بس الورقة اخر شي من خابرت مرة ثانيا يلى عرفت الورقة والشغلة كلها صايرة دفاتر واوراق واني ما اعرف فاانت هم 80 ورقة شكد بالدولار يعني لو كتاب يطلع واني هم بعد مااعرف 

[زيوس]

الاخت انجي الفاضلة الاخ البابلي عنده 8000 دولار الورقة يعني 100 دولار

الاخ البابلي تمنياتنا الك بالتوفيق بس شوية اهدأ ومو من اول موقف يصير بيك تغير رأيك 180 درجة يعني اتخاذ قرار بالسفر صعب و الغاءه صعب جدا لما له من اثر نفسي سلبي سيبقى بداخلك الى ان تودع الحياة الدنيا
واني اخوك ترى هم نفس القضية يعني انت شتصور يعني مثلا اني عندي سلسلة مال فنادق 5 نجوم  اب برشلونة لو شنو ؟ وكل الاخوة نفس المعاناة المادية واني اقسم لك يمين لو اني متمكن حيل مجان افكر اسافر ولو يجوز اسافر بس لاكمال دراستي العليا و للسياحة فقط اخي العزيز
تدري اني اعرف هواي ناس متشتري امريكا بدرهم لان امورهم فوق الزينة بالعراق وانطيك مثال حي عندي ولد معرفة هم كان مقدم يمكن siv  راح الى امريكا يمكن شهرين ورجع للعراق و حصل كرين كارد ومن سالوه الناس يابة ها اشو رجعت ؟ كلهم يابة لا الامور مو زينة بامريكا
زين هي طبعا مو زينة بالنسبة اله لان هو متعود على العز واكل الوز وازيدك من الشعر بيت مثل هيج نماذج عنده اني اكل اشرب وانام اذن انا انسان ..
وبالنسبة للي يتعب اكيد وبعون الله يحصل

اعتذر للاطالة واني احسبني اخوك الصغير

زيوس - جزر القمر

[ذاكر ابو فابيان]

انجي اذا دتوزعين دفاتر فد كم دفتر ناوشيني من يمج ههههههههههه تحياتي

[امير البابلي]

الاخت العزيزة انجي اقصد بالورقة هيه ال 100 دولار مثل ما اتفضل اخويه العزيز زيوس طبعااشكرك اخوية العزيز على هل الاجابة الشافية اخي زيوس لتلومني اني لو وحدي ما افكر باي شيء بس المشكلة ويايه زوجتي واطفالي هذا الي مخوفني اريد بس اوفرلهم الراحة البسيطة على الاقل اخوك داكه الوكت لمن كاعد على صفحة ماكو شيء ما شفته بحياتي اهنا على كلا اشكركم مرة ثانية

[angie-dawood]

اخي الغالي المبلغ الي عندك يكفيك وزايد زايد المهم توصلون بالسلامة وربك ما ينسى عبده ومنطقة  ديربون راح تحس انه انت بعدك بالعراق مو بامريكا وهي منطقة رخيصة جدا واغلب المحلات والمطاعم بيها كلهم جماعتنا العراقيين وارجع واكول اي شي تحتاج وانت بمشكن اختك بالخدمة وراح انزل الك رابطة من موضوعي عن مشكن وربي يوفقك يارب

[angie-dawood]

http://www.ankawa.com/forum/index.php/topic,361404.0.html

وهاي الرابطة بيها كلشي معلومات عن ولاية مشكن

[زيوس]

الاخت العزيزة انجي اقصد بالورقة هيه ال 100 دولار مثل ما اتفضل اخويه العزيز زيوس طبعااشكرك اخوية العزيز على هل الاجابة الشافية اخي زيوس لتلومني اني لو وحدي ما افكر باي شيء بس المشكلة ويايه زوجتي واطفالي هذا الي مخوفني اريد بس اوفرلهم الراحة البسيطة على الاقل اخوك داكه الوكت لمن كاعد على صفحة ماكو شيء ما شفته بحياتي اهنا على كلا اشكركم مرة ثانية

اغاتي لا شكر على واجب

و خادمك هم نفس الشي هم عندي اطفال اثنين ... وعلى العموم اتمنى لك الحياة السعيدة والتوفيق اخي العزيز

زيوس - انقرة

[ال رداد]

السلام عليكم طبعن حقيقه كمت اتمنه ولايتي تصير يم  الاخت انجي  ورده المنتدا واخت للكل ياربي  يحفضك ويخليك تحياتي تقبلو مروري اخوكم ابو علاء بس انجي معقولا اكو عراقي ميعرف شنو دفتر

[angie-dawood]

اي اني ما اعرف واللة هسى عرفته ثق باللة

[احمد عباس]

المبلغ الي عندك 80 ورقة يعني شكد بالدولار حتى اكول الك شنو هو قيمة المبلغ الي عندك هنا بمشكن


ملاحظة اسفة اخي ترى اني صدك مااعرف شنو الحسب مال ورقة مرة امي كانت بالعراق واني بمشكن خابرتها داسال عليهم كالت الي ياريت ادزين النا فد دفتر يعني فلوس هي تقصد بس اني مكنت اعرف شنو دفتر كتلها يوم شنو معقولة حتى دفاتر ما عدكم ببغداد كالت ولج يادفاتر ليش شعدنا مدرسة دفتر يعني فلوس هاي كول تعلمتها بس الورقة اخر شي من خابرت مرة ثانيا يلى عرفت الورقة والشغلة كلها صايرة دفاتر واوراق واني ما اعرف فاانت هم 80 ورقة شكد بالدولار يعني لو كتاب يطلع واني هم بعد مااعرف 

ماشاء الله الحجيه ابد متريد تحرجج

دفتر كبل يعني 100 ورقه

100 ورقه ام ال100 دولار

يعني 10.000 دولار

[angie-dawood]

هسى افتهمت  شنو ورقة وشنو دفتر وشنو كتاب هم اكو كتاب لو لا 

[احمد عباس]

والله حبيبي الغالي اني ماعرف بالضبط هاي الفلوس تكفي لو لا

بس على الاكثر اي تكفي

لان الملابس مو غاليه هناك والمنضمه راح تطيك مساعدات

يعني فلوسك بالبدايه تكون على الاكل شويه

وبما انو مراح تكدر تاكل من بره لان كله لحم خنزير لو ذبح مو حلال
فه راح تكضيها تمن ومركه بالبيت

يعني ال80 ورقه ان شاء الله تكفيك

[احمد عباس]

هسى افتهمت  شنو ورقة وشنو دفتر وشنو كتاب هم اكو كتاب لو لا 

هع لا عاد مو كتب تره تصير صدك مدرسه هيج


بس اكو ناس يكولون بلوكه على الدفتر

فه اخاف تخابرج الحجيه تكلج دزي بلوكه فه عرفي تريد 10.000

انتي جاوبيها كولي هااا شنوووو مداسمع اهووو يمكن نكطع الخط وسدي التلفون

بيها دفتر تره هع

[angie-dawood]

ليش كله لحم خنزيز وما مذبوح حلال مو ملينا مشكن مطاعم عربية وخصوصا بمنطقة ديربون كلها الجالية المسلمة هناك وعدهم قصابين باللحم اللحلال مثل ملحمة حسن وغيرها ليش ماكو اكو هواية مطاعم عربية

[احمد عباس]

ليش كله لحم خنزيز وما مذبوح حلال مو ملينا مشكن مطاعم عربية وخصوصا بمنطقة ديربون كلها الجالية المسلمة هناك وعدهم قصابين باللحم اللحلال مثل ملحمة حسن وغيرها ليش ماكو اكو هواية مطاعم عربية

اي بس غالي الحم اعتقد

ثاني شي المطاعم الامريكية ( العالميه ) متاخذه لهذا الحم

يعني مثل بركر كنج وماك دونلد وهارديز هاي كلها متستخدم لحم حلال

وحتى بالنسبه للدجاج Kfc و بابايز و بوسطن ذبحهم مو حلال


ثالث شي ولايتج بيها عرب يمكن هوايه فه عدهم لحم حلال

بس باقي الولايات مو هوايه يعني اني مره بنيه كالت الي احنه نروح لولايه ثانيه او مجموعه اصدقاء كل فتره واحد منهم يروح فه يوصو جيبلنه وياك


وشكرن ( ن )

[حسام الجبوري]

اخي العزيز توكل على الله وتعال وصدكني كلش كافيه فلوسك  ولحد يكلك هذا الحجي  وانته من تجي مو حتبلغ المنضمه مالتك انو انته جايب فلوس وياك لالالالا هذا غلط طعبا............ومن توصل بلغ منضمتك بانك لم تجلب ولا قرش ولا فلس احمر مثل ما نقول فهمت وكلهم جايب 80 دولار وصرفته بلمطار للطعام والماء والله يسهلك اخويه بلقدوم وتوكل على لله