شبابSIVعويصة احد صايرة بيه هيج والله فرج عنه

[confident]

اخوان اني عندي توصية من مدير الشركة العام ومن الادارة ودزيتهن وديري والادارة اكدو هذا الشي لجماعة الاس اي في وهمه هسة ايكولولي اريد توصية لازم من مديرك المباشر مو من مدير الشركة العام ومديري المباشر ترك العمل من زمان ومحد يكدر يتصل بي وهسه اني شسوي والله ما ادري وخاطبوا مديري العام كالوله انت مديرة المباشر جاوبهم كال الهم لا ومديرة المباشر ترك العمل يعني شنو احد صايرة بي هيج والله فرج علي جاوبوبني وادعولي وشكرا

[ابو عبد الله التكساسي]

الله يعينك اخي الغالي
المدير العام اكيد عنده العنوان البريدي مال مديرك والا شلون قدم على الشغل (( بامريكا لازم ريزومي ام العنوان)) فممكن تطلب من المدير العام ان يتصل بيه ويكله انريد ركمنديشن لواثق لان اموره دجت

شوف شيكلك ؟؟ وتعال كلي واني اكلك اشراح اتكله

تحياتي 

[سيزر]

صديق اليه كان بمثل حالتك وما يعرف اي شي عن مديره المباشر لان بطل من زمان ايضا" لكنه كان على علاقه طيبه بشخص اخر وطلب منه انهو يكتبله تزكيه ويؤيد بيهه انهو هو الدير المباشر اله ومشت الشغله ...بس طبعا" الحل الافضل انهو تتطلب عنوان مديرك المباشر من المدير العام وانشالله محلوله شغلتك اخي العزيز ...

[confident]

ابو عبدالله والاخ سيزر شكرا بس هم مديري العام اصلا مبطل وجاوبهم بايميلة الخاص بس مدير الادارة موجود بعدة وكلي اني خاطبتهم وكتلهم اشتحتاجون خاطبوني بس همه ايلحون على ريكومنديشن من مديري المباشر  والله كريم بس انت كتلي شسوي

[GoldenEgle]

عزيزي اعتقد الاخوة مشكورين انطوك الاجوبة ...

مادام عندك مدير الادارة موجود فبكل سهولة تكدر تحصل على التزكية وتكون بهذه الصورة..

Memorandum for Record
Subject :- Special Immigrant Visa Letter for Recommendation for Mr...........

بس اهم شيء انه يكتبلك بيها عبارة انه ( انت لاتمثل اي تهديد للامن القومي لامريكا وانه هو مسؤول عن كلامه )

تحياتي
النسر الذهبي

[confident]

شكرا اصدقائي
هاي التوصية من مدير الادارة عندي لاتهتمون ومن البدايه قدمتها وبعدين مدير الادارة هم اكد عليها حسب ما قال الي بس ما دزلي سي سي بالايميل بس هو دزلي ايميل قال الي لا تقلق وفوقاها مدير العام خاطبهم قال الهم اني ازكي واي شي تحتاجون اتصلوا بي بس هم ماكو رد من جماعة الاس اي في شكرا

[vincenzo]

يابة هاي كلنا ترة مرينه بيهه وخصوصا اللي اشتغلوا وية الجيش مباشرتا لان كلش صعب تحصل عنوان ضابط لو NCO اذا مو هو شخصيا ناطيكياه  فبهالحالة اكو حلين اشارولهه الاخوان والخصلكياهه:

1. ان تتبع اخبار وعنوان مديرك المباشر باستعمال الانترنت او العاملين الاخرين بالشركة اللي انت لا زلت باتصال وياهم او من عنوان الشركة (او الوحدة العسكرية) الى ان توصلله وتطلب منه الورقة اللي محتاجهه

2. اذا عندك ميانة وية اي امريكي جان وياك بالشغل الى درجة ان يسويلك الورقة ويكتب انه هو المسؤول المباشر فبعد هاي اسهل

وحسب ما ذكرتلك بموضوعي "تقديمي" هاية ترى اكبر مشكلة بالاس اي في برايي بس حلهه مو صعب بس ينرادله شوية تعب ووقت

بالتوفيق

[Cpt_Ali]

أني همين عندي نفس المشكلة وماعرف شسوي, والظابط الي جان مسؤولي والي هو نفسه كاتبلي الركمنديشن ماعندي ايميلة, وصارلي سنة ادور على ايميلة وبالاخير لكيته ولكيت رقم تلفونه مال مكان شغله (كاعد ديدرس بجامعه بشيكاغو) , راسلته بالبداية داتأكد بانه هو لو لا وجان يجاوبني ويطلع اي هو وكلي انت مترجم محمد؟  وراها راسلته مرة ثانية كتله لا اني مو مترجم محمد اني مترجم علي الي عايش بنفس الغرفة وية محمد وجنه سوة نشتغل وياك بالوحده وصارلي سنه ادور عليك وهسه يلة لكيتك ومحتاج مساعده صغيره...اشو جان يلبسني وكام ميجاوبني, وعندي صديق امريكي خليته يخابره وجان يطلع مموجود وجاوبت السكرتيرة وصديقي بلغ السكرتيرة وكالت من يرجع عد هيه راح اتكله ...اشو همين لبس صديقي وراها صديقي الامريكي دزله ايميل وشرحله بانو اني محتاج مساعدته اشو همين لبسه مرة ثانية, ادري ليش هذا هشكل كاعد يسوي؟ شبي شافط؟ مو صوجه صوجي اني لانه جنت اوديلة بطل ويسكي بليل كل اسبوع,  هسه ماعرف شسوي اني اتذكر كم اسم مال الظباط وياية بنفس الوحده بس مداكدر الكي ايميلاتهم واذا لكيتها اكيد راح يساعدوني خو واحد بيهم بوحدتي جان ابن قائد قوات المارينز بالانبار اسمة James Conway جنه كلش اصدقاء وحتة جنه نضرب نركيلة سوة بتالي الليل ونسمع ام كلثوم هههههه , بس مداكدر الكي ايميلة, محد يعرف فد هكر مضبوط يخترق الموقع مال المارينز ويجيبلي ايميلات مال الظباط الي اعرفهم؟ ههههههه

[vincenzo]

صديقي علاوي
انت هسه عالخط الصحيح
ابقى حاول على وحدة من الطريقتين اللي اني كتبتهن ولتجلب باللي لابسك لان اكو غيره بس دير بالك احتمال مو لابسك متقصد ويجوز يجاوبك بعدين
واكو هواي ظباط يخافون من المسؤولية او اصلا هو ميحبك او ميرتاحلك وميريد يسوي براسك فضل وهو حر بكيفه
اني هم الظابط اللي دزلياهه طول شهور يالله دزلياهه مع انه هو كلش جان يريد يساعدني لان العينتين جان ديدرس دراسات عليا باحدى الجامعات وما عنده وكت
دير بالك انه اتصال اي ظابط بالجيش بصورة مباشرة بعراقي كائنا من يكون قد تؤثر سلبا على مستقبله المهني بالجيش وخصوصا انت اكيد سمعت بحادثة القاعدة العسكرية بتكساس و ميجر نظال فاني كان اتصالي بالظابط اعلاه عن طريق شخص ثالث امريكي هم وهم ظابط جبير خوش ادمي الله سهلي وخلاه بطريقي واللا لو ابقى على صاحبي جان لهسه ما مقدم

ملاحظة ارجو عدم ذكر اسماء صريحة وكاملة للاشخاص سواء امريكان او عراقيين او اسم حضرتك لان متعرف منو ممكن يفوت للمنتدى كزائر وانت تعرف الوضعية الامنية هسه شلون صايرة ولذلك احنا نستعمل اسماء مستعارة

[Cpt_Ali]

يمعود مو صارلي سنة على الطريق الصحيح وكلشي ماكو ههههههههههههه, الصراحه اني كلش تعبت ولعبت نفسي وحتة عيني راحت من ورو google المشكلة اني كاعد دالكي مقالات وصور على الجنود الي اعرفهم وكل شوية اكمز وأصيح لك اي لكيته الصديقي وطب ماكو لا ايميلة ولا تلفونه, اني بس لو افتهم ليش السفارة الامريكية امصعبيها السالفة فد مرة؟ مو خطية احنه؟ عبالي يعتبرونة (((المترجمين أكرم منا جميعا)))

 راح ابقى على الIOM وأريح بالي احسن شي ووين توصل خلي توصل واليخسء الخاسئون.

[vincenzo]

حبيبي الشغلة يمك
اذا اكو امل تحصل الورقة اللي رايديهه (تزكية) فحاول بيهه الى ان تدبرهه وقدم اس اي في

واذا يأست من الموضوع استمر عالاي او ام

وهم تكدر تقدم عالاس اي في بدون الورقة واذا طلبوهه explicitly عود سولفلهم اللي صار وياك بطريق تحصيلهه بصراحة وشوف وين توصل وياهم (وبهالاثناء انت مستمر بمحاولة تحصيلهه)
ولو ما اعتقد راح توصل لنتيجة وياهم بس مجرد انه تلزم سرة ليروح ينسد البرنامج او كلشي يصير فاحسن ما انت ضال هيجي

طبعا تعبيرك مال كلساع تكول ايييييه لكفته كلش واقعي ويذكرني بنفسي قبل سنتين بس ما فادني غير الانترنت والتعرف على ناس امريكان طيبين سهلولي الموضوع والاتصال باللي اريدهم

[Cpt_Ali]

واللهي حجايتك معقولة, خلي اقدم لل SIV قبل ميعزلون وهمين مخسران خسارة اذا قدمت, قبلوني قبلوني واذا مقبلوني ملازم, باجر راح اركعهم بأيميل حيدري. تسلملي وردة ولو تعبتك وياية


Semper Fidelis