لا للازدواجيه

[Basheer73]

اخواني الاحباء اميركا ليست جيبوتي بل الدوله رقم 1 بالعالم اقتصاديا وهذي الازمه تعدي لان كل العالم يعاني منها بسبب ارتباط الاقتصاد العالمي بالاقتصاد الاميركي وبشكل مصيري0 اما بالنسبه لمن يرى ان اميركا هي جحيم فبأمكانه ان يعود بأسرع وقت لجنة الوطن الحبيب ويحقق احلامه ويبني مستقبل سعيد جدا لعائلته0 الوطن الحقيقي هو الوطن اللي تعيش بيه كأنسان وتحافظ على انسانيتك وليس شبح لذلك 99% من العراقيين الغيارى يحلم بالسفر وهجرة الوطن الحبيب وان يكون عنده جواز اجنبي وجنسيه اجنبيه يفتخر بيها اكثر من جنسيته الاصليه وهذا هو الواقع الفعلي وليس مثاليات براقه مناقضه للحقيقه 0

[freeman2]

اخي بشير كلامك صحيح وللاسف هناك الكثير من اخوتنا يعانون من مرض الازدواجية

ابوهدى-مصر

[نيولوك]

كلامك صحيح واللي يكول غير هيج خلي يرجع لاحضان الحكومه الجديده
شكرا

[احمد سلطان]

واللة صحيح اول مرة يتوسلون ومن يوصلون لامريكا تبدى التفلسف

[احمد عباس]

من ضمن الحجي الي يحجو العراقين من يروحون هناك ويعتبرو هذا شي يضوجهم وبالعراق او الوطن العربي احسن


هوه بامريكا كلمن عليه بروحه
وكلهم انعزالين يعني ميصادقون ملتهي بشغله وبيته وجهاله بس


العراقين متصرفلهم هيج صراحه اذا مو واحد يروح يم الثاني والقشب وفلانه كالت وفلانه حجت

هاي نقطه النقطه الثانيه

بره عدهم شتشتغل مو عيب والعراقين من يروحون هناك يشغلوهم عمال

لذالك العراقي متصرفله هيج على اساس بالعراق ديشتغل مدير عام

اني عن نفسي اشوف افكر بمستقبل اولادي من ازوج اكثر مافكر بنفسي صراحه لان اهلنه

عاشو  بالعراق لان جان عدهم شغل بالعراق وممحتاجين يسافرون

بس من صارت الحرب وخسرنه كلشي من شغل الى مسكن الى الاقارب يعني مضل شي عدنه بالعراق نبقه علموده صرنه نريد بس نطلع وطبعاً اهلي قبل الحصار وهل سوالف جانو يوميه مسافرين لدوله اجنبيه

ومفكرو يعيشون ويحصلون النه جنسيه

هسه اذا جتينه فرصه فه خلي ندوس على نفسنه حتى لو صعبه العيشه ماكو عيشه سهله كل دوله الها الزين والها الموزين بس ندوس حتى نحصل جنسيه وذاك الوكت نرجع


وتره اني اتضحلي شي العزله وقله العلاقات احسن بهوااااايه بالك يكون صاافي وهاي عن تجارب

اول شي الصديق الزين نادر بهل وكت

الي يصادقك يريد يتونس براسك تعزمه وتفره او يداين منك
او يوغفلك يوميه بالبيت

فه فكروووو زين فكروووووو

[الناسك]

كلامك صحيح 100%
مع الاسف اصبح الوطن جحيماً على ابناءه والغربة جنة لهم
(الوطن اسير ايران ) ودول الجوار الاخرى المغرضة .
الناسك

[نهاد احمد]

اخي بشير كلامك صحيح
وللاسف هناك البعض من اخوتنا يعانون من مرض الازدواجية


نهاد ابو علي

[حمدمد]

كلامك منطقي وصحيح اكو من جماعتنا عدهم ازدواجيه
مع الاسف.
يا اخي اكو مليون واحد يتمنى هاي الفرصه وهي ان يكون خارج العراق

اخوان والله والله والله والله العراق انتهى العراق هسه صار عباره عن ساحه لايران ولدول المجاوره

thx 

[ابو عبد الله التكساسي]

احلى تعليق واقربهن للواقع
هو للاخ احمد عباس
يابه انت من صدك لوتي وبايك الاسئله اشمدريك بهاي السوالف ؟؟
تحياتي لكاتب الموضوع

[vincenzo]

اي والله ايران مو حبابين وامبريالية وصهيونية 
عمي حمد بطل من هاي السوالف بمنتدانا لان انت من ذاك اليوم سويت عضوية قريت شروط الكتابة رحمة لوالديك بطلو لان ماكو هيجي بكة تلعب شناو

احمد عباس صدك بايك الاسألة

[زيوس]

بدون تعليق

زيوس- قندهار

[راهب الحب]

حبيبي الغالي بشير :::
هي مو قصّة إزدواجية ولا غير شيء إللي يريد يشتغل ما يتعكز على الحجج ولا ينتظر المساعدات وهاي الشغلة نسبية تختلف من شخص إلى آخــِر  ....
بس بالنسبة إلي شغلة الإنتماء للوطن عندي خّط أحمر ما أگدر أتجاوزه ولا أنكرهُ ولو الف جنسية ملونة عندي تبقى جنسيتي العراقية رقم 1 بلا مُنازع حتى لو رحت لجنة عدن  (( بعيداً عن أي تناقضات أو منافقات  أو حاجات أو هجرات وما إلى ذلك ))  ...
تمنياتي إلك بالتوفيق ودُمت بألــف الــف خيــــر .... †





                                 أخــوكــُم / وسـام بهنـام داؤد الخابــوري

[Basheer73]

وسام الورده 000 الانتماء للوطن هو حاله عاطفيه وغالبا ما تتحطم هذا العاطفه امام الانتماء الاقوى للذات وهذا لايعني ان المتكلم لايحب وطنه ولكن العكس بشرط ان لايكون هذا الحب على حساب حياتي وانسانيتي واحب ان أكد لجميع الاحباء الكرام اني احب وطني لانه وطني فقط وليس لانه مستفيد من خلال هذا الانتماء ولكن يبقى الانتماء الاسمى والمنتصر  في كل الجولات هو الانتماء الى الذات والى كل ما يرتقي بها0 تمنياتي للجميع بالتوفيق والحياة الحره الكريمه 0 

[snoopy]

الاخ بشير

ازدواجية الشخصية العراقية هاي امر واقع مو بس بمسألة الانتماء للوطن بل في امور كثيرة اخرى

اقرا كتب الدكتور علي الوردي (لمحات اجتماعية من تاريخ العراق الحديث) و كتاب اخر ما اذكر اسمه يمكن قراءة في تاريخ العراق المعاصر و انت تعرف الي اقصده عن ازدواجية الفرد العراقي
و هو فد شي مو عيب لأن فرضته علينه التقاليد و العادات و الفهم الخاطيء للدين

تنويه: اخوان رجاء لا تجيبون طاري السياسة و الحكومة الجديدة و الحكومة القديمة و ايران و ما ادري شنو

اذا انت تكول ايران فانا اكلك السعودية و الدول العربية
فليش نتعارك بسبب ناس ما يهتمون النه و همهم مصالحهم و بس خلونه اخوان و بدون سياسة

snoopy

[vincenzo]

رحم الله والديك اخوية سنوبي اني من شفت عنوان الموضوع اتصورته بديهي للجميع بس يمكن مو كل الاخوان والاخوات الاعضاء قارين كتب الدكتور الوردي الرهيبة وبالمناسبة هو عنده كتيب اسمه نفس اسم هالموضوع بالضبط او شوية يختلف بينما الكتب اللي حضرتك طرحتهه طويلة واجزاء كثيرة بس اكو كتاب جدا مهم اله اسمه وعاظ السلاطين اتمنى كل العراقيين يقرونه لان صدك يفهمك هواي اشياء مشوهه الاعلام المبرمج لغسل ادمغة الناس واكو هم للمهتمين بالتاريخ الاجتماعي للعراق كتب للاستاذ حنا بطاطو والدكتور عباس العزاوي وهي هم مجلدات ضخمة بس كلش قوية ومفصلة
فد يوم مباشرة ورى الحرب بال2003 وبعد الكهرباء ما راجعة وما جنة متعودين على البرامج الحوارية ومنعرف يعني شنو تعدد الاراء بدت البي بي سي (لان ما عدنا غير الراديو بذيج الايام العجيبة) برنامج اسمه نقطة حوار معضم حلقاته النقاشية عن الحرب القائمة عالعراق فاتذكر فد متصل عراقي كال وعاظ السلاطين اتمنى كل العراقيين يقروه لان بعد ماكو ممنوع وهو ميدري انه احنا عدنا بالبيت كل كتب الوردي ضاميهه زين وطلعناهه من تغير الوضع بس بصراحة ما جنت قاريه بس قاري كم جزء من اللمحات فقريته ويمكن عدته مدري شكم مرة وكمت كل فترة اشتري كم نسخة من المتنبي واهديهه للناس اللي يهموني لان هاي مسؤولية
حياك يا سنوبي

[Basheer73]

اخواني الاحباء 000 اني مقصدت بكلامي عن الازدواجيه اي دوله كايران او سعوديه او فيجي ايلاندز لان ما عندي تجارب وياهم وتجربتي فقط مع مجتمعي العراقي والحمد لله بعض الاخوان يعرف ويقرأ لدكتور علي الوردي وهذا وحده يكفي ان يخليك ضليع بخفايا الشخصيه العراقيه 0 وبالمناسبه دكتور علي الوردي قدم أدلة على ثلاثية ورباعية الشخصيه العراقيه وتطورها من مرحله الى مرحله كونها من اصل بدوي تحول الى فلاحي ثم الى افندي يلبس سداره وبعدين تطلع الشخصيه تجمع بين فهد و سوادي وتوفيق افندي ابو سرمد وهذا الشخصيه تريد تتطور اخيرا وتروح للغرب تعيش ويه توني وجيمي 0

[snoopy]

الاخ فنجنزو
الدكتور علي الوردي شخصية عبقرية و كلامه واقعي و انا اثني على كلام الاخ بشير لأن هيه مو ازدواجية فقط بل قد تكون ثلاثية و رباعية و هاي كل انسان عراقي خلي يلاحظهه بنفسه راح يلكى هواي تناقضات و فعلا البداوة و الريف لازالت حاضرة بمجتمعنا الى اليوم مع قليل من المدنية

بالمناسبة فنجنزو كتب اللمحات اجتماعية انا قريتهه من كان عمري 15 سنة يعني الحجي قبل 10 سنوات تقريبا و عدتهه اكثر من مرة السبع اجزاء بالاضافة الى كتاب القراءة المعاصرة

و وعاظ السلاطين و مهزلة العقل البشري ما قاريهم و اتمنى اقراهم فد يوم

اخوية بشير انا من قصدت على طاري دول الجوار و السياسة ما قصدتك انما قصدت الاخوان الي جابوا طاري دول اخرى و السياسة و كان قصدي ان ما ينجر الموضوع الى منحى اخر ينتهي بعركة

تحياتي للجميع