السكن في امريكا.......ايجار لو شراء ساعدوني على الفهم رجاءاً؟

[rmadi]

اخواني الاعزاء

عندي طلب اني صارلي مدة دا احاول افهم موضوع شراء السكن بامريكا ومفتهمت كلشي.

لذلك راح اطلب من الاخوة ساكني امريكا اجابتي على ما يلي:

1- اذا اني عندي 100 الف دولار كاش اشتريت بيها بيت بفد ولاية اني شراح اتحمل ضرائب او موركج او اي شي ثاني مهما كان اسمه كل سنه؟

2-هل الي افتهمته صحيح ؟ انهو اذا عندك كاش الشراء اصرف ؟ واذا عندك بس جزء من المبلغ فلا تتورط وتشتري لان الفوائد مال باقي المبلغ الي هية الموركج ( هاي اذا افتهمت صح ) راح تضاعف سعر البيت وبهاي الحالة الايجار اصرف.

اعرف اكو تفاوت بين الولايات لذك اطلب شي تقديري منكم

مع شكري الجزيل

[احمد عباس]

حبي انت حدد الولايه الي تريدها حتى الاعضاء يفيدوك

الضرائب بكل ولايه شكل

وبالنسبه للكاش شي اكيد يكون احسن خصوصاً اذا اخذت بيوت حاجزتها البنوك يبيعوها باسعار زينه



بس انت حدد الولايه حتى يكلولك على قوانينها

[angie-dawood]

اخي العزيز

شراء البيت في الولايات المتحدة وفي كل الولاية تكون كالاتي :

1- اذا عندك فلوس البيت كلها كاش ما راح يكون عندك دفع مثل ايجار شهري ومثل ما تكون ماخذ قرض من البنك راح يكون عندك بس الضريبة يعني العقار مثل ما نسمياها بلغتنا العامية هذا العقار يعتمد على حسب اولا الولاية وشكد الضريبة عدهم 6% او 9% حسب الضريبة وهم يعتمد حسب الضريبة الي بالمنطقة مو شرط تكون كل الولاية نفس دفع العقار اكو منطقة يكون العقار ارخص من منطقة اخرى مرات تشوف بيت سعره 300 الف دولار تكون الضريبة او العقار 1200 دولار سنويا  وقسم من الناس يدفعونا وي البيمنت مال بيت حتى لا تكون ثكيلة عليهم من يدفعوها كل سنة وقسم منهم يخلوها كل سنة ويدفعون الضريبة ومرات تشوف بيت يكون سعره 150 دولار تكون الضريبة مالته 1500 دولار لانه يكون السبب هي المنطقة والضريبة العالية بيها
والموركج هم اكو 2%  او3 % اكو اعلى هاي الموركج شنو هو انه البنك الي راح ينطيك الفلوس لشراء البيت هو ياخذ الفائدة وانت شكد ما تخلي تقدوما مال بيت شكد ما يكون البيمنت اقل مثلا البيت سعره 150 الف دولار انت خليت 50 الف تقدوما مال بيت شكد راح يكون البيمنت راح يكون تقريبا 750 دولار كل شهر كانه كاعد بشقة وهذا ايجار الشقة بس فلوس الشقة تروح وما ترجع وانما فلوس البيت راح ينزل من سعر البيت وبالاخير يصير ملك الك بس تبقى تدفع الضريبة السنوية واذا عندك فلوس البيت كاش ماعندك غير تدفع الضريبة السنوية طول ما انت ساكن بالبيت هاي لازم تدفها لانه يعتبروها فلوس ياخذون منها للمدارسة ولمنظف الشوارع والي ينظفون الحاويات وكل الخدمات ياخذوها من هاي الفلوس الي هي الضريبة او العقار

[rmadi]

شكرا أعزائي

شكر خاص اخت انجي والله انتي مستشارة عامة لكل العراقيين والوكت الي دتخصصي النا مشكورة علية وممنونين الج كلش هواية.

هسة اني الي افتهمتة اني اذا اشتريت بيت ب 100 الف دولار دفعتها كلها كاش والضريبة 6% فرضاً بالولاية راح ادفع 6000 دولار بالسنة ضريبة؟

والموركج بس على القرض الي من البنك والي دافع كاش مالة علاقة بالموركج لا من قريب ولا من بعيد؟

صحيح؟؟؟؟؟؟؟


شكرا

[rmadi]

الوووووووووو

احد يسمعني؟؟؟؟؟

[ريم عبد]

صح اخ رمادي الموركج هاي الفوائد البنكيه اذا انت مماخذ قرض من البنك متدفعها
بس ضريبة السكن هاي تندفع علمود الخدمات

[angie-dawood]

اخي العزيز الموركج يعني البنك من ينطيك فلوس وما انه انت ما تحتاج للموركج يعني ما راح تاخذ فلوس من البنك وتدفع عليها فائدة بس اكو شي مهم انه حتى لو دفعت فلوس البيت كلها كاش بس عندك الضريبة لازم
تدفعها كل سنة حسب الضريبة مال كل ولاية

[Abo Andrew]

دير بالك تشتري بيت بامريكا وتدفع فلوسة كلهة

هذا اكبر خطا ممكن اتسوي بحياتك

السستم هنانا مو مثل العراق اخي العزيز

والتفاصيل متشعبة اكثر من ما تتصور

بس نقطة وحدة خليها ابالك وهو اكو شي اسمة Property Tax اللي ادفعة سنويا (وهاي منو كلك اذا اشتريت كاش مراح تدفع بعد)

اصلا البروبرتي تاكس بعد تسديد سعر البيت بالكامل تزداد لذلك الامريكان ورة ميوصلون مرحلة تسديد سعر البيت ايبيعوا ويشترون غير بيت حتة ايظلون ايدفعون اقساط وهذا راح ايقلل من قيمة البروبرتي تاكس والتاكسات الي تستقطعهة الحكومة منك من غير مصادر دخل باعتبار مساعدة الك لان انت مديون
والمثال على ذلك

اغلبية العراقيين (االاجئيين) راكبين كامريات 2010 وايضلون على مساعدات الحكومة زين هاي اشلون ؟

ايكلك الحكومة اتكول انت مشتري السيارة بالاقساط يعني اكو عليك دين لذلك احنا منكدر نكطع عنك المساعدات لانه مديون

فهذا واحد من الامثلة مثل البيت لان ماكو احد بامريكا يشتري سيارة ويدفع سعرهة كاملا كاش

اخي العزي هاي بسيطات واذا اتريد تعرف عن الموضوع نصيحة اخوية

المنتدى مراح ايفيدك اللي ايفيدك شخص عايش بامريكا فوك ال 20 سنة  وهذا الشخص مراح تلكاة هنانا لان احنا كلنة جدد واني المعلومات اللي دا اكلك ياهة هي بسيطة ومن شخص صارلة اكثر من 30 سنة عايش بامريكا وعندة خبرة بهل مجال يعني مو سامع من فلان وعلان

هاي غير تفاصيل هواية لي هسة مفاهمة


الاخت انجي وضحتلك شي حلو بس هذا جزء بسيط جدا من السستم هنانة بس اتفق وياهة 100 بالمية ومثل مكلتلك البروبرتي تاكس ادفعة ايظل بركبتك طول الحياة
تحياتي