مكالمة ضرورية

[chaldian prince]

الو يمه شلونج
هله وليدي حمودي صدك جذب اذكرت امك الحك ابو محمد محمد علتلفون
ركض جاء الاب هله وميه هله بالغالي هله بحمودي والله مشتاقين موت لشوفتك
هله يابه شلونك وشلون صحتك انشاء الله بخير والله يابا اني اكثر مشتاق والدمع ممفارك عيوني.
اي ابني بشر احوالك امورك بامريكا شلونها؟
يابا بخير اشتغل واشتريتلي سيارة تذكر سيارتك الشوفر الامبالا القديمه /يضحك حمودي /هم انه شوفر حديث اشتريت.
مبروك وليدي تستاهل بطل من كاعك ادري بيك سبع من صغرك ماخاف عليك.اي كول شوكت نشوفك؟
عن قريب يابا اخذت الجنسية وهسه اكدر اجيكم واشوفكم وهماتين اريد اوصيكم تشوفولي بنت الحلال وبسرعة لان اجازتي شهر بس مااكدر اطول اكثر.
وج ام محمد لحكي محمد جاي ولازم نشوفله بنيه .
اخذت الام السماعه ابني من طرف ابوك لو امك تريدها؟
يمه بكيفكم ماكو فرق اهم شئ اخلاقها وبيناتنه هم لازم حلوة علمود هنا اصدقائي لا يصنفون علي.
اني ارشحلك بنت خالتك فوزيه صدقه لو بس تشوفها شنو من طول شكبان ناكة وكل عين صلوات تخبل صايرة؟
لا يمه الله يخليج ماريدها فوزيه شوفيلي غيرها ،اولا عبرت ال 25 سنه وانه ابن ابوي روحي خضرة؟
ابني هو انت 35 سنه هسه يعني مناسبه الك اشوفها.
يمه اني بامريكا وهنا الشباب من يجنسون دينزلون للعراق واحدهم مايقبل اقل من 15 سنه فرق شتريدين يضحكون علي اصدقائي وداعتج ليكولون صام صام وفطر على جري،لا يمه اريدن وحدة بين 18 للعشرين ؟ترة ابطل واروح للمغرب هناك اخذلي وحدة ستوهه طاكه ال18 وفوكاها بوسه من ابوها.
هاك احجي ويه ابوك خلي هو يشوفلك لعد .
هله بابني مو تدلل والله اخطبلك بنيه ستوهه طخت ال18 هو اكو زلم بهال زلك تتزوج شو كلها حفاي وبالانترنيت والكهاوي .تذكر عمك راضي ابن عمتي ؟
اي يابا اذكره شبيه؟
عندة بنيه صلاوات من الحسن والجمال ماتنوصف وعمرها 19 سنه وتدرس بكليه الطب وتحجي انكليزي بلبل ،يعني مراح تتعب لتتعلم لغه شتكول؟
اي يابه والله والنعم منك روح استعجل اخطبلياهه فدوة رتب كلشي بسرعه وانطيني خبر بساع.
باجر انطيك الجواب.
يله يابه مااكدر اطول لازم انام ورايه شغل تصبحون على خير وسلملي على الكل.
وانت من اهل الخير.

وفي مساء اليوم الثاني
الو ها يابا شلونكم بشر؟
هله بالغالي مبروك كلشي تمام حاجيناهم وخطبنالك والناس فرحو بيك حيل .وباي وكت تجي حاضرين.نسويلك الخطوبه وفد اسبوع وراها الزفه.فرحان انت ها انا ابوك.
زين اني اول الشهر الجاي اني جايكم.مع السلامه
مع السلامه.

بالمناسبه الاسماء مستعارة والي سميناه محمد اتزوج ابغداد وصلها لامريكا وصارله 3 ولد واحد احلى من الاخ وبس اخذت الجنسيه جابتله الشرطه وطلك وهو الممنون بحجه ضربني مرتين؟وممنوع يتقرب على البيت .
ومتوب ورجع لبغداد وتزوج وحدة لوخ انوب هاي بعد اصغر ب19 سنه؟


ملاحظه بسيطة على اغلب شباب اليوم من يريد يتزوج .

فارق العمر الغير مقبول ؟ يعني مثال هو 35 وهي لازم 18 لل20 ؟ليش متخاف ربك شلون تريد تنجح هيج زواج.؟؟؟

سالم عقراوي
 ميونخ






 

[ضـاع الوطن]

هاي الحقيقه اخويه اعتقد الموضوع للدردشه 

[الحياة فرص]

حلوة بس مكانها مو هنا اتصور ولتزعل علينا

[chaldian prince]

عيوني ضاع الوطن اكيد هاي الحقيقة وازيدك من الشعر بيت الثانيه الي جتي صار عنده منها بنات اثنين والثالث بالطريق ومقدمه على الطلاق وصاحبنا صارله اسبوعين ينام بنسيون وبس يهدد الا اجيب الثالثه .

[chaldian prince]

عيوني الحياة فرص وين مكانها فدوة ليش الزعل مابيها زعل .بلكد تكتب لتايكر دينقلها ؟
تحياتي

[Cpt_Ali]

عيوني ضاع الوطن اكيد هاي الحقيقة وازيدك من الشعر بيت الثانيه الي جتي صار عنده منها بنات اثنين والثالث بالطريق ومقدمه على الطلاق وصاحبنا صارله اسبوعين ينام بنسيون وبس يهدد الا اجيب الثالثه .

فوكاها يريد يتزوج مرة ثالثة؟ ههههههههه تره مسكين هذا محمد, بس سؤال هو يصير صديقك؟

[chaldian prince]

عيونيCPT-Ali لا عيوني مو صديقي ولا مسكين بس جاهل ؟المؤمن لايلدغ من جحر مرتين هيج واحد مستعد ينلدغ الف مرة وميتوب المشكلة هي الاطفال المساكين الضحايا الولد يكرهون الاب كره العمى وبالمستقبل البنات هم لان بعدهم صغار واخونا روحه خضرة.ههههههههه.

[Cpt_Ali]

عيونيCPT-Ali لا عيوني مو صديقي ولا مسكين بس جاهل ؟المؤمن لايلدغ من جحر مرتين هيج واحد مستعد ينلدغ الف مرة وميتوب المشكلة هي الاطفال المساكين الضحايا الولد يكرهون الاب كره العمى وبالمستقبل البنات هم لان بعدهم صغار واخونا روحه خضرة.ههههههههه.

عبالي صديقك علمود داكلك كله اذا يريد يتزوج وحده صغيرة عمرها 18 سنه فأحسله يتزوج وحده روسية لو اوكرانية لانه جدا مخلصات وراح يعبدو للابد, بس اظاهر مولانا الشيخ محمد ماعنده خبرة بهيج سوالف يلة خلي ينضرب بوري ثالث لانه شكله مدمن مال بوريات

ولو الفرق بين عمره وعمر البنية الي رايدها هو كلش فرق جبير بس ترة كل انسان عنده طبيعه خاصة.

[(بغدادي)]

هذا الموضوع حاليا مدار نقاش دائم في بيت احد الاصدقاء هنا في امريكا..وهذا الحجي نفسه بس الفرق انو العائلة كلهة هنا والام دتسوي اتصالاتهة بالعراق حتى تلكي بنية عمرهة 20 للولد اللي راح يصير 38 بعد شهر طبعا الام ما مقتنعة بهالفارق الكبير بس الولد ايكول اني وبس بالساحة واكثر من 21 مستحيل واعتقد النهاية ولو ما اتمناهة للولد بس راح تصير مشابهة لهالقصة..
اكو نسبة مع الاسف متفكر بصورة منطقية وكان الامر هو عبارة عن ونسة وسفرة سياحية..
طبعا حاليا اكو عائلة سورية بنفس منطقتي الزوجة طالبة الطلاق واستحقت حتى البيت اللي كاعدة بيه وعدهم 3 اولاد اكبرهم عمره 17 سنة وفرق العمر بين الرجال ومرته 20 سنة والرجال هسة مفلس ويتوسل بيهة اتبقيله جم فلس يمشي بيهة اموره..

بغدادي