موضوع امريكا والنصائح حول الذهاب او عدم الذهاب للمرة المليون

[أ.ج.ت]

السلام عليكم اخواني واخواتي.
موضوع امريكا والذهاب من عدمه انثار اكثر من مرة والكل مشكورين نقلولنة تجاربهم الشخصية بهذا الموضوع بس ياريت لو الاعضاء يبطلون يسألون بهذا الموضوع لان موضوع يتلف الاعصاب لان بصراحة الي مداافتهمة اذا الاسان مهدد وخايف على حياتة حيكون عدة خيار وحتى الي ممهدد وتطلعلة امريكا مراح يروح؟ مااعرف احنا ليش نضحك على نفسنا ونسأل او حتى نجاوب بهيج مواضيع .
نصائحي لكل من يريد السفر لامريكا الي يخاف من العيشة وماكو احد راكض وراه يريد يقتله ليفكر يطلع من العراق الي ميريد يضحي ويبني مستقبل لجهاله ليفكر يسافر الي عنده بنات وخايف عليهم وميفكر انو الحليبة طاهر عمره ميسوي شي غلط خلي ميطلع من باب بيته والي والي والي اخواني معظم العراقيين يريدون يطلعون من العراق او طلعوا من العراق لانوا اكو تهديد مباشر على حياتة وحياة عائلته فرجاءا راعوا مشاعر الناس الي لاحول الهم ولاقوة وميملكون حتى تقرير مصيرهم ذولة الناس من يقرة كلامكم شيسوي يكلهم مااروح لامريكا لان خايف من العيشة . اخواني رجاءا الي عده معلومة براسها خير يكولها ويفيد الناس اما موضوع العيشة والحياة هاي ارزاق ربك يقسمها اما اذا الواحد ضايج  ويريد يفرغ حركته فحرام عليه لان لا الي ديسأل على اجي لومااجي وخلي اتصير صدك وينقبل وعود خلي ليروح ولا النصائح دتجي من شخص صارلة 5 سنين بأمريكا حتى من يطيك تقييم يكون تقييم مبني على خبرة
بالنهاية حبيت اكول كلامي مموجهة لاي شخص وانما اني دااحجي بصورة عامة

[rmadi]

والله اخوية كلامك صحيح

الكلام مال بعض لاخوة ياثرون سلباً علينا

وياريت لا ياثرون على الناس ويخلوهم حايرين وداخلين

[sonmaz]

السلام عليكم
اخي اشمتكون الحياه بامريكا فهي احسن من العراق ومن باقي الدول العربيه
اشو العربي ايذل العراقي والعراقي الي هو اخوه ايذل اخوه كافي انه ما عند ابسط حق من حقوق الانسان الي هيه الامان الكهرباء النظافه والله تعبنا من الي صار بالعراق اخاف اطلع للسوك اخاف نطلع ويه العائله ليصير انفجار لو ينسد الطريق على غفله والله واحد من المسؤولين ديمر
اجه الصيف بانزين ماكو للمولده اجه الشتا نفط ماكو من غير المعامله الي يعامل العراقي باي دائره من دوائر الدوله لو واحد طفل ايوكفك وله شنو سيطره تعبنا من الحياه الي بالعراق والدول العربيه والله تعبنا  

[Hexo]

السلام عليكم اخي العزيز...
بارك الله بيك على هذا الموضوع و بصراحة مثل ما كلت اني طبعا هلكد ما قريت اتشوشت افكاري بحيث حتى احتمال ابطل اخر شي قريته على موضوع الكفيل و ايضا اليوم نزلت سؤال على موضوع الكفيل و بصراحة اني هسة بحيرة ما ادري اروح ما ادري ابقة و الله ما اعرف واني اضم صوتي وياك يعني رجاءا من الاخوان اللي يكتبون عن موضوع الهجرة يكونون متأكدين من الحجاية مالتهم لأنه الكل لازم يعرف انه اي شخص يكتب موضوع هو راح يكون مرجع للكل و حسب قول الرسول علية الصلاة والسلام ( من سن سنة حسنة فله أجرها واجر من عمل بها الى يوم القيامة و من سن سنة سيئة فله وزرها و وزر من عمل بها الى يوم القيامة) واتمنى ان لا يزعلون الاخوان بس المفروض ان نعرف ان كل كلمة بيها يا اما حسنة و اجر او سيئة اذا مو اكيدة لأن اصل اساس هذا المنتدى للمساعدة وليس للاذى و احباط المعنويات يعني بشرفكم اني اقرة اكثر من تعليق يخص نفس الموضوع و خلي نفترض الكفيل و بعدين احس روحي مثل الاطرش بالزفة واحد ايكون لا تختار كفيل الثاني يكول تنقص المساعدات و واحد يكول لا عادي وهاي طبعا مو بنفس الموضوع وانما مواضيع مختلفة بس الهدف واحد و هو الكفيل (حفظة الله و رعاه).
و هاي طبعا القائمة تشمل الكل فأرجو من الاخوان الاداريين وضع قوانين للحد من تشتت المعلومة وايصالها بشكل واضح للمشترك بالمنتدى علمود الكل يستفاد منها ومن أجرها وانشاء الله ما اكون زعلت اي واحد من الاخوان انتوا كلكم اخوتي واصدقائي بس اللي اريد اكوله أنه احنا كوليتنا اعصابنا تعبانة و دايخيين فمانريد ان نختم الموضوع بامعلومات مشوشة.
وشكرا جزيلا واعتذر عن الاطالة

اخوكم
هيكسو

[freeman2]

اخي العزيز
هم ذولة المترددين للذهاب الى امريكا هم ذولة اصحاب الثروات وخايفين على قطع المساعدات والفودستامب عنهم وشلون راح يستقبلون التحويلات كل شهر وبدون ما تأثر على المساعدات..
هم ذولة المترددين ليس الا.
المثل العراقي القديم ..يقول المفلس بالقافلة اميــــــــــــــــــــــــن ..
ولله الحمد



ابوهدى

[حفرئع]

السلام عليكم
اخوان هي حجاية وحدة
واحد مهندس وخبرة وتعبان على روحه خل يقدم على فيزة لدبي!!!!!!!!! مينقبل لين ميردون عراقيين
ازيدكم من الشعر بيت دبي بسنة 1986 جانت صحراء قاحلة بيهة بس عمارة وحدة
نفس الشخص خل يروح لامريكا ويتجنس امريكي ويقدم على دبي راح يبوسون قندرته وهمة الممنونين
هذا غيض من فيض
والمعاجبه ليروح

[احمد سلطان]

السلام عليكم انى صارت عندى قناعة وين مجان اروح وخليها على اللة بس حبيت اعرف بامريكا ابو المولدة يشغل كهرباء بليل لو لا يمعودين تكولوا ياللة اكو مثل طاح الها رجال كالت اعور

[zico]

اخواني
 خصم الحجي
 باي بقعه من بقاع العالم اذا متشتغل متعيش مرتاح
 بالسبعينات واثمانينات جنا بالعراق واحد من العائله يشتغل ايعيش باقي العائله عيشه مرتاحه 0 يعني مثل هسه اميركا اذا بس اني اشتغل اعيش مرتاح اني وزوجتي واطفالي
 ورحمه الله والديه الي يبثله خبر حلووووووو

[ابو خالد]

انا بس اكول كلمه وحده عيشة امريكا افضل مية مره من عيشة العراق والدول العربيه وكل شخص طالعله توطين خلي يسافر بدون تردد وخلي يحمد الله ويشكره ليل نهار

[cricket]

شكرا للاخ كاتب الموضوع ...

مثل ما تفضل اخونا ابو هدى المفلس بالقافلة امين .. وصدكوني الي يتجاوز اول اشهر بامريكا بالتخطيط الجيد واستغلال الوقت بدون تضييعه راح يخلي رجله على اول الطريق الصحيح الي هو تعب بس اكو نتائج واكو قطف لثمار هذا التعب .. الله يسهل امركم جميعا

عندي سؤال زغيرون .... هواية كتبوا مواضيع حذروا بيها من القدوم الى امريكا وحجوا تجاربهم المريرة بس وراها اختفوا لا حس ولا خبر معقولة تطبيقا للمثل القائل (بخيرهم ما خيروني وبش........... )

شكرا لصاحب الموضوع وتقبل مروري

كريكيت

لاس فيغاس

[Abo Rami]

متكولولي انتوا لويش دايخيين قابل امريكا تعزل اذا الشخص الي متردد ما راح ...بس اكولكم شغلة (الي ماينوش العنب يكول حامض) وخلص؟؟؟؟؟؟؟؟
ابو رامي

[sonmaz]

هذولي ايطردون اعيون (الخير ايخص بس الشر ايعم ) همه ايريدوها بس الهم

[eboo]

السلام عليكم
بارك الله فيك اخويه وعاشت ايدك على الي كتبته وصراحه صارت كلش ماصخه كل يوم طالع واحد يرعب بينه عمي وين متصير خلي اتصير قابل تركيا هسه الي ايشين بيه احسن من امريكا اشو ياخذون منه افلوس اقامه بعد واذا مدفعته بوقته راح يضربوه في اثنين لو سوريا لو عمان لو لو وغيره من الدول عمي حمدو الله وشكروه مو كثر النوح يجيب ؟؟؟
المهم اخي أ.ج.ت اصار من شغلتك انطوك موعد سفر بشرني بأخبارك الحلوه

[abo yunes]

صح السانك اخوية وبارك الله بيك شكو ماكو اخبارك مشتاقين اهواية سلامي للعائلة     ابو يونس

[National]

السلام عليكم أخواني الأعزاء
يعني اني هسه صار عندي انفصام الشخصيه schizophrenia من كد ما كل اشويه اسمع او أقرا خبر مره اقرر اسافر  والعصر اكول لا مااروح  ومن يجي الصبح اقرر اروح و على هاي الرنه لذلك أخواني الأعزاء ارجو التثبت من نقل الاخبار  بس أحتمال هذا التناقض يرجع الى أختلاف القوانين في كل ولايه عن الأخرى بس أكو سؤال ملح يطرح نفسه بأستمرار وهو أنه ذولي الجماعه اللي سافرو الى الولايات المتحده وايكولون اتورطنه ليش ميرجعون للعراق ويخلصون من هاي الورطه ويتنعمون بالحر الشديد والبك العذيبي  وأنطفاء الكهرباء وانغام المولدات ومتعة الوقوف في الطوابير للحصول على النفط المغشوش في البرد القارس شتاء والجدران الكونكريتيه التي جعلت من المدن عباره عن سجون كبيره والكلام المعسول اللذي تسمعه من قبل الحرس في السيطرات والمارثون العراقي السير مشيا لمسافات طويله نتيجة قطع الطرق وربما يأتون زوار اليك في الساعه الثالثه ليلا ليفتشو بيتك وهايه زين اذا بس فتشو ومااعتقلوك او أستعارو بعض المصوغات الذهبيه والأموال وما خف وزنه وزاد سعره والقائمه طويله ولايتسع المجال لذكرها أخواني الأعزاء كل هاي الأمور اللي ذكرته اتخليك تشعر أنه أسوأ شيء انته اتعيش في مكان تنعدم بيه انسانيتك أني اكول خلي نتوكل على الله وانسافر ومهما يكن ماراح اتكون الوضعيه اسوا من اللي احنه بيهه يعني امبلل ميخاف من المطر  على الاقل واحد ايروح الى ان الظروف اتصير زينه ان شاء الله يعني وهم عود اذا ايريد يرجع وهم الجواز الامريكي ابجيبك...الشكر لصاحب الموضوع وأثني على ماذكروه الأخوه الأفاضل أعلاه وأرجو المعذره للأطاله وتقبلو تحياتي

[Hexo]

صباح الخير شباب..
طبعا احب اعقب على تعليق الاخ ناشيونال والله والله هسة اني بطريقي للدوام مالتي بالمنصور وهسة اني بدوامي همين نفس حالة الاخ العزيز كمت ما اعرف فاذا الاخ ناشيونال الصبح برأي و العصر بغير رأي فآني اعتبرة محظوظ لأن اني هسة بطريقي من طلعت من بيتي كلت شكو رايح لجوء خلي ابقى بمكاني وشيصير خلي ايصير و وصلت لليرموك وشفت السيطرة والازدحام مال جامع ام الطبول و كلت هاي شبية متكولي شكو باق على هاي اللغوة شوكت انصير اوادم و والله وصلت لمعرض بغداد و طبعا اني دا اشوف الملصقات الانتخابية كلت وية روحي يعني اكو امل مثل ولو شوية انه احنة راح نرجع مثل قبل.
المهم ما ادوخكم القصد من كلامي اني هلكد ما قريت على الهجرة من آراء بموقعنا الموقر و غيرة صدك كمت ما اكدر اتخذ قرار محدد من ناحية الهجرة مرة اكول اروح و مرة اكول لا ليش اورط روحي اخاف اتورط.
على كل حال اتوكلت على الله وكلت هو المقسوم لازم ايصير و على كولة المثل المصري ( اللي مكتوب على الجبين لازم اتشوفة العين )
فآني اناشد من كل الاخوان انه مثلا من يكول اني ماعاجبني الوضعية و اتورطت يشرحلنا لويش اتورط و شنو الاسباب اللي مر بيها مو بس يريد ايبين انه هو ايريد ايسوي خير و يخبلها للعالم يترك المنتدى فترة و بعدين يدخل ويفجرله قنبلة بنصنا ويخلينا حايرين.
وشكرا جزيلا
تقبلوا مروري
اخوكم هيكسو

[أبو زيوني]

أخي العزيز أول شي مشكورة جهودك على هذا الموضوع الجميل وثاني شي بس الواحد يخص من السيطرات والمولدات وينام مرتاح تسوى الدنيا ومابيها.





أخوان أتوكلو على الله وفلتو من القهر هو ماكو أحسن من بلدنا بس شنسوي أذا أحنه بعد 100 سنة متصير النه جارة


وشكرا

[engineermech]

السلام عليكم ورحمة الله وبركاته
اخي العزيز الي عنده هدف وناوي يسوي ما يسمع بكلام اي شخص لانع مقتنع من الشي الي راح يسوي وهذه تحتاجله ارادة فكلام ما غير بس الي ما عنده ارادة وهدف

[أ.ج.ت]

اشكر كل الاعضاء الي شاركوا بالموضوع سواء بردودهم او مجرد قراءة الموضوع واسف اذا تاخرت بالشكر السبب كان انقطاع الانترنيت.
اخي العزيز ايبو وابو يونس شكرا على سؤالكم وان شاء الله هذا الاسبوع يحددولي موعد.

[مهند المهند]

عمي والله العضيم هسة لو ايكولون توطينك بروسيا البيضاء اقبل المهم مرتاح الببببببببببال

[koka75]

شكرا لكل الاعضاء بس اريد اكول حجاية وحدة الرجال الطالع من ضهر ابوه ويكول اتورطنة بامريكا وهاي ورطة خلي يقدم رجوع للعراق ومن يرجع بخير وسلامة خلي يكتبلنة موضوع صغير ويكول ها اها اني رحت لامريكا وتورطت ورجعت للعراق وماعتقد اكو واحد راح يسويها لو شتكولون اخوان واخواتي
   اخوووكم ابو محمود

[alwismy]

حقيقة وليست مجاملة

14 سنة في دبي وماكنت انام وانا مرتاح كنت دائم التفكير شلون الايجار وشلون الكهرباء وشلون مدراس الاطفال واللي هي الاهم في حياتي واذا ماعندك تدفع للمدرسة يقولولك اخذ اطفالك وبس يصير عندك احنا موجودين ---------واللي شفته هنا غير غير غير عن اي بلد مر بحياتي اهتمام مو طبيعي بالاطفال مدارسهم وتعليمهم مجانا وتأمينهم الصحي مجانا لغاية 18 سنة  وبالفعل ارتاح بالي وقمت انام وانا مرتاح ومن ناحية العمل فهو مو بيوم وليلة ويحتاج لصبر يعني مثل ماتوصل لاي دولة لازم تبحث عن اي عمل علمود تتأقلم وتندمج مع الحياة التي راح تعيشها مع هذا المجتمع

نصيحة وليست دعاية

فرصة العمر لاتتكرر مرتين --- اغتنم اقرب فرصة لك لكي تتجدد بيها حياتك وحياة اسرتك

[3okl]

السلام عليكم
مشكور اخي على هذا الموضوع اني اريد اكول شي الي ضايج من امريكا خلي يرجع للعراق
واني اظمن اللجوء وراتب من الحكومة العراقية وشغل ايخبل عمالة 15 الف دينار عراقي يعني
13 دولار وكيلو اللحم 14 الف دينار والمولدة 9الف دينار الامبير والتايكر عطالة ابشرك اني تدري شسوي
من تكمل شغلتي اشحن مولدة عاطلة لامريكا علمود اتذكر الماساة الي بالعراق  (هذا لا يعني انه العراق مراح
ايصير واحسن من كل دول العالم ان شاء الله ) اخوكم عوكل

[Alrwad]

عمي انتو صدك اتسولفون؟؟؟؟؟ عمي العراقيين جانو يطلعون تهريب لسوريا ولبنان والاردن حتة يشتغلون هناك بالفلسان واكثر الناس انلزموا ورجعوا تسفير واكو طالعين رسمي وهم سفروهم الاردنين شنو نسيتووووووووو؟؟؟؟؟؟عمي اقراها زين امرررررررريكااااااااا. صدك جذب؟؟؟هسة شنو انت راح تنحكم بالاعدام اشو هية سفرة مال يومين معجبتك ارجع العراق راح تلكيه موجود...ها ولاتخاف راح تلكة نفس الخيسة والازدحامات والسيطرات...اني ادري يمكن كلامي شوية راح يزعل بس هو هذا الواقع شئنا ام ابينا..وتقبلوا مروري

ابو لينة.