شبيك لبيك كندا بين ايديك

[المصباح السحري]

السلام عليكم ورحمة الله وبركاته
حبيت ان احيي جميع العراقيين بالداخل والخارج واللي ناوين يجون الى كندا لمقاطعة كيبك واجعل من هذا الموضوع مرجع ودليل للقادمين الى مقاطعة كيبك في كندا.
بالبداية احجيلكم قصتي بالتواريخ، اتصلو بية اليو ان بنهاية شهر الواحد 2009 وكالوا عندك مقابلة بكفرسوسة بدمشق علمود التوطين على بداية شهر الثاني سالتهم وين التوطين لاي دولة كالوا من تجي تعرف.
رحت على المقابلة واني ابالي اذا تطلع على امريكا ارفض، اجة وقت المقابلة كالتلي الموظفة انتة طلعتلك اعادة توطين لامريكا كتلها بس اني ما اروح لامريكا كالتلي بس اذا ترفض ايسدون ملف اعادة توطينك اذا ما عندك سبب مقنع كتلها اني ما اكدر اروح للامريكا و هي الي دمرت العراق والامريكان ضربوا ابوية ثلاث اطلاقات وحدة بالراس والله نجى.. عد هية سكتت وكالتلي انتة بنتك الصغيرة ولادة سوريا كتلها اي كالت اتريد اضيفها على اليو ان (لان جنت بعدني مضايفها) كتلها ضيفيها...بعد مطلعت الموظفة من الغرفة حتى إضيف بنتي رجعت كالتي اتروح على كندا؟
اني جان ماعندي اي معلومات عن اللجوء لكندا وشنو المميزات، بس كلت اي شيئ غير امريكا ووافقت على كندا.
بعدها كالت انتظر اتصال السفارة احنة راح انقدملهم ملفك واذا وافقوا يتصلون بيك.
بس اكوا ملاحظة بعدها صاحبي طلعلة لجوء كال اني اذا طلعتلي امريكا راح اسوي مثلك بلكي ايغيرون ملفي وصدك طلعتلة امريكا وكلهم اني ارفض امريكا كالولة راح انسد ملفك وصدك سدوا، بس هوة سوة استئناف ورجع ملفة لامريكا وهوة هسة بامريكا بس اتاخر، يعني مو اكيد واحد ايحولوا لغير مكان.
اوكي نرجع لموضوعنا بعدها باسبوعين خابرتني السفارة الكندية وحددتلي موعد اجيب بي الاوراق الرسمية وكان ايضابشهر الثاني 24-2-2009 ورحت للمقابلة وسلمت الاوراق الرسمية المستنسخة وياهة صور, وهم كالوا انتظر اتصال من السفارة.
بعدها اتصلوا بية وحددولي مقابلة بشهر الثالث، ورحت للمقابة وكانت مع موظفة كندية كبيرة بالعمر ومترجمة،
وطولت المقابلة تقريبا نصف ساعة واني طكطكت كم كلمة انكليزي وياها لان المترجمة معرفة اتوصل كلامي بصورة صحيحة، فسالتني انتة تعرف انكليزي؟ كتلها قليل، كالت راح اسجل هذا الشيء. يعني اذا شافوك تعرف شوية انكليزي هذا ممكن ايعزز موقفك بالمقابلة.
بالنهاية كالت اني انطيك موافقة مبدئية على اللجوء، وانطتني فايل اوراق الفحص الطبي.
وبعد يومين سويت الفحص الطبي و سالتهم اني اخذ النتيجة؟ كالوا لا احنة نبعثها بالبريد للسفارة.
وظليت بعدها انتظر اتصال السفارة الى ان ايست كلت خلي اروح للسفارة اسال والكل يعرف شراح ايصير.... تلكة نفسك راجع للبيت وبيدك ورقة بيهة ايميل ورقم فاكس..
ودزيت ايميلااااااااااااااااااااات وماكوا جواب.
وبالشهر الثامن دزيت فاكس وانتظرت وماكو جواب.
وبنهاية شهر العاشر اجاني اتصال من السفارة الكندية كالوا انتة بملفك طلبت اوتاوه بس اوتاوه مبقة بيها مقاعد اتريد اتحول على كيبك حتى اسافر قبل 15-12 لو تنتظر على السنة الجديدة؟  كتلها لا حوليني على كيبك (كيبك باليد خير من اوتاوه على الشجرة).
بعدها اتصلو بية كالو سفرك بنهاية شهر 11 وقبل السفر باسبوع اخذت الدورة التثقيفية.
اكتفي الان بهذا القدر وانشاء الله ابدي بالموضوع القادم عن المطار والجنط والايام الاولى ....

[اينشتاين العراقي]

السلام عليكم اخونا العزيز  (المصباح السحري)
طبعا احب اكلك مبروك على توطينك في كندا لانه دوله ممتازه بكل المقاييس
ولو تهنئتي جتي شويه متأخره
وثاني شي احب اشكرك على مباردرتك الحلوه لمساعده اخوانك العراقيين الي يريدون يروحون للكيبك
وهسه صار عدنه الفريدو وعبسي واخونه اريد وطن بتورنتو
وانت بالكيبك
وانشالله اني سفري عن قريب لفانكوفر
يعني منتدنانا الغالي مغطي كل اجزاء كندا 
وانشالله كل التوفيق الك اخويه العزيز بحياتك بكندا
بس يا ريت هم تشرحنا بالتفصيل عن كل شي بالكيبك يعني من وصلت للمطار الى اليوم
وشكد الرواتب وهل هنلك فرص عمل ام لا وطبيعه الجو واللغه المعتمده ؟؟ وما الى ذلك
ولو راح انعذبك ويانه شويه بس حتى يصير هذا الموضوع مرجع بحق لكل من يريد الذهاب للكيبك
وتقبل تحياتي
اخوك اينشتاين العراقي بأنتضار ان اكون اينشتاين الكندي قريبا

[الفريدو]

اخويه المصباح السحري اتشرف بيك في كندا
انا في كالكري ولكن ممكن سؤال ؟؟ انته في اي منطقه في كيبك لان عندي اصحابي طلعو الى كيبك بنهاية شهر 11 و15/12 اتمنى ان تكون على معرفه بيهم

انشالله راح نفتح مكاتب في كل ولايات كندا لمساعدة اخوانه الاعضاء

اهلا وسهلا بيك بين اخوانك واهلك في هذا المنتدى الجميل



اخوك : الفريدو

[ابو خالد]

اهلا بيك اخوي العزيز المصباح السحري والحمدالله على سلامتك وبالتوفيق انشالله ونشكرك على مساعدتك الى اخوانك

[Wingo]

ألف مبروك عيني
الله عز و جل راد خيرك
مرات أتمنى لو سويت مثلك و صرت حازم من البداية في طلب عدم تحويلي على أمريكا
الحمد لله ، الخير ما إختاره الله
الله ييسر أمرك و يوفقك لكل خير
بس ياريت تحكيلنا بأي مدينة في كيبك ؟ مونتريال؟
إن شاء الله نظل نسمع أخبارك الطيبة دائماً

[skn]

السلام عليكم

احب احيك اخويه المصباح السحري على حب التعاون والمساعده بالحقيقه اني تحولت على منطقه كيبك ولكن ليس لدي معلومات كامله عنه حسب معرفت ليس كل كيبك فيه الامتيازات الموجوده في المقاطعات الاخرى ياريت ازودنا بالمعلومات ولو اخونا الفريدو واختنا كندا مقصروا ويانه ولك جزيل الشكر.

اخوك skn من مصر

[Mazen Al-Baghdadi]

الف مبروك اخويه المصباح السحري على سفرك
والحمد لله والشكر من تعاطفت الموظفه وياك لان همه دائما يكونون مشددين.......

وتسلم على مساعده اخوانك لان انريد نعرف شنو مميزات ومساوئ  كيبك
ولو كل ولايه بيهه مميزات ومساوئ ......ومنتظرين منك تكمل تفاصيل من وصلت .........
الى انت حاليا شلون عايش
وصار عدنه بكل ولايه اخو


      اخوك:اربد

[ضـاع الوطن]

الف الحمد لله على السلامة اأخوية موفق بحياتك الجديدة ان شااااء الله

منتظرين باقي القصة أخوية

تقبل مروري

[المصباح السحري]

السلام عليكم اخواني .. اشكركم جميعا على ردودكم وتهانيكم وانشاء الله تفرج على الجميع واني انشاء الله ما قصر وياكم باي معلومة والله يسر.
نبدي اول شيئ بتجهيزات السفر والمستلزمات الي تاخذوها وياكم :-
اول شيء الملابس،الملابس الثكيلة والصوف مو كلش مهمة لان الي يجي بالشتة ايسلموا بالمطار (قمصلة مطرية وبالداخل فرو وميدخللها البرد حتى لو تنام بالثلج، وقفازات وحذاء مكتوب عليها -35 يعني اخر شيء يبرد ايدك ورجلك، وينطوك لفاف وكليتة تعبانات يعني مو كلش تحمي من البرد وممكن تشتري منا كليتة مبطنة فرو واتسد الاذن وهاي افضل شيء). بس المهم هنا هي الملابس الداخلية القطنية ردن طويل لان متكدر تتحرك اذا متلبسه جوة الهدوم (اكيد مو فوكاها لان ينطوك شهادة عود بعدين احجيلكم على هاي الشهادة), وتحتاجون تيشيرتات فانيلة كم طويل تنلبس جوة القمصلة لان داخل البنايات والمولات كلها تكون مدفاية تنزعون بيها القمصلة ونادرا متشوف واحد لابس صوف واذا شفتة هذة اني هههههه.
اذا جايبين وياكم قماصل خفيفة راح اتفيدكم بنهاية الشتة وبداية الربيع. ولتكثرون من الملابس لان هنا اكو مولات رخيصة جدا مثل زلرس و ولمرت هاي اتبيع ملابس جديدة بس بسعر كلش مخفض يعني مرات اتشوف شغلات ارخص من سوريا، وبسوريا بالتاون سنتر بعد مواصلة كموديل يعني مو موديلات قديمة.يعني مثلا بنطرون الكاوبوي 12-25$ والتيشيرت 12-25$ وكثير مرات تجي تخفيضات حقيقية على الملابس 30%50-%
هاي بالمولات الي كتلكم عليها يعني لتهمكم الملابس.
وشغلة ثانية همة راح ياخذوكم على المول زلرس ويشترولكم ملابس بقيمة 175$ للشخص الكبير و 160$ للصغير وهاي اتجيب ملابس اطلعك موسم (هاذا الكلام عن كيبك ولا اعرف هل هو موجود بغير مقاطعات).

الشغلة الثانية المهمة هي اللابتوب لان هنا ما عدكم غيرة للتسلية ومشاهدة التلفزيون والتحدث مع الاهل
واللابتوب يشتغل على الفولتية مالكندا وللتاكد اقرة الفولتية على المحولة 240-100 فولت لان هنا اللابتوبات اغلة من سوريا لان السعر تقريبا نفسه بس ازيد تاكس 13% يعني كل 100$ ياخذون تاكس 13$.

لتجيبون بهارات ماكو داعي بس سالوا من توصلون عن محل الافغاني او الباكستاني او الجزائري....وهاي المحلات اتكون مثل المحلات بالعراق او بسوريا يعني صغيرة بس بيها كلشي اتريد من البهارات للحوم الحلال للماجي واللبن والعسل والعنبة وعجينة الفلافل وخبز العيش والمارتدلا والصوصج (سوالي مشكلة بالمطار هم بعدين احجيلمياها)، بس انتوا لتاخذون من عندة حتة البيض والعصائر لان هاي موجودة بالمولات ويصير عليها تخفيضات رهيبة.
بعض الاسعار عند الافغاني:
الخبز  1.65$ عند الافغاني وبعضهم ايبيعوا 2.5$ ايكولك هذا نوع توب وهي نفس الشيء
المارتديلا والصوصج  1.16$-2.5$
اللحم  الهوش 7$
الدجاج افخاذ  3.5$
اللبن 750 غرام  2$
الرز 8كيلو  10$ ويوصل بسبعة بالتخفيضات يعني اخذوا كمية
البيض طبقة 12 بيضة 2.5$-4$ وتجي تخفيضات توصل الطبقة 1.5$ الخشن وهاذه الوكت تاخذ كمية جبيرة ولا يهمك.
الزيت تقريبا 4$ اليتر وهذه يتغير بالتخفيضات وحسب الكمية يعني ممكن تاخذ علبة 16 لتر 19$ زيت خضار .
هاي اهم الاغذية الي راح تاخذها بكثرة هنا.
ومن الشغلات الي نوعا ما مهمة هي الكامرة لان راح يعجبك اطك صور بالمطار الترانزيت حتة اتكول هاي اول مرة اكدر اوصل هذا المطار بجواز عراقي!!!!
وها قبل ما انسة اهم شيء ممكن اتجيبوا وياكم هوة اجازة السوق المحلية مو الدولية لان هنا الدولية ممعترف بييها،الاجازة راح اتوفر عليكم 900$ دولار اجور الدورة الي فرضوها بكيبك بالقانون الجديد الي بدة هاي السنة. فاذا عدكم هاي الاجازة مباشرتا تدخلون امتحان الاجازة المؤقتة وهوة امتحان نظري (نحجي بموضوع الرخصة على الجايات).
هاي من الاشياء المهمة الي اتجيبوها وياكم وايضا اكيد دفتر لقاحات الاطفال ولو لحد الان محد طلبة بس على المدارس يطلبوا وايضا لااكمال اللقاحات المتبقية.
اني اترخص منكم هسة وانشاء الله راح اكمللكم على المطار بالموضوع الجاي مع السلامة

[(بغدادي)]

حمدلله على سلامة الوصول والاستقرار وانشاءالله موفق اخي العزيز..

بغدادي

[migrant]

حمد لله على السلامة..والف شكر على معلوماتك الرائعة من قلب الحدث..

[skn]

عاشت الايادي على هاي المعلومات المفيدة وبارك الله بيك

[ammarbattal]

شكرا اخي مصباحالسحري
 على موضوعك الجميل واتنمى تتواصل معانا للاستفاده للجميع .... انا  مخلص الفحص الطبي من شهر 11 /2009 ولحد الان انتظر رحمة الله .... التوفيق للجميع ... اخوك عمار

[المصباح السحري]

السلام عليكم
بالبداية اشكر كل الي شاركوا بالصفحة واكولهم انشاء الله الوصول بالسلامة لكندا والي وصلوا اتمنالهم الموفقية والنجاح واني بالخدمة لاي سؤال، بالنسبة لسؤال المتميز الفريدو الي مقصر ابد باي معلومة حتة ايفيد اخوانة بالموقع اني ساكن بضواحي مونتريال منطقة تبعد خمسة وعشرين دقيقة عن الداون تاون بالسيارة منطقة نوعا ما سكنية وهادئة وحلوة واني حاضر لاي مساعدة.

نبدي بالجنط، الوزن الي مسموح بي تقريبا 23 كيلو بس ميدققون يعني، والتفتيش كلة صار بالاشعة يعني متنفتح الجنط ما عدا الجنط الهاندباك وهم مو ذاك التفتيش يعني ميدققون، والجنط متستلمها الى ان توصل كندا.
احجام الجنط ما اذكرها بالضبط الي كالوا عليها بالدورة التثقيفية بس الي اتفاجئت بي انه الناس كل واحد جايب جنطة شكل يعني هم مدققوا على الحجم، والي موجودين بدمشق اكو سوك اسمة سوك الخيجة هذا يبيع جنط سفر من توصلون هناك سالوا على جنط مال يو ان اصير سود (وتكدر تعاملة وتاخذ 3 بالف ليرة ههههه وتمشيك حتى توصل).
اكو شغلة مهمة اذا لكيت تحويلة كهرباء (راس البلك) جيب وياك اذا كنت جايب لابتوب لان اتفيدك واذا ملكيت فمن توصل هنا اسال على محلات اسمها ( دولورامة ) مو دولمة، او (بلازه دولار) وهاي تلكاها تقريبا سعرهه دولارين لان هاي المحلات تشبه محلات حاجة بربع وكلشي بيها من الكهربائيات البسيطة وبعض اغراض المطبخ والقرطاسية وزهور الزينة والساعات والهواتف الارضية والمنظفات وبعض العدد البسيطة....... الخ
يعني تقريبا معظم الحاجيات الضرورية بالبيت وباسعار رخيصة. اني بعض الاحيان اتحول على موضوع ثاني لغرض الفائدة بس انشاء الله راح اخصص موضوع عن المولات وانواعها وانسبة الاسعار بيها.

نجي هسة للمطار،الطيارة مالتي كانت الساعة سبعة ونص الصبح اتفقت قبل يوم مع سائق تكسي يجيني للبيت، وصلنا للمطار بدمشق الساعة سبعة تقريبا لكينا ابو اليوان صاير اعصاب يكول ليش متاخرين، واخذنا يم الجوازات وخلصنا وسلمنا الجنط مطلع اكو زيادة بالوزن، والحمد لله طرنا من مطار دمشق الى مطار برطانيا الي كانت ترانزيت، بعدها استقبلنا شخص برازيلي من الاي او ام بمطار بريطانيا وكمللنا الجوزات واخذنا لقاعة الانتظار بقينا تقريبا ثلاث ساعات وراها جتي طيارة مونتريال،واتجهنا الى كندا مونتريال
بالطيارة تاخذ وجبتين معظمها بي لحم (بيف) يعني بقري او دجاج بس اكيد مو حلال بس تكدر تاكل رز او التوست او اجبان الى ان توصل.
الحمد لله وصلنا مطار مونتريال المغرب وكملنه اجرائات الدخول واخذولنه صور حتة يسون كارت الاقامة الي يوصلك بعد فترة بالبريد ويسئلوك  اذا عندك تعديل على الاسماء او اي معلومات اتريد تصحيحها الى اخره.
بس اكو شغلة كلش مهمة انه احنة عدنا الطفل يسمة على اسم ابو وبعدين جدة (الاسم الثلاثي)، لاكن هنا عدهم الاسم الاول والاسم الاخير (اسم العائلة) فلي عندة اولاد ياخذون اسم الطفل الاول والاسم الثاني الي هوة اسم الاب ويعتبرون الاب اسم العائلة، وللاب ياخذون اسم الاب هوه الاسم الاول وابو الاب (الجد) اسم للعائلة، بعد هاي الهوسة كلها ايصير الطفل اسم عائلتة يختلف عن اسم عائلة ابو (والله دوخة) . فمن تراجع على شغلة مثل لاسمح الله مستوصف ايكلولك هذا ابنك شو اسم عائلتة يختلف عن اسم عائلتك،اني سالت المساولين عن ملفنا هنا كالوا ماكو حل لان انتوا جوازاتكم هيج المعلومات الي بيها، واذا اتريدون سوا معاملة تصحيح اسماء فلي يكدر يسال قبل ميجي شنو الي لازم اسوا حتة اذا اتكدرون مباشرتا بالمطار سوا تصحيح الاسماء يعني خلي الاطفال والاب يصير عدهم اسم العائلة نفسه وهوه اسم الجد.
شغلة مهمة الي يجيب ويا فلوس شكد متكون ليكول عندي ومن يسالوا يكلم  ماعندي ولا فلس لان محد راح يفتش جيوبك، واذا سجلت فلوس عليك يتكلون عليك.
زين نجي بعد مكملتوا اجرائات الجوازات واذا كنتوا واصلين بالشتة فياخذوكم لغرفة الملابس حتى ياخذون قياسكم وينطوكم ملابس شتوية وهي :
قمصلة - حذاء (بوت ثلج) - قفازات - كليتة ولفاف
بعدها يصعدوكم بسيارة وياخذوكم الى فندق بالمنطقة الي راح تستقرون بيها، واني حسب الفندق الي كعدنا بي كان فندق راقي بي مسبح وقاعة رياضة ومطعم وانترنيت وايرليس(للي جايب لابتوب) ولوندري، وكل غرفة بيها مرافق وحمام خاص.وجابوا عشاء (بس ديربالكم كان سندويجات لحم خنزير ) اني الي استقبلتنا بالفندق وهي نفسهه المسؤلة عنه سالتني اذا كان الاكل الي جابولنيا منكدر ناكلة لان مسلمين فممكن اتبدلة بس اني جنت تعبان كلش باوعت بالجيس عبالي سندويجات جبن لان كان شرائح بيضة كتلها لا لتغيروا بس ورة مراحت يلة عرفنا هذه لحم من ريحتة. بس واحد من التعب ميفكر بالاكل بس يريد ينام.
بقينه بالفندق عشرة ايام تقريبا الافطار والغداء بمطعم الفندق والعشه بمطعم صيني قريب من الفندق وكل يوم كانوا ياخذونه انكمل اوراقنه من الصبح للعصر واخر يومين شوفونة ثلاث شقق للاجار وكالوا اختاروا وحدة بصورة سريعة لان اذا اتاخرتوا راح ايصير الفندق على حسابكم كل يوم تاخير
فاختارينه شقة غرفة وصالون لان اني عندي طفلين صغار فما احتاج الشقة الجبيرة واجرة الشقة 550$ بالشهر بدون كهرباء ولا تدفئة بس وياها بارك للسيارة ( قائمة الكهرباء طلعت تقريبا 100$ بالشهر مع التدفئة)
بيوم الي انتقلنا بي للشقة جابوا اثاث:
طباخ - ثلاجة - سرير نفرين - سرير لكل طفل - كومدي ست مجارير - كومدي ثلاث مجارير كبيرة لكل طفل( يعني مو شرط الابن طفل ممكن يكون شاب) - ميز طعام مع كراسي على عدد افراد الاسرة -  تيبل لمب - غراض مطبخ على العدد - مناشف كبيرة وصغيرة على العدد - مواد تنظيف - وساعة منبه مع راديو .
هاي كانت اهم الاشياء الي ردت تعرفوها عن السفرة، الموضوع الجاي راح نتحدث بي عن الايام الاولى بكيبك.
مع السلامة

[Mazen Al-Baghdadi]

تسلم اخويه المصباح السحري على المعلومات المفيده
ومنتظريك تكمل على الايام الاولى بكيبك  لتتاخر علينه


اخوك:اربد

[there is hope]

الحمدلله على السلامة اخ المصباح السحري....

    اخي الف الحمد لله على السلامة وان شاء الله تحصل شغل والله يوفقك ويسهل لعائلتك بس سؤال انا جوازاتي مسويها ابغداد نفس الحاله مالتك شدكول اغيرها ...والله انا تعبت هاي شلون...اخي ادري بيك مشغول بس اذا تكدر جاوبني انتة او اي احد من الاخوان....



اخوك

there is hope
   

[الفريدو]

اخويه العزيز المصباح السحري اشكر روحك الطيبه لمساعدة اخوانه وحب المساعده

اني حبيت اسالك عن شخص طلع من عمان الى كيبك وبنفس يوم سفرك اتمنى ان تكون تعرفه او صادفته لان هو شخص عزيز وانقطعت اخباره عني لسبب سفري وكان سفري بعدي ولم اتواصل معاه وهو رجل رسام اسمه ابو محمد ( سعد النعيمي ) رسام وهوعنده عوق طفولي ( اعرج ) اتمنى ان تكون تعرفه وتبلغه سلامي وياريت تحصلي على رقمه واكون ممنون منك هوايه

تحياتي اخي العزيز وحياة سعيده انشالله



اخوك : الفريدو

[المصباح السحري]

السلام عليكم اخواني اشكركم على تفاعلكم مع الموضوع وانشاء الله راح اكمل عن الايام الاولى بكيبك، بس حبيت اجيب على اسالتكم اولا.
بالنسبة الى الاخ there is hope فاكلك لتغير اي شي بالجوازات واذا ردت اسوي اي تغيير ورة متجي لكندا سوي، وماكو داعي للمجازفة لان الشغلة متستاهل ومرح تكدر اطبق قانون كندا بالدول العربية (الاسم الاول والاخير) وترة هنا رغم انه مخربطة شوية يعني اسم عائلة الولد يختلف عن اسم عائلة الاب بس ميكدرون يحجون لان هنا اكو بلاوي يعني اكو ناس مسمين على الام واكو همة يختارون اسم لابوهم يعني مليوصة بس رغم هذا اني دا انتظر صاحبي هم نفس المشكلة عندة فقدم على تصحيح اسماء ودينتظر النتيجة وايشي يصير اني انشاء الله ابلغكم، فتعال هنا وبعدين انتة بكيفك.
اما بخصوص سؤال الاخ المتميز الفريدو فمع الاسف لم التقي بهذا الشخص الى الان وانشاء الله اذا سمعت اي معلومة عنه او التقيت بي شخصيا، مباشرتا راح ادزلك خبر وتدلل.

[دحدوحة]

الله يطيك العافية ويسهلك امرك علة هالموضوع
بس اخي مذكرت اطوكم شراشف بطانيات ستائر واذا مطوكم تنصحني اجيب من سوريا تدري هيج اشياء هنا بفلس ونص
واذا اطوكم خوما مثل الي طونياهة بسوريا هاي الرصاصية مال الجيش

واشكرك

[المصباح السحري]

السلام عليكم
بالنسبة لسؤالج اختي فاني نسيت اكلكم انطونه بطانيات ولحاف نفرين وشراشف على عدد الاسرة يعني لكل واحد بطانية وشرشف ولحاف ومخدة والبطانيات نوعا ما جيدة لان اكيد ماكو مثل بطانيات الجيش هنا. بس همة ايجيبون اشياء رخيصة نوعا ما بس اتمشي الحال، وشغلة مهمة ترة هنا التدفئة جيدة جدا يعني محسينة اكو شتة وبالبيت لبسنه كلة صيفي ومحتاجينة بطانيات بس الي جابولنياها، لاكن صح التدفئة جيدة بس مو معناها انخليها مشتغلة طول الوكت. لان اكو عوائل عراقية جتي هنا طلعت قائمة الكهرباء عليهم 900$ تقريبا لان التدفئة جانوا ميطفوها، والبيت كلة مشغلين تدفئتة. وصارلهم كم شهر يدفعون اقساط الكهرباء.
اما الستائر فهنا ينطون بس ستارة لغرفة النوم والباقي لازم انتوا تشتروا والستارة الي ينطوها من النوع المكتبي يعني دفترية تصعد وتنزل. والبردات القماش هنا تعتمد على نوعها والمكان الي تشتريها منة والاسعار متفاوتة بس تلكة بسعر مناسب وهي واحد يشتريهة مرة وحده ويخلص.

نحجي هسة عن الايام الاولى في كيبك، فبعد ان تنتقل من الفندق للشقة لازم تبدي تعتمد على نفسك. وراح ينطوك كم فلس تقريبا 240$ (حسب حجم العائلة) حتة تشتري بيها الاشياء الضرورية مثل الاغذية وهم تدفع منهه فلوس الصور الي يستعملوها بكارت الصحة والصور تقريبا 10$ للشخص (صورتين) والصور تكدر اصورها باي صيدلية او بعض المولات.
والافضل انه تبدي تطلع واشوف المنطقة الي انتة بيها قبل متطلع من الفندق يعني تتعرف على المولات والمحلات القريبة
وهاي المنطقة راح اصير عندك احلى منطقة بكندا لان هية اول منطقة شفتها بكندا واتظل من تجي بيها تذكر ايامك الاولى.

بكندا المولات انواع منها المتخصصة بالاكل مثل (سوبر سي وماكسي ولابلاوس....الخ) ومنها الي تشمل الاكل والملابس والاجهزة المنزلية مثل (زيلرز وولمرت...الخ) او متخصصة بالاجهزة الكهربائية والرياضية ومعدات الثلج والمواد الاحتياطية للسيارات مثل (كندياً تايرد) او المحلات الي واحد ميستغني عنها وبيها ادوات بسيطة مثلا القرطاسية وادوات المطبخ واغراض التنظيف وممكن اسميها محلات حاجة بربع لان اسعار المواد بيها متجاوز الدولارين وهية (دولورامة) و(بلازة دولار) ولاكن الاخير بي مواد اكثر واسعارها توصل من (1$ - 10$). وانشاء الله راح اكتب بالتفصيل عن المولات وانواعها واسعارها.

بعد فترة راح يجيك رسالة بيها مقدار المبلغ الي راح ينطوكميا اللولفر وهذه مثل الراتب الشهري ومقداره يعتمد على عدد افراد الاسرة يعني لعائلة متكونة من اب وام وطفلين تقريبا 1300$ وبعد كم يوم يجيكم راتب الولفر ويكون عبارة عن ظرف بي شيك وهذا الشيك تاخذة للبنك الي سويت بي حسابك وهاي الامور بالبداية يكون وياك المسؤول عنك يكمللكياها.
واذا شافوك عندك شوية لغة انكليزية او فرنسية راح يبدون يحولون الاشياء عليك فانتة لتبين انه انتة خبير ودائما كلهم اني ما اكدر اروح وحدي لازم احد يجي وياي حتة متحتاج تركب تكسي وتدفع من جيبك.
ومن هذا الراتب لازم تدفع اجار البيت، ويكون الدفع اما تنطي كاش لابو الملك لو تنطي شيك والمسؤول عنك راح ايعلمك شلون تدفع شيكات اذا كنت متعرف وممكن تطلب منة يستنسخلك اول شيك حتة تاخذ دائما منه المعلومات وسجلها بالشيك الجديد. بس اني دائما افضل الكاش واخذ من صاحب الشقة ورقة (ريسيت) بالمبلغ الدفعتة وتاريخ الدفع حتة اثبت حقي لان هنا كلشي تدفعة تاخذ بي وصل.

راح اشوف انه الراتب الاول راح ينصرف بسرعة لان انتة بعدك جديد بالمنطقة ومتعرف المحلاتوالمولات الي يمك واسعارها وبعدها الجرايد مواصلتك واكيد راح تسال شنو هاي الجرايد؟
الجرايد هاي راح اترتبلك الصرف واتقلله وهاي الجرايد تجي اسبوعيا وتكون يم باب كل عمارة وتقريبا لكل الاسواق والمولات الكبيرة وبهاي الجرايد تلكه المواد الي مسوين عليها تخفيضات (مواد غذائية او منزلية)، فتبدي اترتب ميزانيتك، يعني مثلا اشوف اعلان انه المول الفلاني مسوي تخفيضات على البيض (مسوي بنص القيمة) انتة مباشرتا اتروح لهذه المول وتاخذ منة كمية كبيرة من البيض اتكفيك شهر مثلا الى ان تجي تخفيضات ثانية ونفس الشيء بالنسبة للالبان والخضر والفواكه او اي مادة منزلية ثانية، يعني لازم اترتب ميزانيتك مضبوط لان همه الراتب الي ينطوكيا حتى اتعيش بي بدون تبذير.

واني اتحولت على الشقة تقريبا 10 بالشهر والاجار منطيتة كامل فمحسيت انه صرفي كثير رغم اني كنت اشتري من المولات الغالية ومن محلات البقالة الصغيرة والي اتكون غالية جدا، ومشاني الراتب لراس الشهر بس بين عندي الصرف الخطاء بالشهر الثاني لانه دفعت الاجرة كاملة 550# ودفعت فاتورة التليفون والانترنيت وتركيبها 110$ فاظطريت اكمل الشهر من جيبي، وبديت اسأل العراقيين الي جاين قبلي بفترة شلون امشيها اول شيئ كالولي كلنه مرينه بهذا الشيء بالبداية بس بعدين اتعلمنه شلون نصرف ولازم تنتبه على التخفيضات بالجرايد وتعرف المولات الرخيصة، وبعد ثلاث اشهر تقريبا راح تبدي تجيكم شيكات مساعدة كيبك وهاي الشيكات تنجمع وتجي كل ثلاث اشهر والي عنده اطفال راح يجي راتب الطفل وهذا الراتب يستمر لي عمر 18 سنة، فاول اربع اشهر اتكون صعبة، وممكن راح تصرف من جيبك بنهاية الشهر اذا كانت عائلتك صغيرة (كلما اتكون العائلة اصغر راح يكون الراتب اقل)، بس اني انشاء الله راح انطيكم معلومات اتفيدكم من حيث اختيار الشقة المناسبة وايضا انواع المولات ومميزاتها يعني مراح تجي لكندا على عماك وراح تكدر تتاقم بسرعة.اني لهنا راح اتوقف واكمل بالموضوع الجاي اختيار الشقة و معلومات عن بعض المولات والاسواق واتمنى الموفقية للجميع . مع السلامة

 

[Mazen Al-Baghdadi]

تسلم اخوي المصباح السحري تعبناك ويانه
ويارب يسهل كل امورك........
انشاء الله راح تفيد هاي المعلومات كل المقبلين على كندا
ومنتظرين منك تكمل باقرب وقت عن الشقق


      اخوك:اربد

[angie-dawood]

Pl3LsQ  zbyljulvuleg, cllofegovwba, [link=http://sdgjdwzcmyfj.com/]sdgjdwzcmyfj[/link], http://lbjttmdntmsk.com/

[mosul87]

تحية طيبة
اني ما عندي اشخاص بكندا
اكو طريقة اخرى للسفر لكندا
وشكرااا

[صابرين]

عاشت ايدك اخ المصباح السحري على جميع التفاصيل وبارك الله بك وان شاء حياة مليئة بالنجاح و التوفيق

صابرين

[الفريدو]

اخويه المصباح السحري مشكور على هاي المعلومات الحلوه

وعاشت ايدك والله شرحك جدا لطيف

اتمنالك الموفقيه اخويه




اخوك : الفريدو

[اينشتاين العراقي]

كل الشكر الك اخي العزيز
والحقيفه جنه معتازين بالمنتدى موضوع عن الكيبك لان تختلف باقي المقاطعات والحقيقه مجان اكو بالمنتدى موضوع يفصل هيج تفصيل عن الكيبك
وانشالله يستفادون منه كل الراحين على الكيبك
وتقبل تحياتي


اخوك اينشتاين

[جنانو]

السلام عليكم
اولا الحمد لله على السلامة وبالموفقية انشاء الله
 ومشكور على الجهد الطيب
بس حبيت اسال على فقرة شيكات مساعدة كيبك اذا امكن  اتفصلنة هذه الفقرة ولكم جزيل الشكر

[عراقية مغتربة]

اخوية المصباح السحري...
عاشت ايدك على هل معلومات الروعة ....ومنتظرين منك المزيد
مع تمنياتي لك بالموفقية

اخوك
ابو محمد
عمان

[المصباح السحري]

السلام عليكم اخواني، اعتذر منكم عن هذا الانقطاع واشكركم على ردودكم وتفاعلكم مع الموضوع، واحببت ان اجيب على سؤالكم عن الشيكات، بالنسبة لكيبك فهناك ثلاث انواع من الشيكات تصل للعوائل واحد منها ايكون مبلغة جيد وهو يعادل الراتب بالدول الاخرى مثل امريكا وغيرها، وهذا الشيك هو عبارة عن مبلغ يعطى للاجئ لحين اكماله دراسة اللغة وحصوله على عمل، ويسمى هذا الشيك بالولفر وتحدد قيمته لكل حاله بشكل مختلف حسب كون الشخص وحده او مع زوجته وعدد الاولاد واعمارهم.

الشيك الثاني ياتي من كندا (الفدرل)، وهوه عبارة عن مبلغ يعطى للعائله التي لديها طفل ويتضاعف تقريبا مع عدد الاطفال.وتقريا يكون قيمته 250$ لكل طفل وياتي شهريا.

الشيك الثالث ياتي من حكومة مقاطعة كيبك، وايضا يكون للاطفال ويتضاعف تقريبا مع عدد الاطفال ولا اعرف بالظبط قيمته لاني لم احصل عليه الى الان ولاكن تقريبا 150$ للطفل وهذا الشيك ينجمع  وياتي كل  ثلاث اشهر.

بالنسبة لشيك الولفر فياتي بعد عشر ايام تقريبا من وصولكم الى كندا اذا كملتوا معاملته بسرعة، اما شيك الفدرل (حكومة كندا) فياتي بعد ثلاث الى اربع اشهر ويكون مجموع الاشهر السابقة وبعدها ياتي بصورة شهرية،اما شيك حكومة كيبكك فياتي بعد شيك الفدرل بفترة ويستمر كل ثلاث اشهر وليس شهريا.

فالمهم انه اضبطون صرفكم اول ثلاث اشهر لان الي عندة اطفال مراح يكفي شيك الولفر وممكن راح يصرف من جيبة وهذا الي صار مع معظم العراقيين هنا، بس بعدها لمن تجي مساعدات الاطفال راح تتحسن الوضعية.

ومن هاي الفلوس لازم انتة تدفع كل شيء الاجار والكهرباء والتلفون والانترنيت وبعد اربع اشهر تقريبا تبدي تدفع قساط القرض الي دفعولكميا لتكتات الطيارة والفحص الطبي، بس لتخافون اذا عرفتوا تتصرفون وابتعدتوا عن التبذير فهاي الفلوس راح تكفيكم انشاء الله....والحمد لله رب العالمين
انشاء الله راح انحول موضوع الشقق والاجارات على الموضوع القادم

[الفريدو]

اخويه المصباح السحري تسلم على هاي التفاصيل

وربي يوفقك ويسهل امرك

شلونه الجو عندك هسه ؟؟؟؟  احنه صارلنه فتره الجو جميل والبرد خفيف يعني تصل درجة الحراره تقريبا من 1 الى 4 مئويه وبالليل تصل من -1 الى 4- مئويه يعني الجو جدا جميل ( كالكيري )

تحياتي

اخوك : الفريدو

[المصباح السحري]

السلام عليكم شلونك اخي الفريدو الحمد لله الجو كلش حلو صار ودرجات الحرارة بالاسبوعين الراحت جيدة جدا تقريبا من 6 الى 12 وباليل تقريبا من 0 الى 4 (وكمعلومة للاعضاء فدرجات الحرارة فوق الخمسة مؤية وعدم وجود الرياح القوية يعتبر الجو دافئ).
 والثلج صارلة سبوع مختفي من الشوارع ما عدا الاماكن الي كانت البلدية تجمع الثلج بيها وحتى هاي المناطق هم قبل اربع ايام جتي البلدية شالتها، بس اليوم شوية باردة وياها مطر والحمد لله.

[اينشتاين العراقي]

اخويه المصباح السحري تسلم على هاي التفاصيل

وربي يوفقك ويسهل امرك

شلونه الجو عندك هسه ؟؟؟؟  احنه صارلنه فتره الجو جميل والبرد خفيف يعني تصل درجة الحراره تقريبا من 1 الى 4 مئويه وبالليل تصل من -1 الى 4- مئويه يعني الجو جدا جميل ( كالكيري )

تحياتي

اخوك : الفريدو

شلونك خويه الفريدو
يمعود كول غيره 4- وتعتبر الجو زين؟؟؟
يمعود اني عندي الوالده اذا درجه الحراره اقل من 12 مئويه تكابل الصوبه وتكعد
يعني يرادنه على هالحجي فد عشرين صوبه
خخخخخ

[الفريدو]

اخواني المصباح السحري واينشتاين السلام عليكم شلونكم اخباركم
بصراحه الواحد تعود على البرد وهنا الحلو بيهم بكل مكان اكو تدفئه يعني ماتحس بالبرد هوايه وخاصه للعنده سياره لان تطلع من بيتك انته دافي وتدخل السياره هم بيها تدفئه تروح على المول او اي اسواق او الشغل كله دفو يعني ماتحس بالبرد مثل برد باقي الدول

صدكوني بعز البرد لما جانت 40- البنات لابسات تنورة خواتهن الصغار وطالعات وخاصه بالمولات يعني محد يشيل هم الشتاء هنا

اما عن اخونه اينشتاين ما اتصور راح تشوف البرد الصحيح لان ولايتك حلوه مابيها برد بس امطار صيف شتاء امطار بس خضارها جدا جميل وكل الولايات يجون يصيفون عندك بفانكوفر ..




تحياتي اخوكم : الفريدو

[المصباح السحري]

السلام عليكم اخواني
اليوم حبيت اسولف وياكم عن الشقق والاجارات، والشقق هنا انواع:

1- البيوت وتكون كبيرة وتتكون من عدة غرف ومدخلها خاص. بس اجارها ايكون غالي يعني تقريبا من 1000$ وفوك، وهاي اتكون مناسبة للعوائل الكبيرة يعني اكثر من 6 اشخاص.

2- شقق تكون عبارة عن نصف بيت يعني بيت مفصول طابقين. وهاي الشقق هم تعتبر غالية وهم للعوائل الكبيرة وايضا الها مدخل خاص.

3- شقق داخل بنايات. وهاي الشقق تنقسم حسب عدد الغرف، وبصورة عامة همة حاسبين كل شخصين بغرفة. وهاي سعرها يعتمد على عدد الغرف والمنطقة.
وتسمية عدد الغرف يختلف في كيبك، يعني مو مثلنا ايكولون غرفة وصالون او غرفتين وصالون، لا هنا الغرفة واحد والمطبخ واحد والحمام والمرافق نص. يعني مثلا شقة غرفة ومطبخ وحمام ومرافق ايسموها اثنين ونص،
وغرفة وصالون ومطبخ وحمام يسموها تلاثة ونص، وغرفتين وصالون وحمام يسموها اربعة ونص............الخ.

4_ الاستوديو. ويكون عبارة عن غرفة طويلة واحدة وحمام وانتة اتقسم الغرفة يعني اسويها نوم وجلوس ومطبخ انتة بكيفك. وهاي اتكون مناسبة للشخص الواحد او اثنين امفلسين ههههههه. بس ترة هاي هم مو رخيصة يعني كلما تقترب من الداون تاون (مركز المدينة) اصير اغلى.

بس نصيحة ضرورية هنا ممنوع ازعاج الجار باي طريقة كانت لان بسهولة يتصل بالشرطة ويشتكي عليك، وممكن اذا ثبت ازعاجك يطلعوك من العمارة. فاذا عندك اطفال ممكن يسون صوت لان الارض هنا معظمها خشب وطلع صوت قوي من واحد يمشي عليها.فالافضل اختيار طابق ارضي حتة ماكو احد جواكم وتاخذون راحتكم بالمشي.

زين نجي هسة على الاشياء الي واحد ايجيكها بالشقة قبل التاجير:

1- موقع الشقة وقربها من الباصات والمترو لان بالبداية اعتمادك كلة على النقل العام، الى ان تشتري سيارة، لان السيارات هنا تلكة رخيصة.
2- كون المنطقة نظيفة والعمارة ايضا.
3- هل الاجرة تشمل الكهرباء والتدفئة والمياه الساخنة.
4- هل يوجد بارك تابع للشقة وهل هوة من ظمن الاجار.
5- وجود مصعد اذا كانت العمارة عالية.
6- قرب المسكن من المولات والمحلات التجارية والمدارس للي عندة اطفال وايضا قربها من العيادات (يسموها هنا كلينك)
7- قربها من المسجد لان بالمسجد راح تحس نفسك مو بغربة، وراح تتعرف على ناس عرب وغيرهم وكثير يحبون ايساعدون الجاي جديد.
8- يجب ان تكون الشقة متكاملة من حيث الحنفيات وبلكات الكهرباء والشبابيك يعني كلها اتكون صالحة للاستعمال.
9- العمارة بيها مكان لغسل الملابس لو لازم انتة تشتري. لان هنا الغسالة وحد والنشافة وحد وسعرها كلش غالي.

هاي اهم الصفات الي واحد لازم ايشوفها بالشقة، ولازم اتكون متاكد من اختيارك لان هنا العقود طويلة يعني مو اقل من سنة، واذا اتريد تكسر العقد لازم تدفع غرامة ثلاث اشهر.
وشغلة كلش مهمة انه صعب اذا تركت الشقة تلكة شقة ثانية وهذا الي صار وية صاحبي، لان بس ايعرفون انتة ماعندك شغل مياجرولك واذا كان عندك اكثر من طفلين انسة تلكة شقة، فتاكد من كل شيء قبل متاجر لان اول شقة مجبورين الهجرة ايدبرولكياها.

هاي اهم النقاط الي لازم واحد يعرفها واهم شيئ تقراون العقد زين قبل التوقيع.

وبالموضوع الجاي انشاء الله نحجي عن الباصات والمترو .....مع السلامة

[Mazen Al-Baghdadi]

تسلم اخويه المصباح السحري على المعلومات
يعني اخويه اذا الشقه ما عجبتك تكدر تكل للمنظمه موزينه وما اريدها عادي
لو بيهه اشكالات
زين عند قرائت العقد اذا الشخص ميعرف انكليزي زين تعتقد المترجم يفهمك لو يخلس على هواي شغلات

[المصباح السحري]

مرحبا اخت اربد بالنسبة لسؤالج عن تغير الشقة فهذا امر جدا صعب ومكلف، بالاول اريد ابين انه في كندا اللاجئ تكون رعايته من الحكومة وليس من منظمة وهذا اضمن لللاجئ، ووبنفس الوقت الحكومة غير مسؤولة عن الاختيار الخاطئ لللاجئ، فالحكومة فقط وعن طريق مكاتب رعاية المهاجرين تقدم الدعم لتسهيل حصول اللاجئ على سكن. فتشوفة مجموعة من الشقق وهوه يختار وحدة. لاكن ليس لهم علاقة بعد ذلك باللاجئ من ناحية تغير السكن فسوف يتحمل هو مسؤولية هذا القرار.
وبصورة عامة اذا كان في الشقة مشكلة كالاعطال او الامان فهذه مسؤولية صاحب الشقة وعليك ان تبلغه باسرع وقت ليصلح الامر، واذا تاخر عن التصليح فمن حقك ان تشتكي عليه عن طريق الاتصال بدائرة حكومية تحمي المستاجر لان القانون دائما يحمي المستاجر اذا كان ملتزم بدفع الاجار في وقته ولا يزعج الجيران.
اما عن قرائت العقد فمركز رعاية المهاجر او المسؤول عن ملفكم يقوم بترجمة العقد للمستاجر ومن حقك الاستعلام عن اي بند بالعقد وميكدر المترجم ايغلس عن شيئ لان هنا الناس تحترم شغلها.

[Mazen Al-Baghdadi]

تسلم اخويه المصباح السحري على الجواب
وانشاء الله تتسهل كل امورك
اني اخوك اربد 

[عراقية مغتربة]

جزاك الله خير اخونة
والله المعلومات الي دتكتبهة كلش مفيدة
رحم الله والديك


اخوك
ابومحمد

[المصباح السحري]

اعتذر اخوية اربد على هذا الخطا وتسلم على مشاركتك اخوك المصباح السحري

[angie-dawood]

عاشت الايادي موضوع جدا رائع ومفيد اخي العزيز بارك الله بك وربي يوفقك

[عراقية مغتربة]

اخوية المصباح السحري
بارك الله بيك
والله معلومات جميلة ومفيدة
ننتظر باقي المشاركات

اخوك
ابو محمد

[المصباح السحري]

السلام عليكم... بالبداية اشكرم اخواني على ردودكم ودعواكم، وانشاء الله الموفقية للجميع والله يخلص بلدنا العراق من الماسي الي يعانيها ونرجع كلنا لبلدنا ووطنا ويرحم شهدائنا الي ديساقطون يوميا بسبب الاحتلال.
حبيت اخواني اليوم احجيلكم على النقل والمواصلات في كيبك. فالمواصلات هنا تنقسم الى عدة اقسام واهمها التكسي والباصات والمترو والقطار واكيد السيارة الخاصة.
بالبداية احب انطي فكرة عن العناوين (Address) وهنا في كندا او امريكا كل شقة او بيت اوشركة او مستشفى او سوبر ماركت لازم ايكون الة عنوان، وهذا العنوان يتكون من (رقم البناء زائدا اسم الشارع زائدا اسم المنطقة) وايضا يجب ان يحتوي كل عنوان على رمز بريدي (Postal Code) ويتكون الرمز البريدي من ستة ارقام واحرف مثلا (n0j 1v0). وسوف تعتمدون في كل تنقلاتكم على العنوان عن طريق اعطاء العنوان لسائق التكسي او البحث بواسطة الكوكل ماب (Googl Maps) وهي خاصية في متصفح الكوكل تمكنك من معرفة الطريق من عنوانك الى العنوان الذي تريد الذهاب اليه بواسطة وضع عنوانك وعنوان المكان الذي تريد الذهاب اليه واختيار نوع النقل ( مشي - سيارة خاصة - نقل عام )، ويقوم هوة باختيار اقصر الطرق والوقت الذي تستغرقه الرحلة وايضا اذا كان بالنقل العام فسوف يظهر لك اقرب موقف باص من عنوانك ورقم الباص والوقت الذي يصل فيه الباص للموقف ووقت الوصول الى العنوان المطلوب (يعني شغلة توكف العقل).
وناتي الان الى انواع النقل:

اولا التكسي: التكسي هنا مو تطلع للشارع وتكعد تنتظر شوكت يجي. ومن يجي لو ياخذك لو مياخذك بحجة الطريق ازدحام، هنا التكسي تتصل بي من البيت وتنطي عنوانك الي هوة رقم البناء واسم الشارع وخلال دقائق راح يجي كدام العمارة بس لازم يلكاك بالباب مو تريدة يجي يدكلك الجرس، زين من تصعد وية التكسي تنطي العنوان الي تريد اتروحلة وهوة ايضا رقم بناء واسم الشارع ومرات اسم المنطقة، وهوة راح يدخلة بجهاز الجي بي اس وراح الجهاز يكودة للسايق للعنوان باقرب الطرق يعني مو يصير السايق لوتي ويكعد يفركم مسافة بعيدة حتة ايزيد العداد. واذا كنتوا رايحين لمكان معروف مثل المولات الكبيرة او دائرة حكومية او لاسامح الله عيادة او مستشفى وتعرفون الاسم فممكن ان تطلبوا من السائق توصيلكم للمكان حتى لو متعرفون العنوان. بس معلومة مهمة تخلي الناس متصعد تكسي الا للظرورات وهية انه اجرة التكسي كلش غالية يعني مشوار اقل من خمس دقائق ممكن يكلف 12$ يعني اذا ثلث ساعة ممكن توصل 40$.

ثانيا الباصات: الباصات في كيبك تغطي اغلب المناطق ومن الافضل ان تختار مكان السكن بالقرب من مكان مواقف الباصات لتسهيل التنقل، والباصات تكون متوفرة من الفجر الى ساعة متاخرة من الليل. وتكلفة التذكرة من 2.75$ الى 3$ حسب المدينة ويجب ان تكون حامل النقود المعدنية وبنفس قيمة التذكرة وتضعها بصندوق جنب السائق وبعد وضع النقود تسمع صوت معناه ان الاجرة كاملة وتخرجلك بطاقة ممكن تستعملها اباص ثاني اذا كان بنفس الاتجاه. ولا يتدخل السائق ولايقوم بارجاع اي مبلغ او تحويل العملة الورقية الى معدنية يعني خلاصة القول انتة لازم شايل وياك اقل شي 3$ معدنية قبل صعود الباص. وممكن ان تشتري كارت باص اليكتروني اذا كان استخدامك للباص بشكل يومي يكون اصرف من الدفع كلما تصعد. وتقريبا سعر الكارت 3.5$ تشتري مرة واحدة وبعدين تعبي تقريبا 70$ للشهر.
بس اكو شغلة مهمة الكارت يشتغل من يوم واحد بالشهر الى اخر يوم من الشهر. يعني اذا تعبي بتاريخ 1 او  10 بالشهر راح يشتغل وياك لي نهاية الشهر، مو يحسبلك 30 يوم من وقت تعبأت الكارت يعني الافضل ان تعبي الكارت من بداية الشهر.

ثالثا المترو: ويمتاز  المترو بسرعته وتغطيته لاهم المراكز الرئيسية بالمدن الكبرى مثل الشوارع الرئيسية والجامعات ومراكز المناطق. وعلامة موقف المترو تكون سهم للاسفل، وبعد ما تدخل تنزل الدرج وراح تلكة كشك يبيع تذاكر المترو وسعر التذكرة 2.75$ وايضا ممكن تطلب من الكشك خريطة المترو (مجانية) وممكن على اساسها تعرف انتة وين ومنين لازم تصعد لان معظم المحطات بيها اكثر من طابق واكثر من قطار وتكدر تستفاد من الاتجاهات واسماء مواقف المترو الموجودة على الجدران حتة تعرف اي مترو تصعد. بعد متاخذ التذكرة الورقية دخلها داخل فتحة من جانب البوابة وراح يشتغل ضوء اخضر معناه انه التذكرة صالحة وتخرج التذكرة من الجهة الثانية وتنفتح الباب الدوارة .تاخذ التذكرة و وتنتظر المترو (ممكن  تستعمل نفس تذكرة المترو لصعود الباص وايضا باتجاه واحد، وتبقى البطاقة فعالة لمدة ساعتين). ومن يجي المترو يتوقف لفترة قليلة وبعدها تسمع صوت تنبيه انه الباب راح يغلق. وابدا لتحاول اتعيق الباب من ينسد لانه غرامته 150$.
وممكن اذا كنت تستعمل المترو هواية تشحن نفس بطاقة الباص حتى اصير للباص والمترو بس راح يصير شحنها 118$ تقريبا شهريا.

رابعا تاجير سيارة: ممكن بعد متوصل بفترة بسيطة تاجر سيارة ليوم او عدة ايام بس لازم اتكون عندك رخصة دولية صالحة. لاكن الرخصة الدولية تستفاد منها لمدة ثلاث اشهر فقط وبعدها لازم اطلع اجازة كندية. وحسب القانون الجديد لازم يكون عندك اجازة سوق محلية (مو دولية) صالحة حتى تدخل امتحان السياقة النظري والي يخليك تاخذ اجازة مؤقتة وبهاي الاجازة ميصير اسوق الا واحد كاعد يمك عندة اجازة كندية صارلها 3 سنوات. وبعد سنة من الاجازة المؤقتة تروح تمتحن عملي وينطوك الاجازة الدائمية.
لاكن اذا ماعندك اجازة سوق محلية (الدولية متفيد بس ثلاث اشهر) فحسب القانون الجديد اجباري دخول دورة السياقة وتكلف بحدود 920$ وايضا بعد سنة يلة ينطوك الاجازة الدائمية. بس الاجازة هنا كلش مهمة لان انشاء الله الكل راح يشتري سيارة. والسيارات هنا تعتبر رخيصة نوعا ما (يعني ممكن اتحصل سيارة موديل 2000 بــ 1200$).

بس شي لازم تنتبهوله اذا اتاجرون سيارة او تشترون لازم ايكون عدد المقاعد في السيارة على عدد الركاب ولكل راكب حزام
وايضا الاطفال الي يكون ارتفاع اجسامهم من الحوض الى الراس اقل من 65 سنتيمتر لازم عدهم كرسي سيارة خاص.

وايضا ملاحظة مهمة حول المترو والباصات، فممكن ان تصعد الباص او المترو حتى ولو لم يكن هناك مقعد فارغ. وكثير من الاحيان في اوقات الدوام راح اتشوف الباص مقبط للسايق وماكو محط رجل، بس متلكة احد مجلب وطالع من الباب ههههههههه.

انشاء الله اتكونون اخواني استفاديتوا من هذا الموضوع وانشاء الله نلتقي بمواضيع قادمة.... بالموفقية

[Mazen Al-Baghdadi]

عااااااااااااااااشت ايدك اخويه المصباح السحري تعبناك ويانه
معلومات حلوه ومفيده انشاء الله راح كل الواصلين كندا بالجديد يستفادون

[ام سما]

السلام عليك اخي المصباح السحري والله يوفقك وأيجازيك على خدمة اخوانك وعلى هذه المعلومات القيمة الي قدمتها للاخوة والاخوات في المنتدى  عندي سوأل اذا ماعندك مانع عندي اختي مرفوضة من امريكا واستئنفت وهم انرفضت وبعدها رجعنا ملفها لكفر سوسة وبعد ايام اتصلوا بيها وكالولها تقبلين كندا ووافقت وعملوا معها مقابلة لمدة ساعة بالتلفون أسألة واجوبة وكان الي يتكلم معها مترجم كندي يسأل الوفد ويرجع يسألها وتجاوب لمدة حوالى ساعة ورجع اتصل بيها 3مرات بنفس اليوم وكاللها انت متأكدة موافقة على كندا بالرغم انوا ماعندج احد واكدت انها موافقة وكاللها انتظري من عدنا جواب وهذا الحجي من شهر التاسع 2009 والي حد الان كلما تروح لكفر  سوسة يكولولها ملفج عند الوفد الكندى وراحت للسفارة قبل اسبوع تسأل واعطوهة ورقة بيه أميل وفاكس وخاطبناهم وشرحنا الموضوع كلة وكانت اجابتهم على اميلها انوا ماعدنة اي ملف عندة بالسفارة واذا اردت جيبي رقم المعاملة وانت تعرف اخوية اي رقم بكفر سوسة مينطون  فسوألي شنو نسوي حتى نعرف ملفها وين وصل وأسف على الاطالة ولك مني جزيل الشكر والتقدير

                                                 اختك ام سما

[المصباح السحري]

السلام عليكم اخواني
اختي العزيزة ام سما اعتذر عن تاخري بالرد على سؤالج. بالنسبة للسفارة الكندية فما ممكن اتحصلين منهم لا حق ولا باطل واذا ممكملين شي من المعاملة فمراح  ينطون اي معلومة واني ظليت فترة اراسلهم بعد المقابلة وماكو اي رد حتى مرة سويت لعبة حتى افوت للسفارة، كتله للحارس اني اقامتي راح تخلص وراح يرجعوني للعراق واني عندي ملف بالسفارة. واني صدك جانت اقامتي راح تخلص خلال اسبوعين، فقبل الحارس يدخلني. بس من حجيت وية الاستعلامات كالتلي منكدر انسويلك شي انتة دبر نفسك، كتلها زين ملفي وين وصل كالت ممكن انطيك اي معلومة. يعني حتى لو احد يقابل السفير ميحصل شي. فاختي ما عدكم غير الصبر. واني اول مرة اسمع مقابلة بالتلفون. لان لازم قبل المقابلة ياخذون نسخ من الاوراق الرسمية وصور وبعدها ايسون فايل وينطون رقم. وانشاء الله يوصلكم رد من السفارة باسرع وقت 

[المصباح السحري]

-

[ام سما]

السلام عليكم اخي المصباح السحري واني اشكرك هواية على الرد على موضوعى واهتمامك بيه بالنسبة  لأختي عملوا معها مقابلة كاملة بالتلفون لان ملفها كامل عدهم لان هي عاملة مقابلات كاملة مع الوفد الامريكي حتى الصور والبصمات واكيد اخذوا كل المعلومات من الملف وعندما اتصلوا بيها كانت اضافة معلومات الي الملف واخذ موافقتها على كندا والي حد الان ماكوا شىء ننتظر والله كريم اكيد من يتصلون اخبرك ان شاء الله لان منعرف  اى شىء على كندا
 الله يوفقك وينطيك على كد نيتك لخدمة اخوانك بالمنتدى
وبالنسبة الي  انى وزوجي واولادى صار سنة ونصف مكملين كلشي على امريكا  وننتظر الفيزة والله يوفق الجميع


                                    اختك ام سما 

[المصباح السحري]

السلام عليكم اخواني.. اعتذر عن تاخري بالكتابة بسبب الانشغال وارجو منكم ان تشاركوا بالموضوع وتطرحوا اسالتكم واستفساراتكم لتعم الفائدة للجميع وانشاء الله اجيبكم عليها.
انشاء الله سوف تبدا كورسات اللغة الفرنسية يوم الاثنين القادم، وراح تستمر تقريبا ثمانية اشهر. بس اللغة الفرنسية صعبة جدا مقارنتا بالانكليزية ومراح تكفي هاي الكورسات لضبط اللغة. يعني تتخرج من هاي الكورسات تكدر تحجي وتكتب وتفتهم على اللغة الفرنسية، بس تبقى صعب عليك تكمل دراسة جامعية او معهد باللغة الفرنسية لازم تاخذ كورسات اضافية.
وهذا الشيء يحتاجلة وقت، يعني ممكن تضيع اكثر من سنة ونص حتة تتمكن من اللغة الفرنسية.
وهنا كثير من العراقيين التقيت بيهم رفضوا يدرسون اللغة الفرنسية وبدو يدرسون لغة انكليزية على حسابهم ويحاولون يكملون الدراسة الجامعية باللغة الانكليزية ( اكو جامعتين جدا مشهورات على مستوى العالم في مونتريال تدريسها باللغة الانكليزية وهية جامعة مكيل وجامعة كنكورديا وبيها كل التخصصات).
وانشاء الله الموفقية للجميع واني مستعد للاجابة عن اسالتكم لتعم الفائد للجميع.

[Mazen Al-Baghdadi]

تسلم اخويه المصباح السحري على تعبك ويانه وعلى هاي المعلومات الي كاعد تفيدنه بيهه
بس اخويه العزيز يعني كيبك كلها فرنسي لو لا
حقك صدق صعبه اللغه الفرنسيه اني بس من اشوفهم بالافلام يحجون ادوخ

[المصباح السحري]

السلام عليكم اخواني...
اخوية العزيز مازن بالنسبة لكيبك فاللغة الفرنسية هية الرسمية والانكليزية هي الثانوية على المستوى الحكومي، لاكن بالشارع وبالاسواق وحتى الدوائر الحكومية فممكن تتحدث الانكليزية. وكثير من الناس بكيبك ميعرفون الفرنسية. بس من تريد تشتغل كثير يسهلك معرفتك بالفرنسية. و بعد وصولك لكيبك راح يدخلوك كورسات لتعلم الفرنسية على حساب الحكومة. بس للعلم اللغة الفرنسية اصعب بكثير من الانكليزية و العراقين اصعب عليهم التعلم لان مدارسيها بالمدرسة مثل المصرين والبنانين ودول المغرب العربي الي اصلا يحجون فرنسي. والله يسر للجميع وتوصلون بالسلامة

[Mazen Al-Baghdadi]

تسلم اخويه المصباح السحري
بس اخويه حبيت اسئلك بما انه انت عايش بكيبك  يعني اذا واحد عنده عائله يكدر يعيش ويدبر وضعه لو لا
وصدك المساعدات احسن من باقي المقاطعات

[Mazen Al-Baghdadi]

شلونك اخويه المصباح السحري اشو صار فتره ماكو انشاء الله بخير
لان ظل بالنا عليك يارب تطمنه عليك

[دحدوحة]

السلام عليكم
اشكر اهتمامك ومتابعتك النة  واريد اسالك شنو معلوماتك عن الجامعات الي بالانكليزي وشنو اقسامهة وايهم افضل امتحان التوفل او دراسة الادولت سكول الي كالولنة عليهة بالدورة التثقيفية حتة اكدر ادخل جامعة انكليزية واشكرك وياريت الي عدة معلومة يشاركنة بيهة

[muayed temo]

الف شكر على الموضوع اني اتمنى واريد انو اقدم على كيوبيك  او مدينه منتريال علما اني ادرس الفرنسية فياريت اي من المعلومات الي تفيدني بالتقديم وشكرا الك

[كنديون]

الف شكر للقائمين والمتواصلين على عمل واداء المنتدى
وشكر خاص لاخي العزيز كاتب هذا الموضوع الرائع وعلى طريقة صياغته للموضوع

بالنسبة لي وكم يعرف اغلب الاعضاء ... إني مقدم على لم شمل الى كندا الى والدي ...

وفحصت فحص طبي وكملت وبالتلي طلبوا مني عدم محكومية ....
من الاردن وسوريا

كوني كنت اعيش هناك

والحمد لله اكملت العدم محكومية من الاردن ومن سوريا وانا بإنتظار الفيزا الآن.

سؤالي

اين احصل على عمل بأجور جيدة ... يعني حسب علمي ان في كندا مقاطعة تختلف عن اخرى من حيث الاجور . فبرأيك ... اي مقاطعة افضل . من تلك الناحية ؟؟؟؟!! .

شكرا جزيلا

[اينشتاين العراقي]

الف شكر للقائمين والمتواصلين على عمل واداء المنتدى
وشكر خاص لاخي العزيز كاتب هذا الموضوع الرائع وعلى طريقة صياغته للموضوع

بالنسبة لي وكم يعرف اغلب الاعضاء ... إني مقدم على لم شمل الى كندا الى والدي ...

وفحصت فحص طبي وكملت وبالتلي طلبوا مني عدم محكومية ....
من الاردن وسوريا

كوني كنت اعيش هناك

والحمد لله اكملت العدم محكومية من الاردن ومن سوريا وانا بإنتظار الفيزا الآن.

سؤالي

اين احصل على عمل بأجور جيدة ... يعني حسب علمي ان في كندا مقاطعة تختلف عن اخرى من حيث الاجور . فبرأيك ... اي مقاطعة افضل . من تلك الناحية ؟؟؟؟!! .

شكرا جزيلا

شلونك اخويه العزيز بالنسبه للغل ما اعرف بالنسبه لكل المقاطعات بس اعرف بمقاطعه برتش كولمبيا مدينه فانكور الي اني عايش بيه الشغل متوفر
بس يرادلك اول شي لغه جيده واحد يساعدك مثلا تلكالك منضمه او شي تساعدك بكتابه الريزومي مالتك وتعلمك شلون تدور شغل
حتى تصير الاموراسهل عليك انشالله
لان اذا تضل بدون مساعده من احد راح تبقى تدور شغل وبلا فايده
بس اخي خلي ابالك انومقاطعه برتش كولمبيا اغلى من باقي المقاطعات بشويه
لان ضريبتهم عاليه
بس اذا تعبت روحك ممكن تلكي شغل خلال شهر او شهرين انشالله
وتقبل تحياتي

[كنديون]

كلماتك ... جدا رائعة وتواصلك اروع

اخي العزيز انا شاكر لك ... وصارت الفكرة واضحة .... علما ان الفحص الطبي الخاص بي اكسباير .... وقمت بإعادته ... مع العلم اني مكمل كافة اوراقي ... ومعاملتي لم شمل وليس امم متحدة .. تقبل كل احترامي وتقدير .

[candyman]

السلام عليكم ورحمة الله وبركاته مبروك عليكم عيد الفطر  واسال الله ان يكون قد غفر لي ولكم في شهر رمضان واود ان اسال الاخ العزيز المصباح السحري لماذا هذا الانقطاع  فقد كنت تغنينا انت والاخوة كندا وانشتاين وعبسي ومازن وحنانو والفريدو والملاك العراقي وكل الخيرين بالمعلومات وعودتمونا على العطاء فلماذا الانقطاع حبيبي عفريتو المصباح (لو يرادلك  ينفرك المصباح ) حتى تنورنا بالمعلومات ارجع النا لأن ابشرك تحولت وفحصت وكالولي على كيبك 

[ابو النيادين]

مرحبا اخواني واخواتي تقبلوا مروري انا عضو جديد بالمنتدى

[ORCA]