هذه بعض تجارب الاخوه الاعضاء كنت قد جمعتها منذ فتره طويله حول
تجاربهم مع المحلفين عسى ان تنفعنا او نستفاد منها:
لماذا قدمت على اللجوء لامريكا؟
ما الذي يجعلك تشعر بهذا الشئ؟
من ضمن الاسئلة المحرجة
هل انته متزوج؟
هل ليديك اطفال؟ طبعا حتى لو جوابك مامتزوج يسألوك هل لديك اطفال؟
هل لديك علاقه عاطفيه سابقا؟ او حاليا؟
انتبه عزيزي على هذا السؤال جيدا
هل انت محكوم بجريمه جنائيه او جريمة ارهاب او جريمة مخلة بالشرف؟والعياذ بالله
فأذا كانت الاجابه بـــ لا
هل اخذت بصماتك من قبل؟؟؟؟؟
واوصيك بأن تحفظ سيرتك الذاتيه من بداية دخولك الابتدائية ولغاية يوم المقابلة وبالتحديد التواريخ المضبوطة والتسلسل الزمني المرتب
واوصيك ايضا بعدم الارتباك اطلاقا او بقدر المستطاع اخي هؤلاء ضباط امن ومخابرات امريكيين وبحوزتهم جميع المعلومات طبعا التي قلتها وحتى الصورة التي التقطوها لك في المقابلة الاولى يعرفون الشخص الصادق والكاذب والعياذ بالله من رمشت العيون او حتى من حجم بؤبؤ العين من حركات اليدين من لون الوجه صدقني اخي انا لا اريد ان اخوفك منهم لكن اريدك ان تعد نفسك للمقابلة علما بأن عدتي للمقابلة كانت على يد محاميه امريكية ولها خبرة بتلك الامور واصلا هي كانت محلفة وتعرف كل الامور حاول ان تنظر بوجه المحلف او بعين المحلف ولا توجه نظرك نحو الارض ابدا لاي سؤال ولاتكون كريم بالاجوبه ان سألت جاوب على قدر السؤال بدون زيادة او نقصان واصغي جيدا للمترجم ان اقتضت الحاجه الى مترجم
ايضا من ضمن الاسئلة التي تسال عن انتمائك لحزب البعث وتاريخ الانتماء وان كان الجواب بلا فما هو السبب وعن خدمتك العسكرية مدتها وتاريخ الالتحاق وانهاء الخدمة وعن اماكن عملك وعناوينك الوظيفية بالاضافة الى عدد من الاسئلة التي قد لاتخطر على بالك بهدف استفزازك والتحقق من مصداقيتك
فلتكن هادئ في اجاباتك وواثق منها ................ امنياتي بعبور هذه المرحلة بنجاح والله الموفق
اخي العزيز احجي كلشي صحيح و خصوصا العسكرية اما بالنسبة اذا جنت بعثي لو لا فلتحجي شي على الموضوع كلهم لا مو بعثي هاية مثلا انت لتحاول تخرج عن الموضوع حتى لو هو جرك لغير شي رغم اني بوكتها سالني ليش الارهابيين يستعملون سيارات الاوبل و ال BMW ليش الهوية بيهة لقب و شهادة الجنسية لا يعني مختصر ترة حتى المحقق انت و حظك بالتوفيق اخي.
كلها سهلة المقابلات ويا الامريكان
بس شنو احتمال اذا يشكون بشي (ولو هما بكلشي يشككون) يستفزوك يعني يجيبلك سؤال متتوقعا ويسألك بس يريدك تثبت هذا الشي، وخصوصا الاخيرة ويا المحلفين بس انت كلشي لتغير بالقصة مالتك يعني مثل ما حجيت بالاولى وبالثانية.
بس عادي كون واثق من نفسك ولا تتلكئ
اول شي معلوماتك شخصيه بعدها يسائلك على قصه واهم شي تواريخ ويسالك هل كنت حزبي هل شاركت معركه هل كنت عسكري بعدها يقول لك اسف سوف اسائلك اشياء هل انته عندك مبلغ من مال هل عندك اتفاق مع مجموعات هل تعرف لغه غير لغتك هل انته قمت بضرب جيش العراقي وجيش الامريكي هل ساعدات يعني هيج امور ويقول الاجابه اما بكلمه اي او لا بعدها يطلب منك ترفع يدك وتقسم بعدها ياخذ جوازك ويقرء هل راجع للعراق ها اخواني اخوتي سؤال مهم جدا جدا يقول لك ليش مترجع للعراق تقول له مهدد يقول لك امكانك تذهب غير منطقه اعطي سبب مقنع ونصيحه كون عندك ثقه بنفسك لا تخاف لاترتبك لا تستعجل وتكون اجابتك واضحه وشافيه اي اخي خير الكلام ماقل ودل بعدها يقول لك هل عندك شي اضيفه يقول لك بعد قليل اقرر بعدها تنظر في صاله جلوس وشي نصف ساعه اقل تدخل لعمل طول وزن صوره بصمه اصابع بعدها يطلب منك تذهب ونتيجه تكون شهر او شهرين لماذا لكثره العدد اخواني اخواتي هناك ناس اطول اكثر من ساعه عندهم عائله وهناك اشخاص افراد يطلون ساعه حسب الحاجه لهذا الغرض ومن الله توفيق وان شاء الله الجميع مقبولين يارب اخوكم
المقابلة مالها زمن محدد او معين يعني مثلآ يهذا الوفد الي هسة موجود بلبنان عائلة مكونة من اب وام واطفال صغار ماسأل الام غير عن الدراسة والمواليد وبس والاطفال عن اساميهم وطلعهم خارج غرفة المقابلة وهو ماطول ربع ساعة بس يستفسر عن العسكرية وسبب عدم الرجوع الى العراق يعني حسب ماافتهمت منه انه مايهتم لويش طلعت ولا شنو تهديدك بس مهم ليش ماتكدر ترجع واهم شي يقتنع انه من المستحيل رجوعك واكو عائلة جبيرة اكيد راح اتطول وياها المقابلة لان راح يسأل واحد واحد المهم مااريد اطول عليك ماكو رفض بهاي الوجبة يكولون بس الا اذا الواحد اتخربط او ارتبك اما بالنسبة لقسم اليمين فبعد مايسأل كم سؤال تجاوبه بنعم او لا كبل مايبدي طرح الأسئلة عن القصة يكول ارفع ايدك اليمين واحلف انه انت صادق بكل كلمة ستقولها وانت تجيب بنعم اقسم ومن الله التوفيق
طبعا بالنسبه الى الخدمه العسكريه يركزون على الي اولا بحلبجه وجيش الي دخل الكويت والي جانوا يشتغلون بالكيماوي والجيش الي باد الانتفاضه وهذا الي يركزون عليه وبس وشي طبيعي ان لايكون من المقربين الى النضام السابق وطبعا ويركزون على الصنف الي جان بيه ويسالوة عنه وهم معضم تركيزهم ان لا يكون قد استخدم الى اباده الشعب او استخدم الكيماوي .
اخي العزيز صدكني احسن المقابلات هي ويا الوفد الامريكي لان احنا طبينا بس ربع ساعة وطلعنا من يم المحلف ومايسأل شي القصة ماتهم المحلفين لان هم يريدون عدد يريدون كمية الي يهمهم هو مثل ماكلوا الأخوات عدم المصداقية يعني اتأثر هواية طريقة كلامك كدامهم يعني اي شي يلمسوه من حركاتك مو بس الكلام بيه عدم مصداقية صدكني اني اعرف عائلة على اساس قصتهم ابنهم خطف وكتلوه واثناء المقابلة جانوا كلش عاديين فأكيد يشك المحلف اشلون ابن ميت والعائلة ماعدها ملامح الحزن او عائلة طبت يم المحلف وجان الاب يرجف عبالك رايح للاعدام فأكيد شك المحلف انه خايف هذا الشخص لايغلط واجاه رفض صدكني القصة بالحرف الواحد كولها كدام المحلف وماتخاف ولاترتبك لان هم جايين ياخذون العراقيين مو مثل كبل جانوا ياخذون بس الحالات الصعبة هسة الكل مشمول حتى الي قصتهم من كبل السقوط راحوا وسافروا المهم ماتخاف واكيد قبول ان شاءالله لان ماكو رفض بهل الايام غير بس للعدم مصداقية وبس ولك مني كل التوفيق
لن أقول لك لا تقلق، لأن القلق طبيعي في هكذا مواقف، لكن أيظاً حدود القلق يجب ان تكون طبيعيه وان لا تتمادى بالخوف والرهبه، ولفائدتك وفائدة الزملاء كافه سأعيد شرح مجريات المقابله الأولى...
في الوقت المحدد لك سيأتي احد موظفي الـIOM وهو عربي الجنسيه ويصطحبك مع مجموعه أخى الى السفاره، عند وصولك للسفاره سيستقبلك موظف ويصطحبك الى داخل السفاره لأجراء المقابله (مع افراد عائلتك اذا ما ضمنتهم في قضيتك)... ستبدأ المقابله التي تستغرق في حدود 2 الى 3 ساعه والتي تتضمن قسمين:
-1 القسم الأول: معلومات عامه عنك وافراد عائلتك، كالأسم الكامل والميلاد (يوم شهر سنه)والعنوان والحاله الزوجيه والتحصيل العلمي وأماكن العمل والخدمه العسكريه أن وجدت، وستتضمن المقابله اسئله تفصيليه جداً عن كل مراحل حياتك ، وفي هذا الجزء من المقابله لا داعي للقلق اطلاقاً فهي معلومات عامه عن حياتك واسرتك ، ويفضل ان توثق كل هذه المعلومات (بضمنها تفاصيل حياة أسرتك : اخوتك واخواتك ، زوجتك، والديك، أهل زوجتك...الخ). يجب ان تصطحب معك نسخ اصليه ومصوره للوثائق المطلوبه ، جنسيه، شهادة جنسيه، جوازات، باجات، شهادات ، عقد زواج ، بيانات الولاده للأطفال، دفتر الخدمه العسكريه ، توصيات، كتب التعيين، رسائل تهديد... الخ هذا الجزء من المقابله سيزيل القلق وستنسجم أكثر مع الموظفه القائم بالمقابله مما يسهل عليك الأنتقال الى الجزء الثاني من المقابله:
2 - حالة الأضطهاد أو التهديد التي مررت أو تمر بها: وهنا سيتوجه الموظف اليك بالسؤال عن الدافع بطلب اللجوء، وهنا انصحك التزام الهدوء والتأني وسرد القصه بتسلسلها الزمني والدقيق ، وكل زملائي اللذين اجرو المقابله يؤيدوني بضرورة التزام الدقه بالسرد. لذلك انصحك بأن تبدأ الآن بكتابة القصه وتحفظها لأنك ستسأل عن بعض جوانبها في المقابله الثانيه مع المحلفين، ويجب أن تتطابق الأقوال في كلتا المقابلتين.
المهم هنا أن تكون مقنع، وأن لا تشوش الموظف بمصطلحات أو روايات لا يفهمها ، فهو ليس عراقي ويجب أن تتكلم بوضوح وأن تقود مجريات المقابله، أي لا تسكت وتنتظر منه السؤال التالي ، فهي قصتك وهو مكلف بتثبيتها وأطلاعك عليها لاحقاً لأستحصال توقيعك. أيظاً ، يجب أن أوضح هنا بأن الموظف يهدف الى مساعدتك: فلا داعي للتخوف والقلق المفرط، المهم ان تقنعه بروايتك، قد يختلف هذا في المقابله الثانيه مع المحلفين لأن مسؤوليتهم امنيه أكثر مما هي أنسانيه.
بالنسبه الى عدد التوصيات، أعتقد هذا سيفيدك مع المحلفين أكثر مما يفيدك في المقابله الأولى ، لأن الهدف من المقابله الأولى هو التأكد من جدية الخطر المحدق بك، وليس ولاءك للولايات المتحده...
يجب أن تبين في نهاية المقابله أنه اصبح من المستحيل ان تعيش في العراق، وتجنب أن تتطرق الى مخاوف عامه ، كأن تقول لا يوجد أمان في العراق، أو توجد ميليشيات كثيره ، أو لا أستطيع أن أجد عمل براتب مجزي... فهذه شؤون عامه يواجهها كل العراقيين، المهم ان تشرح خطورة ظرفك الشخصي ، تكلم عن نفسك وعن حجم الخطر الذي واجهته وتواجهه نتيجة عملك مع التحالف.
سيطلب منك أيظاً أن تشرح بالتفاصيل حالات التهديد ، الخطف ، الأبتزاز... التي تعرضت لها، فراجعها من الآن لكي لا تنسى اي تفاصيل...
تأخذ معك كل المستمسكات الرسمية . وسوف يسألوك الاسئلة المعتادة سبب الخروج ومن اين ومتى وصلت ..يعني الاسئلة الروتينية .. ولاتنسى التواريخ يجب حفظها في عقلك لانك سوف تسأل في المقابلة الثانية .وتشرح لهم اسباب خروجك من العراق واهم شيئ التواريخ.
النجاة في الصدق....عند الامريكان هذا مو تفستق، هذا واقع.....فقط اذكر ما حدث معك في خصوص الخدمه العسكريه و حزب البعث بصراحة و صدق و هو شي لا يؤثر سلبا على قضيتك لان معظم العراقيين اللي ديسافرون مروا بنفس ظروفك.....و اخيرا تأكد من تطابق كلامك بين المقابلتين في كل شئ.... اول متطلع من المقابله الاولى سجل كل حجيك على ورقه، لتكول يلله قابل رح انسه، لا رح تنسه و صارت بيه و اكثر من واحد، سجل لتتعاجز لان تنسه تنسه.
اخي العزيز....اني قابلت محلفين قبل 10 ايام تقريبا وكانت كلش سهله وسخيفه جدا.
مجرد اسئله على قصتك وطبعا لازم تكون حافضها واهم شي التواريخ
مثلا:
1- اسمك الثلاثي وميلادك؟
2- تاريخك المهني,,,اسم كل مكان اشتغلت بيه وشوكت وشكد ضليت بيه وليش تركته؟
3- الخدمه العسكريه,,,اذا اكو.
4- هل منتمي لاي حزب؟
5- ليش تركت بلدك؟ يعني تشرحله القصه,,,وطبعا هيه مكتوبه عنده,بس يريد يطابق الي انت كلته سابقا واللي دتكوله هسه,,,,واذا نسيت شي انت كايله قبل وبالمقابه مديجي على بالك,,,تكدر تكول نسيت, ولا تحكي تواريخ من عندك.
6- هل عندك تهديد؟ وهل تعرضت لاعتداء او خطف؟ مع ذكر التفاصيل.
وقبل هاي الاسئله,,,اح يكلك ارفع ايدك واقسم على عدة نقاط بسيطه تخص الامن بامريكا.
وبالنسبه للمترجم,,,اذا انكليزيتك زينه,,تكدر تطلب من المترجم يطلع بره,(اني هيجي سويت بمقابلتي(
وطبعا هاي الاسئله تشمل جميع افراد العائله.
انشاء الله صار عندك بعض المعلومات,,,,ولا تخاف ابدا
اكتب هنا الاسالة التي سالت بها عن عسكريتي من قبل المحلفيين
السوال الاول:
لابس عسكرية؟ نعم
ليش لبست عسكرية؟ كول عراقي ورة ميكمل دراسة لازم يلبس خدمه العلم
شوكت لبست عسكرية شهر 10 2001
وين لبست عسكرية: مركز تدريب المحافظة اللي اني بيها وقريبة من البيت وهية مجرد مدرسة تعليم اساسيات
شنو اتعلمت بالعسكرية؟ المسير والتدريبات الرياضة الصباحية واساسيات الكلاشنكوف الروسي
هل كان عندك سلاح؟ نعم سلاح التدريب اللي مابي لا مخزن ولا بيت الترباس فقط للتدريب واب حياتي ماظارب طلقة منه
هل كنت حائز سلاح في حياتك؟ طبعا لا
شوكت تسرحت؟ شهر 1 2002
شلون اتسرحت؟ دفعت بدل
زين ليش مدعفعت بدل مال 3 اشهر؟ متقبل الحكومه هاية 3 اشهر هية خدمه العلم في العراق وهية الزامية
اول متكعد حيكولك ارفع ايدك اليمين و تكول تقسم تكول الحقيقة اب هاية المقابلة ؟
طبعا اتجاوب نعم او يس
وتبدي تسالك
اسمك؟
مواليدك؟
البلد المولود؟
اسم ابوك وامك؟
اسماء اخوانك وخواتك من الاكبر لللاصغر
شوكت دخلت تركيا؟
مرجعت من ذيج المدة للعراق؟
حزبي؟
ماخذين بصماتك قبل؟
العسكرية؟
ليش مبقيت بالعسكرية؟
شاركت بجريمه؟
شاركت باخفاء اشخاص الهم علاقة بعمليات احرامية؟
دفعت مبالغ لاهيحي اشخاص؟
ماذي احد لانه من غير دين او شي؟
وبعدين شنو قصتك ؟
شيصير لو ترجع؟
من ياذيك؟
- من المهم جدا جدا أن تسرد الحقائق بالتسلسل الزمني وبدون كذب وعليك أن تتذكر جيدا كل الحقائق لانه مطلوب منك تذكرها ثانية بالتفصيل في مقابلة المحلفين وأياك اياك ان تقع في الخطأ الذي وقع فيه من قبلك الكثير وهو الخلط والتلكؤ بالحقائق في مقابلة المحلفين.
سيقوم الموظف بعد ذلك بأخذ طول ووزن جميع من معك بالظافة اليك طبعا ويشكركرم على حضوركم مرة ثانية.
سيقول لك الموظف في أخر المقابلة بأنه يريد أن يسألك سؤالا أخيرا ويريد الجواب بنعم او لا: هل تريد أن تبقى في العراق ام لا؟
من المستحسن أن تشكر الموظف في نهاية المقابلة وتعبر له عن أمتنانك وتقديرك لجهودهم .
أذا احببت استفسر من الموظف عن الموعد التقريبي للمقابلة الثانية وموعد الفحص الطبي .
سيقوم الموظف بمرافقتك الى بوابة السفارة وسيوصلك الباص الخاص بالسفارة الى البوابة الرئيسية .
اخوية كانت اسئلة غير عادية وتحاول المحلفة استفزازنا اول مابدت تخون امريكا وتشتغل جاسوس للغير؟ تبيع تكنلوجيا امريكا للغير؟ تشتغل بلدعارة (عذرا بس سؤال للكل) سؤال عن ارتباطك ودرجتك بحزب البعث ومتتصور يعرفون انه الكل كان مغصوبا او مضطرا فجاوب عادي ,وهل تتزوج مرة ثانيا في امريكا؟وبعدين تبدي تسئلك عن قصتك وسبب خروجك من العراق يعني اكو معلومات كدامها بس شنو تناورك فد سؤال موعلى بالك بس تريد من خلاله تشوف مصداقيتك فأوصيك كون بارد وتضحك وواثق من نفسك يعني عادي والباقي على الله.
انا بالنسبة لتواريخ مقابلاتي ( في عمان ) الاولى كانت 29 /10 /2008 والثانية 2 / 11 /2008 وخابروني يوم 5 /12 /2008 كالولي عندك مقابلة محلفين يوم 7 /12/ 2008 ورحت قابلت بنفس التاريخ وجان مكتوب في لوحه الاعلانات عدهم سيكون استلام النتائج يوم 20 /12/ 2008 ورحت استلم وكان الجميع ماشرين على اوراقهم بالمربع الرابع ( الاخير )
الاسالة الي اتذكرها تقيربا 90%
1. لماذا تطلب اللجؤ للولايات المتحده الامريكية ( اني كتلها مهدد بالقتل )
2. انت مهدد من منو ؟
3. شنو تعتقد يصير بيك اذا رجعت للعراق
4. طبعا هاي بالبداية اسمك وعمرك ومن هاي الدعافيس
5. شوكت تهددت ووين وشنو كانت ردة فعلك وشنو كان بالتهديد مكتوب
6. ليش اتهددت
7. جنت بحزب البعث لو لا ؟ اذا لا ليش ؟
8. شنو رائيك بحزب البعث ؟ وليش
9. ساهمت بعمليات ارهاب
10. خدمت عسكرية ؟ ووين ومن شوكت لشوكت ( هوايه دققت المحلفه )اني خادم طبعا
11. شفت انتهاكات لحقوق الانسان وسكتت ؟
12. اذا عندك ورقه تهديد وينها ؟
13. انته اذا متهدد وسافرت شنو تتوقع راح يصير اذا مسافرت وليش ؟
14. دفعت فديوم فدية على احد كان مخطوف ؟
15 .كم دوله سافرت بحياتك وليش
16. عندك نية ترجع للعراق ؟ اذا لا ,,,,, ليش ؟
17. شوكت اخر مرة طلعت من العراق
18. شوكت فتت للاردن ؟ سافرت من الاردن لغير دوله ورجعت ؟ وليش
19. انته مبصم بغير IOM ( يعني ناطي بصمات بغير دوله )
تحياتي للجميع واتمنه ان تستفادون من معلوماتي مع تحياتي للجميع والموفقيه ان اشاء الله
على الزوج والزوجه درس القصه جيدا,,ويجب تطابق ايفاد المعلومات بدون اي اضافه من الطرفين,,
على سبيل المثال,,
انا وزوجتي قبل يوم المقابله درسنا القصه جيدا,,,وحتى قمت انا امثل دور المحلفيين ووجهت الاسئله المتوقعه
طرحها من قبل المحلفين,,
فيجب الحذر في ذلك.
الاطفال...
عليهم حفظ الاسم الثلاثي لهم,,
اعمارهم,,يوم شهر,,سنه,,
من اي مرحله تركوا الدراسه,,
اذا ذهبت الى امريكا ماذا تحب ان تصبح؟؟؟
هذه الاسئله كلها مطلوبه الاجابه عليه,,
على سبيل المثال,,,
نحن اول ما دخلنا في غرفة المحققين طلب مني المحقق بان يسال بعض الاسئله للاطفال,,,
نظر المحقق الى ابني الكبير وناداه باسم اخوه الاصغر,,طبعا السؤوال هنا متقصد,,
وبعد ذلك سال وقال,,
من منكم الاكبر؟؟؟
ماذا تجيد من لغات؟؟؟
هذه الاسئله مطلوبه من الاطفال,,
سؤال موجه الى الجميع
هناك سوأل مكرر لكل الكيسات على مايبدو وغالبا يطرح في نهاية المقابله
الرجاء الرجاء من الجميع اعطاء رأيه الخاص
السؤال هو: هل عندك اي دليل او شاهد على مامريت به من اضطهاد، تهديد، اختطاف قتل او ماشابه ذالك
فأذا لم يكن لديك اية رسالة تهديدي مذا يجب ان يكون الجواب؟؟؟
اخي العزيز .. بالتاكيد ليس الكل ومع ظروف العراق المعروفة لديهم مايثبت تعرضهم للخطر او التهديد .. والجهة التي تسالك "مبدئيا انت امامهم انسان صادق والغربي يعتبر الصدق قانون للحياة فحاول قدر الامكان ان تعطي ظروفك ووضعك بكل صدق وامانة وعفوية وهم سيقدرون ان ليس الجميع يملكون الوثائق التي تثبت خطورة وضعهم وظروفهم وسترى انهم بالاساس متعاطفين مع حالتك كعراقي ومقدرين للوضع الذي اوصلك بالنتيجة ان تكون مجرد رقم في سجلات ومجرد لاجئ
. السلام عليكم والله اعتقد يااخي العزيز اكيد اللي انخطف يكون ماله ورقة تثبت اختطافه ولا المهجر من بيته همينة عنده ورقة تثبت اما اذا كنت سني يسالوك وين ساكن بالعراق والغالبية اللي ساكنين بمنطقتك سنة لو شيعة وبالعكس واللي انقتل عنده احد اكو شهادة وفاة تثبت بس هم اكيد اكثر شي حتى يتاكدون من مصداقيتك تنطيهم تواريخ الحدث اللي صارلك وتكون متاكد
اذا العراق صار زين ترجع لو لا ؟ فهيج جواب يرادلة صفنة وااذا كتلة نعم او لا راسا راح يكولك ليش
لاتتوقع الاسئلة راح تكون مباشرة مثلا مراح يكولك انت بعد الحرب شنو صار وياك بحيث تاذيت من عندة نفسيا او جسميا .. راح مثلا يكولك انت نضريت بحياتك بصورة عامة ومراح يحدد المدة فانت ممكن تكون ممركز وعقلك يروح لفترة قبل الحرب ودجاوبة جواب غلط لان انت متوقع بسالك مباشر
من يحجي حاول تباوع علية لاتودي تركيزك بغير مكان يم المترجم مثلا لمن يخلص كلامة باوع عالمترجم ولاتحاول تحجي ويا زوجتك او احد افراد العائلة اثناء المقابلة لان هذا الشي يمكن ينحسب ضدك يتصور انه دتعلمهم شيكولون ...
لازم تحاول شكد متكدر متغلط بالتفاصيل او التواريخ الي حدث بيها امر مهم مثل التجنيد والتسريح وهالسوالف
لا تسهب في الجواب كثيرا واجب على قدر السؤال فقط فمن الممكن ان يكون شرحك الزائد قد يدل المحلف على سؤال كان غائبا عن ذهنه او يجعلك تعطي تفاصيل قد تظن انت انها تافهة ولكنها تعني الكثير للمحقق.
حاول ان تتذكر تواريخ دخولك الى الدول التي سافرت اليها والمذكورة في جوازك لانه قد يسالك عنها المحلف ليس بقصد المعرفة بقدر ما يريد ان يرى سرعة ذاكرتك.
هنالك سؤال يسالونه كل المحلفين تقريبا للشخص المقابل وهو هل اخذت منك بصمات في اي مكان بالعالم سابقا فقل له نعم في العراق وسيسالك كيف فقل له عند استخراج دفتر الخدمة وشهادة الجنسية وجواز السفر
احتمال اذا يشكون بشي (ولو هما بكلشي يشككون) يستفزوك يعني يجيبلك سؤال متتوقعا ويسألك بس يريدك تثبت هذا الشي، وخصوصا الاخيرة ويا المحلفين بس انت كلشي لتغير بالقصة مالتك يعني مثل ما حجيت بالاولى وبالثانية.
بس عادي كون واثق من نفسك ولا تتلكئ
