مراحل اللجؤ عن طريق اليوان بالامارات

[زينه العراق]

السلام عليكم ورحمه الله وبركاته
اخواني واخواتي الاعزاء
اني عراقيه مقيمه في الامارات ارغب في عمل لجوء الئ امريكا
اتصلت اليوم عله مقر اليو ان في ابو ظبي اسئل عن الاجراءت فاجاوبوني يرجه الحضور يوم الاربعاء لحضور محاضره تثقيفيه بعد ذلك ياخذ طلب اللجوء
فانا اسئل  حضرتكم وارجو الاجابه ماهي هذه المحضاره ماذا تتضمن
واحتاج من يرشدني

[vaio]

الاخت  الكريمة زينة العراق .

اهلا ومرحبا بك بين اخوتك واخواتك  وان شاء الله ستستفيدين من هذا المنتدى   وايضا  نرجو ان توفقي لافادة  الاخرين ايضا .

بالنسبة لسؤالك -

المحاضرة التثقيفية التي تلقى  للمتقدمين الجدد هي لتوضيح كيفية  البدء في طلب اللجوء وكيفية مليء استمارة الطلب  وايضا لتوضيح الاجراءات التي تنتظر اللاجيء واعطاء فكرة مبسطة عن كيفية اجراء المقابلات  وغيرها الكثير من المعلومات المفيدة .

تمنياتنا لكم بالتوفيق

فايـــــــــــو

[زينه العراق]

السلام عليكم اخي العزيز
بالنسبه للدوره التثقيفيه يسوها مره كل شهر او اكثر من مره
لان الانسر مشين تجيب تراجع قسم الحمايه يوم الاثنين والاربعاء
فارجو الرد لغرض التاكيد رجاء

[اتوشي]

السلام عليكم اخي العزيز
بالنسبه للدوره التثقيفيه يسوها مره كل شهر او اكثر من مره
لان الانسر مشين تجيب تراجع قسم الحمايه يوم الاثنين والاربعاء
فارجو الرد لغرض التاكيد رجاء

اختي العزيزة الدورة التثقيفيه الي تحجين عنها كل يوم اربعاء بمقر المنظمه بابوظبي وهاي اول خطوة من خطوات اللجوء وينطوكم فورم متكون من 8 اوراق تقريبا تذكرون بي معلومات عنكم وتسلموه بعد ما تكملو للمنظمه
وبعدها تدخلون مسار الانتظار والله يصبركم ويصبرنا واغلب الموجودين هنا ودينتظرون الدورة التثقيفيه الاخيره الي هي بعد اربع سنين تقريبا من الدورة التثقيفيه الاولى

وبين الدورتين اكو 4 مقابلات وحده منهم هي مقابله تسجيلكم بصورة رسميه وينطوكم رقم فايل للكيس مالكم تراجعون عن طريق هالرقم وباقي المقابلات هي كالتالي

مقابله توطين اولى مع محامي منتدب من اليو ان وعادة تكون في مقر اليو ان بابوظبي
مقابله توطين ثانيه تكون مع الوفد التركي اي سي ام سي
مقابله المحلفين الاخيره الي هي تكون مع الوفد الامريكي

بعدين اكو فحص طبي

وتجي الدورة التثقيفيه الاخيره الي هي شرح عن الحياة بامريكا حسي ما اتوقع وسامع لان بعدني ما وصلت لهالمرحله

ومع كل المقابلات الي صارت اكو احتمال رفض او قبول مع كل مقابله ولو مشت كل المقابلات مع الموافقه راح تنتظرون موافقه امنيه (تجييك امني ) وهذا مدته غير معروفه

اتمنى اكون وضحت لحضرتج خطوات اللجوء
الله يسهل اموركم وامورنا امين رب العالمين

[vaio]

السلام عليكم  جميعا

اخوتي اخواتي الاعزاء

الحمد لله  اتصلو بنا لتحديد موعد الدورة التثقيفية  .  والموعد يوم 20 و 21و 22 من هذا الشهر .
يا ريت كل شخص اتصلو عليه  يخبرنا ويخلينا نشاركه فرحته .

تمنياتنا لكم جميعا بالتوفيق والسفر القريب .

اخوكم فايـــــــــو

[كاري ميرو]

مبروك أخويه
شوكت التقديم والفحص ورآها بشگد اتصلو

[vaio]

اخوية العزيز كاري ميرو  الله يبارك بيك
 التقديم من زمان  والفحص بالشهر الاول .

فايــــــــو

[كنداوية]

السلام عليكم اخواتي واخواني الكرام 

احببت المرور عليكم والتمني لكم بالسفر العاجل ان شاء الله .

[vaio]

الف شكر اختنا الكنداوية وشكرا على مرورك وممنونين منك على  تمنياتك  وكل الهلا .

تمنياتنا لك بالتوفيق



فايــــــو

[جمال وليد]

السلام عليكم اخوتي الطيبين
أتمنى تكون كل أموركم بخير يارب وتسهل كل أمور سفركم

بالنسبة لنا اتصلو بينا قبل يومين وحددو لنا موعد الدورة التثقيفية بهذا الشهر بأبوظبي

سؤالي هو مامعنى تحديد موعد التثقيفية وعلاقتها بموعد السفر والأمنية ؟
هل يعني ان الامنية مكتملة ؟ أم لا ؟؟

تحياتي وشكري للجميع
أخوكم أبو وليد

[vaio]

العزيز جمال

كل الاخبار  تقول لا علاقة بين موعد الدورة التثقيفية وانتهاء التجييك الامني .

لكن من المؤكد انها خطوة  ضرورية ودليل على تقدم  في الملف .


فايـــــو

[جمال وليد]

شكرا فايو
تسلم على المعلومات عزيزي
ربنا يفرجها على الجميع

[sparky]

العزيز جمال

كل الاخبار  تقول لا علاقة بين موعد الدورة التثقيفية وانتهاء التجييك الامني .

لكن من المؤكد انها خطوة  ضرورية ودليل على تقدم  في الملف .


فايـــــو

+1

[زينه العراق]

السلام عليكم اخواني الاعزاء
ممكن اذا كان زوجي هو صاحب القضيه انا اروح اقدمها
لان باجر اكو دوره تثقيفيه فيصير اني اروح ماكو اجازه اله بسبب ظرف العمل

[vaio]

اختنا العزيزة زينة العراق
الدورة التثقيفية ما الها علاقة بتقديم طلب اللجؤ لان هاي في مكان وهاي في مكان اخر وايضا الي يجرون الدورة التثقيفية مو موضفي اليو ان هاي منظمة اي سي ام سي التركية
بينما الي يستلمون طلب اللجؤ هم ناس اخرين يعملون في الامم المتحدة مكانهم غير وشغلهم غير.

فايو

[زينه العراق]

مشكور اخ. فاير الله يسهل عليك ان شالله ويفرجها بوجهك يارب

[ABUDHABI]

السلام عليكم - شنو الاخبار شو التحديثات اني من جماعة الطابوكة النايمة مخلص الدورة التثقيفية بشهر 9/2011 ولي هسة ممسافر وين الاخوان الباقين

[tetanic]

السلام عليكم شباب
السلام عليكم خواتي
انا مقدم من سنة 2010 ونتظرت حتى مل مني الانتظار وعطفوا علي اخيرا واعطوني رقم فايل قبل شهرين.....وكلولي اصبر احنا نخابرك ولحد الان محد بين منهم....شتكولون تحريك الملف هماتين راح ياخذ سنين لو الفرج قريب.....اخواني وخواتي ساعدوني باليتعرفوه اللة يسهل عليكم وعلينا ان شاء اللة.

[vaio]

اخي العزيز ااهلا ومرحبا بك وربنا يسهل امرك
اخي العزيز ابتشر خيرا  ما دام انطوك رقم ملف اصبح من الظروري عليك متابعة الموضوع حتى تتمكن من اجراء مقابلة التسجيل وبعدها ستمشي الاجراءات بشكل طبيعي وسريع ان شاء الله حسب ما ضهر بالاونة الاخيرة
تمنياتنا لك بالتوفيق

فايو

[sparky]

حياكم الله يالطيبين ومنور المنتدى اخونا الغالي تيتانك

شلونك تاج راسي يافايو الورده

[tetanic]

ممنون منكم شباب على سرعة ردكم وشكرا الك اخوية فايو ...واللة يرحم والديك يا الغالي بس عندي استفسار صغيروني...اشو جربت اتصل عليهم وشفت  حليمة بعدها بعادتهاالقديمة وهذا عبد السلام سداها بوجهي وكلي احنا مشغولين هسة ..عود من ايصير شئ احنا نخابرك.
فسؤالي هو احرك نفسي واشوفهم نفسي احسن لو انتظر ترة واللة مليت اللانتظار والحالة صارت  ا صعبة جدا ..وهذا عبد السلام ابيش مشغول؟ ليش اكو مقابلات هسة واجوا الاتراك لو لا....فدوه اروحلكم ساعدوا اخوكم المنسي  "ابو احمد". تيتانك.....

[vaio]

العزيز سباركي مشكور اخوية الغالي على السؤال وانا والحمد لله بانتظار موعد السفر وان شاء الله للجميع. ربي يوفقك ويسهل امرك


فايو

[vaio]

اخوية العزيز ابو احمد
جوابهم هذا امر طبيعي. اصلا هذا الجواب جاهز وحاضر لاي واحد يسال خصوصا اذا ما كان عدهم خلك يجاوبون
انت لا تترك موضوعك للزمن وبالمقابل حاول بين فترة واخرى من خلال التلفون اما الاهم من التلفون ان تشوفلك وثيقة قوية مثل تقرير طبي او شيء اخر وتكتب رسالة تطلب بيها تسريع معاملتك بس بشزط عندك حجة مثل ما كلنا تقرير او شيء اخر
وتمنياتنا لك بالتوفيق
فايو

[dardoor89]

 الى الاخوة الذين سافروا من الامارات .......... ارجو مساعنكم بكيفية الحصول على جدول التلقيحات من الشارقة و اين يمكن تصديقه؟؟؟
 الى الاخوة في امريكا...و بالتحديد في كاليفورنيا / لوس انجليس ..... ما هي المساعدات هناك و هل صحيح ان التامين الصحي لا يشمل الاذن اضافة الى العيون و الاسنان؟ ماهو معدل الايجارات لشقة غرفتين وصالة؟؟؟ شاكرا لكم التعاون.
اخوكم دار دور

[اتوشي]

اخوية دار دور بالنسبه لجدول اللقاحات فاذا عندك جدول ميحتاج تصدقه بس يحتاج يكون مترجم
واذا هذا الجدول حكومي فهو حيكون مترجم اساسا لان اسماء اللقاحات مذكورة بالعربي والانكليزي

وبخصوص الايجارات ان شاء الله الاخوان يفيدوك لان اني هم دا انتظر الفرج
وان شاء الله هم نروح لكاليفورنيا

[Omar Al Iraqi]

السلام عليكم

اخوان كل واحد سوة دورة تثقيفية بأبوظبي بشهر نيسان أبريل يومين بدل من ثلاثة ايام وما اجاه اتصال تحديد موعد سفر خلي يبعث ايميل يسأل عن حالة ملفه فاذا تم اخباره ان الملف تم نقله الى الاي او ام فليتصل على اي او ام السعودية وليكلم شخص باكستاني اسمه طارق ليأخذ موعد السفر لان اكو ضغط ومدا يتصلون بالشخص قبل وقت كافي والله يفررج عن الجميع ولا تنسونا من الحلاوة

[اتوشي]

اخوية عمر السلام عليكم
اني من جماعه الدورة التثقيفيه مال نيسان ام اليومين 17 و18
ولحد اول البارحه دزيت ايميل للاي سي ام سي اسالهم عن حاله ملفي كلولي بالتجييك الامني وكالو لتبعثلنا ايميل مره ثانيه تسال عن حاله ملفك لان اذا اكو اي تطورات احنه نخبرك
وكذلك عندي اتصال بأغلب الناس الي جانو ويايه بالدورة وماكو اي احد منهم اجاه اتصال تحديد سفر ونفس الموضوع يسالون ويكولولهم بالتجييك الامني
فاكدر اعرف اذا ممكن من وين هالمعلومات ؟
وبالنسبه للحلاوة بيك خير وتدلل بس خلي تصير صدك

[ABUDHABI]

حبيبي اني مخلص الدورة التثقيفية من شهر 9/2011 ولحد هسة ممسافر كلما اخابر اسأل بعدك علتجييك الامني فلتستعجل

[سعد1111]

السلام عليكم ، نحن قدمنا في 2010 وزوجتي كانت هي صاحبة الطلب والطلب كان يشمل ستة اشخاص وبعد المقابلة الاولى في اليو ان تم فصل الملف الى ثلاث ملفات واحد لعائلتي والثاني لوالدها ووالدتها والثالث لأختها وعند مقابلة المحلفين حصلت الموافقة لوالدها ووالدتها واختها ولكن لم يقوموا بعمل الفحص الطبي بانتظار الموافقة على حالتنا التي تحتاج لوقت لاننا لدينا معاملة هجرةعادية الى كندا والمحلفين يحتاجون لسؤال الجهات الكندية وهذا الموضوع معلق الى الان منذ مقابلتنا في نهاية العام الماضي ومعاملة اهل زوجتي الان عبرت التشييك الاول وقد اخذوا الدورة التثقيفية الشهر الماضي ونحن قلنا للمحلفين باننا نريد ان نذهب جميعا الى نفس المكان ، السؤال الان هو اذا قمنا بسحب ملفنا (انا وزوجتي وابني)  فهل سيؤثر هذا على معاملة اهل زوجتي؟ وهل ممكن ان معاملتهم تنجز في وقت اسرع؟ ياريت احد منكم من لديه الخبرة بالموضوع يفيدنا ولكم جزيل الشكر والامتنان

[Omar Al Iraqi]

أخ اتوشي

ثلاثة من دورة اليومين كان لديهم موعد سفر ولم يخبرهم احد ولكن بعد اخبارهم بهذا الموضوع تم الاتصال باي او ام السعودية وتم تاكيد سفرهم علما ان احدهم اعطوه فقط عشرة ايام للسفر لان الحالة الامنية كانت ستصبح غير صالحة بعد ذلك

ولهذا السبب حسب ظني كانت الدورة لهذه الوجبة ليومين فقط عكس باقي الوجبات

المشكلة نحن العراقيين نخاف من الحسد الى حد النخاع بحيث الاخ لا يخبر اخاه بسفره الى اليوم الاخير والدليل ان هناك مجموعة اتصلوا بهم اثناء وقبل الدورة حتى ولكن لم يخبوا احد خلال الدورة وانا متأكد من كلامي

اتمنى لكم ولنا ما هو خير ان شاء الله

[اتوشي]

اخوية عمر احنه من رحنه للدورة جان اكو عائلتين ناطيهم موعد سفر اساسا وبعدين سمعت انه اكو عائله انطوهم موعد سفر
بس بعد هذولة ما اتوقع احد انطوه موعد سفر
وعالعموم كلامك جدا صحيح الكل يخافون من الحسد وهاي الصفه مراح نخلص منها ابد
الله يوفق الجميع ان شاء الله

[زينه العراق]

السلام عليكم اخواني واخواتي
الله يوفق الجميع ان شالله

حبيت انقل الكم اخباري بقضيه اللجوء
بعد جهد رحت لابوظبي وحضره الدوره التثقيفيه انا ومجموعه من العوائل
وصدق مثل ماقالو الاخوان ياهو الي تسئله يجاوبك ماعرف ماادري ومايدرون الرزق مقسم والي الك مايخذه غيرك
الحاصل اخواني اختكم حايره تريد تكتب القصه وماجاي تعرف شلون ترتبها ومحتاجه مساعده من ذوي الخبره
الله يسر عله الجميع ان شالله
لان قالو كتبو ادق التفاصيل ودزوها بالبريد وانا حايره والله شكتب

[Omar Al Iraqi]

السلام عليكم

ستبدأ او بدأت اشعارات مواعيد السفر للذين حضروا الدورات التثقيفية في شهر ميسان أبريل في أبوظبي ندعوا من الله ان نكون من الوجبات الأولى وان يجعلها خطوة خير لنا اجمعين.

حسب ما عرفت انه خلال ايام الدورة كان هناك وفد اميركي في اسطنبول وعلى الاكثر هو من يقبل أو يؤجل او يرفض المتقدمين لطلب اللجوء واقصد هنا الوفد المختص بالموافقة الأمنية، وبعد موافقة الوفد يتم ارسال الموافقة النهائية الى الولايات المتحدة للمصادقة وليعود الرد بنقل واعادة الملف الى الاي او ام لتحديد موعد السفر وتأخذ هذه العملية شهر الى شهرين تقريبا، وبما ان الدورات كانت قبل شهر تقريبا فستبدأ باذن الله بشائر السفر.

نتمنى ممن تأتيه البشرى ان ينقل لنا الخبر ليكون بصيص امل للجميع

[افاق المستقبل]

مرحبا اخواني ممكن سؤال للجميع انا الان في العراق والوضع صعب جدا جدا واريد ان احصل على لجوء او هجرة باي وسيلة علما انني متزوجة ولدي طفلان والله اخاف عليهم حتى من روحة المدرسة يعني صار بينا رعب موطبيعي والشغلة الاهم انو اختي رح تحصل على الجنسية الامريكية فكيف اكدر اقدم من العراق ام من الامارات زين اذا اقدم من الامارات هل يجب ان اقيم هناك وكيف احصل على اقامة هناك وشلون اعيش علما ان لدي اقارب بالامارات وايضا خايفة انو خاف اترك عملي بالعراق وابقة بالامارات وماحصل شي والاهم من هذا شلون رح تكون طريقة الطلعة وهل يكدر احد يقدملي من اقاربي بالامارات ويتصلون بيه والله ماعرف حايرة بس اريد اي طريقة ياريت تفيدوني اكون شاكرة الكم

[ABUDHABI]

اختي العزيزة بالنسبة للهجرة عن طريق الامارات الى امريكا فتكون عن طريق ال UN الي هية صايرة بابوظبي ومن شروط التقديم لازم عندج اقامة بالبلد  وهنا الحياة صعبة بدون عمل يعني الي ديشتغل يادوب مكفي نفسه بعدين الاقارب ميفيدون يوم يومين هم يملون بعدين يرادلهم مو اقل من سنتين ونص اذا مو اكثر كل شخص وحالته اني بالنسبة الي مخلص كلشي من شهر 9/2011 ولليوم بعدني ممسافر وعندج الحساب اني اشوف احسن طريقة يطلع بيها الواحد يشتري فيزا شنغن من بغداد ويسافر بيها ويطلب لجوء ويخلص سواء بفنلندا او غيرها احسن منما يبقى ينتظر 3 واربع سنوات ياكل بكلبة ويكتلة القهر حتى دتطلع الامنية ويسافر اني هسة احس بنفسي ندمان بالتقديم ليش لان عندي اصدقاء شترو فيزا من بغداد وسافرو الى بلجيكا والله وفقهم وهسة عدهم اقامات وكل فترة اشوفهم مسافرين بدولة يفترون مع العلم اني مقدم قبلهم بسنين وبعدني مستقريت طبعا هذا الحجي من وجهه نظري مااريد اسببلج هبوط معنويات الله يساعدكم علوضع بس فكري بيها زين والقرار بالاول وبالاخير الج والله يسهل امرج وامرنا

[افاق المستقبل]

والله اخي اشكرك اولا على اهتمامك وردك اللطيف بس تعرف احنة عائلة يعني لو واحد وحدة يكدر يجازف ويروح يطلب لجوء ومتعرف وين رح يذبوك مخيمات متعرف شكد تبقة امورك مخربطة احنة عائلة ويانة اطفال 2 هي هاي المشكلة يعني من نطلع نطلع كلنة طلعة وحدة

[ABUDHABI]

احسن شي يطلع زوجج وحدة اذا جان ناوي علجوء بس اذا ناوين تقدمون على IOM فالمفروض كلكم تطلعون سوا والاحسن تقدمون بعمان اجراءاتهم اسرع او تركيا وثنيناتهم يرادلهم صبر سنين فلازم واحد يحسبها زين ماديا ونفسيا يشوف نفسة يتحمل هلشغلتين لو لا حتى ميندم بعدين والبي خير الله يقدمه ان شاء الله - تحياتي

[tetanic]

السلام عليكم اخوتي وبالاخص العزيز فايو والنشمي sparky ....
مشتاق ادردش وياكم كلش هواية اغاتي ولوما ظروف الحياة الصعبة وضغواتها جان لكيتوني كل يوم هنانا وياكم....
اخوي العزيز فايو بس عندي استفسار بسيط عيوني ...اني صدك كلش مريض وعندي عرق النسا وكلما اروح لدكتور يكلي يرادلك عملية بس اني خايف اسويها لان عملية الدسك بالظهر وتخوف وها اتشوفوني اتنقل من طبيب لطبيب وباقي على العلاج الطبيعي والمسكنات فسؤالي هو هل حالتي تسوى اويلها تقرير واوديه الهم واذا فاد التقرير باستعجال شغلتي ..شأكل للدكتور يكتب لي بيه ممكن تتفضل علي وتكلي شنوهي الكليشة اللي لازم اكتبها .... والله ما انساكم في دعائي واللة يسهل اموركم ويستر عليكم ان شاء اللة.

                                                                                                                         اخوكم المنسي ابو احمد

[vaio]

السلام عليكم
اخي العزيز tetanic كل الهلا بيك والف شكر على سؤالك
والف سلامة وان شاء الله الشفاء العاجل.

نعم اخي الحالة الصحية جدا مهمة في تسريع خطوات معاملتك وخاصة اذا كانت بتقارير طبية ووياها رسالة تشرح بيها معاناتك
وجدا مهم ان تصدق التقرير الطبي. وترفقه مع الرسالة
اما الكليشة فهي بسيطة ما عليك الا ان تكتب انك مريض وهذا المرض يٱثر على حياتك وعملك واطلب منهم تعجيل وتحريك ملفك كمساعدة منهم في تخفيف معاناتك
وربنا يوفقك ويسهل امرك

[tetanic]

بارك اللة بيك اخوية فايو على ردك السريع وتمنياتك لي بالشفاء يا وردة اني كلش ممنون منك اغاتي ان شاء اللة نبقى على اتصال ولاتنسوني حبيبي باي معلومات مستجدة عن الاتراك ومتى يجون......ثيمان الله

[sparky]

السلام عليكم ورحمة الله وبركاته
رمضان مبارك وكريم على الجميع ويارب الفرج قريبا لجميع المنتظرين والعفو والعافيه والستر علينا وعلى الجميع
هناك احت جديده اسمها هديل مقيمه بالامارات وتريد تعرف شلون يتم التقديم على الهجره وقد جاوبتها ودليتها على جمعيتنا هنا فنتمنى انها ستاتي هنا للحصول على الاجابات التي تطمح بالحصول عليها
ننصحها بالاطلاع على كل الصفحات السابقه واللي فيها كل ماتريد معرفتها وستجد ضالتها والاجابه لكل اسالتها فلنرحب بها - فلقد كتبت على صفحه على العام ودليناها الدرب لجمعيتنا الموقره
http://www.ankawa.com/forum/index.php/topic,677726.0.html

[Hadeel Alzubede]

السلام عليكم  انطوني بالمنتدى هذا الربط حتى اتواصل مع الأخوة الي بالامارات  اني مقيمة وية عائلتي بالامارات واريد اقدم لجوء  شنو الاجراءات واكول لجوء هسة ووين اروح ساعدوني اخواني ترة ما عندي علم بكلشي وهل الاجراءات سهلة لو طول كلش وبارككم  الله

[أبو يعسوب]

الاخوة الاعزاء والاخ سباركي

الحالة الامنية للملفات مكتب ICMC لا يعلم عنها شئ فهي مسئلة امنية بحتة مرتبطة بشكل مباشر بالامريكان وكل ملف يختلف كحالة مستقلة عن الملفات الاخرى

ولجميع الاخوة أي مساعدة في المعلومات او الاستفسار عن أي شئ انا حاضر بالاجابة

والتوفيق للجميع

[Hadeel Alzubede]

شكرا الكل الإخوة الي ديساعدوني ويوفرولي المعلومات  وخصوصا ابو يعسوب وسباركي  وبقية الإخوة والاخوات  ، الاخ ابو يعسوب مشكورا  كلي بعثي رسالة الى icmc وانطاني الايميل مالهم زين شنو الأكتبة بالرسالة وبالعربي لو بالانكليزي  واكو فورم مال تقديم ومثل ما خبرتكم اني ما مشتغلة وية الأمريكان زين هل اروح اخذ الفورم من ابو ظبي لو ادزلهم ايميل وهمة يجاوبون ، وشكرا مقدما على كل نصيحة   والله يخليكم كل معلومة عدكم اريد اعرفها وشنو الخطوات الأولى وشلون تنكتب القصة

[Hadeel Alzubede]

السلام عليكم اليوم الصبح اتصلنا باليوان وكالونا اكودورة يوم الاثنين تعالو حضروها واكو استمارة املوها ويكون الاتصال عن طريق صندوق بريد زين شنو هاي الاستمارة وشنو المفروض نكتب بيها اذا سالو عن سبب طلب اللجوء سوال ثاني اني بنتي عمرها هسة 13 يعني اذا صارت 18 ميقبلوها ضمن اللجوء الى انشاء الله نقدم عليه   انتظر الجواب مع الشكر

[may1]

الاخ سباركي وكل اعضاء الجمعية الموجودين بالامارات والمسافرين
كل عام والجميع بالف خير ويارب تحقيق الاماني والسفر القريب لكل من ينتظره

[sparky]

الاخت الغاليه مي والاعضاء جميعا
كل عام وانتم بامان وعفو وعافيه ونسال الله العلي القدير ان ييسر امورنا جميعا وان يحفظكم جميعا وان يقدم لنا ولكم وللجميع الخير والشفاء لعراقنا الجريح - اللهم امين بجاه رب العالمين -

[ABUDHABI]

رمضان كريم ان شاء الله على كل الاعضاء والله يسهل سفرنا وسفر كل من ينتظر

[أبو يعسوب]

لجميع الاخوة والاخوات

رمضان مبارك عليكم والله يتقبل صيامكم وقيامكم،

الاخت هديل اذا انت مشتغلة مباشرة مع الامريكان تستطيعين التقديم على برنامج (SIV) بس تحتاجين العقد الي وقعتي مع الامريكان والباجات الي كنت تستعمليهه رسالة الوصية (Recommendation) من مسؤلك المباشر الامريكي طبعا وتقدمين القصة حسب ما شرحتلك
اما بالنسبة لابنتك فهي تحت سن 18 سنة وتعتبر معك جزء من الملف

بالمناسبة انت وضعك كا SIV يختلف حيث جميع اجراءات تختلف وهي تعتبر افظل انواع الهجرة حيث انه اخي هو مهاجر SIV

اي معلومات انا حاضر

[Hadeel Alzubede]

السلام عليكم ابو يعسوب اشكرك على اجاباتك  الوافية  بس اريد اوضح انى ما مشتغلة وية الامريكان وشنو هذا الsiv الاخوان كالولي ايفيدج icmc ليش شنو الفرق وبالنسبة البنتي هية هسة 13 بس اخاف الإجراءات اتطول وعمرها يعبر  ال18 هذا سؤالي وهم سألتكم على مود الدورة الي كلونا عليها يوم الإثنين ان شاء الله شنكتب بالفورم
 مع فائق التقدير

[أبو يعسوب]

الاخت هديل

موضوع SIV هو برنامج الهجرة للاشخاص الذين عملوا بشكل مباشر مع الامريكان حيث انه الهجرة الى امريكا كما وضحت سابقا كالاتي:-

IOM : وهو اشخاص عملوا بشكل غير مباشر او احد اقاربهم (اب او ام او ابن او ابنة) يكونون قد عملوا بشك مباشر مع الامريكان

بالنسبة للدورة اعتقد انها دورة تعليمية وتثقيفية لاضير من حضورها واجراءات SIV OR IOM لا تطول اكثر من سنتين بالنسبة للمقيمين في الامارات حيث عدد المقدمين اقل

هناك بعض الاشخاص القضية طالت عندهم اكثر من ذلك ولكن ليست مقياس اذا كانت جميع المعلومات صحيحة والاوراق المطلوبة متوفرة تصبح الاجراءات سريعة

ولكم الشكر والتوفيق

[Hadeel Alzubede]

اشكرك على الإيضاح اخوية أبو يعسوب  بس بهاي الحالة البرنامجين iom  و siv مرح يفيدني حسب ما تفضلت  زين لعد على يا برنامج يقبلونا و اكو برنامج يشمل الناس الي ما مشتغلين  وية الأمريكان بعض الأعضاء كلولي برنامج cimc  بس ايكولون هذا برنامج ضعيف ويطول  اكو هيجي برنامج لو لا واسفة عالاسئلة بس ترة كلشي مدا افتهم يعني انقدم لو شغلتنا صعبة

[أبو يعسوب]

الاخت هديل

غدا هو الاربعاء ومكتب UN يستقبل زوار حاولي ان تصلي الى ابو ظبي غدا قبل الساعة الثامنة صباحا واتصلي على مكتب الامم المتحدة UN واحضري الدورة واخذ الاستمارات واملئيها واستفسري عن حالتك واي برنامج يلائم وضعك سوف يرشدوك على البرنامج المناسب ويتحول الملف الى ICMC وهذه اسلم واسرع طريقة

والله يوفقكم انشاء الله

 

[Hadeel Alzubede]

السلام عليكم اخواني
 انشغلت بهاي الفترة هواية والبارحة رحت وية عائلتي لليو ان بأبو ظبي وقامو بتسليمنا فورم للتعبئة وكتابة القصة  بس كالو كلش تتأخر المهم بدينة بأول خطوة والحمد لله الآن اني وعائلتي حايرين شلون نصيغ القصة  وشلون نركز على النقاط المهمة علما انهم طلبو منا نقدم القصة بإسم زوجي لكن قصة زوجي ضعيفة بالمقارنة مع قصتي فهل من الممكن التركيز على قصتي رغم كون الطلب بإسم زوجي ، الله يحفظكم دلوني على النقاط الي تقوي القصة  ، مع الشكر.

[سوبرمان بغداد]

السلام عليكم
رمضان كريم و يعود عليكم بالخير و العافيه

سلامي لكل الاصدقاء حاليا انا في تكساس هيوستن و الحمدلله

انشا الله اموركم بخير

[أبو يعسوب]

الاخ هديل

اذا كانت القصة التي تخصك اقوى من قصة زوجك من الافضل ان يكون الطلب باسمك واشرحي القصة بشكل استعراض المراحل وحسب الاحداث والتواريخ ليست بتفاصيل دقيقة ولكن اجعليها بشكل عمومي ولكن مفهوم ومتسلسل بحيث يستطيع القارئ ربط الاحداث وتتبعها لكي تكون مقنعة وسلسة حيث عند المقابلة سوف تسالين عنها وسيطلب منك توضيح بعض النقاط والتفاصيل وكوني دقيقة بسرد الاحداث وبشكل متسلسل اعتمادا على تسلسل التواريخ فهو شيء جدا مهم عندهم حيث يدعم مصداقية القصة

والله يوفقكم

ابو يعسوب

[Hadeel Alzubede]

السلام عليكم
  اخواني اخواتي بالنسبة لتقديم الفورم فقد طلبو منا باليو ان ان يكون الطلب بإسم رب الأسرة الأب وليس الأم  لا اعرف السبب  وعندما سألتهم ان يكون بإسمي رفضوا
 زين  سؤالي هو كيف ادمج قصتي مع قصة زوجي وهية مقدمة بإسمه وخصوصا بعد السقوط هوة كان بالإمارات واني وأطفالي أبغداد ساعدوني إخوان لأن كل منريد منبدي نكتب القصة توكفنه هاي النقطة
 زين من نبدي القصة رأسا نكتب  موضوع التهديد لو لازم نكتب مقدمة عن مكان العمل والسكن
 وتقبلوا مروري  مع التقدير.....

[أبو يعسوب]

الاخت هديل

البداية بموضوع التهديد ومن ثم التواجد في الاماكن ولكن عليك ان تقومي بالربط ما بين التهديد واماكن التواجد و حسب التواريخ التي يجب ان تبرمج بشكل يتطابق مع الاحداث واماكن التواجد

لك جزيل الشكر

ابو يعسوب

[Hadeel Alzubede]

السلام عليكم .....
بارك الله بك اخي ابو يعسوب على التوضيحات
 وارجو من كل الإخوان ابداء آرائهم حول ما سأكتبه مع تقديري للجميع....
 إخوان  أكو حالة قبول جتي لضابط عراقي في الجيش السابق علما هو ضابط بحري عادي لو ماكو مثل هاي الحالة
 الله يخليكم جاوبوني .... مع التقدير

[ابو غربة]

اشلونكم احبائي صديقكم الجديد ابو غربة ارجو للجميع راحة البال والتوفيق اخواني والله تعبت ومحتاج نصحكم اني مسجل من عام 2010 ولحد الان ماكو بس مقابلة معلومات شنو القصة واحد ضاقت بيه الدنيا واريد نصيحتكم شسوي واعجل بموضوعي لان تعبت اخواني الله يقضي حوائجكم

[alzandawi]

كل الهله بيك اخويه احنه نفس الحاله ماكو ولا مقابله معلومات وهم من 2010الله كريم كلشي باوانه والله يسهل امرك وامرنا وأمر كل صاحب حاجه

[ابو غربة]

اشلونك عيني اخوي alzandawi وشكرا على ردك علية اغاتي الوردة  ترى والله مشكلة اكو ناس قدموا ب2011 و2012 وراحوا الله يتمم الهم بكل خير بس اريد اعرف اشلون شنسوي اشو الوكت يمر وماكو فرج  وهاي انت اخوية alzandawi ماكو لهسة مقابلة معلومات الله ييسر امرك وتقابل برمضان واتمنى للجميع الفرج واخواني الي عنده تعليق يساعدنا الله يفرج عنكم وتمشي جميع معاملاتكم هاي السنة باذن الله واريد اعرف اخواني يمتة يجي الاتراك وجم مرة بالسنة يجون عيوني مو تنسونا منتظرين لكرمكم

[أبو يعسوب]

السلام عليكم

الاخ alzandawi والاخ ابو غربة انشاء الله الله يوفقكم وتسمعون اخبار جديدة ارجوا الاتصال على هذا الرقم وهو رقم احد الموظفين في ICMC  في ابو ظبي 0559023597 وهم متواجدون في ابو ظبي وممكن الاتصال بيهم والاستفسار عن أي شيء يخص حالتكم وانشاء الله تحصلون على نتيجة واذا تريدون رقم ICMC في تركيا هو 00902129777001 وانشاء الله التوفيق للجميع

ابو يعسوب
 

[ابو غربة]

آآآآآآح ياابو يعسوب الوردة هاي الارقام مال شنو اشو اني اروح بنفسي وأخابر المنظمة ومحديجاوب لو  يكولولي انتظر انتظر انتظر   ملفك مو مستعجل  عدنا ملفات هواية حالتهم اصعب من حالتك يعني الا يبطلوني لو اصير بمأزق ومشكلة يله يحسون بينا اي اني ما معترض بس اريد اعرف يعني يراديلي عشر سنين حتى اسمع خبر والله تعبت ياخوية زين هذولة المحلفين الاتراك يمتة يجون
ويصير واحد يطلب مقابلتهم لو الا همة يستدعونا بس شيستدعون اذا الملف نايم وعليه كومة تراب
تسلملي ابو يعسوب على الرد وبارك الله بيك ورمضان مبارك ارجو المساعدة افيدونا احبائي        

[أبو يعسوب]

الاخ ابو غربة

رمضان مبارك عليك وعلينه هذه الارقام مال المنظمة  هنا وبتركيا وصدقني الاتصال بيهم لا يشكل أي مشكلة لأنه من حقك الاستفسار عن ملفك باي وقت وتكدر ترسل لهم  ايميل  ايضا ودائما ابحث في ايميل   عن spam  لا نه حالات كثيرة وصلتهم ردد على spam  وهم لا يعرفون

والله يوفقك انشاء الله

[alzandawi]

أشكرك أبو يعسوب الورد على التلفونات  وأشكرك اخويه العزيز على الدعاء والله يسهل امرك ويفرجه عليك فرجا عاجلا غير اجل

[alzandawi]

الأخ العزيز أبو غربه أشكرك على الدعاء ويارب يسهل امرك ويفرجه عليك رب العالمين وعلى كل الاخوه المنتظرين وماكو شئ بعيد يم رب العالمين

[SAMER 13]

السلام عليكم اخواني الاعزاء
اني قدمت على ICMC عن طريق الايميل وبدون مراجعة اوفتح ملف مع اليو ان وبعد مدة ردو علية وطلبو مني معلومات ومستندات وفورمات امليه لهم وبعدهااعطوني رقم كيس وقالو لي ان حالتك وقصتك ستمضي قدما ويتم معالجتها فقط في حالة التاكد من صحة المعلومات والمستندات التي قدمتها والتي سيتم التاكد من صحتها عن طريق الجانب الامريكي فقط وسنعلمك بالنتيجة حال ورود اي رد من الجانب الامريكي ولم يردو علي لحد الان منذ شهر تقريبا
اخواني الاعزاء سؤالي هو هل اقدم على اليو ان ايضا ام انه ليس بصالحي التقديم على اليوان نظرا لان اليو ان هم يحولون الكيسات على الICMCوهل يصبح تعارض اذا قدمت على اليون وهل ال ICMC يوفرون وضع لاجيء كما هو الحال مع اليو ان بكل ماتعنيه هذه الصفة من توفير الحماية وماهي الخطوة اللاحقة انشاء الله بالنسبة لل ICMC وكم يستغرق الوقت لهم لكي يكملو موضوع التاكد من المعلومات وعن ماذا يتاكدون هل من مكان العمل والشركة فقط ام يشمل ذلك كل شئ مثل الجنسية وشهادة الجنسية وعقد الزواج لانه في هذه الحالة ستاخذ وقت طويل جدا لان الدوائر في العراق بطيئة جدا وربما لاترد
ارجو النصيحة وشكرا ورمضان كريم على الجميع انشاء الله

[sparky]

الاخ سامر
السلام عليكم ورحمة الله وبركاته
في رايي المتواضع لاحاجه لان تقدم على اليو ان طالما انك عملت مع الاميركان ولديك الان كيس منتظره التاكد منها
مسالة كم من الوقت ليرجعوا بعد التاكد من المعلومات التي قدمت فهذا صعب الاجابه عليه
لكن لدينا اخ اخذت معه فترة شهرين وجاوبوه انهم تاكدوا من عمله السابق - والله اعلم -

[ابو غربة]

اشلونكم  احبائي واذا  ما ادعو لاخواني بالخير لعد المن ادعو الله ييسر امرك اخوي alzandawi  الوردة واخوية ابو يعسوب المهيوب الله يحفظكم ما عدنا غير الانتظار بهاي الغربة والفرج منه ان شاء الله بس حبيت اعرف الاتراك يمتة يجون الي يعرف يكولنا ياغاليين وكل رمضان وانتو بالف خير

[SAMER 13]

السلام عليكم ورحمة الله وبركاته

الاخ سباركي المحترم
شكرا جزيرا اخي العزير على ردكم واني فرح بدخول المنتدى والله يفرج عن الجميع انشاء الله , اتصور انك عضو قديم في المنتدى ومعاملتك صارلها فترة طويلة ويوجد اخ اخر اسمه فايو وهو منذ 2010 الله يسهل معاملاتكم انشاء الله وتحصلون الكرين كار والجوازات باسرع وقت باذن الله , انا في الامارات منذ 5 سنوات ولم انتبه لهذا الموضوع المهم الا الان حيث العراق من سئ الا اسوا وايضا هنا لاتضمن بقائك 
اخي سباركي انا لم اعمل مع الامريكان وانما عملت مع شركة عراقية دخلت كمقاول ثانوي في مشاريع بنية تحتية عراقية مولتها الحكومة الامريكية لذلك انا اتسائل كيف سيتاكدون ومن من سيتاكدون من الشركة العراقية فقط ام من من؟ اذا كان لديكم اي معلومات افيدوني يرحمكم الله  واما موضوع اليوان فتسائلي هل منظمة ICMC منظمة توطين امريكية ام هي تابعة لليو ان لانك لو تم تسجيلك في اليو ان كلاجئ فهذا معناه تصبح لاجئ دولي (تحظى بحماية دولية لغاية اعادة توطينك) هل هذا الوضع ينطبق على الل ICMC؟
شكرا لكم ورمضان كريم وافطار شهي باذن الله وتقبل الطاعات

[أبو يعسوب]

الاخ العزيز

لتأكيد واقع الحال يطلب منك كافة الوثائق ولايميلات الرسمية للاشخاص المعنيين الذين عملت معهم لكي يتم مخاطبيتهم وتاكيد القصة وحالة الحصول على ذلك التاكيد سيرسلون لك اقتناعهم بالقصة واعتبارك حالة مقبولة لكي تبدأ المقابلات واستكمال جميع الاجراءات واذا كان عندك عنوان البريد الالكتروني لمسؤلك المباشر في الشركة ابلغه انهم سيتصلون به او يرسلون ايميل له للتاكد من صحة الوثائق المقدمة عنك بمجرد تأكيدها اعتبر الموضوع قد اصبح على الطريق الصحيح والله يوفقك

ابو يعسوب

[SAMER 13]

السلام عليكم

شكرا لك اخي ابو يعسوب والله يوفقكم

اخي ابو يعسوب هل لديك معلومات عن حالات مشابهة وكم استغرقت من الوقت وماذا بعد التاكد هل ستكون المقابلة وكم مقابلة . لدي صديق بدا ب سبتمبر 2011 وهو الان قد اكمل الدورة التثقيفية والفحص بانتظار السفر ولكن لايعلم شي عن موعد السفر

شكرا جزيلا ويارب يفرجها على الجميع

[sparky]

الشكر الجزيل للاخ ابو يعسوب على الاجابه لتساؤولات الاخ سامر وشكرا لدعوات الاخ سامر لنا ونقول ( ولكم مثلما تدعون لنا باذن الله تعالى )
وفعلا نحن من القدماء ولانزال ننتظر الفرج ومن الله التوفيق

[أبو يعسوب]

شكرا لك اخ ابو غربة والاخ الزنداوي والله يوفق الجميع اما بالنسبة للذين قد اتموا الدورة التثقيفية ما بين شهر (4-5) 2013 معظمهم وبالتتابع بدا باستلام مواعيد السفر وانا واحد من الناس الذين اتموا الدورة التثقيفية في شهر (5) 2013 وبانتظار موعد السفر واخر الاجراءات مطلوب انهاء هذه المعاملات قبل نهاية هذه السنة للبدا بالمعاملات الجديدة
ورمضان مبارك عليكم يا اخوتي العراقيين وتقبل الله صيامكم وقيامكم والله يسهل امركم ويفقكم

ابو يعسوب

[اتوشي]

السلام عليكم

اخوية ابو يعسوب للتصحيح فقط انه مواعيد السفر تعتمد على موعد انهاء مقابله المحلفين وليس على ترتيب انهاء الدورة التثقيفيه
وان شاء الله ربي يسهل عليكم وعلينا ونسمع اخبار السفر بهالشهر الفضيل
تحياتي للجميع

[زينه العراق]

الاخ ابو يعسوب رمضان مبارك على الجميع يارب
انتو مقدمين من يا سنه

[أبو يعسوب]

السلام عليكم الاخ زينة العراق

CASE NO. 03/2012


1- 19/6/2012 مقابلة  ICMC   
2- 13/02/2013 مقابلة المحلفين
3- 28/02/2013 الفحص الطبي
4- 02/05/2013 الدورة التثقيفية

وبانتظار انهاء التدقيق الامني حيث تم الاتصال على الكفيل وتوثيق جميع المعلومات وانشاء الله نتأمل موعد السفر قريب


والله يوفق الجميع

ابو يعسوب
 

[زينه العراق]

الله يسرلك ان شالله يارب
انا قدمت ودزيت الملف بس مانطوني رقم كيز
فشلون همه يتصلون وينطوني رقم القضيه لو شلون

[SAMER 13]

السلام عليكم
الاخت زينة العراق
بالنسبة لل ICMC يعطونك رقم كيس في حالة طلبو منك ملاء فورمات وتزويدهم بوثائق ومستمسكات وبعدها يعطونك رقم كيس وبعدها تبدا مرحلة التدقيق والتحقق من صحة الوثائق والمستندات ومصداقية القصة . انا ايضا قدمت جديد اعطوني رقم كيس وفقط لايوجد جديد منذ شهر وفي حالة اي جديد سايلغكم به . اعتقد ان الاخوة الذين اجرو الدورة التثقيفية في نيسان الماضي سيسافرون باذن الله نهاية العام الجاري وسنكمل نحن الجدد دورة جديدة فارجو ان نكون على تواصل واي جديد يجب ان نعلم الجميع كي تعم الفائدة وانشاء الله الجميع يسافر وتنتهي المعاناة

اخوكم سامر الغريب

[زينه العراق]

اهلا بيك اخي العزيز
بس انا دزيت الهم الفورمه والاوراق والمستمسكات بالدي اج ال وخابرت استلموها بس مانطوني رقم كيز

[SAMER 13]

السلام عليكم

عيني الاخت زينة
اني راسلتهم بالانترنيت وعن طريق ايميلات موجودة على الويب سايت وبعد 14 يوم ردو عليه وطلبو مني الفورمات والمستمسكات ودرزيتها بالايميل ايضا وبعدها طلبو معلومات اخرى ودزيتها وتعديل معلومات بالفورمات وبعدها دزيتها بالايميل وبعد يوم اويومين اعطوني رقم الكيس وقالو بالرسالة مالتهم احنة مراح نمشي اي خطوة بمعاملتك الا بعد ان نتاكد من صحة المستمسكات من مصادرها ومدى اهليتك لدخول برنامج الهجرة   ولحد هاي اللحظة اني ما اعرف عنوانهم البريدي ولاتلفونهم فقط ايميل ولحد هاللحظة هم يدققون بالاوراق والمستمسكات منذ شهر وماكو اي رد منهم وما اعرف ويامن راح يجيكون ولمن سيراسلون وكم تطول والله كريم ورمضان كريم والله يسهل على الجميع باذنه وانشاء الله الكل تسافر باسرع وقت

اخوكم سامر الغريب

[زينه العراق]

الله يسر ان شالله

[أبو يعسوب]

الأخ سامر الغريب

هم. راح يدققون مع الشخص الي كان مسؤول عنك أو الشركة الي كنت تشتغل معهم يدققون صحة القصة والفترة التي قضيتها مع الشركة أما بالنسبة للقصة لن يدقوا شيئا فيها يكون ذلك التدقيق معك فقط في اول مقابلة واهم شيء اجعل القصة متسلسلة التواريخ ولاتخطاء بأي تاريخ واحفظ القصة جيدا وتذكر كل حدث فيها لانه مقابلة المحلفين هي الأساس ويجب ان تكون الأقوال مطابقة في المقابلتين لانه اقتناع المحلف بالقصة تكون قد أنجزت 90% من الإجراءات وتستطيع الاتصال على منظمة ICMC على الأرقام التالية

ابو ظبي موبايل : 0559023597
رقم تركيا: 00902129777001

واتصل دائماً من يوم الاثنين ولغاية الجمعة بعد الساعة العاشرة صباحا

والله يوفق الجميع

ابو يعسوب

[SAMER 13]

السلام عليكم

شكرا اخو ابو يعسوب الورد على التلفونات والمعلومات المهمة والله يوفق الجميع

[ابو غربة]

اشلونكم عيوني
حبيت أحييكم وأباركلكم  بقرب قدوم العيد جعل الله أيامكم أعيادا بتسهيل المعاملات وتسريعها إن شاء الله أخوتي شكو ماكو وين صرتوا منتظرين اخبار حلوة منكم واني أخابر المنظمة  ولا حس ولا نفس الي يعرف شيء يخبرنا جزاكم الله خير ترى تعبنا وهذا المنتدى صاير متنفسنا الوحيد 

[SAMER 13]

السلام عليكم

اخواني الاعزاء الف الف الف مبروك حلول عيد الفطر المبارك اعاده الله عليكم بالخير واليمن والبركة وتحقيق الاماني وانشاء الله عيد الاضحى القادم يكون قدسافر كل الاخوة القدماء الى وجهتهم المنشودة واخص بالذكر الاخ سباركي والاخ ابويعسوب والاخ فايو وعذرا اذا نسيت بعض الاسماء وانشاء الله نحن بعدهم ودمتم بالف خير

[sparky]

الاخ الكريم الغالي سامر الطيب والطيبين
نسال الله لكم وللجميع عيدا مباركا وصياما مقبولا وذنبا مغفورا ونساله تعالى ان يجعلنا من الفائزين الذين قاموا لرمضان ايمانا واحتسابا
والشكر الجزيل لذكركم لنا بالخير وبارك الله لكم وفيكم سيدي الغالي ويومك سعيد باذن الواحد الاحد الفرد الصمد

[RoRo Rola]

مرحبا عيد مبارك عليكم
عندي سؤال مهم
اذا كنت عملت مع الامريكان بس بطريقة غير مباشرة ولكني التقيت معاهم اكثر من مرة وبعدها تركت العراق ورجعت للامارات وطبعا ماعندي اوراق تثبت كلامي لكن عندي صور
يعني صوري معاهم في اماكن العمل في بغداد
يعني اكدر اقدم لليوان بخصوص العمل مع الامريكان لو ماكدر اقدم ياريت تفيدوني واكون شاكرة الكم
لان عندي طفل وماريد يصير بيه شي ويتبهذل من بعدي

[sparky]

كل عام والجميع بالف خير
الاخت رورو حياكم الله بجمعيتنا المتواضعه
الان حضرتكم ذكرتم الكلمات التاليه :-
كنتم تعملون مع الاميركان بصوره غير مباشره ولديكم صور معاهم بموقع العمل - ففيها شئ غير مفهوم بالنسبه لنا -
بكل الاحوال فانها من دون شك تصب بمصلحتكم وفي قضيتكم واذا تمكنتم من التواصل مع هؤلاء اللي ظاهرين بالصوره معكم ليؤكدوا عملكم ولو لاسبوع فانها ستصب بمصلحة القضيه بصورة مباشره بدل التقديم عبر اليو ان فان قضيتكم سيتم التعامل معها مباشرة من قبل المنظمه الدوليه اي ام ام
او منظمة الاي سي ام سي
وربنا يوفقكم والجميع ونحن معهم بجاه هذه الايام المفترجه

[sparky]

السلام عليكم ... اخوية سباركي و كل الاخوة و الاخوات ..... ما الفرق بين الهجرة و اللجوء و بماذا تفرق اللاجراءات؟؟؟ و شكرا مقدما

اولا تريليون مبروك لاخونا الغالي فايو
الاخ داردور الهجره هي للناس اللي قدمت على برنامج الاس اي في ويحصلون على الكرين كارد خلال شهر من وصولهم
اللجوء او اللاجئ هو اللي مقدم اما عن طريق الامم المتحده او اللي مقدم مباشرة عن طريق الاي او ام ولازم يقيم على الاقل سنه بامريكا ليمنح بعدها الكرين كارد
بالنسبه لسؤال حضرتكم الاخر بشان الناس اللي لم تتصل بهم المنظمه الاي سي ام سي التركيه وعلى صاحبك الذي لم يتصلوا به فقل له لايقلق وسيتصلوا به وهناك تسريع ملموس جدا وفي مصلحة الجميع وباذن الواحد الاحد الفرد الصمد وربنا ييسر امور الجميع ونحن منهم وحياكم الله جميعا

[زينه العراق]

اخوان انا زوجي مشتغل ويا الامريكان بطريقه غير مباشره وعندي اثباتات قدمت على اليو ان
شلون اقدر اقدم على مكان ثاني يفيدني مثل siv او غيره

[ساكور]

السلام عليكم 

تحياتي إلى الأخوة الأعضاء وكل عام وانت بخير. أنا عضو جديد بالمنتدى ابحث عن  عن بعض الأجوبة حيث قمت بمقابلة المحلفين بأبوظبي في الشهر الأول من 2013 وأكملنا الدورة الثقافية في الشهر الثاني من 2013. ولكن لحد الآن لم يطلب منا إجراء الفحص الطبي و عند الاتصال بمكتب تركيا (icmc) أخبروني بان الملف تحت التدقيق الأمني . سؤالي هو كم باعتقادكم يستغرق التدقيق الأمني؟ وهل توجد مواعيد سفر قريبا؟

وشكراً.

[اتوشي]

نورت اخ ساكور
بس سؤال بلا زحمه عليك
انت ذكرت انه قابلت المحلفين بشهر ال1
وسويت دورة تثقيفيه بشهر ال2 بهالسنه
متاكد من هالمعلومات ؟
لان حسب علمي المحلفين جانو موجودين بشهر ال12 من سنه 2012
وبشهر الثاني من شهر 2013
والدورات التثقيفيه بدت بشهر ال4
بس ياريت تاكد التواريخ واكونلك ممنون
100 هلا بيك مره ثانيه ومشكور مقدما

[SAMER 13]

السلام  عليكم  اخواني

ارجو من جميع الاعضاء في المنتدى التواصل . صار المنتدى هدوء (صار جولة) يمعودين حتى اذا ما اكو اخبار عن اللجوء وعن المقابلات وعن الاجراءات تواصلو خلي نكتب على الاقل مرة بالاسبوع حتى نسمع اخبار بعضنا وان الجميع بخير والسلام ختام

اخوكم
سامر الغريب

[ساكور]

عزيزي أوتشي تحية لك للمساهمة في موضوعي معلومتك صحيحة بالنسبة للدورة التثقيفية واني غلطت بالتاريخ شهر الثاني والصحيح الشهر الرابع والمحلفين اني متأكد بالشهر الأول 2013 وتسلم على معلوماتك الدقيقة

[زينه العراق]

اخوان سوال اول مره. من رحتو جبتو الاستماره ومليتوها من اليو ان ورجعتو دزيتوها بعد شقد فتره زمنيه خابروكم وانطوكم رقم قضيه

[ساكور]

عزيزي زينة العراق بالنسبة لي بعد سنتين من ملئ الاستمارة اتصلو بي ودونو أقوالي وأخذ ولنا صور  وأعطونة كيس نمبر وبعدها يتغير هذا الرقم من تتحول الأوراق لل icmc

[gheed ... جـهــيـــــــد]

الاخوه والاخوات
محتاج ايميل ال icmc لغرض مراسلتهم من دوله الامارات وعنوانهم ايضاً اذا كان موجود
شاكر لكم تعاونكم مع تمنياتي لكم بالسفر القريب



اخوكم جهيد

[زينه العراق]

تسلم اخوي على الرد اشكرك

[gheed ... جـهــيـــــــد]

الاخوه والاخوات
محتاج ايميل ال icmc لغرض مراسلتهم من دوله الامارات وعنوانهم ايضاً اذا كان موجود
شاكر لكم تعاونكم مع تمنياتي لكم بالسفر القريب



اخوكم جهيد

Up

[ABUDHABI]

ايميل ال ICMC 

info@icmcturkey.org

00902129777001 رقم تلفونهم الي بتركيا

وبالخدمة

[gheed ... جـهــيـــــــد]

ايميل ال ICMC 

info@icmcturkey.org

00902129777001 رقم تلفونهم الي بتركيا

وبالخدمة

اشكرك اخي العزيز الله يبارك بيك

[SAMER 13]

السلام عليكم

الاخ العزيز جهيد اسف جدا للتاخير اليوم قراءت رسالتك  ادناه بعض ايميلات ال ICMC

srdan.samardzic@icmcturkey.org

hampson@icmc.net

الله ييسر لك وللجميع وانشاء الله فرج وفرح وتيسير من العزيز القدير

[زينه العراق]

اخواني الكرام
هل يحق لي ارسال ملفي كامل الذي قدمته الى اليو ان بالامارات الى تركيا عبر الايميل او لا واكو تجاوب ولا لا

[ساكور]

عزيزي زينة العراق
حسب اعتقادي ومعلوماتي لا يجوز إرسال الملف إلى تركيا وانتم مقيمين في الإمارات وخاصة إذا تم تقديمه في الإمارات  لانه اصبح في عهدة مكتب ابو ظبي وهم يتكلفون بالملف

[ساكور]

إخواني الأعزاء
حسب معلوماتكم الموافقة الأمنية شكد تطول أكثر شي  ؟
وبارك الله بيكم

[sparky]

6 اشهر الى سنه حسب الكيسات الجديده
اما القديمه فاكو ناس صارلها اكثر من سنتين تنتظر ولحد الان   والله ييسر امور الجميع

[أبو يعسوب]

الاخوة الاعزاء

لقد استلمت الاتصال التليفوني من منظمة ICMC يعلمني بصدور الموافقة الامنية وقد حددوا لي موعد سفر يوم 17/09/2013 من مطار دبي طبعا الموافقة الامنية بدأت بالتدقيق من بعد مقابلة المحلفين في تأريخ 13/02/2013 والفحص الطبي  في 28/02/2013 والدورة التثقيفية في             02/05/2013 المهم تمنياتي للجميع بالتوفيق وصدور معاملاتهم بأسرع وقت ووجهتي هي الى كاليفورنيا وانشاء الله التوفيق من الله سبحانه وتعالى

وعند وصولي سأقوم بأرسال والكتابة عن كل ما سيحدث من لحظة الانطلاق من دبي ولغاية الوصول الى كاليفورنيا

اخوكم ابو يعسوب
   

[زينه العراق]

مبروك اخ ابو يعسوب وتوصل بالسلامه ان شالله يارب الله يسهلها على الجميع
من اي سنه انت قدمت وبعد شقد عطوك كيس نمبر

[حبيبي العراق]

اخوية ابو يعسوب شايف كل الخير ويارب الراحة والاستقرار .
اخونا العزيز اذا امكن تبلغنا بالتواريخ منذ تقديمك واكون ممنون وشاكر لفظلك.

[ساكور]

شكرًا لك مبدع الهجرة وبارك الله بيك عالجواب

[ساكور]

ألف مبروك ابو يعسوب والله يفتحها بوجهك وجميع إخواني العراقيين

[ساكور]

أخوية ابو يعسوب إذا أمكن شوكت اتصلو عليك بالضبط وبلغوك موعد السفر الله يوفقك

[SAMER 13]

الف الف الف  مبروك للاخ ابو يعسوب الله يسهل وييسر عليك جميع الاجراءات باذن الله لغاية سفرك واستقرارك هناك وانشاء الله تجد فرصة عمل هناك وتحصل على الجواز لك ولعائلتك باسرع وقت يارب وللجميع انشاء الله تسهل الامور والكل تسافر وتحصل استقرار وجوزات لكم ولعوائلكم قولو اميييييييييييييييين

سامر الغريب

[ابو غربة]

مبروك   يا اخوية يا ابو يعسوب اقسم انك تستاهل كل خير  واحنا  فرحانين علمودك وان شاء التوفيق لك في هذه السفرة التي نرجو من الله ان تكون ميسرة ومريحة لك وللاهل ايها الاخ العزيز

[أبو يعسوب]

الف شكر للاخوة
سامر الغريب والاخ ساكور والاخت زينة العراق وانشاء اللة الله يسهله للجميع اخوان اني التواريخ بدأت كالاتي:-

رقم الكيس نمبر في 03/2012
المقابلة الاولى 19/06/2012
مقابلة المحلفين 13/02/2013
الفحص الطبي 28/02/2013
الدورة التثقيفية 02/05/2013
الموافقة الامنية 07/08/2013
موعد السفر 17/09/2013 

والله يسهله على الجميع وانشاء الله عند الوصول سوف ارسل للجميع خطوات السفر لغاية الوصول الى السكن

ولكم جزيل الشكر
 ابو يعسوب

[ساكور]

بارك الله بيك ابو يعسوب على هذه الإيضاحات  والله يفتحه بوجهك والأهل جميعاً

[زينه العراق]

الله يسهلك يارب ولكل العراقيين وتوصل بالسلامه مشكور ماقصرت

[sparky]

الله يسهل امور الجميع وربنا يوفق الجميع
اما بالنسبة لقضيتنا فلقد مضى 25 شهرا على الاجـــــــــــــــــــــــــراءات الامنيــــــــــــــــــــــــه ولانزال ننتظر الفرج من رب العباد الى ان ياذن سبحانه وتعالى بالسفر واللي لايعلمه الا الله سبحانه وتعالى .

[ساكور]

معقولة أخي مبدع الهجرة صارلك 25 شهر تنتظر الموافقة الأمنية ؟ الله يكون في عونك ..عزيزي انتة في اي بلد مقيم ومن اين قدمت أوراقك  لأن بدأت أحس بالإحباط والله يسهل أمرك وجميع الأخوة مع تحياتي

[alzandawi]

مبروك موعد السفر الأخ أبو يعسوب وبلسلامه أن شاء الله

[اتوشي]

الف مبروك ابو يعسوب ان شاء الله توصلون بالسلامه
احنه نفس التواريخ الاخيره تقريبا ومع ذلك ما زلنا قيد الاجراءات الامنيه والله المستعان

[vaio]

السلام عليكم ورحمة الله وبركاته

اخوتي الاعزاء جميعا

اعتذر عن الانقطاع الطويل وابلغكم بوصولي الى امريكا في بداية هذا الشهر والحمد لله

تمنياتي لكم جميعا  بالفرج  القريب ان شاء الله

انا في ولاية نيويورك مدينة روشستر
وانا في خدمتكم عن اي سؤال  ان شاء الله

اخوكم فايــــــــــو

[زينه العراق]

مبروك اخ فايو يارب رحله خير عليك الله يفرجها للجميع تستاهل

[SAMER 13]

السلام عليكم ورحمة الله

الف الف الف مبروك للاخ فايو وانشاء الله الاخ سباركي قريبا وجميع اعضاء المنتدى والمتكلم معهم باذن العزيز القدير . انا والله دخلت المنتدى قريبا لكن قراءت الصفحات الاولى منذ فترة وجود الاخت شجرة الدر وكنت استمتع بقراءة تعليقاتها ولكن كان قلبي ينكسر واشعر بالحزن على الاخوان فايو وسباركي لانهم منذ البداية ومستمرين بالمنتدى ولم يسافرو والحمد لله اليوم سافر الاخ فايو وغدا انشاء الله سباركي والزندواي والجميع ونحن معهم وسبب ذلك الصبر والصبر فقط وتفويض الامر برمته للعزيز القدير ان الله على كل شي قدير . اللهم لاتدع لناذنبا الاغفرته ولاهما الافرجته ولاميتا الارحمته ولامريضاالا شفيته ولامبتلى الا عافيته ولاحاجة لك بها رضا ولنا فيهاصلاح الاقضيتهاويسرتها برحمتك ياارحم الراحمين . قولو اميييييييييييييييييين
سامر الغريب

[alzandawi]

السلام عليكم ورحمة الله

الف الف الف مبروك للاخ فايو وانشاء الله الاخ سباركي قريبا وجميع اعضاء المنتدى والمتكلم معهم باذن العزيز القدير . انا والله دخلت المنتدى قريبا لكن قراءت الصفحات الاولى منذ فترة وجود الاخت شجرة الدر وكنت استمتع بقراءة تعليقاتها ولكن كان قلبي ينكسر واشعر بالحزن على الاخوان فايو وسباركي لانهم منذ البداية ومستمرين بالمنتدى ولم يسافرو والحمد لله اليوم سافر الاخ فايو وغدا انشاء الله سباركي والزندواي والجميع ونحن معهم وسبب ذلك الصبر والصبر فقط وتفويض الامر برمته للعزيز القدير ان الله على كل شي قدير . اللهم لاتدع لناذنبا الاغفرته ولاهما الافرجته ولاميتا الارحمته ولامريضاالا شفيته ولامبتلى الا عافيته ولاحاجة لك بها رضا ولنا فيهاصلاح الاقضيتهاويسرتها برحمتك ياارحم الراحمين . قولو اميييييييييييييييييين
سامر الغريب.     







أشكرك على هل الدعاء الجميل يارب الفرج لكل متضايق وتسهيل الأمر للجميع

[فزاع]

• • السلام عليكم اخواني واخواتي
    
    ابارك لكم هذا العمل الانساني وعسى ان تسهل اموركم وامورنا جميعا
    
    أخواني واخواتي الكرام حبيت اضيف رد هنا واطرح بعض التساؤلات عليكم وبعد قراءة بعض الردود وما شاء الله التفاعل سواء كان من الادارة ام من الاعضاء فهو تفاعل يجسب لكم وتشكرون عليه.
    استفساري وياريت ما ازعجكم بطول اسألتي
    اخوان اني طالع من العراق من فترة مو قليلة وكملت دراستي الجامعية في ماليزيا وبعد ما تخرجت الحمد لله رحت للامارات بفيزة زياره عن طريق والدي واهلي المقيمين هناك بس لهسه وضعي بالبلد ما يطمن بخير وتدرون مو بسهولة الواحد يلكى شغل هنا اذا ما عنده اقامه!
    
    سؤالي هو شون اكدر اقدم على اليو ان وشنو شروط التقديم الها والاهم شلون ابدي لان والله محتاج اطلع ومو عارف شنو الخطوات, فياريت استفيد من خبراتكم بهذا المجال ايها الاعزاء ولكم مني جزيل الشكر.
    
    
    
    
    

[/color]

[فزاع]

الاخ ابو يعسوب بما انك ما شاء الله ماشي بالامور مسبقا
يا ريت تتفضل علي وتخليني على الطريق الصحيح بالنسبة للتقديم لان ليس لدي اي علم بها ولا عمري فكرت الا هسه
فقط الشغلة الي اعرفلها انو لازم اقدم على UN وليس IOM لان الاخيرة فقط لمن كان يشتغل مع القواب الاميركية

وبالنسبة للتواريخ الي حضرتك ذكرتها هل هي ثابتة لكل متقدم ام تختلف الاجرائات وكل حسب حالته؟

لك مني جزيل الشكر

[SAMER 13]

السلام عليكم

الاخ فراغ اهلا وسهلا بيك في المنتدى
اخي اولا يجب عليك ان تاخذ فورم من اليو ان ومكتبهم حاليا في ابو ظبي شارع المرور مقابل محطة باصات ابو ظبي بشارع فرعي قرب شركة الخزنة للتامين قرب صحة الامارت وهو مركز طبي لجراحات اليوم الواحد الحقييقة شوية مكانهم صاير ختلة بس اذا وصلت صحة الامارات هو قريب جدا هاتفهم هو 02-6677668 وايملهم هو uaeab@unhcr.org . حبيبي تجي يوم اثنين او اربعاء فقط الساعة من 12:30 لل 1:00 وتستلم استمارة وتكتب بيها قصتك واوراقك واثباتاتك واحسن بلانكليزي وياريت تقرا الصفحات القديمة من 1 لل18 من هذا المنتدى حتى تستفاد من التعليقات واكتب قصتك بحكمة وروية وترتيب ويكون عامل الصدق اساسي فيها واما تواريخ المقابلات وتسلسل المعاملة لغاية السفر فيعتمد على كل حالة ومدى قبولها لديهم والله الموفق

اخوكم سامر الغريب

[فزاع]

وعليكم السلام والرحمه والاكرام
اخي سامر الغريب جزاك الله خيرا و وفقك لما انت به طالب ان شاء الله وكل اعضاء المنتدى

أخي العزيز ان شاء الله يوم الاربعاء سوف اذهب لهم واقوم باخذ الفورم وأبدا بالخطوه الاولى طبعا حاولت ان اسلسل الاحداث التي سوف امر بها من خلال قرائتي للموضع اغلبه لا اقول كله لان هناك امور لا تخص حالتي منها من اشتغل مع الاميركان وبعض الامور الاخرى, بفضل الله حاولت ان اطلع عليها وافهم ما هي قدر الامكان وبعد تعاونكم هذا اتضحت الصوره اكثر فجزاكم الله خيراً.

بالنسبة للقصه ان شاء الله تكون كلها بمصداقية تامه فانا لدي حالتي التي ان شاء الله ستؤهلني للقبول وكل هذا سيتم بالسعي والتوكل على الله اولاً.

اخي العزيز عندي كم استفسار:
1- كم سيعطوني من مدة حتى اتمم بها قصتي وهل استطيع تقديمها في اي وقت؟
2- ما هي الاوراق والهوايات المطلوبة للتقديم على طلب الفورم الاولي وحتى اكمال باقي الاجرائات ( اقصد بها الجواز ام الجنسية ام بطاقة الامارات وماهو الاجباري وما هو الاختياري ) ياريت تفيدني !
3- بعض النصائح التي تقدمها لي من حيث المظهر وما الى تلك الامور ( سمعت احدهم يقول اذهب باقل ما تملك من هندام ) فهل للصحة شيء من هذا؟

أخيراً اشكرك جزيل الشكر واشكر القائمين على هذا العمل راجين من الله تعالى ان يسهل امور الجميع.

[اتوشي]

السلام عليكم

اخوية العزيز فزاع اسمحلي ارد على تساؤلاتك

اولا المنظمه خصصت يوم الاثنين للعراقيين ويوم الاربعاء للاخوة السوريين فانصحك تروح يوم الاثنين افضل

ثانيا بالنسبه للاسئله راح اجاوبها حسب الترقيم الي ذكرته حضرتك
1-لما تروح تستلم الفورم من المنظمه راح يدخلوك محاضره مدتها تقريبا ساعتين يشرحولك بيها طريقه ملئ الفورم والمده والطريقه المطلوبه لتسليمه للمنطمه وعن موعد المحاضره فهو موعد ثابت ياريت تتصل بالمنظمه ويبلغوك بموعدها حتى متتاخر وتفوتك
2-في البدايه المطلوب منك نسخه جواز مع نسخه اقامه سارية المفعول وهي شرط اساسي من شروط التقديم وكل مستند يدعم قصتك ترفقه بالفورم لما تسلمه للمنظمه ان شاء الله
3-الهندام ماله علاقه بظروف الانسان وهذا الكلام الي انت سامعه مو صحيح حاول تظهر بمظهرك الطبيعي بدون تصنع لان ما اتوقع هالشي يفيدك

تقبل مروري
تحياتي للجميع...

[زينه العراق]

السلام عليكم اخواني واخواتي الكرام
الجماعات الي سلمت ملفاتها شهر الخامس 2013 ماكو اخبار جدبده لو بعدها سنطه

[فزاع]

السلام عليكم

اخوية العزيز فزاع اسمحلي ارد على تساؤلاتك

اولا المنظمه خصصت يوم الاثنين للعراقيين ويوم الاربعاء للاخوة السوريين فانصحك تروح يوم الاثنين افضل

ثانيا بالنسبه للاسئله راح اجاوبها حسب الترقيم الي ذكرته حضرتك
1-لما تروح تستلم الفورم من المنظمه راح يدخلوك محاضره مدتها تقريبا ساعتين يشرحولك بيها طريقه ملئ الفورم والمده والطريقه المطلوبه لتسليمه للمنطمه وعن موعد المحاضره فهو موعد ثابت ياريت تتصل بالمنظمه ويبلغوك بموعدها حتى متتاخر وتفوتك
2-في البدايه المطلوب منك نسخه جواز مع نسخه اقامه سارية المفعول وهي شرط اساسي من شروط التقديم وكل مستند يدعم قصتك ترفقه بالفورم لما تسلمه للمنظمه ان شاء الله
3-الهندام ماله علاقه بظروف الانسان وهذا الكلام الي انت سامعه مو صحيح حاول تظهر بمظهرك الطبيعي بدون تصنع لان ما اتوقع هالشي يفيدك

تقبل مروري
تحياتي للجميع...

أخي العزيز اتوشي اشكرك جزيل الشكر يالغالي على الايضاح وانا اتقبل منك ومن اي عضو النصيحة والايضاح ان شاء الله, هذا من ذوقك

ان شاء الله نخليها على يوم الاثنين كما اسلفت انا كل علمي انه فقط يوم الاربعاء لكن اخي سامر كان قد كتب لي انه يوم الاثنين ايضا وحضرتك اتممت موضحا ان الاثنين للعراقيين شاكرا لك.

-ان شاء الله سوف اتصل بيهم واستعلم منهم عن موعد المحاضرة بالضبط واحاول ان اكون متواجد منذ بدايتها
- ايضا لي صديق سياتي معي ان شاء الله لكن مشكلته لا يملك الاقامة حاليا وقد انتهت فيزة الزياره التي دخل بها حيث ان والده يعمل هنا فقام باصدار فيزه له وانتهت ولن يستطع العوده للعراق لاسباب خاصة به! فهل لديك اي معلومة عن هكذا حاله؟
- ان شاء الله سنظهر بالمظهر المعتادين عليه والتساهيل من الله الكريم 

أشكرك جزيل الشكر ودمت لفعل الخير ساعٍ

[sparky]

الشكر الجزيل للاخوه سامر ولكل من يدعو لنا بالسفر واقول ليس هناك داعي للقلق بشان القضايا الجديده لانها دتمشي سريعه جدا
اما بالنسبه لماذا تاخرنا او تاخر موضوع سفرنا فقط لاننا واكبنا اوضاع وتغييرات اثرت بصوره سلبيه على قضايانا نحن القدامى ومنها مشاكل الناس اللي عملها بعض العراقيين بامريكا واللي ادت الى التشديد في موضوع الامنيات مالتنا والشكوى لله لاللبشر ولله الحمد اولا واخرا

[فزاع]

السلام عليكم ورحمة الله وبركاته

اخوان اليوم اتصلت بالموفضية وكان عندي بعض الاستفسارات والحمد لله افادوني بها

بس حبيت انوه شغلة وحسب ما قالت الموضفة هناك اضنها لبنانية كانت تقول بان المفوضية ليس لها اي دخل في الاقامة وانما الاقامة هو امر يخص الشخص المتقدم وقوانين الدولة التي فيها و لكن اسلفت بان اقل معاملة تاخذ من سنة ونصف الى سنتين قانت تتحمل مسوليتك بالكامل لان المفوضية لا تملك صلاحية باصدار اقامة لك او اعطائك كتاب تحتمي فيه كما في بعض الدول الاخرى حيث تملك المفوضيات هناك الى هكذا امور.

وان شاء الله يوم الاثنين سنذهب انا وصديقي لهم ونوافيكم بالتفاصيل
أحببت ان اضيف هذه النقظة فقط للايضاح للمتقدمين في المستقبل ان شاء الله

اخي سباركي الف مبروك لك الله يتمم عليك ان شاء الله

[سفير الوطن]

الله يساعدكم شباب وبنات الله يخليكم عندي شخص بالامارات اترجاني شلون يقدم على اليون هوه جان يشتغل ويه شركه اجنبيه اشتغلت ويه الامريكان  شنو فلمه هذا شنو الحل اله بندول اسبرين ياخبراء اشرحولي

شكرا وبالتوفيق

[ابو غربة]

اعزائي  واخوتي الطيبين وينكم شو محد يدخل لا حس ولا نفس تعرفون اني ما احب الاخبار الموزينة  بس سمعت انه بعض الي اعطوهم موعد سفر اجلوهم الى اشعار  آخر بلكي الي عنده اخبار يبلغنه شنو الموضوع اخوتي اني بعدني على المقابلة مال عبد السلام يعني يصير واحد ينتظر سنين وبعدين يمكن ما يحصل شيء علما اني مقدم من 2009 والسنين تمر وماكو شيء وبعدين هاي السنة ايكولون بعد ماكو توطين يعني الي ما سووا مقابلة التوطين يم ست نسرين لازم ينتظرون 2014 يعني اشلون نأيس وما نفكر بعد واحنا ظروفنا بس الله يعلم اشكد تعبانة

[UN]

السلام عليكم اخوتي وخواتي الافاظل ،،،،،،،،

اخواني الكل يعرف وضعنا بسوريا شلونة وتعبت من الانتظار والقلق  ،،،،،

فعندي سؤال اذا انقل ملفي من سوريا الى الامارات يصير لو لا

علماااا انو اني عندي توطين امريكا بس صار عندي اضافة ورجعت من البداية تقريبااااا وهسة دا انتظر الوفد طبعااا بقة عندي اضافة اوراق للملف بس مدى تخلص يرادلة وقت

واني ما اكدر ابقى اكثر بسوريا فهل يصير اخبرهم واكمل اوراقي مناك لو لا

مع كل احترامي وتقديدري

[UN]

يمعودين صدك جذب ماكووووو احد

[ساكور]

عزيزي انتة عايش بسوريا وتريد تنقل ملفك للأمارات لازم تكون عندك أقامة الإمارات حسب أعتقادي ومن باب التأكد أكثر هذه تليفونات الأمارات وتكدرتتأكد بنفسك والله يستر عليك وعلى جميع أخواني العراقيين بسوريا
تليفون 0097126677668
فاكس009712667661
وهذا أي ميلهم. UAEAB@UNhcr.org
وأني بخدمتك واعتذر للتأخير

[حبيبي العراق]

اخي العزيزتحية طيبة
اخي حتى تنقل ملفك الى الامارات يجب ان تكون موجود بالامارات ويكون عندك اقامة سارية المفعول وبعدها تنقل ملفك وياخذ مجراه الطبيعي والمنظمة مكانها بابو ظبي .
اي سوال او استفسار اني اخوك وحاظر

[ساكور]

السلام عليكم أخواني
شنو ماكو مواعيد  سفر حسب معلوماتكم شغلتنة حمضت مقدمين من2009 ومقابلين محلفين  ومخلصين الدوره الثقافية وفاحصين طبياً ؟

[سلام قول من رب رحيم]

اخواني وخواتي  انا ضيفه جديدة بالمنتدى   ساعدوني اذا عدكم معلومه تفيدنا احنا   مخلصين كل المقابلات وباقين على التجييك الامني صارلنا 9 اشهر في الانتضار اخواني برايكم شنو هل التاخير والله تعبنا من الانتضار واللي عنده معلومه لايبخل علينا والله يفرج همه ويفتحه بوجها ويسهل امر الجميع 

[سلام قول من رب رحيم]

يابه الله يساعد الجميع والقلق والتوتر والاعصاب المشدودة ملازمتنه ليل ونهار عسى ربي يفرجه على الجميع ومابيدنه اي شي نسوي غير الانتضار والحمدلله والشكر ان هذا المنتدى فيه اخوان وخوات يتبادلون الاراء والمواضيع اللي تخص حياتنا اليومية كل الشكر لراعي المنتدى والتوفيق للجميع باذن الله

[سلام قول من رب رحيم]

اخواني اهل الامارات ولا واحد رد على الموضوع بس يدخلون يقرون الموضوع ويطلعون خلي نتواصل حتى نعرف وين وصلت قضايانا يعني الفايدة للكل حتى نكسر التوتر شويه   والتوفيق من رب العباد

[سلام قول من رب رحيم]

اللي عنده اجابه لايبخل علينا اخوان سمعتو احد من الكيسات عادو الفحص الطبي الكم الاجر والثواب

[سلام قول من رب رحيم]

عمي ينطيكم الف عافيه وماقصرتو ابشركم انطوني موعد سفر ويوم اللي الكم

[Ur akkad]

اخوان الي يقدر يساعدني رجاءا انا عايشة في الامارات ممكن تفيدوني شنو اكتب بطلب اللجوء

[حبيبي العراق]

اختي العزيزة اور اكد تحية طيبة
في البداية احب اخبرك ان القصة يجب ان تكون شخصية اي بمعنى انتي المعرضة للتهيد او القتل وليس الوضع بالعراق بصورة عامة راح اقرب الصورة يعني مو ما اكدر اعيش بالعراق لان مفخخات وكهرباء ومن هذا القبيل وان شاء الله وصلت الفكرة.
حتى تنقبلين على اللجوء هناك معايير يجب ان تنطبق على اللاجي حتى يحصل على سمة اللجوء وكل هذا يتحدد من خلال القصة اللي انتي بنفسك يجب كتابتها ولتنسين هناك حلفان اليمين .
اتمنى ان اكون قد افدك ولو بالقليل من المعلومات
                                                                                            اخوك حبيبي العراق

[Ur akkad]

شكرا اخي حبيبي العراق بس ياريت توضح اكثر اريد اقدم المعاملة باسمي

[حبيبي العراق]

اختي اور اكد تحية طيبة.
لكونك امرأة ولوحدك هذا مهم جدا جدا وتكون قضيتك ان شاء الله مقبولة تحت اهم بند من شروط قبول الاجئين وهو (امرأة في خطر) وبالنسبة للقصة تكدرين ترتبين الموضوع وتحطين تواريخ وتذكرين اهم شي هو سبب خروجك من العراق مع التاريخ وسبب عدم مقدرتك للعودة الى العراق .
راح اقربها الك هو خروجك من العراق بسبب التهديد بالقتل وعدم مقدرتك على الرجوع لكونك مهددة .
ارجوا ان اكون ساعدتك
اخوك حبيبي العراق

[Ur akkad]

اخ حبيبي العراق تعرف انك وردة محد رد علية بس انت ومشكور اخي واتمنى من الجميع المشاركة حتى نستفاد اكثر اشو ماكو احد ، اني كتبت لك على الخاص لان ردت تفاصيل اكثر اذا ممكن

[ابو غربة]

اشلونكم ان شاء الله كلكم بخير
أحبابي   سمعت اجا الاتراك والمحلفين سوية صدق لو الخبر الي اجاني ما اله صحة
افيدوني الله يفرج عليكم 

[ابو غربة]

السلام عليكم
عيوني مو بس شغلتي نايمة عليها طابوكة بس حتى مشاركتي نايمة عليها بلوكة  صار اشكد من سالت سؤال بسيط ومحد كال خل اشوف هذا الرجال شيحجي
يابة شكرا هم هاي الصفح بعد ما نفتحها

[Ur akkad]

ابو غربة اني قريت مشاركتك وماعندي معلومات بهذا الخصوص لكن مكتب اليو ان معطل وحيفتح السنة الجاية فانتظر وشوف والله يعينك طبعا حقك تسأل لان الكل كاعدين على اعصابهم ولا تزعل على الاعضاء يجوز مشغولين

[البابلي2000]

الاخ ابو غربة
السلام عليكم .... الي كانو موجودين في تاريخ 10/12/2013 هم لجنة من اليوان جاية من المكتب الاقليمي لليوان في لبنان لغرض اجراء مقابلات التوطين الابتدائي والي جانت سويها الست نسرين للملفات المتأخرة والمستعجلة .فنصيحة مني يراد لك تتصل وتراجع كل شهر للمنظمة .

تحياتي  والله يفرجها على الكل

[المهندس الزورائي]

الاخ ur Akkad  حضرتك مهندس؟

[Ur akkad]

السلام عليكم أخواني وأخواتي
كل عام وانتوا وعوائلكم بالف خير ويارب يجعلها سنة خير وسلام على العراقيين المساكين ولد الخايبة الي عايشين بالعراق الجريح
ويارب يجعلها سنة تسريع معاملات اليو أن للجميع يارب
مرحبا المهندس الزورائي أنا اختك أور ولست مهندسة

[Ur akkad]

السلام علكيم أخواني وأخواتي
حبيت افيدكم بهاي المعلومة لكل من يريد ان يقدم فورم جديد بالنسبة لجماعة الامارات وهي انه في الفقرة الخاصة بأي مشاكل في البلد المضيف اكتبوا اذا عندكم مشاكل في العمل او السكن ولا تبقوه فارغ اكتبوا عن اي شي تعتقدون او يكون فيه مشكلة واجهتكم وكل واحد حسب ما واجه يكتب بس الافضل ان ما تبقون الفقرة بدون شي

أختكم أور

[ABUDHABI]

السلام عليكم شلونكم عيني ان شاء الله سنة خير علينا وتنتهي كل الملفات النايمة والله الواحد ميعرف شيكول يعني اكو واحد صارلة سنتين من مخلص كلشي وينتظر السفر ترا صارت بلا ملح وحتى لعبت نفسي منها

[may1]

الاخ ابو ظبي
كل تاخيرة وبيها خيرة مثل ميكولون وبعدين اخوية ترا الشغل ب ابو ظبي كثير افضل من هنا بامريكا 
بس ردت اعرف الاخوة سباركي واليوسفي شنو اخبارهم ... ياريت لو  تطمنونا عليكم

[ABUDHABI]

والله يا عيني مااعرف بيهم الاخوة لان الناس لو ملت وكطت روحها ودتخل قليل لو سافروا والله يسهللهم

[Msc -pharm]

مرحبا كيف حالكم ان شالله تمام

شفت موقعكم بلصدفه وبصراحه احييكم على هذا التعاون الرائع ومبروك للي انقبلو وان شالله تفرج على البقيه

بدون زحمه اني حابة احد يساعدني بطريقة التقديم وشنو هيه الامتيازات الي لازم اتكون عندي حته اتصير عندي فرصه اكبر للقبول
مع العلم اني مقيمه هنا بلامارات  صارلي سبع سنوات
واي احد عنده معلومات ياريت يساعدني

[المهندس الزورائي]

الاخت msc >> ماكو أي امتيازات .. فقط تحضرين قصة تهديدك بالعراق + سبب رغبتك بمغادرة الامارات .. بمعنى توضحين للمنظمة انه ما عندك مكان امن ممكن تعيشين بي لذلك تطلبين اللجوء .. طبعا لازم تعززين كلامك بدلائل .. وخلي ببالك انتظار 3-5 سنوات .. بس ههههههههه اهلا بيك واذا احتاجيتي اي مساعدة اني والاخوان الباقين موجودين .ع فكرة الافضل تسرعين بالتقديم لان السوريين هنا دا يقدمون باعداد كبيرة جدا ودا يزدادون يوم بعد يوم .

[Hadeel Alzubede]

 السلام عليكم  إخواني  أخواتي ....
كل عام وانتو  وعوائلكم الكريمة بألف خير

عندي استفسار بسيط  احنة من الجماعة الجدد  الي راجعنا بشهر السابع  22 او 24 /7 وسلمنا القصة بشهر التاسع  من سنة 2013  شكد تتوقعون ويتصلون بينا  يعني بعد كم سنة وهل يوجد أحد  قدم بهذا الشهر وشنو الصار ويا 
 مع دعواتنا للجميع بتسهيل الأمور بإذن الله

[Msc -pharm]

الاخت msc >> ماكو أي امتيازات .. فقط تحضرين قصة تهديدك بالعراق + سبب رغبتك بمغادرة الامارات .. بمعنى توضحين للمنظمة انه ما عندك مكان امن ممكن تعيشين بي لذلك تطلبين اللجوء .. طبعا لازم تعززين كلامك بدلائل .. وخلي ببالك انتظار 3-5 سنوات .. بس ههههههههه اهلا بيك واذا احتاجيتي اي مساعدة اني والاخوان الباقين موجودين .ع فكرة الافضل تسرعين بالتقديم لان السوريين هنا دا يقدمون باعداد كبيرة جدا ودا يزدادون يوم بعد يوم .

شكرا جزيلا اخي المهندس الزورائي ،وماشاء الله المدة سريييعه جدا ههههه الله يقدم مابيه الخير النه وللجميع ان شالله

[حبيبي العراق]

الاخت مس فارم
يتطلب الموضوع قصة تهديد والمستمسكات وعقد الزواج واذا  توجد شهادات تخرج ومثل متفضل الاخ المهندس الزورائي الشغلة تطول  وتاخذ وقت من ٣ سنوات واكثر .
الاخت هديل الزبيدي  اختي العزيز لسة الدرب طويل لان فعلا اكو ناس مقدمة ب ٢٠١٠ ولحد الان محد مخابرهم بس نصيحة لله دائما راجعيهم وبينيلهم انه انتي فعلا محتاجة للسفر يعني لازم كل شهر تراجعيهم واي مستجدات لازم تخبريهم من تغير اقامة او تمدديها او طفل جديد او  اي حدث يحدث وياج من ناحية العمل لازم تنطيهم علم .اتمنة ان اكون فدتكم بشي ولو بسيط .
اخوكم حبيبي العراق

[المهندس الزورائي]

عيني هديل .. اني قدمت شهر الخامس 2013 وقبل يومين راجعتهم كتلهم اشو لا حس لا خبر لا حامض حلو  .. كالوا انت فرش كلش انتظر .. يعني توقعي بعد سنة يتصلون بيكم ..والله اعلم .. اهم شي هسه لا تخلون هذا الموضوع ببالكم والتهوا بالعيشة لان الشغلة مطولة .. تحياتي

[Hadeel Alzubede]

السلام عليكم شكرا للاخوان حبيبي العراق والمهندس الزورائي على الايضاح بس ردت اسال انه دائما نسمع عن ناس طلعت بغضون سنتين شلون هاي وهل يوجد الية لتفضيل ملف عن اخر وهل توجد منظمة اسرع بالاجراءات من icmc مع التقدير

[المهندس الزورائي]

خيتي هديل  .. اللي يطلع بسرعة اكيد عنده قصة مضبوطة معززة بالاثباتات والدلائل + الحاح متواصل عالمنظمة ( اتصال بالهاتف , ايميلات ,, مراجعة للمنظمة ) + الحظ . عموما ماكو قاعدة ثابتة او معيار دقيق ممكن يعتمد عليه بمعرفة اسباب تسريع سفر البعض وتاخير البعض الاخر .. تحياتي وامنياتي بالتوفيق لك وللجميع

[Hadeel Alzubede]

 
كل عام  وجميع الإخوة والأخوات بألف خير  وإن شاء الله تتحقق كل الأماني  وألف الصلاة والسلام علي رسول الله محمد صلى الله عليه  وعلى آله وصحبه  أجمعين في يوم ميلاده العظيم
 
 أشكرك أخوية العزيز المهندس الزورائي على هذا الجواب الوافي و الله يصبر الجميع ويسهل عليهم  .

[المهندس الزورائي]

 هديل لا شكر على واجب .. اهم شي لا تهملون الموضوع .. دائما راجعوا المنظمة وذكروهم .. وممكن تضيفون حالة معينة او دليل معين تعتقدون انه يفيد قصتكم .. تحياتي

[ابو غربة]

شكرا الك أخي أور أكد ولاخوية البابلي على الرد والتشجيع بس واحد روحه طكت والمشكلة واحد خال أمل جبير على هذا الموضوع  بس يا اخوان ما يتحرك الموضوع  واحد شيسوي  حيرة  اتمنى من الله ييسر الكم والنا وتكمل معاملاتكم باسرع وقت وشكرا مرة ثانية على ردكم وبارك الله بالطيبين

[ساكور]

اخواني أخواتي المتواجدين في الإمارات والي دينتظرون مواعيد السفر لا خبر لاجفية تواصلو اخواني بالأخبار شكو ماكو ربي يسهل أمورا لجميع

[المهندس الزورائي]

السلام عليكم .. اليوم كنت عند المنظمة وقابلت الست مي .. كالت احنه شغالين بجماعة 2011 بس المشكلة السوريين كلش هواية وظروفهم اصعب من ظروفكم ! اني كتلها طيب مو لازم حسب الاسبقية كالت أي اكيد ( جوابها مكان مقنع ! ) . المهم كتلها ترة اكو جماعة بدوا ييأسون بسبب طول المدة كالت المستعجل افضل اله يروح للاردن او لتركيا لان هناك سنة ونص يطلع بينما هنا من 3-4 سنوات ! المهم اني هم بقيت اقرالها اليتيمة على وضعي وعلى وضع الباقيين كالت الله يقدم اللي بيه الخير واحنه هم دا نشتغل مكاعدين بس العدد كبير ولازم تعذرونه .. وابوكم الله يرحمه .. ولو بيتنا قريب كان جبتلكم حمص وزبيب ...

[حبيبي العراق]

أخوان اليوم رحت للمنظمة وقابلت عبد السلام  وحجالي نفس المقتل مال الاخ الزورائي وكال اكو ناس بالسجن ودنتابع ملفاتهم وطبعا قبل سبع اشهر هم كال اكو ناس بالسجن (يعني مسفرين لاغين اقاماتهم ومخالفين) ومتعرف الكلام الصحيح وين . ومدام مي كالت اللي مستعجل  واريد انقل ملفة للاردن او تركيا او ماليزيا ماعندي مانع . كتلها عمي على كيفك ويانة ترة ملينة من الصبر  كالت والله احنا عددنا قليل والاعداد اللي تجينا كلش كبيرة واني طلبت زيادة الموظفين لان م عام بنلحق .

اخوكم حبيبي العراق

[المهندس الزورائي]

مر شهر على اخر مشاركة وماكو اي تعليق ! وينكم جماعتنا ليش مختفين ؟

[الصحفي العراقي]

السلام عليكم جميعا
لكل من يعرفني ولكل الاعضاء الجدد اهلا بكم ، ونتمنى من الله ان يوفق الجميع وان يقرب الفرج ويوسع الارزاق
اما بعد،
قد يكون ما سأرويه طويلا لكني متأكد انه لن يكون مملا للذين يبحثون عن اجابات عن قضاياهم او من يبحثون عن امل للتشبث والهروب من الواقع المرير الذي نعيشه في هذه الايام.
قصتي تعود الى عام 2007 عندما شاع خبر في الامارات... ان الامم المتحدة ستقوم بفتح مكتب للموفوضية السامية لشؤون الاجئين في ابوظبي وبعد وقت قليل سارعت للذهاب الى ابوظبي لتقديم الاوراق الثبوتية للحصول على حق اللجوء، خاصة واني من الصحفيين الذين تعرضوا لعدد من عمليات التصفية الجسدية المدروسة والمقصودة والجميع على علم بما حصل في العراق في عام 2006 وحتى يومنا هذا.

في يوم 11-03-2007 توجهت الى ابوظبي وبعد سؤال وبحث وجدت مكتب الامم المتحدة وهو موصد الابواب، حاولت الدخول او التحدث الى احد من الموظفين وبعد انتظار طويل، اطل السيد عبد السلام من الباب وقال ان مكتب الامم المتحدة غير فعال في هذه اللحظة ولا يمكن استلام اي طلبات باليد او اجراء اي مقابلات او توفير حماية، واعطاني ورقة صغيرة مكتوب فيها رقم الفاكس واسم المنظمة وقال " ارسل لنا قصتك عن طريق الفاكس"
عدت من حيث اتيت اجر اذيال الانكسار والخيبة ولكني بالفعل وفي نفس الليلة كتبت قصتي بشكل كامل وشرحت الظروف التي دفعتني الى مغادرة العراق وتركي لعملي ، اعتقد ان اغلب الناس غادروا العراق لنفس الاسباب
في يوم 12- 3- 2007 قمت بارسال طلب اللجوء عن طريق الفاكس ووردني اتصال من السيد عبد السلام باستلام القصة وطلب مني الانتظار حتى النظر في ملف القضية ...انتظرت لايام واسابيع واشهر ولم يأتي رد، قررت ان اندمج في الواقع وان لا اعول على شيء قد يكون شبه مستحيل في هذه الحالة
في يوم 24-8-2009 جاءني اتصال هاتفي من السيد عبد السلام يبلغني ان مفوضا من لجنة الامم المتحدة سيكون موجودا في ابوظبي بعد اسبوع وانا من ضمن مجموعة من الناس سيقومون بمقابلتهم لاستلام القصة بشكل رسمي وان ما بعثته عن طريق الفاكس عام 2007 ضاع واختفى
لا اخفيكم مشاعري ، فرحت كثيرا واحسست ان ابواب الفرج فتحت ، تشجعت وانطلقت مع زوجتي الى ابوظبي يوم 10-9-2009 وكنا اول الواصلين حتى قبل موظفي المنظمة، وخلال الانتظار التقيت مجموعة طيبة من الناس اغلبهم اعضاء في هذا المنتدى الرائع الذي انتمي اليه بكل ما تحمله الكلمة من معنى
 دخلت المقابلة التي استمرت 4 ساعات قام من خلالها المفوض بكتابة قصتي وروايتي واسباب خروجي من العراق ، وكان هذا الشخص لطيفا مؤدبا لكنه لم يكن يتفاعل مع ما اقوله ، بل يكتب كل ما اقوله من دون تردد ويحاول ترتيب الاحداث كما ارويها له، ولاني كنت اعمل في المجال الاعلامي سألني في نهاية اللقاء " هل لديك اي اعتراض لو قامت الامم المتحدة باعادة توطينك انت واسرتك في الولايات المتحدة الامريكية ؟"
فقلت لا ليس لدي اي اعتراض
رد علي الموظف بان السيد عبد السلام سيتواصل معي خلال الايام المقبلة
بالطبع لم يكن لدي اي اعتراض ، انهيت القاء وخرجت وانا منهك القوى وعدت من حيث اتيت وكان الامل كبيرا خاصة وان الموظف كان مقتنعا بما سمعه مني من حقائق ودلائل موثقة بالاوراق والاثباتات
بعد اسبوع اتصل بي السيد عبد السلام ليزف الي خبر قبول طلب اللجوء لدى الامم المتحدة ، لكنه اكد ان العملية ليست بسيطة وستحتاج الى وقت حتى الوصول الى نقطة المغادرة
لم يكن في معلوملي ان الامر سيكون بهذه المشقة ،

في شهر 11 تشرين الثاني اتصل بي عبد السلام وابلغني ان جماعة من منظمة تركية سيكونون مسؤولين عن ملفي لدى الامم المتحدة ويجب علي مقابلتهم، واعطاني موعدا بعد اسبوع للقدوم الى ابوظبي
في منتصف شهر 11 تشرين الثاني من عام 2009 ، التقيت بمنظمة ICMC التركية وقمت باعادة قصتي بشكل كامل دون انقاص او زيادة ، وقام الاعضاء في المنظمة بسؤالي عددا من الاسئلة التي كنت قد ذكرتها في مقابلتي السابقة مع مفوض الامم المتحدة
لم يكن الامر سهلا اذ كان علي ان اتذكر التفاصيل الدقيقة التي كنت قد رويتها قبل اشهر، لكن وبفضل من الله تعالى كان كل شي في مكانه ، التقط الموظف صورا لي ولزوجتي وكنا اخر الذين قابلتهم المجموعة التركية قبل سفرهم بساعات
غادرنا ابوظبي ليلا بعد انتظار طويل ولا اخفيكم التعب الذي اصابنا انا وزوجتي ولولا تقدير العزيز الجليل لكنا في عداد الاموات بعد ان غفونا في اثناء القيادة على الطريق
مرت الايام والاسابيع والاشهر ولم يتبين اي خبر لا من الجماعة التركية ولا من مكتب الامم المتحدة في ابوظبي وكنت على تواصل دائم معهم من اتصال هاتفي الى زيارة الى مكتب المفوضية كل اسبوع تقريبا

في عام 2010 وبعد ان اختفى الامل وتلاشت الفرحة وفي شهر رمضان بالتحديد وردني اتصال من السيد عبد السلام من مكتب الامم المتحدة يبلغني بحضور المحلفين الامريكيين الى ابوظبي وانهم حددوا لي موعدا لمقابلتهم ، توجهنا الى ابوظبي وقد عادت البسمة بشكل بسيط الى مخيلتي والحلم الذي اطارده منذ سنوات اصبح قريبا
زوجتي كانت حاملا بطفلي الذي لم يولد بعد وكان من الصعب ارهاقها بمثل هذه المسافة بين الشارقة وابوظبي، ولكن ما باليد حية حتى لا يذهب انتظارنا سدى ، توجهنا الى مكتب الامم المتحدة وسط مجموعة كبيرة من الحشود تفترش "الكرفان" والجميع قلق من المقابلة مع المحلفين ،
مالذي يخيفني ؟
قصتي حقيقية وليست من نسج الخيال، اوراقي كاملة وليس فيها نقصان، اثباتاتي قطعية ولا تقبل الشك او الجدل
لكني كنت مرعوبا من الدخول ومواجهة شخص يحاول تكذيبي باي شكل من الاشكال
المحلفون كانا رجلا وامرأة ، والمصيبة ان كل من يخرج من المقابلة يقول ان الرجل هو الاسوء والمرأة افضل منه بكثير، دعوت ان تكون من حصتي تلك المرأة ( المحلفة الامريكية) عسى ان تشملني بعطف بعد ان تعرف المدة التي انتظرتها وان تتعرف على حقيقة قصتي
صدقت دعوتي ، وكنت من نصيب المرأة ، لكن قبل الدخول كان يجب ان يأخذوا نسخة من بصمات الاصابع وبصمة العين وكان الرجل الذي يأخذ هذه البصمات هو نفس الرجل الذي اكد الجميع انه بلا رحمة ولاشفقة ولا يقدر اي معلومة مهما كانت صحيحة، انا وجدت العكس ، وعرفت ان المرأة هي الاصعب قبل حتى ان ادخل الى غرفة التحقيق
الرجل وانا تحدثنا اثناء عملية مسح البصمات عن الحياة في الولايات المتحدة وعن الحرب في العراق وعن نظام الحكم والطريف في الامر انه كان متأكدا اني ساكون هناك في القريب العاجل لما لمسه مني ثقافة متواضعة ولغة متواصلة وشغف للعيش بعيدا عن الظلم والقهر والقتل
دخلت وكانت المحلفة تجلس على طاولتها وهي تنظر الي باسحتقار وتجلس الى جانبها مترجمة من اصل اردني ( لا تفقه في اللغة الانجليزية الا بعض الكلمات مثل "يس" و "نو" yes , no  )
لا يهم ، العزيمة موجودة ورب العالمين فوق كل ظالم ونحن في ايام شريفات من شهر رمضان
كنت صائما ،
المحلفة : هل انت صائم ؟
اجبتها : نعم ،
وانهالت علي بالاسئلة وانا اجيبها بصدق وثقة حتى وصلت الى سؤال عن اليوم الذي تعرضت فيه لحادث التهديد عام 2006
المحلفة : في اي يوم تعرضت للتهديد ؟
الجواب : تعرضت لعدد كبير من التهديدات لكني لم اعر لها اهمية من قبل حتى قتل ما لا يقل عن 15 صحفيا من اصداقي في التاريخ الفلاني ( وذكرت التاريخ الذي لن انساه) لكني لا اتذكر في اي يوم استلمت تهديدا وماذا كان ذلك اليوم
النجاة في الصدق ... لكن الحقيقة ان الصدق لا يعمل في مثل هذا المكان ، كنت صادقا عندما اخبرتها ان لا اتذكر تاريخا حدث قبل اكثر من اربع سنوات كانت مليئة بالنكسات والصعوبات، في العراق كل يوم الف قصة والف حادثة والف قتيل ومفقود، من يتذكر ماذا كان يرتدي عندما تعرض للتهديد ؟
ربما مجموعة قليلة انعم الله عليهم بذاكرة قوية في حين ان الاغلبية لن يتذكروا ما فعلوه قبل اسبوع
المحلفة عرفت نقطة الضعف ، واخذت تضرب على هذا الوتر
التواريخ ... وكانت جميع اسألتها عن التواريخ عرفت انذاك انه لا امل لي
وقلتها بصراحة " لا  اتذكر التواريخ التي لم اعر لها اهمية ، اتذكر فقط التواريخ التي غيرت مجرى حياتي ، مثالها ما دفعني الى مغادرة العراق ، بالساعات والدقائق لكني لا اعلم عن حوادث كانت تصيبني كل يوم "
المحلفة قالت : انتهت الاسئلة
خرجت من الغرفة والرجل ( المحلف الاخر ) كان ينتظرني بالخارج وهو مبتسم ... " لا تقلق ستكون نهاية العام هناك في امريكا وسادعوك الى لعبة كرة القدم الامريكية مع اولادي "
ولكن لما رآني وقد اختفى كل بصيص امل عني ، غضب وتوجه الى غرفة المحققة وقال انتظر هنا ولا تخرج
انتظرت وبدأت اسمع صراخا وجدالا بين المحلف والمحلفة ، كان محور الحديث (قضيتي) وخرج الرجل بقوة من الغرفة ودعاني الى الرجوع الى الغرفة مرة ثانية وقال للمحلفة اسئليه امامي.. وكان يمسك ملفي الخاص
تفاجأت من طريقة كلامه معها وكانت ترتجف منه خوفا
قال لها " من يتذكر تاريخا سخيفا مثل هذه التواريخ التي بقيتي تسأليه عنها؟"
اسأليه عن اشياء مهمة ... مثلا هل شارك في قتل مجموعة من الناس ؟
هل كان يعلم شيئا عن اسلحة الدمار الشامل ؟
هل شارك في اي حملة للابادة الجماعية
قال لها : " نحن بشر ، ويجب ان نتعامل معهم على هذا الاساس "
وقال انا ارغب ان اعطيه موافقتي للقدوم الى امريكا
احسست بفرحة ، سبحان الله ، شخص لا يعرفني دافع عني بهذه الطريقة امام امرأة من ابناء جلدته ، اين انا ؟
المحلفة بقيت صامتة ولم تتحدث
طلب المحلف مني المغادرة والانتظار خارج المبنى ليعلموني بنتيجة القرار
انتظرت ساعات طوال ، وبعدها تم استدعائي من قبل السيد عبد السلام
نعتذر منك " لكن قرار المحلفين كان متناقضا ، يعني ان المحلفة كانت غير مقتنعة والمحلف كان مقتنعا ... القرار هو " تم رفع الملف الى اشعار اخر بصفة " انتظار " )
قلت له هل انا مرفوض ؟
قال : لا
فقلت له : هل انا مقبول ؟
قال : لا ، انت بين القبول والرفض
ضحكت من كل قلبي على مفارقات الحياة التي تلاحقني اينما ذهب
بعد هذا اليوم بقيت استفسر عن حالتي مع المنظمة التركية ، ولا اعلم المدة التي سيأخذها القرار النهائي بالقبول او بالرفض وبقيت معلقا بين الحانة والمانة
في منتصف عام 2011 رزقت بطفل والحمد لله وفي شهر تموز اتصلنا بالسيد عبد السلام نبلغه باننا نود اضافة طفلنا الى الملف وبهذا نكون قد ابلغنا الامم المتحدة كل التطورات
في شهر 9 – ايلول اتصل عبد السلام وقال ان المحلفين سيأتون الى ابوظبي قريبا ولديك موعد للمقابلة معهم لمعرفة نتيجة القرار واضافة الطفل
بالفعل ذهبنا وهذه المرة ابني كان يرافقني مع زوجتي، دخلنا الى غرفة المحققة وكانت في روضة في ابوظبي واعدت نفس الحكاية مرة اخرى ، ثم ردت علي المحققة ان القرار ما زال معلقا وسيبقى الحال على ما هو عليه

بعد هذا اليوم، قررت ان اقطع الامل بشكل كلي واخذت المسألة بطيب خاطر ، تجربة ومرت وليس منها نتيجة
واختلفت حياتي وتغيرت الاحداث وتطورت اشياء حتى وصلنا الى قرار الانفصال بيني وبين زوجتي ولست في حال لذكر الاسباب
وكان يوم الطلاق الرسمي 29-12-2013
وبعد اسبوعين في يوم 16-1-2014 ، وصلتني رسالة على البريد الالكتروني مفادها
" لقد تم قبول قراركم ، الرجاء التوجه مع اسرتك لاجراء الفحص الطبي في ابوظبي "
لا اخفيكم الخبر ، لن اكذب على احد ، اتصلت بالسيد عبد السلام وابلغته بانفصالي عن زوجتي فهل سيكون علينا اجراء الفحص الطبي ام لا
عبد السلام : نعتذر ، سيتم الغاء الملف والقرار ، لان القرار كان للعائلة وليس لشخص واحد وطلب مني ارسال وثيقة الطلاق المصدقة
شكرته بهدوء وابلغته ان الامر لم يعد يعنيني بالمرة ومهما كان القرار فانا لست بمهتم ووعدته بارسال الورقة
انهيت المكالة واكملت مشوار حياتي
في يوم 14-3-2014 وردني اتصال من رقم غريب ، وكان الاتصال من المنظمة التركية يبلغوني انهم استلموا ورقة الطلاق التي كنت قد ارسلتها الى الامم المتحدة
وقالوا ان هناك قرارا جديدا بفصلك في ملف على حده عن زوجتك وطفلك ويمكنك اجراء الفحص الطبي يوم 17- 3-2014 في ابو ظبي
ذهبت واجريت الفحوصات الطبية ولا اعلم كم من الوقت سيستغرق حتى يبلغني احدهم بالتحقيق الامني وموعد السفر
اتمنى منكم خالص الدعاء والتوفيق للجميع
اتمنى ان لا اكون قد اطلت بالملل وازعجت راحة بالكم
لكن ما قلته كان حقيقة وليس من نسج الخيال
انا صابر حتى موعدي والله هو العالم ان كنت سأذهب ام لا
اودعتكم في رعاية الله على وطن ليس بوطن وبلد ليس ببلد
ودعوت لكم مثل ام تتمنى عناق الولد

اخوكم الصحفي العراقي
دبي -19-3-2014

[كنداوية]

اخي الفاضل الصحفي العراقي ..
كم آلمتني قصتك واحزنني الظلم اللذي ذبذب حلم سفرك لوطن بديل يعوضك  سنين الشقاء وعدم الاستقرار ولكن هذه هي الحياة التي يعيشها اللاجيء ولا يفهمها الا لاجيء مثله ,كنت اتمنى لو غابت عن قصتك سطور طلاقك بزوجتك ,والحمد لله على كل حال ولا نملك الا ان ندعي  لك بان يأجرك الله على قدر صبرك وشقاءك وتعبك ويرزقك السفر القريب العاجل لكي تطوي هذه الصفحة  وتبدأ حياة جديدة  ..

بالتوفيق ان شاء الله

[الصحفي العراقي]

الاخت الفاضلة كنداوية

الشكر موصول لكل من تفاعل مع ما كتبته من موضوع قد يعيد الامل الى قلوب ناس اصبح اليأس ديدنهم...
كلماتك اللطيفة والدعاء هما اكثر ما يهماني في هذا المكان وهذا الزمان

ونتمنى التوفيق للجميع


اخواني واخواتي ... الرجاء الرد في حال العلم عن هذا السؤال

ماذا بعد اجراء الفحص الطبي ؟؟
الامنية؟
موعد السفر؟

وكم برأيكم تستغرق المدة ؟

[ابو غربة]

اخي الصحفي العراقي  اني كلت ما ادخل بعد هنا لان الاخوة هجروا هذا المنتدى الجميل الذي كان ينبض بالحياة ولكن لم استطع قلت لنفسي امر بين الحين والحين علني اجد احدا يعيد الحياة اليه والتواصل ولما رايت قصتك وقراتها حزنت لانتظارك الطويل ولكني ايقنت في نفس الوقت ان الله معك وسيكافئك على صبرك ارجو لك ولعائلتك الموفقية أما بخصوص الامنية فحسب علمي المتواضع ومن خلال  متابعتي للاخوة في المنتدى فاعتقد اذا لم يكن هناك شيء فهي مسالة اشهر ويطلعلك السفر اذا شاء الله يعني بلكي قبل ما تخلص هاي السنة وتفرح وتخلص من هاي الدوامات تحياتي لك واني اخوك صارلي من 2010 بعد ما طالعلي توطين بس على التسجيل وننتظر والله ارحم الراحمين ما عدنا غير التوكل والصبر

[المهندس الزورائي]

اهلا وسهلا بصديقنا الصحفي ,, حضرتك حركت الجمود بالكروب والمستمر منذ شهر ونصف بقصتك المؤثرة . خالص الامنيات لك بالموفقية والنجاح . فيما يخص استكمال باقي الاجراءات فلا احد ممكن ان يفيدك بمعلومة دقيقة ,, فالموافات الامنية قد تتم بغضون شهرين او قد تطول الى سنين ! امنياتي لك ان يقف الحظ معك هذه المرة لتنتهي معاناتك باسرع وقت ممكن  باذن الله ..

اخوك المهندس الزورائي / ابو ظبي

[may1]

السلام للجميع
اخوية 
بالنسبة النا سافرنا بعد الدورة التثقيفية ب شهرين
انت الحين تنتظر اتصال من الاتراك بحضور دورة لمدة يومين او 3
وبعدها اتصال اخر بالسفر
اعتقد لازم تنتظر اشخاص من تركيا يجون لعمل الدورة ويحاولون يجمعون عدد كبير من العوائل للدورة

اخوان اذا احد يعرف شئ عن الاخ سباركي sparky
لان من فترة طويلة واخبارة مقطوعة وايظا الاخ اليوسفي وشكرا

[ABUDHABI]

 السلام عليكم شلونكم اهل الامارات شخباركم طبعا اني يمكن اقدم واحد بيكم اني مخلص كلشي بشهر 9/2011 ولحد اليوم ممسافر والسبب الامنية ممكتملة والله كريم - تحياتي

[المهندس الزورائي]

حي الله اخونه ABUDHABI ,, اكو هواية مثل حالتك .. الامنية تاخرت سنين وبعدين طلعت وسافروا .. ان شاء الله الفرج العاجل باذن الله

[العراقي البغدادي]

السلام عليكم اخوان ...بارك الله بالجهود والمعلومات القيمة ... سؤال بدون زحمة ... انا مقيم بالامارات واريد اقدم من ابو ظبي على اللجوء ... هل هناك طريقة سريعة للحصول على استمارة طالبي اللجوء من غير مانروح لابو ظبي .... مساعدتكم راجاءا 

[المهندس الزورائي]

صديقي العراقي البغدادي . اعتقد لازم تحصل الاستمارة باليد لانها تكون مختومة بالظهر  .. تحياتي

[سالم سالم]

السلام عليكم اختي ممكن اعرف في يو ان الامارات ياخذون الجوازات بعد التقديم  لو تبقى عدكم الجوازات وجكد تاخذ فترة التقديم الى ان يحين السفر وشكرا

[المهندس الزورائي]

حبيبي سالم ( وان شاء الله دوم سالم غانم ) .. لا طبعا ما ياخذون لا جواز السفر ولا اي شي ثاني .. بس ياخذون نسخ مصورة .. اما الفترة فماكو احد ممكن يخمن .. بس عموما من 3-5 سنوات .. بس!

[العراقي البغدادي]

تحياتي اختي العزيزة وشكرا للجهود الحلوة ... اني في مرحلة اعداد القصة بدون زحمة ولأاخواني اللي في البيج اريد اعرف اي معلومات بسيطة من خبرتكم بخصوص ترتيب القصة والتواريخ هل بطريقة السرد ام على شكل نقاط وفصول مدااعرف شلون ...نصيحتم

[العراقي البغدادي]

صديقي  المهندس الزورائي  اسعفني شلون ارتب القصة 

[المهندس الزورائي]

حبيبي الغالي ( العراقي البغدادي ) .. اذكر قصتك بشكل سرد عادي وعفوي صادق .. كنت اعمل في مكان كذا وحصل معي كذا وكذا بتاريخ كذا فاحسست  بكذا لذ فعلت كذا بتاريخ كذا و...... الخ ,, يعني احكي قصتك كما هي وبالتسلسل . طبعا الافضل ان لا تذكر تواريخ كثيرة لانك قد تنساها مستقبلا مما يؤثر على مصداقيتها . النقطة الاهم هي الصدق حتى تتجنب رفض القصة لا سامح الله .. كذلك تجنب الخوض بتفاصيل غير مفيدة لانها قد تجرك الى اسئلة متشعبة انت فب غنى عنها .. مع امنياتي لك بالتوفيق

[العراقي البغدادي]

جزاك الله خير الجزاء ... سؤال اخر بدون زحمة ... كيف اشير للمستندات والوثائق المرفقة اثناء سرد القصة .. وهل برأيك  كتابة القصة بالعربي راح تأثر بشكل غير مباشر خلي انكول على موضوع الموافقة او عدم الموافقة على الطلب  ... لان كتابة القصة بالعربي تعطيك حرية اكثر للتعبير وايصال الفكرة

[المهندس الزورائي]

1- ماكو داعي تشير للمستندات .. هم يعرفون كل ورقة شنو معناها . . او ممكن مع السرد تذكر عبارة ( وكما هو مرفق ) . بالمناسبة ترة هم مفتحين باللبن يعني يعرفون كلشي وكل صغيرة وكبيرة .
2- المهم تكون القصة مفهومة .. وبما انه بالعربي راح توضح قصدك بشكل افضل اذن فلتكن بالعربي .. اول تالي راح يترجموها للانكليزي .
3- تحياتي

[العراقي البغدادي]

هل موضوع إذا كان موضوع احد الأقارب أو الأب كان ضابط في الجيش له تأثير على موضوع اللجوء ... أرجو الإيضاح والمساعدة ..... سؤال آخر بدون زحمة هل عملية التقديم للجوء راح يأثر بالمستقبل عل اي عمل تأشيرة  ???فيزا أريد اقدهمها لأي دولة بالعالم

[العراقي البغدادي]

اخوية المهندس الزورائي اسعفنا بجواباتك

[المهندس الزورائي]

1-موضوع الضابط يعتمد على طبيعة عمله وموقعه ودرجة قرابته لحضرتك .عموما .. هم يتحرون بشكل مكثف عن صاحب طلب اللجوء وعائلته وما يهتمون كثير باقاربه الا اذا كانوا خطرين فلازم بهذه الحالة تنفي أي علاقة لحضرتك بيهم .
2- اكيد عملية اللجوء راح تاثر على أي فيزا تطلبها .. لذلك الافضل عدم ذكر الموضوع عند التقديم لاي فيزا مستقبلا .
3- تحياتي

[ابو غربة]

أحبائي شو سنطة كلشي ماكو وينكم الطيبين ماكو اخبار مفرحة منو يعرف اخبار احبتنا اليوسفي سباركي واور اكد وكل الرائعيين في هذا المنتدى الثر بمعلومات واحباء سلامي للاخ الزورائي وزنداوي وينكم اني بعدني انتظر الاستيطان وماكو خبر لهسة

[المهندس الزورائي]

حياك الله ابو غربة .. اي والله سنطة وماكو اي اخبار جديدة .. مع الامنيات بالتوفيق لكم وللجميع

[alzandawi]

تحيه  طيبه  إخواني بلمنتدى وأخص الأخ أبو غربه احنه ماكو لا حس ولاخبر على آليو أن بالإمارات  فشسوينه اخذنه فيزه وطلعنه ومناك قدمته لجوء  ودانتظر  مقابله وادعولنه الله يسهل أموره  واكلكم  بس اني والأطفال طلعت  اختكم زوجه الزنداوي

[ابو غربة]

الله يسهل امرك اخوية العزيز وان شاء الله مقبول مقدما اخوية الزندواي جنت تغمرنا باجوبتك التي تعطينا المعنويات وهسة من حقك علينا ندعيلك بالتوفيق ياوردة ربي يحميكم وين ما جنتو ويبلغكم احلامكم ان شاء الله
تحاياتي لاخوي الزورائي ان شاء الله الله ما ينسانا

[bmba]

السلام عليكم,

احنة قدمنا قبل 3 سنين و قبل 3 اشهر خابرونا علمود مقابلة بال ICMC ابوظبي و ورة شهر سوينا مقابلة وية المحلفين, بس بعد اسبوعين دزولنة رسالة انو ال case لح يؤجل لزمن غير محدد فهل هذا شي طبيعي و اكو ناس ويانة دزولهم نفس الرسالة بس رادو فحص دم , هسة بس اريد اعرف مطولة السالفة لو لا و التأجيل يعني على الاغلب لا؟

و شكرا......

[alzandawi]

تسلم  أخي الفاضل أبو غربه واشكرك على الدعاء واحنه بأمس الحاجه للدعاء بارك الله بيك والله يسهل أمورك ويقدملكم كل الخير واحنه شتحتاجون ونكدر عليه منقصر أن شاء الله

[سوبرمان بغداد]

الله يوفقك اخويه الزنداوي. انشا الله الامور تمشي بخير

[uae123]

سوبرمان بغداد شلونك شنو صار وياك بالنسبه الي أخذت الكرين وراح يصيرلي سنتين بس بصراحه اخر السنه راح ارجع لان بعد مليت من الكعده  بس زوجي جاي يدرس ماجستير هسه الحمدالله شنو اخبار سباركي

[المهندس الزورائي]

السلام عليكم حبايبنا الاعزاء .. شلون ما لونكم .. شخباركم ..
الاخ العزيز alzandawi ,, عاشت ايدك وخوش سويت .. هذا احسن حل .. اني بعثتلك رسالة عالخاص اتمنى تقراها .. مع الامنيات بالموفقية لكم باذن الله .
الاخ العزيز ابو غربة .. انساك ؟ ده كلام ؟ ههههههههههههه حياك الله مستاقين واتمنى اسمع اخبار حلوة منكم عن قريب ان شاء الله
الاخ الغالي bmba انتوا مخلصين الامنية لو بعدكم . اذا مخلصين ما يطول الانتظار .. اذا لا فماكو كائن حي عل وجه الكرة الارضية يكدر يخمن الوقت ! تحياتي
الاخ سوبرمان بغداد .. بما انه انت سوبر مان تكدر اطير لامريكا شوكت ما يعجبك ولا لجوء ولا هجرة ولا بطيخ ههههههههه حياك الله
الاخت uae123 خالص التهاني والتبريكات بمناسبة حصولكم على الكرين كارد .. بس ليش ترجعين وليش الكعدة .. يمعودة توكلي على الله ودرسي .. واذا مالج واهس دوري على شغل ولهي نفسج .. طبعا اعرف الشغل مو سهل يتحصل بس مع الاستمرار بالبحث تلكين ان شاء الله

[bmba]

بس لو تقدر شنو قصدك بالامنية؟

[alzandawi]

الله يخليك ويوفقك أخي الكريم سوبرمان  شكرًا لكلماتك الجميلة

[المهندس الزورائي]

الاخ bmba / الامنية يعني الموافقات الامنية مكتملة لو لا ؟ تحياتي

[سوبرمان بغداد]

السلام عليكم uae123

اني قدمت عل greencard صارلي شهرين. ممكن اعرف شكد اطول المعامله؟؟

و مبروك greencard هذه خطوه ممتازه

[alzandawi]

ذا المعاملة مابيه خطا ومدزولك رساله يريدون أشياء جديده أن شاء الله قريبا تستلمه أخ سوبرمان بغداد

[uae123]

السلام عليكم uae123

اني قدمت عل greencard صارلي شهرين. ممكن اعرف شكد اطول المعامله؟؟

و مبروك greencard هذه خطوه ممتازه

انا اخذتها ورى ثلاث شهور من تاريخ البصمة هما يحسبون بس زوجي بعده ما اخذها صارله خمس شهور هسه

[عراقي عراقي]

السلام عليكم اخوان ..اريد اعرف شلون اكدر احصل على عقد عمل بالامارات ....واكدر اقدم لليوان في الامارات اذا دخلتلها بفيزة سياحة ..لو ما اكدر ولكم فائق الشكر

[المهندس الزورائي]

حبيبي ( عراقي عراقي ) .. حصولك على عقد عمل وانت خارج العراق غاية في الصعوبة .. ممكن تجي للامارات بفيزا زيارة وتبحث عن عمل مع بقاء الصعوبة في ايجاد عمل وهو امر يعتمد على نوع تحصيلك الدراسي وخبرتك ومعارفك وشطارتك . التقديم لل يو ان في الامارات يشترط ان تكون حاصل على اقامة وليس فيزا .. مع التحية

[عراقي عراقي]

اشكرك اخي مهندس زورائي ...يعني اذا اوصل للامارات ...فشتنصحني وين اروح وين اكدر الكة عمل ....لان بصراحة مااعرف احد بالامارات ...بس الله .....ووجوهكم الطيبة ...لان وضعي بالعراق حيل صعب ....واشكركم مجددا ...اخوتي العراقيين

[حبيبي العراق]

اخي العزيز (عراقي عراقي) اهلا وسهلا بيك وياريت تذكر مؤهلاتك العلمية وعمرك وخبرتك وان شاء الله اللي نكدر عليه منقصر وياك.
ومثل متفضل الاخ الزورائي متكدر تقدم على اليو ان بدون اقامة .

اخوك حبيبي العراق

[عراقي عراقي]

السلام عليكم اخواني اني مهندس زراعي خريج سنة 2000 وعندي خدمة في امانة بغداد مدة 8 سنوات ....وعضو في نقابة المهندسين الزراعيين بعنوان مهندس متمرس ...واني اريد اعمل مو بشرط بشهادتي اي عمل في الامارات ....ولكم جزيل الشكر ......

[المهندس الزورائي]

حبيبي عراقي .. اذا ما عندك معارف لازم تسوي اعلان طلب عمل بجريدة الوسيط وبال gulf news وبجريدة الاتحاد وبجريدة الخليج + تقرا بشكل يومي اعلانات طلب الظائف بنفس الجرائد اللي ذكرتها + تلف على شركات المقاولات وتخلي السي في مالتك عند السكرتارية .. مع التحية

[uae123]

اخويه عراقي اكو شركه معروفه عندنا ابوظبي خاصه مال لاند سكيب اسمها شركة المقاولون الخليجيون حاول. اتجيب رقمها من النت او الأميل وادزه الهم وإنشاء الله خير

[المهندس الزورائي]

ما شاء الله الاخت uae123 خبرة بالامارات وتعرف هواية شركات .. تحياتي

[محمد الجراح]

السلام عليكم .......تحية طيبة للجميع 
أرجوا  مساعدكم حول كيفية  العمل والاستقرار في الامارات  والتقديم للهجرة عن طريق يو ان ...
حيث اني حاصل على شهادة ماجستير بعلوم الفيزياء واخويه حاصل على ماجستير بهندسة الميكانيك وعدنه ممارسة وخبرة بمجال التكيف والتبريد  ...فأذاا اجيت لللامارات  ماهي افضل أمارة الواحد يستقر بيه بحيث يلكه شغل بسرعة ؟ واذا اجيت بفيزة سياحية اكدر اقدم على لجوء من يو ان بحيث احصل على اقامة بصفة لاجء ؟

مع التحية

أخوكم
محمد
العراق - أربيل

[المهندس الزورائي]

اخوية العزيز محمد الجراح .. ردي لحضرتك هو تماما نفس ردي للاخ عراقي عراقي ..اما بخصوص الامارة فماكو امارة مفضلة على الاخرى لان الرزق ما ينعرف وين . ماتكدر تقدم لجوء الا اذا كنت حاصل على اقامة وليس فيزا زيارة .. وماكو شي اسمه اقامة لاجئ .. وعموما ما انصحك بموضوع اللجوء من الامارات لان يستغرف من 4-6 سنوات ..  تحياتي

[ABUDHABI]

الاخ عراقي عراقي

هذا رقم شركة المقاولون الخليجيون ( GCC ) شركة المقاولون الخليجيون ذ.م.م

 صندوق بريد :94574

العنوان : ابوظبي -  شارع إلكترا - خلف معرض هوندا

برج رقم 3 - الطابق 13

 أبوظبي - الامارات العربية المتحدة

رقم الهاتف  - خابر على رقم 181 وينطوكيا

رقم الفاكس  -  خابر على رقم 181 وينطوكيا

للاخ المهندس الزراعي - اكو شركات خاصة بالزراعة اعرف منها ( شركة الريوم ) هذي تشتغل بمجال الزراعة بلكي تحصل فرصة يمهم

رقم الهاتف : 6328960-02

العنوان - ابوظبي

ملاحظة: اي رقم شركة اتريدة تخابر البدالة الي هي رقمها 181 وينطوك أي رقم شركة او شي تدور علي بالامارات مو بس بابوظبي

[المهندس الزورائي]

معلومات الاخ ابو ظبي ممتازة .. بس اعتقد اخونا المهندس الزراعي مو بالامارات فمايكدر يتصل على 181 .. تحياتي

[ABUDHABI]

 من يجي للامارات يكدر يخابرهم لان اذا هوة بلعراق ويخابرهم على شغل راح يكلولة من تجي الله كريم

[uae123]

اخويه ابوظبي انت بعدك بأبوظبي راح ارجع بأبوظبي وانت بعدك هناك شنو السالفة

[عراقي عراقي]

  اشكركم اخوتي على نصائحكم وماقصرتو ....وربي يسهل امركم ويحفظكم

[Sound of Soul]

بالتوفيق لكل الاخوة والاخوات في كروب الامارات
تحياتي .

[ABUDHABI]

العزيزة uae123 - اي والله بعدني ممسافر مع العلم أكثر الي جانو وياية سافرو وكلما اتصل عال ICMC يكولون ملفك بلتحقيق وهاي دخلت السنة الرابعة والله كريم ان شاء الله تنوريها الابوظبي من تجين - تحياتي وشكرا عالسؤال

[uae123]

العزيزة uae123 - اي والله بعدني ممسافر مع العلم أكثر الي جانو وياية سافرو وكلما اتصل عال ICMC يكولون ملفك بلتحقيق وهاي دخلت السنة الرابعة والله كريم ان شاء الله تنوريها الابوظبي من تجين - تحياتي وشكرا عالسؤال

اكو واحد خطية راح تركيا علمود بس يسال عن قضيته وهم كالوله على الأمنية راح ورجع واكو عائله ثانيه خطيه رفضوهم بعد ثلاث سنوات انتظار  بسبب الأمنية كالولهم مع الرغم أهلهم هنا انشاء الله خير

[المهندس الزورائي]

اخوية العزيز ابو ظبي .. ما تضيق الا تفرج .. اصبر وان شاء الله خير
الاخت uae123 كلشي قسمة ونصيب .. اهلا وسهلا بيكم . تنورون الامارات .. بس توصلون عازمكم عند صمد .. كباب عراقي 100 % 

[ABUDHABI]

uae123  - الله كريم ماكو باليد حيلة ميفيد وياهم حتى لو الواحد يروح التركيا نفس الجواب انتو بيا ولاية بامريكا وشوكت ناوين ترجعون للامارات الله يسهل امركم وتستقرون

[ABUDHABI]

المهندس الزورائي - اكيد ماكو غير الصبر والواحد ينساها ويعيش طبيعي وهية تجي وحدها

[uae123]

انا بولاية نيوهامشير راح ارجع اخر السنه انشالله بس أبقى ادخل كل ستة أشهر

[ABUDHABI]

انا بولاية نيوهامشير راح ارجع اخر السنه انشالله بس أبقى ادخل كل ستة أشهر

الله يسهلج عزيزتي وكل الهلا بيكم وين متكونون

[may1]

uae 123
ترجعين بالسلامة وانشالله مفتوحة بوجهج وين متكونين بامريكا او
باابو ظبي تستاهلين كل خير

[المهندس الزورائي]

السلام عليكم .. شلونكم شخباركم .. شكو ماكو .. الاثنين الفات كنت بالمفوضية .. ولا جديد 

[ABUDHABI]

سلامتك ماكو شي جديد

[alabbasu]

أنا بإذن الله رايح أبوظبي على مكتب اليو إن أقابل الست مي وأشوف شو الأخبار وبأخبركم إن شاء الله

[المهندس الزورائي]

بالتوفيق للاخ alabbasu

[المهندس الزورائي]

يا جماعة .. اريد اقدم فيزا شنغن .. شنو افضل سفارة اقدم بيها ؟ يعني احتمالية الرفض بيها قليلة ؟ وهل يسوون بصمة الي لو لا ؟

[ABUDHABI]

 البصمة موجودة بكل سفارات العالم بس نصيحة لتتقرب يم المانيا لان عندي رفض منهم قبل سنتين

اهم شي تضبط اوراقك 100% قبل متقدم

الايطاليا - الفرنسية - الاسبانية - قبرص اليونانية - حاول تقدم على هل سفارات

المطلوب - كشف حساب نازل بي راتبك 6 اشهر

كتاب من الشركة بعدم ممانعة

حجز فندقي اصلي ( يعني لازم تدفع فلوس مو شكلي ابو ال 100 درهم ) ترا تنرفض وتتندم

تأمين سفر يغطي مدة السفرة

واهم شي كشف الحساب لدخل بي فلوس هواية مرة وحدة لان مبين انت علمود دترفع رصيدك

والله يسهلك يارب

[المهندس الزورائي]

الغالي ABUDHABI  تسلم وتعيش ع النصائح المهمة .. جعلها الله بميزان حسناتك يا ذهب

[سوبرمان بغداد]

السلام عليكم

روح عل السفاره الايطاليه و سوي قبلها حجز بشركه المسعود حجز فندق و طياره بدون دفع يسموه dummy

و طبعا و يه الاوراق الي كالوا الجماعه قبل

[uae123]

السلام عليكم

روح عل السفاره الايطاليه و سوي قبلها حجز بشركه المسعود حجز فندق و طياره بدون دفع يسموه dummy

و طبعا و يه الاوراق الي كالوا الجماعه قبل

اسهل شي هي فرنسا انا سافرت على فرنسا وسويسرا سنه 2009 بس قدمت حجز الفندق والطيران بوقتها مو اصلي بس صار اكو طبع أصابع ترى قبل ما كان اكو هسه صار بيها طبع أصابع  لما رحت على السفاره الفرنسية كانت الأقل شي بالحساب لازم 30 الف درهم اكو وحده لبنانيه اسمها مي هي كالتلي هيجي حاول اتقابلها هي لا تروح عند الفرنسية وإنشاء الله خير

[alabbasu]

بخصوص اللجوء في أوروبا أفضل موقع يساعدك في ها الموضوع هو موقع بحزاني، اذهب إلى هذا الرابط
http://www.bahzani.net/services/forum/forumdisplay.php?36-%D8%A7%D9%84%D9%84%D8%AC%D9%88%D8%A1-%D9%88%D8%A7%D9%84%D9%85%D9%87%D8%A7%D8%AC%D8%B1%D9%8A%D9%86&s=c7057ecdb282de3294d1d5a59dc96960
والله ولي التوفيق

[المهندس الزورائي]

ممنون من جميع المعلقين الكرام .. بس شغلة البصمة مو خوش شغلة ! ماكو حل حتى نتجنبها  ؟ منا منا ؟

[ABUDHABI]

المهندس الزورائي - تدلل وبالخدمة

[ساكور]

السلام عليكم

[المهندس الزورائي]

ممنون اغاتي ابو ظبي
عليكم السلام ساكور الورد

[alabbasu]

اليوم كنت عند عبد السلام بمكتب اليو إن بأبوظبي، ماكو جديد !
قال لي انهم ينتظرون الموافقات الأمنية

[alabbasu]

تحياتي لكل المغادرين من الإمارات إلى كندا هذه الأيام، وأتمنى لكم حياة سعيدة في وطنكم الجديد، وأسأل الله أن يجمعنا بكم في القريب العاجل، وألف ألف مبروك!

[المهندس الزورائي]

السلام عليكم ... كيف الحال ؟ وش العلوم ؟ يا مرحب الساع  .. وينهم الشباب ؟ اشو مختفين ؟ شكو ماكو اخبار ؟

[Sound of Soul]

up

[ammar.a.h]

السلام عليكم
شلونكم 
ممكن تفاصيل عن التقديم من ابو ظبي شلون تصير المقابلات وشوكت تتحدد المقابلات اسرع من تركيا لو نفس الشي

[المهندس الزورائي]

عليكم السلام .. حبيبي عمار  .. تروح يوم الاثنين ساعة 12 الظهر وتحضر محاضرة تثقيفية وتاخد استمارة المعلومات وتمليها وترفق الاوراق المطلوبة وتسلمها وتنتظر سنة ونصف الى سنتين حتى يناقشون الكيس مالتك واذا وافقوا واقتنعوا ينطوك كيس نمبر وتنتظر مقابلة اخرى من المحلفين خلال اشهر واذا وافقوا تنتظر الموافقة الامنية خلال اشهر واذا اوك تسوي فحص طبي وتسافر خلال اشهر ... باختصار الشغلة ( اذا مشت اوك ) تاخذ من 3 سنوات ونصف الى 4 سنوات او اكثر احيانا .. تحياتي

[عضيبات]

السلام عليكم أخوتي الأعزاءالفاعلين والمشاركين في هذاالمنتدى الرائع  بعد التحية أحب أسال يصير أقدم على لجوءعلى اليو أن بأبو ظبي  وكان التهديد قديم بسنة  2004  وحاليا بسبب تدهور وضع العراق مثل ماتسمعون وتشوفون جعلني أقرر بضرورة البحث عن مكان آمن بعيد عن الاضطرابات الحاصلة علما اخوكم من الانبار
 ولكم مني فائق التقدير

[المهندس الزورائي]

يامراحب بالاخ عضيبات .. اكيد تكدر تقدم لكن لازم تكول انك لازلت مهدد وما تكدر ترجع للعراق .. تحياتي

[المهندس الزورائي]

وينهم جماعة الامارات ؟ صار شهر ولا تعليق ! معقولة كلهم سافروا ؟! 

[الورد الاخضر]

موجودين اخ زورائي اني جاي افكر اروح لعمان صارلي سنتين مقدمة ومحد اتصل بيه شنو القصة ما عرف المهم اريد اسال الي عنده اقامة الامارات هل بعمان الامم المتحده راح تشوف جوازه وتنطيه ورقة حماية بسهولة لو تكوله انت ما مهدد عندك اقامة بالامارات مع العلم اني اقامتي راح تخلص بعد 5 شهور وما اكدر اجددها ولا اكدر ارجع للعراق
شنو راي الاخوان الي عدهم خبرة بالموضوع ارجو الاجابة

[المهندس الزورائي]

حبيبي الورد الاخضر .. بامكانك تسرع اجراءات قضيتك بال يو ان اللي بابو ظبي وماكو داعي تروح لعمان او غير مكان . لازم تراجعهم باستمرار .. يعني الحاح بس بشكل مهذب مو بعركة وتنطيهم اسباب حتى يسرعون ملفك .. خلال فترة قصيرة حيسوولك اجراءات التسجيل و المقابلة ويسوون الكيس مالتك ايرجنت وتختصر هواية وقت وانتظار .. تحياتي 

[iraqoscar]

السلام عليكم جميعا
اخوان عندي استفسار
اني مقدم ع يو ان بتركيا صارلي 4 شهور وعندي ورقة حماية
بس حاليا اريد انتقل للامارات
السؤال هو اكدر انقل ملفي من تركيا للامارات
تحياتي للجميع

[عباس التميمي]

منو بيكم سافر ؟

[wateen]

ما انصح تنقلون ملفكم للامارات لانه راح تنام الشغلة مثلنا واقلىشي 5سنوات

[المهندس الزورائي]

اجراءات اللجوء في الامارات بطيئة جدا .. اذا ما عدكم مانع من الانتظار اهلا وسهلا بيكم .

[Ur akkad]

السلام عليكم اشو الكروب نايم من زمان، سمعت بدوا بملفات سنة 2013 صحيح هذا الكلام واكو من جماعة 2013 اتصلوا بيهم؟

[ali ali70]

شقد تقريبا الانتظار

[المهندس الزورائي]

السلام عليكم
نعم بدوا بملفات 2013 لكن حسب أولوية الحالة .. بمعنى يوجد تفضيل وتقديم لبعض الحالات على أخرى بسب وجود ما يستدعي الإسراع .. تحياتي

[Ur akkad]

اخوان الي مقدم فيزة لامريكا ويسالوه انت مقدم لليو ان شيجاوب نعم او لا اذا كانت مقدم ولايوجد رقم تسجيل ولا اي شي فقط مقدم الاوراق

[المهندس الزورائي]

اخوان الي مقدم فيزة لامريكا ويسالوه انت مقدم لليو ان شيجاوب نعم او لا اذا كانت مقدم ولايوجد رقم تسجيل ولا اي شي فقط مقدم الاوراق

اكيد يكول ما مقدم . ولو حاليا الفيز دا تتأخر بس ان شاء الله تحصل فيزا

[Ur akkad]

شكرا اخي المهندس الزورائي بس اني قريت بغير موقع انه مادام تم تسليم الفايل فمعناها ادخل بسيستم اليو ان ومسجل لديهم وعندالتقديم لطلب فيزة لامريكا الان شنوالحل اخاف يكتشفون انه تم تقديم فايل لليو ان فالجواب شنو بهاي الحالة بصراحة احتارينا

[المهندس الزورائي]

شكرا اخي المهندس الزورائي بس اني قريت بغير موقع انه مادام تم تسليم الفايل فمعناها ادخل بسيستم اليو ان ومسجل لديهم وعندالتقديم لطلب فيزة لامريكا الان شنوالحل اخاف يكتشفون انه تم تقديم فايل لليو ان فالجواب شنو بهاي الحالة بصراحة احتارينا

حبيبي واني رديبت على استفسارك بذاك الموقع واؤكدلك بوضوح .. ما يعرفون انك مقدم لان ماكو أي ربط بين اليو ان والسفارة . وهذا الكلام يشمل المسجلين رسميا ( يعني اللي عدهم كيس نمبر ) شلون اذا حضرتك صلا ممسجل مجرد مسلم فايل ؟ كلامي عن معرفة بناس كانوا مسجلين ومرفوضين بعدين قدموا وحصلوا فيزا ..  تحياتي

[المهندس الزورائي]

السلام عليكم

[saba2014]

السلام عليكم اختي شجرة الدر ممكن تجاوبوني على سؤالي
اني اريد اجي للامارات اقدم على اليو ان فعندي تساؤلات عديده هل اليو ان هي الي تعطيني اقامه بالامارات لو لازم اول مرة احصل على عمل واقامه يله اكدر اقدم عاليو ان  والسؤال الثاني  اني عندي طفل  شلل دماغي هل حالته ياخذوها بنظر الاعتبار ويسرعون بالمقابلات على حسب معرفتكم ام لا واشكركم الشكر الجزيل

[saba2014]

السلام عليكم اختي شجرة الدر ممكن تجاوبوني على سؤالي
اني اريد اجي للامارات اقدم على اليو ان فعندي تساؤلات عديده هل اليو ان هي الي تعطيني اقامه بالامارات لو لازم اول مرة احصل على عمل واقامه يله اكدر اقدم عاليو ان  والسؤال الثاني  اني عندي طفل  شلل دماغي هل حالته ياخذوها بنظر الاعتبار ويسرعون بالمقابلات على حسب معرفتكم ام لا واشكركم الشكر الجزيل

[alabbasu]

السلام عليكم اختي شجرة الدر ممكن تجاوبوني على سؤالي
اني اريد اجي للامارات اقدم على اليو ان فعندي تساؤلات عديده هل اليو ان هي الي تعطيني اقامه بالامارات لو لازم اول مرة احصل على عمل واقامه يله اكدر اقدم عاليو ان  والسؤال الثاني  اني عندي طفل  شلل دماغي هل حالته ياخذوها بنظر الاعتبار ويسرعون بالمقابلات على حسب معرفتكم ام لا واشكركم الشكر الجزيل

شجرة الدر ما عادت تدخل هذه الصفحة من مدة طويلة، فاسمحي أرد على تساؤلاتك بدلاً عنها:
أولاً: أسأل الله العظيم رب العرش العظيم أن يشفي طفلك المريض ويعافيه بفضله آمين.
ثانيا: اليو إن في الإمارات لا تعطي إقامات ولا بطاقات حماية ولا شئ، إنما عليك الحصول على وظيفة وإقامة بطريقتك الخاصة ثم من بعد ذلك يمكن التقديم على اللجوء. يعني لو ما عندك إقامة بالإمارات فإن اليو إن لا يمكنهم مساعدتك بالمرة.
والنقطة الثالثة: إجراءات اليو إن في الإمارات تطول جداً، ويجب أن تضعي هذه النقطة بعين الاعتبار قبل الحضور إلى الإمارات

[Ur akkad]

السلام عليكم اختي صبا كل الي ذكرة الاخ alabbasu صحيح 100%

[المهندس الزورائي]

كلام صحيح
..لكن بالإمكان تسريع إجراءات اللجوء من الامارات اذا كانت حالة طارئة

[alabbasu]

نظرياً كلام الباشمهندس الزورائي صحيح، ولكن عملياً لا.
أنا قابلت أسرة عراقية في مكتب المفوضية وحالتهم طارئة لأبعد مدى، عندهم طفل مشلول ومريض والأب يعمل في شركة خاصة بمعاش قليل ويواجه مضايقات من الهنود والآسيويين اللي يعمل وياهم، وحالتهم تبكي الغريب والصديق ومع ذلك معاملتهم طولت غير شكل
والموضوع في النهاية بخت ونصيب أكو ناس حالتهم عادية ومو مستعجلة يسفرونهم في ظرف سنة ونصف بالكثير، وأكو ناس نسأل الله لنا ولهم العافية يأخرونهم بالسنوات
وحسبنا الله ونعم الوكيل

[um shaheen]

تحيه اخويه
يارب الكل بخير
عندي سؤال وياريت تسعفوني بالجواب المناسب
عندي زياره لدبي (حصلت فيزه مدتها اسبوعين سياحيه) هل استطيع عند وصولي تمديدها اذا احتاج الامر

وسؤال ثاني اذا ردت أجر سياره يقبلون على فيزه السياحه السؤال هو بأي منطقه اجد طلبي اكو جماعه كالو دوار السمكه الشارع الثاني بس ممتاكدين ارجو التاكيد
ممنونه منكم ويارب يفرجها عليكم ان شاء الله
تحياتي
اختكم ام شاهين