مُنـجــزّات الشهـر الأول في لاس فيـغــاس

[راهب الحب]

صبــاح الخـــيــر ومســـاء اليـاسمــيــن علـى عيـونــكــُم يا إخواني الطيبيــن ::

بعـد مسيرة طويلة وخمسة سنين و3 أشهر قضيناها في دمشق إجانا الفرج بعد الإنتظار المُمل والشّاق وهسة كملنـا شهر وكم يوم بأمريكـا وكأنهُ الأيام أسرع مما تتصور وهذا أكيد بلا شغُل لحد الآن لأنهُ الشغل قادم إن شاء الله بالقريب العاجل فأكيد بساعتها ما نحس بالوگت بعـد أكثـر ...
راح أنقللكـُم مُنـجـزات الشهر الأول (( الحقوق الطبيعية لللاجيء ))  وبمـا حصلنا عليهِ لحد الآن :::

1- الفـود ستـامب حصلنا عليهِ بعـد عشر أيـام تقريبـاً  لكل فـرد 155 $ بالكارد
ولكارد الوالد 270 $ لأنهُ لـ 3  أفـراد مع والدتي وإختي ..
2- بعـد أيـام إستلمنـا بالبريد رسائل من الويلفيـر بتحديد نفس المبالغ للفود ستامب ولكنها إعتباراً من شهر نيسـان راح تنزل للــ 141 $ للفرد ولكن للوالد راح تزيد من 270 $ إلــى 330 $ .. أمـا صك المساعدة المالية فكان 335 $ لكل فرد وصك الوالد لشخصين هو ووالدتي كان 562 $ .. لأنهُ إختي صارت 21 سنة وهي الآن تأخذ صك بوحدها بس بالفود ستامب وياهم
3- قبل إسبوعين إستلمنـا من الگيس ووركر الـ Employment authorization card ..
هوية تصريح العمل وحسب ما سمعت من أحد الإخوة العراقيين بإنهُ المكسيكيين يدفعون للحصول على هذهِ الهوية 500 $ .. وما عندي علم إذا هذهِ المعلومة صحيحة لو لا ..
4- إستلمنـا السوشيـال سكيورتي ولكن بشكل متفرّق ولحد اليوم بقى بس أخوية الجبير منتظرها وإللي راح تصدر قريباً جداً ...
5- البارحة رحنـا لإستخراج هويات الولاية ID  وبعد 4 ساعات من الإنتظار في دائرة الـ DMV حصل الوالد والوالدة على الموافقة على أمل أن تصل الهويات  على البريد بعد خمس أيــام وإحنـا الباقيين تم تأجيلنا للإسبوع القادم لأنهُ إسمنا بعقد الإيجار غير مذكور واليوم سوينا عقد جديد بي جميع الأسماء وعدنا ورقة موقعة عليها أحدى الموظفات بالشروع بتمشية المعاملة بحال حضورنا فوراً والدخول من مكان دخول المعوقين وكبار السن إللي ما يحتاجون للإنتظار طويلاً     يعني ما نوگف بالطابور الطويل  لأنهُ حسّت بمعاناة إنتظارنا فقط راح نروح ونسحب الصور الفورية ونوقّع ونأخذ رقم وننتظر مقابلة الموظف المختص  وإتمام الباقي ..
6- اليوم جاءت الگيس ووركر وأخذت والدي لدائرة الويلفير لأنهُ حصل على السوشيال قبل أيام هسة يحقله يقّدم على برنامج رعاية المُسنين فوق 65 سنة الــ SSI  PROGRAM إللي متعودين جماعتنا يسموه تقاعـُد
وحسب مدا يحجون هي مساعدة مالية يمكن بالشهر فـد 700 $ .. والله أعلم وفعلاً قدّم وبعد عدة أسئلة مع الأخذ بعين الإعتبار بإنه الموظف المُختص قام بجلب جهاز مترجم للغة العربية  والسماع من خلال الهيد فون  على الأسئلة والإجابة عليها بالعربية بكل شفافية وصدق وأخذوا شهادة إثبات الولادة طبعاً مثل ما تعرفون أغلب كبار السن تواريخ ميلادهم الأول من تموز نتيجة نزوحهم من الشمال إلى بغداد ولكن والدي أرفق شهادة العماذ الصادرة من الكنيسة الكلدانية في زاخو
وبي تاريخ  الميلاد المضبوط  ... وأخبروه بإنه الرد عليهِ سيتم في غضون شهر إلى 45 يـــوم ..
7- وهسة آني دا  أكتبلكـُم رّن الموبايل والمتصل هي الگيس ووركر تگول آني واگفة بالباب وإجت ومعها كارتات التأمين الصحي لمدة 8 أشهر  وهذا اول شهر طار
بعدني ما قريت ولا إفتهمت شبي شما بي ومن أفتهم راح أرجع أگوللكـُم  ...

أتمنى أن تسيفيدوا من تجربتي الخاصة وإللي آني ياما جربتها ويا تجارب باقي الأعضاء من جنت أقراه بالمنتدى وأحـُـّط نفسي بمكانهـُم وأعيش التجربة بعينهـا مع تمنياتي إلكم بالتوفيق ودُمتم بألـف الـف خيــر .. †









                        أخــوكـُم / وسـام بهنـام داؤد الخابــوري   

[ســـرى]

بارك الله بيك اخونا الغالي بس سؤال بدون زحمة عليك شنو قصدك بالهويات الل طلعتوها؟ يعني شنو هي بالضبط؟ هل هي هوية لاجئ؟ وتشكر مقدما الله يبارك بيك

[راهب الحب]

والله بالضبط يا أختي سُرى ما أعرف بس أعتقد هي هوية تأكد إنتمائج لنفس الولاية وتابعة لهاي الولاية بس منن تصدر وأشوفها راح أرجع وارد عليج من أتأكد منهـا وتدّللين يا حبيبة  .... †

[ســـرى]

الله يخليك ويحفظك ياريت وانتظر جوابك بهذا الموضوع ولو زحمة عليك وشكرا جزيلا لك اخوية العزيز

[worldgold]

للاخ العزيز راهب الحب مني سلام وتحية ..

ما جاء بموضوعك جدا رائع وغني بالمعلومات وبارك الله فيك ونود التواصل لخدمة المنتدى البديع .. وحقا اعجبت باخلاقك الرفيعة

اخوكم


                                WORLDGOLD

[راهب الحب]

عزيزتي سُرى إذا أنتي قصدج هويات العمل فهي عادية تطلع لكل اللاجئين وأصلاً تصريح العمل يكون موجود وياج بكيس الأي أو إم وتوقعين عليهِ قبل ما تستلمين الفيزا وتروحين تسوين عليها مغادرة ...
ولكن من توصلين بعد فترة يتم إصدراها إلج وهي من عمر 18 فمـا فوق حتى والدي إنطوه منها رغم تجاوزهُ الـ 65 سنة ..
أمـا إذا تقصدين الـ id هوية الولاية فهذهِ راح أشرحلج عليها من توصل وأشوفها فقط تدفعين مبلغ 9.50 $ رسوم الهوية ..
وعدنـا إهنا بفيغاس عدة هويات لازم تستخرجيها في حال تشتغلين بعدة أعمال معينة مثلاً ::
إذا تحبين تشتغلين بالمطبخ أو الروم سيرفس أو أي شغلة تخص تلامسج مع الطعام فعليج تطلعين هوية إسمها health care وهي مو ببلاش تدفعين خمسين دولار وتضربين أبرة مثل لقاح وتستلميها بنفس اليوم ..
وأكو هوية أخرى تصدُر وضرورية للي يشتغلون بالكازينوهات وإللي بطبيعة عملهم يتعاملون مع المال بصورة مباشرة وهي هوية الـ sheirrf s card  وقيمة هاي الهوية 75 $ ..
وأكو هوية أخرى تخص العمل مع المشروبات الكحولية ( البارمـان ) وتسمى A.T.M CARD وهي بـ 75 $ ولولا هاي الهويات ما تگدرين تشتغلين بهاي الأعمــال إللي ذكرتها ....

وتتدلّلين يا غالية وأتمنى ما شبجت يمج الإمور هسة  




                 أخـوكـُم / وسـام بهنـام داؤد الخابــوري

[maitham70]

حبي راهب الحب الف الحمد لله على سلامتك وسلامة الاهل وشكرا جزيلا على المعلومات المفيدة
تمنياتي لك بالموفقية انشاء الله يارب

[/color]

[أ.ج.ت]

اخوية وسام بارك الله بيك على المعلومات وننتظر منك المزيد

[عراقي هواي]

اتمنى الكم كل الخير وبارك الله بيك على المعلومات ودومك السبق لمساعدة الاخرين وياربي يسره عليكم وتستقرون اكثر واكثر اكيد عانيتوا هواي والله يسهله على كل طيب وشريف تقبل موروي

[ســـرى]

اخوية العزيز راهب الحب اشكر جوابك الغني بالمعلومات سؤالي كان عن هوية الولاية شنو تقصد بيها؟ مو هوية العمل

يعني لازم الواحد باي ولاية (سواء يعمل ام لا) يطلع هوية الولاية؟ وهل هي للاجئ ام المهاجر؟

وشكرا مرة اخرى

[angie-dawood]

اخت سرى هوية العمل هاي ينطوها لاي شخص وعلى اي برنامج كان هسى والدتي من اخذت لجوء داخل امريكا هم انطوها نفس الهوية وهي اعتقد مدة سنتين وتنتهى بعد ما تطلعين هوية الولاية
وهي ينطوها لان من نريد تطلع هوية الولاية او ايجازة السياقة يطلبون منك خمس اشياء ومن ضمن هاي الاشياء هي الهوية لانه يكون بيها صورتك وطبعا مع الجواز حتى يثبت الهم انو انت هذا الشخص الي اسمه موجود بالاوراق الرسمية مال ولاية الي انت ساكنة بيه

[ســـرى]

زين اني زوجي طلع اجازة سياقة مؤقتة وهه راح يطلع الدائمية واجرنا الشقة واشترينا خطوط التليفون وحد سألنا على هوية ولاية اني اريد اعرف ان امكن هاي من وين نطلعها ومن طلعنا السوشيال سيكيوريتي محد كالنا عليها يعني هسه وين نروح؟ وشيسموها؟ state ID؟ ياريت اعرف الجواب ومشكورين (اكرر سؤالي ليس عن هوية العمل وانما عن هوية الولاية) ومشكورين

[angie-dawood]

EMPLOYMENT  AUTHORIZATION  CARD

هاي اسم الهوية تكدرين تسالين عنها بس ما متاكدة من وين يطلعوها

[untitled.man]

الاخ العزيز راهب الحب...

الحمدلله ع السلامة وانشالله الاستقرار الدائم

اختي العزيزة سرى...

هوية الولاية واجازة السوق مثل ما يكول المثل (وجهان لعملة واحدة) يعني اذا عندج اجازة سوق صادرة من الولاية ما تحتاجين هوية ولاية، اما اذا عندج هوية ولاية وتريدين تاخذين اجازة سوق فلازم تسقطين هوية الولاية ياله ينطوج اجازة السوق. معنى الكلام انه لازم الشخص يكون عنده وحدة من الاثنين، اما اجازة سوق او هوية ولاية وما يصير يكون عنده الاثنين.
نصيحة، ومثل ما اني سويت، طلعتلي اجازة سوق، بس لزوجتي ما طلعت هوية ولاية وانما علمتهه السياقة وحاليا هي هم عدهه اجازة سوق وما اضطربت انه اطلعلهه هوية ولاية.

اما هوية العمل (Employment Authorization Card) اللي ديحجون عليهه الاخوان فهذي تعطى فقط للاجئين (يعني الناس اللي وصلوا عن طريق الـ IOM او الـ UN) ولا تعطى للمهاجرين (جماعة الـ SIV) لانه المهاجرين عدهم الكرين كارد واللي هو يمثل تصريح العمل. لذلك كارت العمل يكون اكسباير وره سنتين لانه اللاجئ خلال هذه السنتين راح يكون محصل الكرين كارد فراح تنتفي الحاجة لكارت العمل هذا ويحل الكرين كارد بمكانه...

اتمنى انه الحجي يكون واضح واي سؤال اني حاضر.

تحياتي

[راهب الحب]

أعزائي الإخوة شكراً جزيلاً على مروركم وتدلّلون وإن شاء الله شگد ما أگدر أرفدكـُم بمعلومات تفيدكـُم وآني الممنــون عسى أن أرد الدين لهذا المنتدى إللي خلاني أكون موجود بأمريكا من قبل ما أجي بفضل الله ومواضيع الإخوة الأعضاء ....


عزيزتي الإخت سـُرى ::
إن شاء الله أفتهملج كلشي بخصوص هذهِ الهوية  لأنهُ بصراحة صدفة صارت روحتنا لهاي الدائرة وبعد ما أخذنا السوشيال الكيس ووركر گالت تگدرون هسة تطلعون الـ ID ..  
راح أرجع أرد عليج مع الشرح المـُفصّل وتتدللّيــن .... ودُمتِ بألــف الــف خيـــر .... †




                   أخـوكـُم / وسـام بهنـام داؤد الخابــوري

[ســـرى]

شكرا اخ وسام لاهتمامك بالموضوع

الاخ العزيز انتايتلد مان يعني صدك جوابك مضبوط وبالضبط مثل ما اني جنت اريده

هسه افتهمت الشغلة يعني اللي عنده هوية لازم تكون لو هوية الولاية لو اجازة السوق هاي اولا

ثانيا احنا كمهاجرين ما نحتاج هوية تصريح بالعمل لان عدنا الكرين كارد

اشكرك عالجواب الشافي والكافي وتحياتي الك وللاخ وسام

شكرا جزيلا

[vincenzo]

عاشت ايدك صديقي الزلمة اللي بلية اسم لان اني جنت اريد اكتب كل اللي انت كتبته بس انت جنبتني هذا العناء
ثاري اكو جماعة صدك يشبتون خبنطو

[queen777]

شكرا لصاحب الموضوع و استاذنة بالاجابة للاخت سرى الوردة

اختي هوية الولاية مهمة لازم اتطلعيهة اذا ما عندج اجازة سياقة و تستخرجيهة من نفس مكان اجازة السوق بس تكوليلهم اريد  state ID و اي مراجعة بالدوائر او البنك راح يريد منج هويتين اثبات و انتي عندج هاي الهويتين الي هنة السوشيل كارد و الكرين كارد بس ما ينصح باستخدام السوشيل كارد لذا ينصحون بهوية الولاية (مو ولاية الفقيه مال ايران الله يلعنهم ههههه) ان تستخدميهة مع الكرين كارد بس زوجك ما دام عندة اجازة سوق ختى لو موءقتة ما يحتاج هوية الولاية

تحياتي
مصطفى

[الفهد السباح]

مشكور اخي وسام بهنام على الشرح والايضاحات وبالتوفيق لك ولعائلتك وحياة سعيدة

سلام المسيح معك ويبارك الرب حياتك

[AboDiana]

شكرا للاخ راهب الحب على الموضوع و عاشت ايدك.

أخوكم أبو ديانا

[ملك الحيرة]

شكرا على تواصلك الكريم...رغم ان الكثير من اخواننا الذين وصلوا الى امريكا انقطعوا عنا وانقطقت اخبارهم الا انك مميز يا اخي راهب الحب

مشكور وأتمنى من الله ان التقيك في لاس فيجاس اذا شاء الله لنا ان نلتقي هناك

[ســـرى]

صدك هذا موضوع الهويات ليش محد طرحه من قبل؟؟؟ موضوع جدا مهم وبارك الله بيك اخوية وسام

شكرا لك اخوية queen777

[vincenzo]

لا خيتي موجود مواضيع عليه بس من جان المنتدى غير شكل ويمكن اذا تجيكين موضوع نصائح وارشادات المثبت تلكين تفاصيل
لعد اني مثلا شمدريني؟؟

[*Sandra*]

الله يبارك بيك أخ وسام على مواصلتك برفدنه للمعلومات الحلوة عن حياتكم هناك اتمنى لك كل الموفقية والسعادة بحياتكم سلامي وتحياتي للعائلة
                                         
 
 
                                                                                أمنية

[راهب الحب]

حبايبي الطيبيـن ::
ــــــــــــــــــــــــــــــــــ
تدللّون إخواني وبيكـُم خير وتستاهلون أكثر وأكثر وإن شاء الله ما أقصّر وأرد الدين بالأكثر منه لهذا المنتدى المتميّز إللي لا زال يطلبني هوايـــة ولازم أشتغل شفتين يللّه ألحـّك أسدّد ديونه 

حبيبي بيـرج ::
ما إفتهمت شنو قصدك شنو الموضوع  جان مُغلق وفتحته إنته ؟؟
آني كتبت تجربتي الشخصية وما عندي علم بالموضوع إللي قفلته حبيبي وشنو محتواه !!!
يا ريت تنورني يا غالي ودُمتم بألـف الـف خيــر ...



               
                     أخـوكـُم / وسـام بهنـام داؤد الخابــوري