اخواني الأعزاء عند الذهاب الى موعدكم مع برنامج الفيو لازم تروحون بالموعد المحدد لتجنب المساءلة عن التأخير وحتى تبينون انه فعلا لديكم النية الصادقة في الاشتراك في البرنامج والالتزام به.
راح تروحون للطابق الثاني وبالاستعلامات تخبروهم انه انتو جايين علمود برنامج الفيو والموظفة اسمها (تنطوهم اسم الموظفة اللي دزلكم الرسالة واللي راح يكون بنهاية الرسالة مال المقابلة) وتستريحون بالانتظار وهي تنطيها خبر وتجي تقابلكم
الرسالة اللي تجيكم يا اما يكون اصلا بيها فورم تملوه وبيه اسئلة اعتيادية عن الاسماء والاعمار والشهادة والعمل اللي مشتغلين بيه سابقا (حتى لو كان خارج امريكا) اسم المؤسسة اللي اشتغلتوا عدها او اسم صاحب العمل والمدة من تاريخ كذا الى تاريخ كذا وسبب ترك العمل (نقل/سفر/ايجاد عمل اخر/..الخ) او تجيكم بالرسالة مال الموعد وهناك تملون الفورمات (طبعا فورم لكل شخص).
بعد ملئ الفورمات راح تاخذها منكم السوشيال ووركر وتسألكم عدة أسئلة من ضمنها شنو انتو مخططين لحياتكم يعني منا لسنتين انتو شنو المجال اللي تشوفون نفسكم بيه؟ ومنا للخمس سنوات القادمة شنو مشاريعكم بالنسبة لنوعية العمل؟ شنو المؤهلات اللي تمتلكوها؟ نوع الشهادة؟ وراح على اساها تقدملكم مجموعة من المقترحات وبالحقيقة هم جدا لطيفين ويسمعون للشخص فكونوا صادقين معهم وهذا افضل شي لان هم راح يحاولون يساعدوكم بالشي اللي يكدرون عليه وتكوللكم من البداية اذا تشوفون نفسكم ما تكدرون على متطلبات الفيو بروجرام انطوني خبر حتى لو بالتليفون حتى الغي الكيس مالتكم (وكالت انه الفود ستامب الميديكيد مرا يتأثر) مع العلم انه مكتوب عالرسالة اللي تجي من الفيو مال الموعد (اذا لم تحضروا للمقابلة بدون عذر مقبول سيتم رفضكم من التانف وممكن ان تتأثر المساعدات الاخرى مثل الفودستامب).
راح تحجيلكم على برنامج الفيو وهو برنامج شرحه يطول ولكن لنلخص اللي ممكن تعرفوه عن ايجابيات البرنامج:
((اولا)) : ايجاد فرص للتدريب بالنسبة لكم لاكتساب مهارات جديدة يمكن ما كنتوا تملكوها مثل ما اخبرتنا عن دورة تدريبية للتدريب على خدمة الزبائن () يعني بالشركات او الفنادق او السوبرماركتات الكبيرة وغيرها.
((ثانيا)): دورات لتعلم اللغة الانكليزية وعلى حسابهم وهاي اكيد مفيدة جدا لاتقان اللغة واللي بدورها تفيد في ايجاد العمل او التقديم له لأن اللغة مهمة بصورة عامة.
((ثالثا)): راح تملون ورقة يكون لونها اصفر براق بيها اسماءكم واسماء اطفالكم مع تواريخ ميلادهم لغرض ايجاد بيبي ستر (مربية اطفال) او دي كير (حضانة او رعاية للاطفال) وعلى حسابهم ايضا ورة ما تملون الورقة تقدموها وراح ينطوكم قائمة باللي مسجلين عدهم من حاضنات الاطفال او دور رعاية الاطفال او الروضات وانتو تختارون حسب القرب وحتى حسب ما عرفنا انه ممكن تروحون للمكان قبل ما تختارون انه تخلون بيه اولادكم.
((رابعا)): اذا ما عدكم وسيلة للنقل راح يوفرولكم بطاقات للباصات (توكنز) علمود التنقل ويحسبولكم الروحة والجية عليهم.
اذا عدكم سيارة راح تستلمون منهم ورقة بيها اسم الشهر بالاعلى وبيها جدول انتو تملوه بكل مرة تستعملون السيارة بيها علمود برنامج الفيو وكالتالي: عدد الاميال اللي قطعتوها/نقطة البداية/نقطة النهاية
عدد الاميال ممكن انتو تكتبوه او اذا تريدون ما تكتبوه وهم راح يحسبوه بناء على نقطة البداية والنهاية اللي انتو كاتبيها وعن طريق الماب كويست يعني مثلا
1: 5 اميال من البيت (تكتبون العنوان) الى مكتب الفيو بروجرام السبب: لحضور الدورة التدريبية.
وهكذا لكل شهر وتسلموها الهم وراح المفروض يعوضوكم عن البانزين اللي صرفتوه علمود الطريق ذهابا وايابا.
((خامسا)): تروحون عالطابق الثالث وبيه موظفة راح تساعدكم على كتابة الخلاصة او السيرة الذاتية (السي في) مالتكم وتعلمكم خطوة بخطوة.
بنفس الطابق راح يكون اكو اول ما تدخلون خانات بيها اعلانات طالبين بيها موظفين هاي طبعا جدا تفيدكم وبالمناسبة راح تكون مقسمة كالتالي:
اولا: خانات للعمل في المدارس الحكومية وحسب المقاطعات مال مدينة فرجينيا (فيرفاكس/اليكزاندريا/...الخ) تلكون بيها اعلانات من المدارس الحكومية مثل الهيدستارت وغير مدارس لحاجتهم الى موظفين.
ثانيا: خانات مقسمة حسب نوع الوظيفة يعني مثلا: وظائف صحية / وظائف هندسية / عمال / بائعين / فاحصي بصر / وظائف لمبرمجي الحاسبات .....الخ
ثالثا: خانات للوظائف الحكومية .
وراح تشوفون اكو حاسبات ممكن تستعملوها للبحث عن وظائف بس تسجلون اسمكم بسجل وتروحون عالحاسبة (هاي للي ما عنده حاسبة بالبيت) واي شغلة ما تعرفوها او ما متأكدين منها اكو موظفين ممكن تسألوهم واكو بنفس المكان بالسنتر طابعات واجهزة استنساخ تستعملوها ببلاش.
من الاشياء الموجودة ايضا كتيب للكورسات التدريبية في مختلف انواع الاعمال والوظائف اسمه ACE Classes
والموقع هو
www.fcps.edu/aceclasses وراح تلكون همين جريدة بيها نشرة مال اعلانات وظائف وكورسات تدريبية اسمها
the employment guide
وموقعها هو
www.employmentguide.com بالنهاية راح تكملون هذه المقابلة الاولى وتنطيكم موعد وتجون مرة ثانية وتشوفون شنو اللي كدرت تحصللكم عليه من دورة تدريبية او عمل
تقبلوا تحياتي
