اخوتي هلا هلا .... محتاج عونتكم بسالفة

[ابو راشد]

اخوتي الاحبة والكرام
اتمنى ما اكون ضوجتكم باسألتي هالاسبوع وان شاء الله ... ان شاء الله .. يقدرني رب العزة وارد كل جمايلكم وامد يد العون لكل محتاج لاستفسار او مساعدة

هسه محتاج اي بطل من الابطال هنا اذا عنده معلومات عن ولاية فريجينا وبالتحديد مدينة ستاونتون

Virginia - Staunton

اتمنى ان ما تكون روابط انترنت ... اريد واحد شايفها او عنده كم معلومة عنها فيما يخص وضعها ومناخها ووضع المساعدات والنقل وغيرها من الامور اللي تهم اللاجئ

ربي يحفظكم و يوفقكم

اخوكم ابو راشد

[ابو ياسين]

اهلا اخي العزيز ابو راشد ان شاء الله الاخوان الي بهاي الولايه ماراح يقصرون وياك

[ابو راشد]

وداعتك ابو ياسين ما اعتقد اكو واحد بهاي المدينة رايح
صحيح انو اكو هواي عراقيين بفرجينيا بس بهاي المدينة ما سامع احد هناك والدليل انو سويت بحث بالمنتدى على اسمها ما طلعتلي ولا نتيجة

الله كريم بلكي يجينا ابن حلال يسولفلنا

شكرا للجميع

اخوكم ابو راشد

[ســـرى]

اخونا العزيز ابو راشد اني موجودة بفرجينيا بس بفيرفاكس كوللي شنو اللي محتاجة وان شاء الله ما اقصر وياك

احجيلك بصورة عامة على فرجينيا ولاية كلش حلوة وراح تجي ان شاء الله وتشوفها قطعة من الجنة بهاي الفترة وجوها هسه بهالوقت كلش حلو الصبح شمس والهوا بارد بس مو كلش بارد يعني بين ال17 وال 20 مئوية وبالليل الجو كلش طيب ومرات نكعد الصبح نلكاها ماطرة ومغيمة بس ثاني يوم تصحي الاماكن هنا حلوة والشوارع كلها اشجار ومساحات خضراء هواية موجودة خصوصا اذا منطقتكم بعيدة عن مركز المدينة راح تحس عبالك عايشين بغابة صغيرة

بالنسبة للنقل بصورة عامة فرجينيا بيها الجزء اللي قريب على العاصمة دي سي ويها خدمة المترو وبيها الجزء الابعد وهاي بيها مشاريع مثلا هسه اكو مشروع يكملون خط المترو الى اماكن ابعد وان شاء الله يكمل بعد يمكن فد سنة ونص الى سنتين حسب ما عرفنا بس وسائل النقل موجودة بصورة عامة بالباصات وبمنطفتنا اكو مثلا باص ينقلك لمحطة المترو ببلاش واكو باصات اللي هي تدفع بيها لو فلوس لو الافضل اول ما تجون تاخذون كارد مال سمارت ترب smartrip وهذا متوفر بمحلات الcommuter تشترون وتشحنوه من محطات المترو كلما يخلص هذا يفيدكم بالباص وبالمترو واكو ناس بعيدة عن العاصمة بس من تريد تروح ما ياخذون سياراتهم لأن ازدحام فيركبون المترو حتى اللي شغلهم بالعاصمة هم هيج يسوون

احنا اجينا كمهاجرين فيزا خاصة وعلى حسابنا فقدمنا على المساعدات بنفسنا والسوشيال نمبر والميديكيد

الشغلة اللي موجودة عدنا انه مثلا ما لكيت لحد الان طبيب اسنان يقبل الميديكيد لمن هم اكثر من 21 سنة فإذا عدكم شي بالاسنان سووه هناك قبل ما تجون

وبعد شنو العلومات اللي تريدها كوللي وان شاء الله اساعدك

[ابو راشد]

شكرا جزيلا اختي سرى على المعلومات الغنية عن فيرجينيا بالحقيقة اني اسمع يكولون كل مدينة تختلف عن الاخرى حتى وان كانت بنفس الولاية والمدينة اللي اني خاليني هسه بالجديد بيها كل شئ ما اعرف عنها مثل ماذكرت بداية موضوع والظاهر حتى انتي ما سامعه بيها .
اريد اعرف مثلا شكد فتره المساعدات حتى الواحد يرتب اموره ويحاول يشتغل اول ما يوصل وشلون اسعار الايجارات بهاي المدينة بالنسبة لشخصين "زوج وزوجته" كذلك فرص توفر العمل فيها اوفي المدن المجاورة واريد اعرف شكد يطول الصيف هناك وشكد يطول الشتاء حتى الواحد يعرف شنو يجيب وياه ملابس

اكو غيرها هواي تفاصيل من تحضرني ان شاء الله اكتبها الج اذا وافقتي على الخاص

شكرا مرة اخرى سرى

في امان الله وحفظه

ابو راشد

[ســـرى]

اخوية ابو راشد هنا بالنسبة للنقل همين اكو شغلة تفيدك من تريد تروح لمكان تكتب عنوان المكان عالانترنيت بالغوغل ان كان مكان عام مثلا مكتبة او منتزه وتروح عالموقع مالته ويطلعلك شلون تروح بالسيارة ومرات حتى يكتبلك شنو رقم الباص اللي تركبه او المترو حسب المنطقة احنا اول ما اجينا جنا هيج نسوي واكو روابط للنقل العام وحتى تلكى الجدول مال الباص يعني بيش الساعة يمر بكل محطة وطبعا ممكن يتاخر فد 5 الى 15 دقيقة حسب الازدحام مثلا شوف هذا الرابط واخزنه الفيفورت favorite عندك يفيدك هناك والجو هم تكدر تطلعه من النت عالياهو او الmsn weather اكو شي حلو هنا بفيرفاكس مثلا هي معروفة بمدارسها الحكومية الممتازة بحيث الكل يمدح بيها ويفضلوها عالخاصة وهم تكدر تسوي سيرج عالمدارس مال منطقتكم بالانترنيت وتشوف ال reviews عنها شنو وياهو احسن مدرسة.

[ســـرى]

تدلل اخوية ابو راشد بالنسبة للمساعدات بفرجينيا مال اللاجئين اني ما اعرف بالضبط لأن كتلك احنا مهاجرين بس الفود ستامب كلش كافي

بالنسبة للمساعدات المالية اني ما اعرف بيها لأن ما قدمنا على الكاش اسيستانس بس اكو برنامج التانف tanf واللي شارحته اني بموضوع منفصل هسه اشوفلك الرابط وتكدر تراسلني على اي سؤال تحتاج اكيد اني اختكم وان شاء الله ما اقصر

وهذا رابط للنقل وانواعه بمدينتكم يفيدك ان شاء الله من توصل

http://www.staunton.va.us/community/transportation

[ابو راشد]

شكرا سرى والله انتي ورده المنتدى وماقصرتي بالاجوبة السريعه ... اني اتمنالج كل الخير واتمنى ارد جزء من الفضل اللي قدمتيه الي بمساعدتج وردودج الطيبة


مشكور وماقصرتي


ابو راشد

[ســـرى]

العفو اخوية ابو راشد اني ما سويت شي واذا تحتاج اي شي دزلي سؤالك وان شاء الله اساعدك