ارجججججججججججو مساعدتكم من الخوان بسان ديغو

[ام رانيا]

السلام عليكم


اريد استفسار من الاخوات والاخوان
الي بسان ديغو   على العلم اني مقدمه  من iom

سوالي


كم شهر تساعدك المنظمه في دفع الايجار

ورايد اعرف الكاش بالنسبه للاطفال

ان عددنا 5 نفرات   

وايضا  عن العمل هل المنظمه هيه التي تعطيك عمل او انا لازم ابحث عن عمل 



وجزاكم الله الف خير

 

[ســـرى]

اختنا العزيزة اني اعرف انه الاخ غسان الاشقر بسان دييغو ويمكن الاخ ماجلان همين الافضل انه تتصلين بيهم وهم ما يقصرون

ونصيحة اختنا العزيزة غيري اسم الموضوع الى ((مساعدة من الاخوان بسان دييغو)) حتى يدخلون عالموضوع ويساعدوج ان شاء الله

[eboo]

كلام الاخت سر ىمضبوط لان احنه من دخلنه منعرف انو السؤال موجه للاعضاء الي بسان ديغو لان ما نعرف الاجابه عليه بس الي ساكنين هناك ارجو ان تغيري عنوان الموضوع وربي يوفقك ان شاء الله

[wessam_sh_75]

اختي العزيزه ام انديانا

كوني اني اخر واحد وصل الى سان دييغو واني على منظمه الكاثوليك جرتيز وبالنسبه للعوائل
من توصلين راح تستلمين مبلغ الوليكم 1100 دولار لكل شخص وره 10 ايام راح تتحولين الى برنامج الولفر الحكومي وراح يحددولج مبلغ الفود ستامب والكاش يعني حاليا المنظمه راح تحولج كبل للولفر ومراح تنطيج ولا شهر ايجار اما بالنسبه للكاش فاني خمس نفرات استلم 941 دولار كاش 780 دلار فود ستامب واكو برنامج اسمه ويك للاطفال دون الخمس سنوات راح ينطولج قساتم شرائيه بقيمه 35 الى 40 دولار لكل طفل لشراء بعض المواد الغذائيه

[ســـرى]

بارك الله بيك اخونا وسام تسلم عالمعلومات

[احمد سلطان]

اخونا العزيز وسام حسب كلامك ينطون 925دولار كل شهر وايجار الشقق عدكم بسان دييغو 3 غرف لان انتوا خمس نفرات اقل شى 1300 دولار يعنى بس على ايجار الشقة الواحد يحط من جيبة 400 دولار يجمل موصحيح واذا انى غلطان ارجوك تصححلى  يعنى اذا هيج هذا شلون لجوء واللى ماعندة يجمل من جيبة شيسوى خوب ميجى احسن وعود همة مسوين علينة فضل خطية الامريكان وناطينة لجوء لاااااااااااااااااااااااا قيمنة

[^Miss Violet ^]

صدك يحجي الأخ أحمد سلطان

لو تشرحلنا بعد أكثر أخ وسام

يعني مو المفروض همه يدفعون الايجار اول 8 اشهر؟؟

[Abo Andrew]

ام رانيا

جواب على سوالج "كم شهر تساعدك المنظمه في دفع الايجار "

هناك نوعين من المساعدة حسب برامج دعم اللاجئين
الاول يدفع ايجار السكن لمدة اربع اشهر على ما اعتقد

والبرنامج الثاني يدفع مبلغ معين يعتمد على عدد افراد العائلة مثل ما موضح الاخ وسام وهذا ثابت لمدة 8 اشهر

وخلال هال 8 اشهر لازم اتكملين من جيبج

اكو مواضيع بالمنتدى عن البرنامجين بالتفصيل وكيفية اختيار المناسب

اتمنة من اختنة سرى اتساعدج بهل موضوع لان هية خبرة بالبحث

جواب السؤال الاخر "ورايد اعرف الكاش بالنسبه للاطفال "

اني صارلي سنة واربع اشهر هنانا مسامع بهيج شي لان اصلا مينطون كاش للاطفال

الشي الوحيد هو اكو برنامج غذائي اسمة WIC
ينطوج جيكات شهرية لشراء بعض الاغذية مثل الحليب الجبن السيريال وقيمتها ما اتزيد عن 50 دولار

بس مينطود جيك اتصرفين فلوسة وتشترين هو الجك تنطي لابو المحل وينطيج مواد غذائية

اكو برامج اخرى في حالى حصولج على عمل يتكفلون بدفع اجور الحضانة بعد اجراء مقابلة والحصول على موافقة

بالنسبة للسؤال الاخير عن العمل

اني مشفت لحد الان اي منظمة وجدت عمل لاي لاجئ عراقي وفادتة بيهم؟؟!!

اللهم اذا اكو واني مسامع

العمل بيد ربج وثانيا يعتمد على امكانياتج ولغتج الانكليزية

ومن الله التوفيق

هذا الموقع ممكن ايفيدج دوري بي هواية لان يحجي عن اهم الاشياء الموجودة بسان دييكو


تحياتي

الموقع

http://www.ankawa.com/forum/index.php/topic,361356.0.html

update

ام رانيا بالموقع اعلاه اكو مشروح عن برنامج الماجك كرانت حاولي تقرين عن الموضوع لمشاركات احد الاخوة ان شاء الله ايفيدج

ابو اندرو

[wessam_sh_75]

اخي العزيز احمد سلطان

بالنسبه للكاش اني استلم 941 دولار وايجار شقتي غرفتين وصاله 895 +60 دولار مال الماء  يعني المجموع 955 دولار يلحكه تلفون 6 دولار والانترنيت 20 دولار  يعني اني 40 دولار اجمل من جيبي ونكول الله كريم

[احمد سلطان]

بس اريد افتهم رحمة لاهلكم هذا شلون لجوء محملينة بية منية اذا الواحد من البداية يجمل على الايجار هسة حتى الايجار ميدفعوة نيااااااااااااااااااالنة ومبروك علينة اللجوء الامريكى واللة حتى مقابلة المحلفين عندى موعد هذا الاسبوع ماروح وابقى بمكانى احسن وممنون من امريكا هجولتنا ودمرت بلدنا وهسة عوووووووووووووود دتقشمرنا بهذا اللجوء الفاكس

[Abo Andrew]

بس اريد افتهم رحمة لاهلكم هذا شلون لجوء محملينة بية منية اذا الواحد من البداية يجمل على الايجار هسة حتى الايجار ميدفعوة نيااااااااااااااااااالنة ومبروك علينة اللجوء الامريكى واللة حتى مقابلة المحلفين عندى موعد هذا الاسبوع ماروح وابقى بمكانى احسن وممنون من امريكا هجولتنا ودمرت بلدنا وهسة عوووووووووووووود دتقشمرنا بهذا اللجوء الفاكس

حبيبي ابو شهاب ليش ضايج؟؟

اذا ميعجبك تجي امريكا محد كامشك من ياختك ؟

لا تزعل حبي ابو شهاب

ترة امريكا بلد راس مالي (واذا ما تعرف شنو معناهة سوي بحث بالكووكل ) هاي انت سمعت هيج اتغثيت لعد لعد لو تجي واتشوف القوانين والكيت اللي ايزرف جيبك شتكول يمكن ايصير بيك سكتة قلبية ؟(هنانا حتة على الهوى تدفع تاكس)

على اية حال انت بما انه ضايج معاجبتك الوضعية ارجع خابر جماعة المنظمة والغي الملف مالتك حتة على الاقل يستفادون غير ناس

تحياتي الك يا وردة

[عراقي هواي]

عمي لا منيه ولا شي بعدين هو اللي يروح هناك ويخلي بعقله يعتمد على المساعدات خل لا يروح ولا يتعب نفسه ..والناس اللي ده تطلب لجوء او هجرة تر ما ميته من الجوع هنا مو لو مو .

[احمد سلطان]

واللة اخوية ابو اندروا وعراقى كل واحد يمدد على كد فراشة انتوا بلعافية عليكم واللة يزيدكم الظاهر اموركم المادية زينة وتكدرون تواكبون الحياة بهيج دول راسمالية هاى وحدة واعتقد انتوا رحتوا قدمتوا على امريكا برغبتكم بس انى ياخوى عمرى ممفكر اقدم على امريكا انى حالتى الصحية واليوان همة حولونى على امريكامع العلم انى مبلغهم اى دولة ماعدا امريكا وعلى كل حال اخوية العزيز ابو اندروا لاتغث نفسك على امريكا بلعافية عليك واذا تريد اتبرع بية لواحد من كرايبك انى مستعد مع فائق تقديرى واحترامى

[Abo Andrew]

حبيبي ابو شهاب

اصلا اني لا غاث نفسي ولا هم يحزنزن واني من اول يوم موطئت هاي الارض لعبت نفسي من ناسهم ومن قوانينهم الفارغة

بس شتسوي من لا جارة احسن من الحرامية اللي مجلبين بالكراسي وما مقدميلك اي شي

والحمد الله والشكر هنانا اللي يتعب على نفسة يحصد الثمر ويكدر ايواكب الحياة برغم صعوبتها

اتمنالكك كل الموفقية وان شاء الله ترتاح باي مكان اتكون بي

تحياتي

[احمد سلطان]

حبيبى ابو اندروا شكرا للرد بس احنا اخوان واحد يتحمل الثانى ولاتزعل منى ترة هم كصيتك بغير مكان هههههههه واحنا هم من الضوجة وطول الانتظار

[ســـرى]

اخواني الاعزاء هو كل مكان تبقى بيه ايجابيات وسلبيات توكلوا على الله زائدا مجهودكم بالبحث على عمل وطوروا نفسكم بالقدرات وبالشهادة قدر الامكان وماكو شي بالحياة سهل ابدا لا امريكا ولا العراق ولا غير دولة وان شاء الله اللي كاتبه الله يصير والباقي انه احنا نسعى باللي نكدر عليه تقبلوا تحياتي

[zozk]

السلام عليكم
اخوان اشو صارة السالفة بيهة اشوية توتر
ترة كلنا اخوان و عراقيين بالنسبة الى امريكا هي بلد لا يقدم اي مساعدات و اي شي للمهاجرين الجدد و حتى هذة الامور الي ايقدموهة مجرد مثل ما انكول تسهيل امر انت اذا اتريد اتروح الى امريكا فقط تخيل نفسك انت داخل في حررب مع الوقت يعني المثل القائل ماكو  واحد مات من الجوع ما يشتغل بامريكا اذا انت ماتكدر تشتغل او حالتك الصحية تعبانة كلمن و ظروفة

اخي العزيز ابو اندرو بعد التحية
ترة اكو عراقيين في سوريا و الاردن حالتهم المادية يرثى لها يعني ما عندة اي مبلغ من المال حتى  ياخذة وياة و من الممكن ان يكون عايش حياة لو ميت اهواية احسلة و رغم هذا كلة دا ينتظر معاملة اللجوء عموما الله ايسهل امرهم ... كلمن و ظروفة اخي ابو اندرو
ربي ايسهل لجميع الاخوان

[Abo Andrew]

حبيبي الغالي ابو شهاب

اكيد خوة ولو انت مشمر طوابيك علية بهذاك ردك

جان لازم تعرف وجهة نظري من ناحية امريكا قبل متحجي كلامك

اخي العزيز يحتاجلك فرة بمواضيعي او تعليقاتي القديمة حتة اتشوف شنو رايي اني بامريكا واللي ميختلف عن رايك

الفرق الوحيد انه محجيت مثلك كلت امريكا مو خوش بلد وديحملونة من نية

اجينا واعتمدنا على نفسنة وربك هو اللي ينطي رزق رغم كل الصعوبات اللي شفناها

الحمد الله اني مو زنكين مثل ما انت تتصور بس نشكر الله اللي جان عندي جم فلس جبتهم وياي

يعني اني هم مجنت حافي بالعراق الحمد الله جنت اشتغل وراتبي زين لميتهم وجبتهم وياي وساعدتني هواية بس ترة هاي مو ملاين مثل ما انت متصور

واكو هواية اجوا ترة هم كلشي ما عدهم كالو الف الحمد الله وهسة مشت امورهم

ابو شهاب الله ايسهلك رغم كل ظروفك وخليها ترجية باذنك اخي العزيز
ترة كل العراقيين اللي بامريكا من ضيمهم عايشين هنانا

لا حبا بيها ولا خوفا علة خدش حيائهة مثل متفضلت حضرتك لان هية من الاول مخدوش الحيا مالتها

بس نرجع وانكون احسن من الم اااا وربعة وحكومة الملاااا  

تحياتي

[(بغدادي)]

اخت مينا يمكن مبلغ الكاش المخصص للايجار يمج بفلوريدا ينطوه لمدة 3 اشهر هنا بكاليفورنيا يستمر لمدة 8 اشهر..وهذا للتوضيح للتوضيح فقط..

ما اعتقد اي احد اجة لامريكا طواعية الا اللهم اللي همة رادوهة واجوي هجرة وهذا موضوع ثاني بس اتكلم عن وضع المواطن البسيط فهوة في وضع مسير وليس مخير واني واحد من الناس بس الحياة متتوقف عند مسالة معينة ولازم واحد يحسب للمستقبل شنو اللي راح ايفيدة يعني خمس سنين بسورية او بالاردن شنو الانجاز اللي راح يتحقق بهالفترة ومقارنته بخيار السفر الى امريكا واذا الكفة الاولى رجحت فكان بها والا فامريكا بلد الفرص ولكن مو الفرص السهلة وانما فرص اللي تنجاب بالعمل والكد والبداية لا بد صعبة بس "ان الله مع الصابرين". وشجابرك على المر غير الامر منه..وعذرا لصاحبة الموضوع لان خرج عن مساره..

بغدادي

[احمد سلطان]

حبيبى ابو اندروامو كتلك خوما زعلان هية طابوكة وحدة واللة يوفقنا ويوفقك ويوفق الجميع وصحيح واللة شلون متصير احسن من الحرامية اهل العمايم واكرر اعتذارى اخاف وحدة من الطابوكات فجغتك

[^Miss Violet ^]

زين اخوان عندي سؤال مهم بالنسبة لكاليفورنيا بشكل خاص.. ولباقي الولايات

احنا شخصين بس.. اني وبنتي عمرها 3 سنوات.. يعني ممكن يطلع الراتب الشهري 500 هذا اذا وصل 500

شلون ادفع الايجار

[Abo Andrew]

زين اخوان عندي سؤال مهم بالنسبة لكاليفورنيا بشكل خاص.. ولباقي الولايات

احنا شخصين بس.. اني وبنتي عمرها 3 سنوات.. يعني ممكن يطلع الراتب الشهري 500 هذا اذا وصل 500

شلون ادفع الايجار

بكاليفرونيا الشخصين ياخذون 569 دولار بالظبط

منين اتكملين ؟ هذا جوابة متروك الج لان همة ملهم علاقة

تحياتي

[مينا]

الف عافية والله يتطيكم بعد وبعد وتستاهلون والله تحياتي

[hussein5582]

بس اريد افتهم رحمة لاهلكم هذا شلون لجوء محملينة بية منية اذا الواحد من البداية يجمل على الايجار هسة حتى الايجار ميدفعوة نيااااااااااااااااااالنة ومبروك علينة اللجوء الامريكى واللة حتى مقابلة المحلفين عندى موعد هذا الاسبوع ماروح وابقى بمكانى احسن وممنون من امريكا هجولتنا ودمرت بلدنا وهسة عوووووووووووووود دتقشمرنا بهذا اللجوء الفاكس

يمعود ديكول يا الله من هسه اذا معاجبك لتروح و ليش اتعذب نفسك ابمقابلات و لا شي
الرجال كلك ايجمل من جيبه 40 دولار يعني انطوك كاش 950 دولار معاجبك بس اتجمل 50 دولار. وبعدين همه من البدايه كايلين انوا اذا جاي تعتمد على المساعدات طول عمرك راح تتعب و لازم انته اتشيل نفسك وره 8 اشهر