ܚܘܼܒܐ ܕܗܒ̣ܢܝܐ

[نينوس نيـراري]

ܚܘܼܒܐ ܕܗܒ̣ܢܝܐ

                 
 
ܫܸܡܲܟܼܝ ܡܘܼܚܸܒܬܝܼ ܡܠܹܐܠܹܗ ܠܤܦܝܼܩܘܼܬܝܼ ܘܡܘܼܪܥܸܫܠܹܗ ܙܲܒ̣ܢܝܼ ܕܠܲܝܬܗܘܵܐܠܹܗ ܙܲܒ̣ܢܵܐ
ܚܘܼܒܲܟܼܝ ܫܲܦܝܼܪܬܝܼ ܩܲܨܪܵܐ ܡܸܢ ܫܝܼܫܵܐ ܫܘܼܪܝܵܐܝܘ݇ܢ ܒܸܒܢܵܝܸܗ ܠܸܒ̣ܢܵܐ ܥܲܠ ܠܸܒ̣ܢܵܐ
ܐܲܝܟܼ ܢܘܼܩܙܵܐ ܛܠܝܼܩܵܐ ܥܲܠ ܬܚܘܿܡܵܐ ܕܚܘܼܕܪܵܐ ܟܹܐ ܦܲܪܬܸܠܸܢ ܗ݇ܘܵܐ ܕܠܵܐ ܩܸܢܛܪܘܿܢ ܘܤܲܪܢܵܐ
ܗܲܠ ܕܒܪܹܐܠܲܟܼܝ ܓܵܘܝܼ ܝܵܐ ܩܝܼܢܬܵܐ ܕܚܲܝܝܼ ܐ݇ܬܵܝܵܐ ܡܥܲܠ ܐܘܼܦܩܵܐ ܐܲܝܟܼ ܩܵܠܵܐ ܕܩܲܪܢܵܐ
      
ܚܲܝܝܼ ܩܲܕ݇ܡ ܚܙܲܝܬܲܟܼܝ ܐܲܝܟܼ ܡܸܝܹ̈ܐ ܟܸܠܝܹܐ ܐܲܝܟܼ ܟܲܘܟܼܒ̣ܹ̈ܐ ܓܸܢܝܹܐ ܐܲܝܟܼ ܠܲܝܬܵܝܘܼܬܵܐ
ܚܲܝܝܼ ܒܵܬ݇ܪ ܚܙܲܝܬܲܟܼܝ ܐܲܝܟܼ ܢܲܗܪܹ̈ܐ ܓ̰ܸܪܝܹܐ ܐܲܝܟܼ ܟܲܘܟܼܒ̣ܹ̈ܐ ܠܸܗܝܹܐ ܐܸܬܝܹܐ ܠܐܝܼܬܘܼܬܵܐ
ܠܵܐ ܐܵܢܵܐ ܐܵܢܵܐ ܘܠܵܐ ܓܵܢܝܼ ܓܵܢܵܐ ܐܲܢ݇ܬܝܼ ܚܘܼܕܸܬܠܲܟܼܝ ܫܸܢܹ̈ܐ ܕܥܠܲܝܡܘܼܬܵܐ
ܘܐܲܝܟܼ ܥܸܫܬܵܪ ܠܬܵܡܘܿܙ ܡܘܼܪܝܸܤܠܲܟܼܝ ܡܝܼܵܐ ܘܢܦܝܼܚܠܲܟܼܝ ܓܵܘ ܨܲܕܪܝܼ ܢܸܫܡܵܐ ܕܚܲܝܘܼܬܵܐ
 
ܐܲܝܟܼ ܢܵܘܪܵܐ ܫܡܝܼܛܵܐ ܐܲܝܟܼ ܫܸܟܠܵܐ ܤܪܝܼܛܵܐ ܐܝܼܕܲܟܼܝ̈ ܓ̰ܲܡܥܘܼܝܝܼ ܩܵܐ ܕܡܸܢ݇ܕܪܹܫ݇ ܒܵܪܸܢ
ܐܲܝܟܼ ܡܫܘܿܚܬܵܐ ܚܲܕܬܵܐ ܒܝܼܡܝܼܵܐ ܕܕܲܗܒ̣ܵܐ ܨܸܒܥܲܟܼܝ̈ ܒܸܟܬܵܒ̣ܝܼ ܘܓܵܘ ܠܸܒܲܟܼܝ ܫܵܪܹܢ
ܐܲܢ݇ܬܝܼ ܓܵܘ ܪܹܫܝܼ ܝܼܘܲܬܝ ܬܲܚܡܲܢܬܵܐ ܘܥܲܠ ܤܸܦܬܝܼ ܨܠܘܿܬܵܐ ܒܫܸܡܲܟܼܝ ܒܸܕ ܫܲܪܹܢ
ܘܝܼܘܲܬܝ ܚܲܕ݇ ܟܬܵܒ̣ܵܐ ܕܚܘܼܒܵܐ ܩܲܕܝܼܫܵܐ ܠܹܐ ܤܵܒ̣ܥܸܢ ܡܸܢܸܗ ܟܡܵܐ ܕܓܵܘܸܗ ܩܵܪܹܢ
 
ܝܵܐ ܐܵܫܘܿܪܲܝܬܵܐ ܫܘܼܦܪܲܟܼܝ ܘܲܪܕܵܐܝ݇ܠܹܗ ܐܘܼܦ ܓܵܘ ܦܸܪܕܲܝܤܵܐ ܒܕܡܘܼܬܸܗ ܠܲܝܬ ܦܩܝܼܚܵܐ
ܓܵܘܢܸܗ ܚܲܪܫܵܢܵܐ ܟܡܵܐ ܡܲܚܒܸܢ ܗܵܘܸܢ ܛܠܘܿܠܵܐ ܕܩܲܝܕܲܡܬܵܐ ܥܲܠ ܛܲܪܦܸܗ ܕܡܝܼܟܼܵܐ
ܐܲܢ݇ܬܝܼ ܓ݂ܵܙܵܠܝܼ ܟܡܵܐ ܫܸܢܹ̈ܐ ܪܚܸܛܠܝܼ ܒܵܬ݇ܪܲܟܼܝ ܠܸܨܝܵܕܲܟܼܝ ܘܟܡܵܐ ܕܥܸܪܝܼ ܟܟ̰ܝܼܚܵܐ
ܘܟܡܵܐ ܟܹܐ ܤܵܒܪܸܢ ܗ݇ܘܵܐ ܕܐܵܬܝܵܐ ܗ̇ܝ ܪܦܵܦܵܐ ܕܪܲܦܸܢ ܥܲܠ ܨܲܝܕܝܼ ܐܲܝܟܼ ܢܸܡܪܵܐ ܤܪܝܼܚܵܐ
 
ܐܲܢ݇ܬܝܼ ܒܪܝܼܬܵܐܝ݇ܘܲܬܝ ܓܵܘ ܙܸܡܪܵܐ ܕܛܲܝܪܹ̈ܐ ܓܵܘ ܒܸܟܼܝܵܐ ܕܡܸܛܪܵܐ ܘܓܵܘ ܫܸܡܫܵܐ ܕܙܵܪܸܩ
ܐܲܢ݇ܬܝܼ ܦܩܝܼܚܬܵܐܝ݇ܘܲܬܝ ܥܲܠ ܨܵܨܵܐ ܕܘܲܪܕܵܐ ܘܦܵܘܚܵܐ ܕܓܲܪܒܝܵܐ ܩܵܐ ܤܲܥܪܲܟܼܝ ܤܵܪܸܩ
ܥܲܝܢܲܟܼܝ̈ ܡܸܠܝܹܐܝ݇ܢܵܐ ܡ̣ܢ ܐ݇ܪ̈ܵܙܹܐ ܕܚܲܝܹ̈ܐ ܟܠ ܕܛܵܒܹܐ ܒܥܘܼܡܩܲܝܗܝ ܐܲܝܟܵܐ ܒܸܕ ܥܵܪܸܩ
ܘܐܸܢ ܐܵܗܵܐ ܬܹܒ̣ܝܼܠ ܚܵܕܸܪ ܥܲܠ ܝܲܡܵܐ ܘܓ̰ܵܪܸܒ ܡܲܚܪܸܩܠܗ݇ܘܿܢ ܓܵܘܲܝܗܝ ܒܸܕ ܚܵܪܸܩ
 
ܚܘܼܒܝܼ ܩܵܐ ܪܘܼܚܲܟܼܝ ܐܲܝܟܼ ܚܘܼܒܵܐ ܕܝܲܪ̈ܩܹܐ ܠܚܒܲܩܬܵܐ ܕܙܲܗܪܝܼܪܹ̈ܐ ܒܵܬ݇ܪ ܛܠܲܩܬܵܐ ܕܥܲܝܒ̣ܹ̈ܐ
ܚܘܼܒܝܼ ܩܵܐ ܥܲܝܢܲܟܼܝ̈ ܗܲܪ ܒܸܫܓ݂ܵܫܵܐܝ݇ܠܹܗ ܐܲܝܟܼ ܡܝܼܵܐ ܕܕܸܩܠܲܬ ܕܨܵܦܚܝܼ ܥܲܠ ܢܝܼܢܘܹܐ
ܩܲܕ݇ܡ ܚܙܲܝܬܝܼ ܠܦܲܐܬܲܟܼܝ ܩܲܕ݇ܡ ܡܙܲܓ݂ܬܝܼ ܒܝܼܲܟܼܝ ܤܸܦܘܵܬܲܟܼܝ̈ ܝܼܗ݇ܘܵܘ ܩܘܼܢܛܲܝܦܹ̈ܐ ܕܥܸܢܒ̣ܹ̈ܐ
ܘܐܝܼܡܲܢ ܕܢܫܝܼܩܲܝܗܝܠܝܼ ܪܘܼܦܪܸܦܠܵܗ̇ ܓܵܢܝܼ ܘܐ݇ܡܸܪܝܼ ܐܲܝܟܼ ܕܐܲܢܹ̈ܐ ܠܲܝܬ ܚܲܡܪܵܐ ܕܡܲܪܘܹܐ
 
ܚܲܕ݇ ܡܵܚܘܿܪܵܐܝ݇ܘܸܢ ܪܸ̈ܥܝܵܢܝܼ ܚܒ̣ܝܼܛܹܐ ܒܸܤܒܵܪܵܐ ܠܩܲܢܝܝܼ ܕܡܲܒܪܹܐ ܚܲܕ݇ ܡܲܚܪܵܐ
ܒܸܙܪܲܩܬܵܐ ܕܥܸܝܢܲܟܼܝ̈ ܥܲܠ ܥܲܝܢ̈ܝܼ ܠܗܝܼܩܹܐ ܗ̇ܝܓܵܗ ܕܠܵܐ ܪܥܲܫܬܝܼ ܡܫܘܿܚܬܵܐ ܟܹܐ ܙܵܡܪܵܐ
 ܐܵܕܝܼܵܐ ܗܘܹܐܠܝܼ ܗܲܝܡܘܼܢܹܐ ܕܐܵܟܼܝܼ ܫܡܲܝܵܐ ܨܸܚܘܲܢܬܵܐ ܟܹܐ ܚܵܕܪܵܐ ܠܡܸܛܪܵܐ
ܘܟܠ ܡܫܘܿܚܬܵܐ ܒܢܲܗܪܵܐ ܕܚܘܼܒܲܟܼܝ ܛܵܡܫܸܢܵܗ̇ ܩܵܐ ܕܡܲܥܡܸܕܸܢܵܗ̇ ܟܹܐ ܫܲܕܪܵܐ ܥܸܛܪܵܐ
 
ܦܲܐܬܲܟܼܝ ܚܵܙܸܢܵܗ̇ ܒܓܲܫܲܩܬܝܼ ܠܢܵܘܪܵܐ ܒܓܲܫܲܩܬܝܼ ܠܤܲܗܪܵܐ ܘܒܸܦܬܲܚܬܵܐ ܕܟܬܵܒ̣ܵܐ
ܥܲܠ ܤܸܪ̈ܛܹܐ ܕܐܝܼܕ̈ܝܼ ܘܓܵܘ ܐ݇ܟܘܿܡܵܐ ܕܥܲܝܢ̈ܝܼ ܗܲܪ ܦܲܪܬܘܼܠܹܐܝ݇ܘܲܬܝ ܐܲܝܟܼ ܓܘܼܕܬܵܐ ܕܕܲܗܒ̣ܵܐ
ܗܘܹܐܠܲܟܼܝ ܓܵܘ ܦܲܓ݂ܪܝܼ ܕܸܡܵܐ ܒܸܓ̰ܪܵܝܵܐ ܐܵܦ ܓܵܘ ܢܵܦܵܤܝܼ ܐܲܢ݇ܬܝܼ ܝ݇ܘܲܬܝ ܗܵܘܵܐ
ܐܲܢ݇ܬܝܼ ܚܲܝܝܼ ܝ݇ܘܲܬܝ ܘܩܵܬܝܼ ܚܸܩܪܵܐ ܝ݇ܘܲܬܝ ܘܚܘܼܒܲܟܼܝ ܓܲܢ݇ܒܵܪܵܐ ܠܹܐ ܐܵܬܹܐ ܠܤܪܵܒ̣ܵܐ
 

ܒܝܲܕ ܢܝܼܢܘܿܤ ܢܝܼܪܵܪܝܼ
ܫܒܲܛ܋19܋1989