مرحبا شباب
حبيت اكتب هذا الموضوع بعدين انزل غير موضوع ابشركم بيه بشارة.
طبعا الموضوع بديهي للكل ان السياقة مهمه جدا في أمريكا وذلك لبعد المسافات بين الاماكن .يعني من البيت لأي مجمع محلات ممكن توصل الى 20 دقيقه سياقه وانتو احسبوها شكد بالباص أو مشي.
لكن راح اتكلم عن نوحي اخرى منها اهمية السياقه,إجازة السوق والسيارة في أميركيا
الكثير من اصحاب المحلات او اماكن العمل يطلب من المتقدم للعمل ان يكون لديه سيارة واجازة سوق نافذة وذلك لكي يتخلص صاحب العمل من الحجج التي قد يستخدمها العامل عند حاجة العمل اليه للبقاء متأخرا او الحضور مبكرا(أي ان لا يكون متقيدا بالمواصلات العامة).وايضا كي لا يزيد ضغط استعمال السيارة المخصصة للمحل من قبل الموظفين لا سباب شخصيه.
الكثير من الاماكن تطلب منك رقم اجازة سوق كهويه تعريفيه اساسية وهنالك من لا يترك لك خيار كتاب رقم هوية الولاية.
كما ان هنالك الكثير من المحلات تحسب حساب المستقبل في حال احتاج المحل الى سائق فمن الممكن الاستفادة من الموظفين بدل تعيين شخص جديد لمعرفته بالسياقة فقط. لذلك فهم يطلبون من المتقدم للعمل ان يكون لديه اجازة سوق.
القصد انه لغه بدون سيارة مراح تفيدك هواي.وسيارة بدون لغة هم مراح تفيدك هواي.
فنصيحتي للي ميعرف لغه خلي يتعلم قبل ميجي واللي ميعرف يسوق هم خلي يتعلم قبل ميجي.
هسه نجي للي وصلوا ويريدون يعرفون عن السياقة والسيارات.
اريد ان اشرح بعض الاشياء للاجئين والمهاجرين الجدد واعتبروها نصيحه حتى متضيعون بالإشاعات مال جماعتنه وتتأخرون بحياتكم بعدين تكتشفون ان المسألة أسهل بكثير.
شراء السيارةالسيارات في امريكا ارخص نسبيا من اي مكان. يعني المستعمل الامريكي موديل 1990-2000 تقريبا من 1500 دولار الى 3000 دولار. واكو ارخص بس بيه شويه مشاكل. والسيارة الأمريكية سيارة قويه جدا والادوات الاحتياطية متوفرة الهه بإعتبار انك في البلد المصنع وخاصة في الجنك يارد وهيه ساحات التفصيخ تلكى سيارة كامله كدامك شتريد فصخ منهه واخذ من دولار الى 200 دولار للمحرك اللي مماشي هواي و1000 مكسيكي يشتغلكياهه ب50دولار.
بالنسبة لا سعار السيارات الياباني فالنظيفة من 2500 دولار وفوك للموديل القديم وماشيه وهواي.
قصه قصيرهرحت ويه اصدقاء للجنك يارد للبحث عن (دعاميه)سيارة دودج فان 97. وكان ويايه صديق عنده مارسدس 94يدورلهه على دعاميه. سألنه على الدعاميه مال المارسدس اصلا مموجوده.ودعامية الدودج ب50 دولار فقط مع التركيب.وبالنسبه للياباني غراضه نار عبالك مستورديه من المريخ.
اماكن البحث عن سيارة:- المعارض وصاحب المعرض يسمى (Dealer) وتنلفظ (ديلر).وهذا يكون غالي نسبيا.(وقفاص) احيانا.
- الاصدقاء والجيران.وهذوله يكونون حيل غالين وكللللللش قفاصين(دائما).
- ممكن تشوف سيارات على الشارع عليهه ورقه مكتوب عليهه (For Sale)وممكن تلكى تفاصيل السيارة والسعر ورقم هاتف البائع.
- موجودة جرائد ومجلات لبيع السيارات.
- منجم السيارات هو ال Craiglist وهو موقع تكتب بيه ولايتك ومدينتك ومنطقتك وتختار شنو اللي تدور عليه وبالسعر والمواصفات اللي تطلبهه وهو
www.craiglist.com - ممكن تزور المزادات وتسمى هنانه (Auction)وتنلفظ (اوكشن) يكون سعرهه ارخص بس انته وحظك.
ألتأمينشركات التأمين متعدده وتختلف اسعارها لكنها مقاربه ولن اعطي اليوم اسعار تقريبيه لحين تأكدي منها.
لكن تعتمد الاسعار على :
- نوع التأمين: هل هو شامل أم جزئي.
- عمر السائق,متزوج ام لا,نوع استعمال السيارة.
- خبرة السائق بالسياقة و عدد الحوادث والمخالفات.
اجازة السوق:اجازة السوق اللي هيه نفسهه ال Driver License وتستخرجهه من دائرة المركبات اللي اسمهه D.M.V وتقرأ (دي . أم . في) كل حرف على صفحه.ولازم تقرأ تعليمات السياقه في ولايتك وتروح تمتحن نظري يعني بالورقه تدفع مبلغ معين مو اكثر من 30 دولار وتستلم النتيجه بعد الامتحان بدقائق وينطوك تصريح مشروط للسياقة يعني تسوق سيارة بشرط وجود شخص اخر لديه اجازة سوق نافذه لتوجيهك واسم هذه الاجازه هو (PERMIT) بس جماعتنه يسموهه اجازه مؤقته.
بعد ان تأخذ هذه الاجازة ممكن تسوق أو تتعلم سياقه بمرافقه اي شخص عنده اجازة سوق عاديه. وبعدهه تأخذ موعد للامتحان العملي اللي تروح بيه لإمتحان السياقة اللي يركب وياك شخص يفحص معلوماتك وخبرتك بالسياقة.بعدهه تستلم اجازة السوق.
تعلم السياقة :لازم تحصل ال (PERMIT) قبل سياقة السيارة كي تتجنب مشاكل لاحصر لها في مستقبلك في اميريكا.بعدهه ممكن تطلب من صديق شريف ان يعلمك سياقه لازم يكون عنده اجازة سوق أمريكية .أو تروح لمكاتب تعليم السياقة اللي تعلمك على السياقة وتنطيك محاظرات عن الطريق والسياقه وتأهلك للامتحان النظري والعملي وتكون اسعارهه من 150 دولار الى 350 دولار لكل شئ حتى حصولك على الاجازة.أو تأخذ ساعات تعليم من مكاتب بمعدل 35دولار للساعه الواحدة وتكون السيارة مجهزة ببريك خاص في الجهه الثانيه كي يتحكم المدرب ايضا في حال الخطورة.
انتبه :- اذا كانت جامه السيارة الامامية مفطورة فطر كبير فلازم تبدلهه أو تحصل انذار عليهه.
- انتبه ايضا الى ان السيارة مدفوعة الضريبة او لا وذلك بالانتباه الى الارقام اللي ملزوكه فوك لوحة ارقام السيارة واللي مكتوب بيهه مثلا may 2010 هذا يعني انه السيارة مدفوعة الضريبة لغاية شهر الخامس سنة 2010 وبعدهذا التأريخ انته لازم تروح تدفع عليهه مبلغ حسب نوع السيارة وموديلهه.
- لازم السيارة تخضع لاختبار اسمه SMOG وهذا الاختبار لمعرفة هل ان محرك السيارة يحتوي على عطل او خلل يؤجي الى التلوث البيئي مثل تسريب زيت أو وقود والكثير من الاشياء.وبدون هذا الفحص لا يمكنك تسجيل السيارة.
- يجب الانتباه عند شراء السيارة الى كونها بسجل نظيف او سجل حوادث وهذا مايصطلح عليه ب Clean Title)) اي سجل نظيف أ سيارة بسجل حادث وهذا مايصطلح عليه ب(Salvage Title)وهذا يؤثر كثيرا على سعر السيارة وسعر التأمين ايضا.حيث قد تفرق في السعر الى 1000 دولار بين سيارة ذات سجل نظيف او ذات سجل حوادث.
- كذلك الانتباه الى عداد المسافه في السيارة ويسموه هنانه Mileage وينلفظ (مايلج) وبمعدل
اقل من 140.000 ميل للسيارة الامريكي.
أقل من 160.000 ميل للسيارة الياباني.
فوك هذه المسافات تتعب السيارة وهم مو قاعده لكل السيارات.
يمكن الموضوع مخربط بس خبرتي لازالت قليله بهذا المجال واتمنى من الاخوان ان يساعدوني او يصححولي.
هذا كل اللي حبيت اكوله وانشالله اكمل عن السيارات والاعمال اللي تتطلب وجود سيارة.
غسان الاشقر
سان دييغو -كاليفورنيا
