اخواني هل شاحنه لابتوب ممنوع اخليها في جنطة لابتوب معي بالسفر

[so2005]

اخواني هل شاحنه لابتوب ممنوع اخليها في جنطة لابتوب معي بالسفر لان موظفة iom قالت يجب شاحن تكون في جنط الكبيره

هل هذا صحيح ياريت احد من اللي سافر يخبرنا


وشكرا

[ســـرى]

والله احنا خليناها بجنطة اللابتوب وهم استفادينا منها من بتنا بالفندق ترانزيت لأن ما استلمنا الجنط الكبار وكل سفراتنا عادي الشاحنة وية اللابتوب اول مرة اسمع بهاي الحالة خلي نشوف اجوبة الاخوان يجوز مارين بنفس الحالة تحياتي.

[may76]

السلام عليكم اخي

احكيلك بالنسبة لتجربتي الشخصية فان كثيرة السفر لدول الخليج ودائما شاحن لاب توب في جنطة الاب توب معي وحتى اني في المطارات من والى الدول اللي اروحلها افتح لاب توب واكو مكانات تحط الشاحن حتى تشحن لاب توب خلال استخدامك له

بس بالحقيقة ماعرف ان كان اكو فرق بالنسبة للسفر الى امريكا لان هيه المفروض قوانين دولية تطبق في كل المطارات

وان شاء الله الاخوة يفيدوك اكثر

[so2005]

مشكورين على ردودكم

بالفعل انا مسافر على طول مافي مشكله بس مدرسة الدوره التثقيفيه خبرتنا انه ممنوع الا بالجنط الكبيره
وان شاءالله نجد من الذين سافروا الى امريكا خلال هذه الاسابيع المضت
تحياتي

[laser77]

مرحبا
حبي ماكو هيج شي لان اني محد حجى وياي وتوكل على الله


اخوكم laser77

[لورنس السفاح]

لا ما اتصور
اللاب توب بدون الشاحنة ساعة ونص ساعتين اتصير ثقل زايد هذا اصلا
اذا كان شحنها فوول
اتوقع الموظفة على خطا
تحياتي

[الدكتور هندسه]

اخي العزيز ممكن تاخذ معك بالاضافة الى الشاحنة الخاصة باللابتوب كاميرة و هارد خارجي يعني اكستيرنل هارد وكل الكيبلات المساعدة وفلاشات (فلاش رام) وهذا ما فعلته انا عند السفر ولكن تم تفتيش كل جزء بدقة متناهية والحمد لله وصلت بدون مشاكل

[Alawi]

اخوية ماكو هيجي كلام...والموظفه على خطأ

متتصور شنو اخذت اني ويايه بالجنطه مالت الظهر.. لظلت شاحنه لابتوب او كامرا او جي بي اس كولشي وياية واتصدك لو لا حته مكينه الحلاقه وياي بالجنطه مالت الظهر لا وبعد شيشه ريحه واللي هية اصلا ممنوع ومحد كلي تعال شنو هاي اصلا اتصدك؟ جنطتي ابد محد فتحهه بس اتمر على الكليم مالت التفتيش وهاي هية ...

اتوكل على الرب وتعال واخذ كلشي وياك

اخوك علاوي
كولورادو

[so2005]

اشكركم جميعا" على اجوبتكم الرائعه وراح اتوكل ان شاءالله

تحياتي لكم

[silver_d]

اصلا لتعب نفسك وتجيبها وياك امريكا
لان الابتوبات بالعراق نضام الشاحن مالتها بس على 220V
ونظام امريكا 110 V
فمن امريكا اشتريلك وحده فد مره
احسن مما اتعب نفسك وهيه مبيها اي اشكلات من اتشيللها وياك
تحياتي الك
اخوك سلفر

[ســـرى]

لا اخوية سلفر من رخصتك الشاحنات مال اللابتوب بالعراق حاليا اغلبها تشتغل عال220 وعال110 همين اني مثلا حاسبتي hp كومباك مكتوب عليها الانبوت input من 100 الى 240 وممكن الاخ يقرا اللي مكتوب عالشاحنة مالته

[الدكتور هندسه]

الاخوة الاعزاء كلام الاخت سرى مظبوط لان كافة اللابتوبات مكتوب على الشاحنة الخاصة بها الفولتية التي تعمل بها وهي تعمل على فولتية 110 واني اشجع شراء حاسبة قبل السفر لان هناك مساوء من شراء  حاسبة من امريكا وهي:
المساوء: معظم الحاسبات ذات هارد واحد (بدون تقسيم) وهذا شيء غير جيد لان اذا اصاب الحاسبة فايروس وتمت الفرمته تخسر كافة المعلومات المخزونه وهناك مساؤ اخرى كثيرة ومهمة

[so2005]

اصلا لتعب نفسك وتجيبها وياك امريكا
لان الابتوبات بالعراق نضام الشاحن مالتها بس على 220V
ونظام امريكا 110 V
فمن امريكا اشتريلك وحده فد مره
احسن مما اتعب نفسك وهيه مبيها اي اشكلات من اتشيللها وياك
تحياتي الك
اخوك سلفر

أخي عزيز كل الاغراض وموا كهرباءئيه فيها مجوله خارجيه معناها تعمل على 110-220 فولت

من شاحنات لابتوب والموبايل والايفون وغيرها

تحياتي

[ســـرى]

العفو اخوية الدكتور هندسة الهارد صحيح يجي واحد بس انت ممكن تقسمه بس من مساوئ جلب الحاسبة من العراق هو الراس مال البلك مالتها لأن ما يشبه النقطة مال الكهرباء فلازم تجيبلها تقسيم علمود ترهمها وحدة من الاشياء اللي تفيد انه تجيبوها وياكم فد تقسيم ابو ال4 خانات للاحتيط لشاحنة الموبايل وشاحنة اللابتوب يفيدكم وما ياخذ مكان احنا من اجينا هنا صح لكينا بعدين بس ترة مو رخيصة نسبة لحجمها ولكينا بس منفردة ما لكينا تقسيم كبير وانتو بكيفكم بعد تقبلوا تحياتي

ملاحظة: ما تحتاجون ستكرات عربية لأن كلشي موجود عالاي بي وعالامازون وب4 دولارات وبكافة الاحجام والالوان همين

[الدكتور هندسه]

الاخت سرى البلكات متوفرة بالمول في راديوشيك ب 5 دولارات او اقل وبالنسبة الى اللابتوبات فانها مجهزة بنوعين من اليلكات منه الذي يتلائم مع كهربائيات العراق و منه الذي يتلائم مع كهربائيات امريكا ولكن عند شرائنا الحاسبة لا نعرف اهمية النوع الثاني مما يجعل البعض يرمي هذا النوع من البلكات
من ناحية اخرى ان تقسيم الهارد بالرغم من انه ليس صعب لكنه يتطلب برنامج الوندو والاوفس وغيرها من البرامج والتي اذا لم تجلبها معك يتطلب شرائها وباسعار خيالية تصل الى 1000 $ لان الاوفس يباع مجزء واصغر جزء به يزيد سعره عن 300$
اما اذا جلبته معك خلال السفر فانه عرضة للتلف بسبب النقل والتفتيش والاندثار

[ســـرى]

الاخ العزيز الدكتور هندسة مشكور وممنونة منك عالملاحظات اللي تفضلت بيها ولكن انت في ميشيغان يعني انتو الجالية العربية هواية يمكم ولذلك تلكى هذا النوع من التقاسيم بينما احنا في فرجينيا رحنا كذا محل وما لكيناها الا عند صاحب محل هندي لأن يعرف اللي يجون مناك يحتاجوها واسعارها نسبيا غالية بينما الراديوشاك يمنا ما لكينا بيه اي شي من هذا القبيل وبالنسبة للشاحنة اللي تكول انه نرمها صدكني احنا من المحل جديدة اشتريناها وما كان بيها، مثلا اخوية اشترى حاسبة ال سي دي من الصين درجة اولى وجابها بصندوقها وما بيها هذا البلك اللي يشابه النقطة الكهربائية بامريكا فمو بكل مكان موجودة وحتى شاحنات الوبايلات ما يجي وياها شاحنتين تجي بس وحدة وبلكها ما يرهم بامريكا مهما كان الجهاز حديث.

مشكور عالملاحظات مرة ثانية ومشكور صاحب الموضوع اللي خلانا نتناقش بيه.

[عاشق تراب العراق]

اخوية اخذهة و محد اصلا يحجي وياك بس اخوان البلكات كلش مهمة لان فعلا هنا مشكلة فجيبو وياكم كم واحد و خلوهة سبير

[الدكتور هندسه]

الاخت سرى اشكرج على ما تفضلت ولكني لم اقل ان كل حاسبة جديدة يكون معها شاحنتين بل شاحنة واجدة ولكن ب كيبلان يعني ممكن ان نضع واحد فقط  ونربطه بالشاحنة اما الاخر فلا يستعمل الا عند الحاجة وهذا الكلام اخص به حاسبات   hp  واعتقد ان معظم الحاسبات بنفس النظام

[ســـرى]

اوكي وصلت الفكرة مشكور اخوية العزيز