محتاجين مساعدتكم بموضوع ممكن؟؟؟؟

[ســـرى]

اخواني الاعزاء حبيت اذكر ملاحظة صغيرة واتمنى انه ما ازعج اي احد بيها واعتبروه طلب صغير من اختكم مرت بينا هواية مواضيع يطلبون اصحابها النصيحة او المساعدة او سامعين بشغلة جديدة ويريدون يتأكدون قبل موعد مقابلتهم او مثلا قبل فحصهم الطبي وطبعا الاخوان كل واحد يحب يساعد من جانبه ولكن....... اكو قسم من اخوتنا اللي سألوا السؤال ما يرجعلنا خبر هل النصيحة كانت مفيدة الهم؟ او هل المعلومة اللي سمعوها مثلا تخص الفحص او تغيير بإجراءات معينة كانت صحيحة او لا؟

احنا شنو نريد اخوتي واخواتي الاعزاء بس نريد تأكدولنا المعلومة علمود الاخوة اللي بعدكم يستفيدون من هاي المعلومة وما تظل لغز نحاول انه نحله اتمنى اكون ما طولت عليكم وما نزلت الموضوع بالدردشة لأن هو يخص الهجرة واللاجئين لأن الكل هنا محتاج المعلومة الصغيرة يمكن تفيده مو صحيح وتقبلوا تحيات اختكم سرى

ملاحظة: ترة ماكو اجبار بالموضوع انتو براحتكم بس للفائدة فقط

[راهب الحب]

عزيزتي الإخت سـُرى ::
بصراحة بالنسبة إلي الله شاهد كل موضوع ادخله وأعرف بإن جوابي يفيد الأخ السائل ما أقصّر واكتب إللي أعرفه لو انقله تجربتي الشخصية ..
بس إذا ما أعرف أترك الموضوع وأطلع وكان الله يحبُ المُحسنين ...
شكراً لتنبيهج المُهـِم ودُمتِ بألـف الـف خيــــــر ... †




                        أخـوكـُم / وسـام بهنـام داؤد الخابــوري

[احمد سلطان]

وردة اخت سرى ملاحظة جديرة بلاهتمام

[ســـرى]

اخواني اسعدني ردكم واشكر اللي مروا عالموضوع بس يمكن اخوية وسام ما افتهمت قصدي

انطيك مثال انه مرة قبل اكثر من شهر احد الاخوان طلب مساعدته بمقابلة بالسفارة وكال انه اكو تعليمات ونزل الايميل اللي جاية من السفارة واحنا حاولنا نساعده بس ما كدرنا ننطيه اجابة شافية لأن محد بينا جاية هيج ايميل والاخ بوقتها كناله انه من يروح يقابل ( وهو هسه اكيد مقابل) يرجع بس ينطينا الخبر الاكيد عالاجراء الجديد ولحد الان لا حس ولا خبر فقصدي انه اللي يسأل سؤال وينزل موضوع خلي بس يتابعه علمود اخوانه يعرفون شنو صار وياه يجوز يفيدهم وان شاء الله الكل هنا للفائدة ونورتوا الموضوع مشكورين عالردود الطيبة واكيد اعضاءنا الاعزاء ما يقصرون ولو بالدعاء لاي اخ او اخت يسأل واذا يكملنا الموضوع ويأكدلنا المعلومة بعد أحسن

تقبلوا تحياتي

[^Miss Violet ^]

اي والله سرى عاشت ايدج

وعندي ملاحظة ثانية

يعني اكو بعض الاخوان يكونون موجودين اثناء انتظار المعاملة.. ويسالون ويستفسرون.. ونساعدهم.. بعدين فجأة ينزل موضوع وصلت الى فلان ولاية.. والموضوع عبارة عن وصلت وباركولي و بعد تعب والرحلة متعبة.. زين وين وصول الامنية و تحديد موعد السفر.. وتفاصيل الرحلة و ما الى ذلك.. وبعدين يختفون تماما.. ندري ينشغلون بس احنا ننتظر كلام اللي يوصل جديد

[الفريدو]

عاشت ايدك اخت سرى

موضوع جدا مهم

ياريت الاخوه ياخذو بنظر الاعتبار ويساعدون اخوانهم مثل ما ديستلمون المساعده من غيرهم

تقبلي مروري



اخوك : الفريدو

[ســـرى]

مشكورين اختي فايوليت واخوية الفريدو وبس نريد يأكدولنا صحة المعلومة اللي سئلوا عليها فقط لا اكثر ولا اقل واشكر كل من مر عالموضوع

[eboo]

والله يا اخي سرى كلامك صح ميه بالميه يعني ساعدوني وتالي مع السلامه هو المنتدى خدمي للجميع واني اشوف بيه اهوايه امور يمكن صعب نسمعه من اي مصدر ثاني يا ريت الكل يفيد ويستفاد تقبلي تحياتي اختي العزيزه

[غــــــــزل]

اي والله هذا الحجي صحيح وملاحظة حلوة نرجو من الاخوان والاخوات التعاون بهاي الامور حتى الكل يستفيد

[ابو راشد]

صحيح والله كلامج اختي سرى
مع ملاحظه انو اللي وصلوا لاميركا مواضيعهم قليلة جدا قياسا بما مضى ... مثلا ابو قمر مختفي من زمااااااااااااااان وغيره الكثير من الاعضاء .... نتمنى التواصل منهم


ابو راشد

[جورجيا]

عاشت ايدج سرى على هذا الموضوع
 وانشاء الله تلكين تجاوب من الاعضاء
جورجيا

[engineermech]

موضوع جدير بالاهتمام لكن للاسف الشديد بعض الاخوة ولا اقصد بهم الكل ينظر لمنتدى من باي افيد نفسي الان وعندما يتكمن ويسافر يبلغ الاخوان والاخوات انه وصل الى امريكا وينقطع عن المنتدى وربما ينسى هذا الصرح الكبير
سبحان الله قبل كان يحتاج المعلومة ونصيحة والمساعدة وكان يجدها هنا بكل راحبة صدر وبعد ان تمكن قطع حبل الاتصال والمودة هنا ونسى ان هناك اناس يحتاج الى تجربتة ومعلومات التي اكتسبها من خبرته في الهجرة
اتمنى ان لا يوجد الكثير ممن يسير بهذا الطريق في هذا المنتدى
شكرا للاخت سرى على التنوية
انجنير ميك

[sniperpain]

ولله صحيححححححححححححح سراوي خوية اخوان
ترة الي تقصدة الاخت سرى هو اني و بالفعل قبل المقابلة طلبت مساعدتكم لان جان طالبين مني سجل لكل القاحات السابقة بس من سويت فحص بالشفاء كلولي هاي هيج كلااوات ميردوهة و الحمد اللة قابلت(هههههه مثل ما كالت الاخت سرى واكيد هو قابل هسة )و قابلت و استلمت الفيزا وهسة منتضر جماعة البنفتس يكملون اجرائاتي وتحياتي لخيتي سراوي و اكرر اعتذاري
تحياتي للكل و سامحيني اخت سرى

[ســـرى]

مشكورين الاخوة والاخوات عالمرور بس صدقوني اني ما كنت اعني اللي يروح لامريكا فقط اني قصدت كل من يسأل عن معلومة غير مؤكدة وما يلكى الجواب بالنتدى خلي يرجعلنا خبر شصار شما صار ههههه ومشكورين الف شكر وطلبت طلبي الصغير هذا من باب الاخوة الف شكر لكل من نور صفحتي بالمرور او الرد

[ســـرى]

ليش هيج سنايبر ليش؟؟؟؟؟؟ هيج تعذبنا وياك تدري اني ناسية الاسم اللي طلب شغلة اللقاحات وبوقتها تتذكر من كتلك رجعلنا خبر بس انت غلست  اكيد معذور واحنا كلنا اخوة هنا بس صدكني ما كان قصدي عليك انت بس اني اقصد بشكل عام بس من صدك اني ناسية انه انت اللي طلبت ترجمة الايميل والله، يالله خوش ذكرتني حتى اظل كل مرة اذكرك بيه  ;Dههههههههه، تقبل تحياتي والله اخ عزيز وان شاء الله ربي يوفقك ويفتحها كدامك بس بعد لا تسوي هيج بينا  واني اختك ان شاء الله واي شي تحتاج حاضرين

[sniperpain]

هههههههههههههههههه لا انشاللة بعد ما اسوية  ::)خيتو بس للعلم اني مطلبت ترجمة طلبت معنى الرسالة بس مو من ناحية الترجمة لان اني مترجم قصدي عميل ههههههههههه 

[GoldenEgle]

الاخت سرى ...
  
 اؤيدج على هذا الموضوع صحيح هناك الكثير ولكن ليس باليد حيلة مامعنى الكلام ( يدخلون فقط لمصلحتهم الشخصية ) دون النظر في كيفية مساعدة الاخرين مع الاسف وينسون انهم يوما ما كانوا في امس الحاجة للمساعدة .

 فاغلب الذين يحبون مساعدة الاخرين لاينتظرون شيئا او هدية من الاخرين في هذا الموقع وكذلك من الموقع نفسه يعني المساعدة في سبيل الله وهذا اللي نسعى اليه لنزيد من المحبة بيننا والرب يرى مانعمل .

 تحية لجميع الذين يساعدون دون مقابل .

النسر الذهبي

    

[ســـرى]

  هاااا نسيت انت عميل صدك

يالله ميخالف نطلعها بيك بغير شغلة 

اخوية النسر الذهبي مشكور عالمرور الطيب

[طلعت روحي]

والله صحيح كلامج اختناسرى بس اكو بعض اخوتنا يخافون من الحسدههههههههههه
 وصدكي اختي اني صارلي سنتين الا شهر من مستلم الموافقه ومنتضر الامنيه
في سوريا وكل العراقيين الي بسوريا في جرمانه يعرفون قصتي كل واحد يريد يسئل
عن اجراء او شي خاص يجيني ويكلي على قصته وياخذ الجواب وبعده يكلي لتكول اني
طالعلي توطين ومن يسافر ميكلي اني مسافر ويروح الله ويايه .
بس اني كل الي اكوله المفروض يرد الجواب مثل ما سئل يرد قسم من الجميل مو حتى
سلام ماكو.
والله يوفق الجميع.

[angie-dawood]

الاخت سرى

 اولا  احنا ما نكدر  نجبر احد انه يكتب تفاصيل مقابلاته الي يريد يكتب خير على خير والي ما يحب يكتب ما نكدر نلوم ولا نعاتب اي شخص وحتى الي سافرون وانقطعوا عن المنتدى محد ميعرف شنو هي ظروفهم فالرجاء اتركوا هاي الصفة مال عتاب او ليش هذا مكتب وليش هذا كتب كل معاملة شكل وكل مواعيد التقديم والمراحل بالتقديم دتختلف يوم بعد يوم الي جانوا يسون ثلاث مقابلات يلى تجي مقابلة الوفد هسى اختلفت  صارت بعض منهم كاموا يسون مقابلتين بيوم واحد حتى اجراءات الفحص والدورة التثقفية تختلف من فايل لفايل اكو بعض  بعد مقابلة الوفد يروح راسا للفحص اكو غيرهم لا ينتظرون ورى شهر يلى يروحون للفحص مقصد كلامي لا تعتمدون على مقابلات غيركم كل معاملة وفايل شكل بلكن هو كتب التفاصيل ومن اجه غيره اختلفت التفاصيل شراح يكول يكول لعد فلان ما حجه صح او اخفى عنا المعلومات او  ما كان صادق بكلامه مثل ابسط مثل  اخونا ابو ارا خلال ثلاث ايام من تقديم الاستمارة لليوان حولوا  فايله للتوطين والكل استغرب وكاموا يكذبون الرجال يعني مقصد كلامي كل واحد شكل معاملة  وشكل مقابلات ومرة اخرى اكول ما نجبر اي شخص انه يكتب تفاصيل المقابلة هو اذا يحب يكتبها ما يريد هو حر والكل هنا يساعدون لوجه الله وليس لمصلحة مو هذا خلصت مصلحة وراح ومااعرف شنو من هل كلام رجاء اتركوا المعاتبة فلان كتب وفلان ما كتب الي عنده معلومات يفيد بيها والي ماعنده ماكو عتب عليه وشكرا لموضوعك وملاحضاتك اخت سرى

[ســـرى]

مشكور اخوية ابو حنين عالمرور تسلم


اختي العزيزة انجي اني ما قصدت اللي يروحون لامريكا وما قصدت مقابلات المحلفين مثلا اني قصدت لمن تكون اجراءات جديدة والاخ السائل بعدين يتاكد منها بس ينقللنا الخبر وكتبت في بداية موضوعي انه ((طلب صغير)) يعني ما بيه اجبار حبي ولا اكو اي اشكال كان طلب وما بيه عتب على جماعة امريكا من جانبي على الاقل وشفتيه الاخ سنايبر كال انه هو كان سائل بموضوع معين على لقاحات الاس اي في ومن رايح للمقابلة طلع ماكو هيج شي وان شاء الله الاخوان بردودهم ما اتجاوزوا على اي شخص احنا كلنا هنا للفائدة وان شاء الله نلتزم بهذا الشي وعنوان موضوعي هو ((محتاجين مساعدتكم موضوع ممكن؟؟)) واتمنى ما زعلت احد بموضوعي بس هو طلب لا اكثر ولا اقل. مشكورة عالمرور تسلمين.

[angie-dawood]

 حبيبتي ملاحظاتي عامه  سواء على اللي داخل امريكا او خارج امريكا  يعني شامله لكل الاعضاء  

 الاعضاء احرار في كتابة  تجاربهم  او معلوماتهم او ما يعرفوه في المقابلات والفحص الطبي وغيرها

[ســـرى]

مشكورين الجميع عالردود والمرور وان شاء الله ما كان الموضوع بيه زعل لأحد تقبلوا تحيات اختكم سرى والله يزيد المحبة والتعاون ما بين الجميع امين.

[jack_of_arabia]

السلام عليكم ... ملاحظة الأخت العزيزة سُرى صحيحة وجديرة بالأهتمام واتمنى من الأخوان التواصل مع مواضعيهم لان انا اعتبر هذا المنتدى خير دليل للناس اللي مسافرين على امريكا وصراحة انا وكثير من الاخوان الاعضاء والزوار استفدوا بشكل كبير من هذا المنتدى والدليل انك عندما تنزل موضوع معين تجد الأعضاء الذين لديهم جواب او نصحية يبادرون بالرد على موضوعك مع شكري وتقديري لهم . تحياتي ... جاك

[ســـرى]

مشكور اخي جاك نورت الموضوع الله يبارك بيك.