مساعده اذا امكن وضروري

[BASHARONA]

السلام عليكم اخواني واخواتي ارجو ان تساعدوني لان عندي نقص بلمعلومات الي مقدم بيهه على iom في بغداد اني اشتغل مع القوات الامريكيه في بغداد وقدمت على iom في بغداد وانطوني الكيس نمبر في تاريخ 29/4/2010 الي هوه  IZ- ولو هوه رقمم طويل جدا بس التساهيل من الله.وبعد ماعندي معلومه شوكت وشلون والمطلوب والاتصال وغير ذلك ارجو المساعده منكم.اخوكم بشار

[durar]

الف مبروك اخوية العزيز  على ال اي زت نمبر  
المسائلة تحتاج وقت وصبر
انت الان بانتظار المقابلة الاولى وهم راح يتصلون بيك على رقم هاتفك  واكيد انت منطيهم رقم هاتفك
ولا تغير  رقم هاتفك
 وهنالك رابط للاخ العضو عكعك  يفيدك بالنسبة للمقابلات
 الرابط موجود في المواضيع المثبته بالمنتدى

http://www.ankawa.com/forum/index.php/topic,294296.0.html

[BASHARONA]

اشكرك اخويه بس اتمنى من المراقب ان يمسح الموضوع لان يكولون ممنوع ان اكتب رقم الكيس نمبر

[angie-dawood]

اخي العزيز تم مسح الرقم حفاظا على سرية الكيس مالتك  انت لو منتبه لموضوعك كان عرفت اني حذفت الرقم من بداية تنزل الموضوع لان مايصير تكتب الرقم على العام

[ســـرى]

اخي انت ما تكتب علمودك انت ومن يمك بس تروح عالمربع مال كلمة (تعديل) وتضغط وتكدر تعدل رقم الكيس تكتب بيه (xxxxxxx) وتقبل مروري.

[BASHARONA]

اشكرك يلمراقب يلغالي اعذرني جديد بس ممكن اعرف سلبياتهه شنو

[BASHARONA]

مشكوره اختي سرى اقدر هذا الشي بس يععني اول مره بس علمود الموضوع لتنسوو

[ســـرى]

اخوية العزيز نظرا لأن المنتدى مفتوح للجميع اعضاء وحتى ضيوف فرقم الكيس مالتك رقم يجب انه ما تصرح بيه مثل اسمك وخصوصا اذا كنت تعمل بعمل حساس او ما شابه فلذلك الاخوة مشكورين نصحوك بحذف الرقم والاخت انجي مشكورة حذفته حتى ما يطلع الاخرين عليه وتقبل تحياتي.

[BASHARONA]

اشكرج هوايه اختي بس مثل مكلت انو مااعرف اعذريني واكيد شكري لانجي وشكرا للاخوه الي نبهوني

[angie-dawood]

تتعلم اخي كلنا مجنا نعرف عادي تصير بارقى العوائل

[ام مشمش]

اخي لمفروض هم يتصلون بيك على مقابله

[وردة بغـداد]

اخويه BASHARONA

انته هسه تنتظر تلفون منهم او ايميل منهم لمقابلتك الاولى

والتسهيل من رب العالمين بس افضل تطلع ع موضوع اخونا عكعك لان بيه معلومات

كلش مفيده الك

تحياتي الك

اختك وردة بغداد

[Linda1]

اخي صاحب الموضوع انتظر يدزولك ايميل يبلغوك بموعد المقابله الاولى  مالتك وراح يذكرون الك الوقت  والمكان والتعليمات وين تروح واذا انت بالعراق  راح تكون مقابلتك بالمنطقة الخضراء من البوابه يم ساحة النسور وبالايميل ماتهم وصف دقيق كلش للمكان واشلون تدخل والاسكورت الي يكون بانتظارك وبالموفقيه انشاء الله.



اختك ليندا

[لورنس السفاح]

اهلا اخي العزيز
بالنسبة لرقم   ال IZ مالتك ومثل ما كالوا الاخوان ميصير
تكتبه ع العام وانما تشير اله برموز مثل IZ000000000  او    IZxxxxxxxxxxxxxxx
حفاظا على سرية الكيس مالتك
وهسه انت بمرحلة انتضار المقابلة الاولى اللي راح يبلغوك بها
اما عن طريق الهاتف او ع الاغلب عن طريق الايميل مال بغداد اللي هو BaghdadInfoCenter@iom.int
واذا شفتهم اتأخروا عليك بتحديد موعد المقابلة الاولى
راسلهم بايميل لكن يجب ان تذكر بالسبجيكت مال الرسالة رقم ال IZ مالتك
حتى يسهل عليهم متابعة ملفك
بالتوفيق لك وعذرا ع الاطالة
تحياتي

[BASHARONA]

اشكركم اخواني واني صدك جنت محتاج هاي المعلومات  انشاء الله كلشي ينحل بوكته واتمنى للجميع ان تنحل شغلته والموفقيه للجميع