اخويه العزيز صاحب الموضوع
انته انصح صديقك مره ثانيه خليه باقي بالعراق احسنله هنا لو يجي مراح يكدر يعيش العيشه الي هوه رايدها ابن عمي انته
يعني هوه مقاول وهوه اكيد ممحتاج للجيه مال امريكا يعني صدكني ترا امريكا متستاهل كل هالتعب هنا تصرف وميجي مكانه مثل ما يعرفون الاخوان الي عايشين بامريكا
اخويه خلي يرووح يشتري باربيل شقه من هالشقق الانكليزيه اب 60 مليون عراقي ويكعد يسكن عائلته بيها وارقى المدارس العربيه باربيل احسن مما يجي امريكا وهم باجر عكبه يخسر جهاله هنا
المهم
بالنسبه للتقديم مالته يكدر يقدم من العراق على ال اس اي في وكلش سهله ومن يستلم الجيف اوف مشن
يكدر بالفورمه مال i-360 يختار الدوله الي راح يقيم بيها المقابله والفحوصات على سبيل المثال تركيا لو عمان
وابووك الله يرحمه من يكلوله يابه انته مقابلتك فلان يوم وهوه يرووح قبلها اب 3 اسابيع يسوي الفحوصات ويسوي المقابله وياخذ الفيزا ويكمل باقي الاجرائأت
وابووك الله يرحمه
وبالنسبه اله من ياخذ الفيزا مال امريكا
يكدر يرجع للعراق ويقدم على المساعدات
ويطير من مطار اربيل او مطار بغداد او مطار السليمانيه على امريكا
وهذا كل ما في الامر الشغله جدا سهله وميرادلها اي تعقيد بس الشغله مو هينه انو الواحد لازم يفكر بيها
زين قبل ميسافر امريكا لان هنا صدك بلد الاحلام
(بلد الجحيم )
تحياتي
سلفر كالفورينيا
احترمك واحترم رأيك اخي الورده سلفر واشكرك على المعلومات الحلوه الي قدمتهه بواسطة ردك الاخير.
بس تدري اخي اني شفت الكثير من الحبايب الي رايحين لاميركا واكثرهم رأيهم يخالف لرأيك واكيد اني متأكد انته دتعاني من الغربه ومثل ميكولون الاعضاء الحبايب بالمنتدى كلمن وحظه من يوصل لاميركا والكثير من الاسباب قد تؤدي الى المعانات مثل عدم انسجام الشخص مع البيئه الجديده والغريبه عليه وعلى عادات حياته السابقه ويجوز المنطقه الي راحلهه موزينه ويجوز هوه الشخص اصلا مينسجم مع الناس الجادين ومثل منعرف ان الاميركان شعب لاتحركه العواطف مثل الشعوب الشرقيه والي يعتبر الشعب العراقي جزء منها.
واخي العزيز كن على ثقه ان العراق بفترة القتل الطائفي والفوضى العارمه الي صارت بسنوات 2006 و2007 وبدايه 2008 احنه مفكرنه نتركه وجربنه العيشه بعدت مكانات ومحافظات بالعراق ومن ضمنها محافظات كردستان صحيح هناك الوضع اهدأ بس تحس احساس قوي بالغربه وكأنك عايش بمكان مختلف اختلاف كلي عن مدينتك وتبقى تراوح بمكانك لسنوات وسنوات يعني تاخذلك مقاولة في محافظتك او محافظه مجاوره لان طبعا علاقاتك ونشاطاتك بس بهاي المناطق خوما انته ( توب كولش ) هههههه.
وتحصل شكم فلس تبدل سيارتك بسياره احدث وتصير طكوك ومصرف وطلعه وطبه وتاليهه تنطي لهدات فلوس للخطافه لو ايصير انفجار لاسامح الله وتروح السياره (هاي اذا انته مرحت وياهه). حبيبي هذا كان رد صديقي بعد ان اخبرته بنصيحتك ان يبقه ويرتب وضعه ( ويحترم نفسه ) واني طبعا مقتنع بكلامه.
واشكرك لان داحسك صدك متألم واني جدا متعاطف معاك حبي واتمنالك الاستقرار والموفقيه والنجاح في حياتك.
واريد اعرف رأي الحبايب من الاعضاء بما طرحته عن صعوبة العيش في اميركا.
