استشارة من كافة اعضاء عنكاوا ارجوا المساعدة

[lionofiraq]

شلونكم اعضاء المنتدى ارجوا ان ما اطول عليكم و لا اخذ من وقتكم بس حبيت اطرح عليكم موضوع يخصني انه المنظمة المسؤلة عليه عرضوا شغل علية و على بقية الشباب الي وياية الي هو كرصون ههههههههه اقصد نادل بس الساعة 3.25  و بيها نسبة من الوجبة  يني بغشيش فما اعرف اذا اكو احد من الأعضاء مشتغل او عنده احد اشتغل هاي الشغلة قبل ارجوا ان يساعدني بالمعلومات و العمل بي منافع زينة مثل التأمين الصحي و غيرها ,  و العمل هو فل تايم يعني دوام كامل اقل شيء 30 ساعة بالأسبوع بس بالشفت اقل شيء راح يكونون 4 الى 5 نادلين و العمل مكانه في فندق جيد

[hussein5582]

اخويه بصراحه اعتبره شغله ممتازه بس بيه الزين و الموزين
بالنسبه للتامين الطبي او البنفت هاي تعتمد على الشركه الي انته مشتغل يمه و شنو نوع الضمان او ويا اي شركة ضمان تتعامل شركة المطعم .
اما بالنسبه للراتب فهو مناسب وهذا المتعارف عليه

الشغله الوحيده الي مو زينه و الكثير من العراقين علموده مديشتغلون بهاي الشغله هي تقديم الكحول والمشروبات الكحوليه ,, لانوا الكثير منا ميقبل ايقدم كحول لانوا حرام بالدين الاسلامي
فهي تعتمد عليك

[lionofiraq]

اخي العزيز بارك الله بيك الضمان الصحي يشمل الأسنان و العيون و كافة الأمراض


اما بالنسبة الى تقديم الكحول اكو حانة خاصة بالشرب بس احنة مو يمنة يعني اصلا بيها عمال

[ام مشمش]

بالتوفيق

[lionofiraq]

شكراً ام مشمش

[angie-dawood]

اخي العزيز هاي الشغلة يسموها ونترس العمل بيه يعتمد على التب يعني البقشيش احيانا يوصل البقشيش اكثر من الراتب وبالنسبة للتامين حسب الفندق اذا صاحب الفندق يسوي تامين للعمال او لا
وساعات العمل حسب الجدول الي راح يكون كل عامل كم ساعة يشتغل بالاسبوع

[Aiham_]

اولا الشغل شرف و مو عيب اذكر جنت اني بالكلية ( هندسة ) و اشتغلت حمال حتى اوفر لنفسي المتطلبات  و ما احتاج احد هاي وحدة ثانيا رب العالمين يكول بمحكم كتابة و ما اريد اسويها شغلة فتاوي حتى ما ياخذ موضوعك منحى اخر بسمالله الرحمن الرحيم (( فمن اضطر غير باغ )) اذا انتة مظطر لهذا الشغل لله يسهلك ... اشتغل اخوية لان انتة بغربة و مو يم اهلك حتى احد يساعدك و اتمنالك التوفيق من كل كلبي

[lionofiraq]

شكرا انجي

شكرا لك اخوية ايهم و اني احيي بيك روح الشباب المتحمس و اني همين مثلك بس حسب خبرتكم الواحد يكدر يطلع وية البغشيش و الراتب فد 1100 دولار حتى يعيش منها؟؟؟ هذا يعتبر مستوى ادنا للمعيشة

[Aiham_]

 تدري اخ لايون احب اذكرك بايام و لكن ماكو وجه للمقارنة مع اعتزازيللاخوة المصريين و طبعاالبارحة اني و الحجية والدتي جنة دا نحجي بالموضوع كلتلها المصريين الهم قدرة لتحمل الغربة مو طبيعية حتى يبنون حياتهم  و يكونون مستقبل اني اعتبرهم مثل للنظال من اجل الحياة من جانو يشتغلون بالعراق و هسة اغلبهم عدهم فلل و عمارات بمصر , طبعا انتة ما تريد فلل و عمارات بس اخوية اقتصد و اشتغل و اني لو منك و واصل لامريكا جان حتة شمعة وحدة اخليها مشتغلة حتى اوفر الي كم فلس لا المثل يكول ( المال بالغربة وطن ) و اني جربتها طبعا رستق امورك اخويا و صير سبع و لا تباوع على فلان و علان انتبه لنفسك و بس و معليك من الي يسنكفون بالشغل .

[lionofiraq]

الف شكر الك و لكل عراقي غيور و اني ان شاء الله ارسم طريقي صح و اشتغل و اعتمد على نفسي بس احب اسمع راي الأعضاء الأخرين اذا امكن لأن منتدانا مليان بالكفائات و اصحاب التجارب الناجحة

[lionofiraq]

عمي اني الضاهر ما عندي مجموعة هنا و يظهر كلها مجاميع فمنا وغاد ما ادخل باسم مذكر ادخل باسم مؤنث حتى يساعدوني بالنصيحة الزللللللللللللللللللللللللم

[مهاجرين بلا حدود]

اخوية العزيزاسد العراق
انت من اسمك مبين راح تقبل بالشغلة مو بلة ؟

على كلا اخي الشغل ضروري لاثبات الذات وكسر طوق الملل ولابد من الاختلاط هناك والتعرف على شخصيات جديدة سواء بمكان العمل او تتعرف على ناس جدد كزبائن مثلا

امريكا علاجها الوحيد الاختلاط ...... وان شاء الله ...رب العالمين يسخرلك اولاد الحلال اليوكفون وياك بمحنتك ....وتصير سوالف

اخوك ابو محمد
ع م ا ن دي سي

[ارمنيان]

حبي Lion الله يوفقك يا رب..اذا مو كلنا فاغلبنه بدينه من الصفر و صرنا والحمد لالله. بس الشي الي انصدمت بي هو الراتب؟؟؟؟؟؟؟؟؟؟؟ شنو 3.25 ؟ ؟؟؟ 3.25  دولار بالساعة؟ لا اتخبلني يمعود يعني على حجايتك 30 ساعة بالاسبوع و اسبوعيتك 100 دولار؟ ادري هذا عذا التب و البقشيش بس همينه هذا الراتب والله ابد ما جنت متوفعه وجماله  بامريكا هسه لو بالصومال انكول اي بي مجال... اتمنه اكون غلطان و مو هيجي الحجي

شكرا خويه

ارمنيان

[National]

صحيح الراتب جداااااااااااا قليل يعني بالهند مصايره بس أعتبرهه محطه للأنطلاق تتعرف بيهه على المجتمع وعلى ناس بلكي الله سبحانه وتعالى يرزقك من خلال هذ المكان في شغل ايعيشك انت ومن معك عيشه طيبه بس انته لايكون هدفك هذا المكان خاصة اذا كان عندك شهاده او مهنه واتمنالك التوفيق

[lionofiraq]

الف رحمة على والديكم و شكرا منكم جميعا فردا فردا لكن اكو ناس اكدولي و يبقى الرزق على الله انه اكدر احصل منه دخل يعيشني عيشة كريمة بس مو اوفر منه هواية و هذه بداية و بلكت احصل فرصة افضل و كله رزق من رب العباد

[متوكل على الله]

اخي العزيز...الله يوفقك ويوفق الجميع ويفتحلكم باب الرزق
اولا ... احسن ما انته كاعد حاليا...استفاد من هالفرصة لأن راح توفرلك تعلم سريع لأن هذي الشغلة برغم قلة مدخولها بيها ميزة انها تعلمك المخالطة وهذا برايي اهم شي تحتاجه للنجاح مستقبلا طبعا بتوفيق رب العالمين اولا

ثانيا قبولك بالعمل يقوي من ملفك ويثبتلهم بانك جاد في ان تتحمل المسؤولية للحياة هناك

ورايي اقبل بيها ولو مؤقتا لحين ما تلاقي فرصة احسن..واني متأكد انه رب العالمين راح يفتحها بوجهك وبوجه كل انسان مثابر ومجتهد......بالموفقية اخي العزيز

[ملوك العالم ريال مدريد]

السلام عليكم
اخي مبروك على الشغلة وان شاء الله الله يوفقك ويباركلك بشغلك ويرزقك



                                                اخوك
                                        ملوك العالم ريال مدريد

[Edy Simon]

عزيزي ابو الشغل
اولا اكلك مبروك على حصولك على الشغل, لانه الحركة بركة على كولت المثل.
او ثانيا عدنا مثل بالعراق يكول اشتغل اب فلس او حاسب البطال, لانه مو بس الفلوس هي المهمة بس الشغل بفيدك ويعلمك اشياء اهوايا, منها الاحتكاك بالناس او اتشوف الوكت اشلون اب سرعة ينكضي او على فكرة بلكي الله يفرجها عليك او تتعرف على ناس اهل الخير او ينطوك شغلة افضل او بعدين امورك تتحسن او بارك الله بيك او اتمنى الك كل الخير تقبل تحياتي
جوسيؤ البغدادي

[^Miss Violet ^]

نعم اخي انا رأيي من رأي الكثير من الأخوة الذين أبدوا رأيهم هنا

مو عيب تكون ويتر.. هي هاي الشغلة في كل مكان في العالم شغلة ترانزيت يعني مثلا الطلاب او اللي يريد يدور على شغل و يريد فترة حتى يرتب اموره ويلكي الشغل المناسب.. يعني اكيد ما راح تبقى ويتر.. لكن هالشغلة راح تخليك تحتك بالناس وتحسن اللغة و متكعد بالبيت و تصرف على نفسك.. وتعرف المجتمع والمكان اللي انت بيه.. وتثبت للمنظمة و الدولة اللي مستقبلتك انه انت مو عالة عليهم

والله يوقك يا ربي و تصير صاحب مطعم مو ويتر

[اسامة الهاشمي]

 اخي العزيزlionofiraq اتوكل على رب العباد واعتقد انه انته كان هذا تفكيرك من طلعت ومن قدمت انه اتحصل الفرصة  وهسه انته امامك هذه الفرصة ويا اخي العمل عبادة اتوكل على الله وان شاء الله  خير ( اسعه يا عبدي واني اعينك ) واتن شاء الله هاي فاتحة خير عليك انه انته بديت تعتمد على نفسك ....

ربي يوفقك .......











احلـــــــــــــــــــــــــــــــــــــــى منتـــــــــــــــــــــــــــــــــــــــــــــــدى

[عكعك التطوى]

اخويه اسد اللعراق اشتغل اي شغله شريفه ومتغضب الله سبحانه وتعالى والله سبحانه
يفتحها بوجهك من اوسع ابوابه

تحياتي

[lionofiraq]

احب اشكر جميع الأعضاء بدون استثناء على النصح و الكلام الجميل و اشركم على روحكم الطيبة و اني اشعر انه اني في بيت مليان بالأخوان الي يخافون عليه و يريدون مصلحتي و اني اوعدكم ان ابيض وجهكم و اخليكم تفتخرون بالعراقي السبع الي يكون مثابر و طموح و العافية درجات و الله يسهل علينا اجمعين شكرا مرة اخرى و بارك الله بيكم