هسة بعد المعايدات والتبريكات بالعيد السعيد اعاده الله عليكم باليمن والبركة.......
نجي شوية نسولف بالغدوية مال العيد وهي عادتا تكون غدوية فلكلورية تاريخية اسطورية خرافية عراقية اصيلة وتختلف العوائل بهذه الغدوية فالبعض يتجمع صباح كل عيد وبعد التهنئة بالعيد مباشرتا اول موضوع حينفتح بين النسوان شنو الغدة شرح نسوي وطبعا مرات اكون الاتفاق عليه قبل بيوم بالتلفونات بس العمل بالاكل اكون بنفس اليوم طبعا.......
ويعتمد نوعية الغدة على اذا جان اكو ذبح خرفان فاكيد الغدة قوزي مرتب لشه كاملة على تمن عنبر من هذا الي اول متشم ريحتة تكوم تبجي وتشمها من باب البيت وعليه الحباشات من لوز وكشمش ورشته وبيض مسلوك وبعدين تجي العينتين اللشة تنزل على الصينية طبعا اللشه خربانة من الضحك بس اطخها توكع اللحمة من العظم يعني بين قوسين لشة خجولة وطبعا اكو فد جم دولكة مال شنينة متوزعة على حافة الميز هاي فائدتها حتى تشرب ودج الاكل زين و ما احجيلك ورة الواحد مياكل ينراد اشيلو بسدية وشديلو مغذي بايدة طبعا المغذي بي جاي زنكين..........
اما اذا ماكو خروف بالموضوع فالاكل الي رح اكون كالاتي:
طبعا من مقومات الميز العراقي الرئيسية هي الطولمة والطولمة انواع حسب نوع المطبخ يعني المطبخ المصلاوي يختلف عن الكردي وعن البغدادي والجنوبي يعني اكو حمرة وحامضة حيل واكو بيضة و اكو احطون باكلة بيها واكو ميحطون والمكونات تختلق يعني البصل والبيذنجان والفلفل والخيار واللهانة ورك عنب و طماطا وسلك والشجر........
طبعا اكيد اكو عل ميز هم تبسيات مال باذنجان ملفوف بلحم يعني ملوكي و دجاج ملوكي.......
فد ثنين بشميل مكون من معكرونة وبزالية ودجاجج مسلوك وكثيرا من الجبن القشقوان ومحروك من فوك
اكو هم على الميز فد جم ماعون مركة وعادتا هي بامية ويابسه واكيد فد جم ماعون تمن ابيض
نجي هسة على التصفيطة مالتهم على الميز طبعا يتراس الميز هي صينية الطولمة الخنفشارية ويكون موقعها بالنص وعل جوانب الميز اكو تبسي باذنجان ملوكي يمة بشميل هاي بكل جانب و مواعين المركة تتوزع بالتساوي على جميع انحاء الميز والتمن الابيض كذلك حتى الكل يكدر انوشها و ماكو ماما صبولي وبابا ناوشني
واخيرا اكو لي وره فد جم ماعون مقبلات الى هية زلاطة عادية وتبولة الى اول شي تخلص ولو تلحك لو متلحك انت وحظك شغلتها مثل شغلة الIOM لو تلحك لو لا
طبعا النسوان اكونون كاضين العيد بالمطبخ و الزلم كاعدة بالهول والزعاطيط ديفترون و لعبون مثل المخابيل واول ميكولون اتفضلو اصير سباق المرثون الى المطبخ او المكان الي انصب بي الغدة و ويتجمع المتسابقون عند الحافة الامامية للميز و الوصل متاخر لازم احاول يخترق القشرة البشرية المتكونة حول حافة الميز حتى يكدر يوصل الى نواة الميز حتى ديصبلة و ما احجيلكم على النصب الى اصير على الميز من (ديربالك على اللية فلان وديربالك علينا وابني لاتكرط الميز ترة انريدة وهله هله بنفسك ابو فلان) و من هاي النصبات الحلوة وطبعا ما احجيلكم على اخوكم ماخذ 5 ميداليات ذهبية بالاكل و 3 فضية مع الاسف لانه جنت ماكل يمكن كيلو كيمر عرب على الريوك فاخوية اخذ الذهبيات مني هههههههههههههههههه
طبعا وره ميخلص الاكل عادتا تجي الفواكه من ركي وبطيخ و تفاح .....الخ .....ولازم الواحد من يتغدا يحسب حسابة انو ميخلي المعدة تنترس وخلي قسم الزفريات الي بالمعدة ميتجاوز قسم على قسم الحلويات والفواكه لانه اذا اتجاوز بعد الواحد ميكد ياكل لا حلويات ولا فواكه.........
هسة خلصت فقرة الفواكه والحلويات هسة لازم يجي الجاي الزنكين الى هو عبارة عن استكان شكر و بي شوية جاي لانه احنة العراقيين ميعجنه نحط شكر هواية
طبعا وره الغدة هذا اذا تروحون تفحصون السكر يطلع واصل للمنتخب
اقل شي فد 500 واصل .
المعدة بهاي الحالة مرح انسميها معدة رح انسميها ست البيت او خباطة بكيفكم لان رح تنترس انواع واشكال الله يساعدها وتضل طول اليوم هي بس تهظم وتسب.
بالحلقة القادمة رح احجيلكم على العشة ولو هو مضل مكان والمعدة Busy .
تحياتي الكم والف عافية........
