سؤال لفطاحلة التوطين وقدماء المتقدمين في كل مكان

[عمر عراقي]

حبايب اني مقدم جديد على اليو ان طبعا اني احب اسئل سؤال مو الا اني استفيد
حتى لو يستفيد غيري طبعا اني راح اكون سعيد وفرحان ( للعلم سعيد فرحان هذا مو اسمي مجرد وصف لمشاعري)
المهم حبايب
اريد اسئل سؤال الي يقدم شهادة وفاة ابوه او ابنه مثلا وهو احد ضحايا القتل العشوائي في العراق
هل هذا يزيد من فرصة قبول توطينه واسراعه؟
مع حبي ياحبايب
قبلااااااااتي للجميع

[العزاوي 55]

اهلا فيك عمر عراقي في منتدى كل العراقيين
طبعا تفيد بس لازم يكون عندك شهادة وفاة رسميه تثبت انه قتل اثناء معركه او تفجير 
الله يبعد عنكم وعن كل العراقيين الشر

[داليا الوردة]

السلام عليكم اخي
اكيد يعزز الموقف ويسهل الامر بس لو عندك اوراق تحقيق افضل ومخطط للحادث بس لايكون الحادث من قبل القوات الامريكية لان هذ يعقد الموضوع وميعتبروه اعتداء ارهابي
يعني الا ان يكون احد ارهابي قاتلة او انفجار مفخخة او عبوة ولا علاقة للقوات الامريكية بهذا الامر
ارجو ان اكون افدتك
واكيد انت لافرحان ولاسعيد واضحة الشغلة اخي

[عمر عراقي]

بصراحه عندي ولد صديق بالعراق استشهد بالعراق قبل 4 سنوات
وهسه اخوه اليوم وصل لعمان وراح يكعد يمي وخلال اسبوع الجاي يروح يقدم ان شاءالله
بس المشكله انه شهادة الوفاة الموجودة عندة لااصليه لاملونه عنده نسخه اسود وابيض
طبق الاصل من شهادة الوفاة الاصليه طبعا. (بالاختصار المفيد الاصليه ضايعه وميكدر يطلع غيرها
لان اخوه الله يرحمه انقتل في احدى المحافظات البعيده وماعنده احد يسافر لهاي المحافظه يطلع شهادة
وفاة ثانيه)
واذا متفيده المستنسخه مو مشكله يقدم بدونها والله كريم

[عمر عراقي]

السلام عليكم اخي
اكيد يعزز الموقف ويسهل الامر بس لو عندك اوراق تحقيق افضل ومخطط للحادث بس لايكون الحادث من قبل القوات الامريكية لان هذ يعقد الموضوع وميعتبروه اعتداء ارهابي
يعني الا ان يكون احد ارهابي قاتلة او انفجار مفخخة او عبوة ولا علاقة للقوات الامريكية بهذا الامر
ارجو ان اكون افدتك
واكيد انت لافرحان ولاسعيد واضحة الشغلة اخي

داليا الورده اكيد اني هسه جدا سعيد وفرحان لان اتعرفت بيكم وبهذا المنتدى الممتع والمفيد
وشكرا على التعليق المفيد

[عمر عراقي]

اهلا فيك عمر عراقي في منتدى كل العراقيين
طبعا تفيد بس لازم يكون عندك شهادة وفاة رسميه تثبت انه قتل اثناء معركه او تفجير 
الله يبعد عنكم وعن كل العراقيين الشر

شكرا حبيبي الورد العزاوي 55 اني جدا ممنون لتعليقك المفيد
وارجو متابعة ابداء الرأي

[داليا الوردة]

شوف اخي العزيز خلي يقدم الشهادة اللي عندة ويوضحلهم من يقابلوه انو من الصعوبة ان يحصل على ملونة او اصلية لان هوة اصلا مو بالعراق وهمة عليهم الباقي اكيد راح يتاكدون من هاي اللي عندة بس ارجع واكلك انو اكيد راح ترفع من قيمة الكيس والموضوع مالتة وتقبل مروري واني بالخدمة
اختك داليا الوردة

[عمر عراقي]

ياريت همه يتأكدون ويفضوهه بس اتوقع ميكدرون يتأكدون
لان خوما يخاطبون دائرة الطب العدلي مال محافظة (السحتوتيه)
ويكلولهم هاي الشهاده صحيحه لو مزوره واكيد الطب العدلي لا يتعبون نفسهم
ولايدورون عليهه بالسجلات (لان جماعتنه بعدهم على شغل الاوراق والسجلات لاكومبيوتر ولاتقنيه)
فحسب مزاج الموضف اذا مرتاح يكول صحيحه واذا ممرتاح يكول مزوره .
اني راح انصحه مايقدمهه حتى ليتعب نفسه ولو هوه مستحق لان فعلا اخو استشهد
لاسباب طائفيه على يد المجرمين الي اتوقع جايين من كوكب زحل او المريخ!! 

[نورالعيون]

اخي العزيز عمر اكيد شهادة الوفاة يعزز موقفه من التقديم خاصة عندما تكون القصة مترتبة واحداثها متسلسلة وشهادة الوفاة تأيد كلامه للاحداث ومو شرط تكون ملونة  حتى لو مصورة بس الاهم تكون مختومة ومصدقة من الجهات المعنية!!

بس ممكن سؤال بلة زحمة؟؟ محافظة  سحتوتة؟؟!!!!! هاي وين صايرة

تحياتي نورالعيون

[عمر عراقي]

اخي العزيز عمر اكيد شهادة الوفاة يعزز موقفه من التقديم خاصة عندما تكون القصة مترتبة واحداثها متسلسلة وشهادة الوفاة تأيد كلامه للاحداث ومو شرط تكون ملونة  حتى لو مصورة بس الاهم تكون مختومة ومصدقة من الجهات المعنية!!

بس ممكن سؤال بلة زحمة؟؟ محافظة  سحتوتة؟؟!!!!! هاي وين صايرة

تحياتي نورالعيون

بيها الختم مال دائرة الطب العدلي في محافظة (سحتوته الديمقراطيه العظمى) وغير ختم مابيه.
...
معقولة متعرفين محافظة سحتوته 
هاي يانو عيني تصير جنوب غرب شمال بغداد وتابعه لاقليم (ستوته) هسه اكيد عرفتيها.!!!
طبعا حبيت ادلع احدى محافظاتنا في العراق فأطلقت عليها هذا اللقب.

[ســـرى]

اخي العزيز عمر ممكن تقديم هذه الشهادة ليش لا ويكوللهم الاسباب اللي ما تخليه يرجع يطلع نسخة ملونة اما اذا مكتوب على هاي النسخة اللي عنده (طبق الاصل) ومختومة فهاي رسمية ومعترف بيها ان شاء الله.

[عمر عراقي]

شكرا سرى على ردك ومشاركتك
واتمنى لكم التوفيق جميعا
حبايـــــــب