التقدم بشكوى ضد المنظمة ؟

[الهندي الشاطر]

السلام عليكم اخوتي واخواتي

يوجد شخص صديق محتاج نصيحة اهل الخبرة من الخيرين في هذا المنتدى .. هذا الشخص وصل امريكا عن طريق برنامج الاي او ام صارله حوالي ست اشهر او اكثر شوية المهم لحد هذه اللحظة ما مستلم سوشل سكيورتي والسبب ان الفايل مالته كانت عند المنظمة لغرض ارسالها بالبريد لاحدى الدوائر لتصحيح بعض الاخطاء .. وكل ما يراجع المسؤل القانوني بالمنظمة ( كاثولك جرتس ) يكوله بعدها ما خلصانة الا ان تفاجأ برده في احدى المرات كاله قضيتك ما اعرف وين صارت لان اصلا احنا ما مستلمين رقم معاملة والجهة الي دزيناها الها تكول ما مستلمين هيج معاملة ( طبعا اهنا بده يعرف ويش انهو اكو اهمال كبير بالموضوع لان كل معاملة يم الدولىة من يستلموها ينطوك ما يسمى رسيبت نمبر ) ما طولها عليكم محد سواله اي شي بالمنظمة حتى المدير ..... السوال هو بهيج حالة او اي حالة اخرى مماثلة الي يريد يشتكي عل المنظمة فما هي الجهة الاعلى منها ووين تنصحون هذا الشخص يشتكي يعني اكو جهات معينة في اي ولاية تستقبل هيج نوع من الشكاوي لانهم فوك ما مضيعين معاملته وهم غير مهتمين وهم ديماطلون وياه وشكرا


ملاحظة ( ال i 94 الي استلمه منذ اول دخوله لاول مطار الاصلي ضايع ويه المعاملة )

[Hanar]

خطية الله يكون بعونه

يعني المنظمات داخل العراق يبوكون العراقيين و خارج العراق هم يبوكونه!!

اكيد هناك جهات اعلى يراقبون شغل المنظمات و يقيمون عملهم

خل صديقك يراسل ال HQ المكتب الرأيسي مال المنظمة

تقبل مروري

[الهندي الشاطر]

شكرا للرد السريع ودعائكم بس ممكن اعرف شنو هذا ال hq

[Hanar]

قصدي المكتب الرأيسي للمنظمة

ما ادري صديقك باي ولاية ,, بس كل منظمة اكيد اله مكتب رأيسي عادتا في واشنطن او نيويورك و الهم فروع بغير ولايات

دور ع عنوان المكتب الرأيسي للمنظمة في النيت و راسلهم شوف شيجاوبون, لكن كاحتياط حاول تراسل اكثر من مسؤول في المنظمة,, مثلا مدير العام و نائب المدير و مدير العلاقات و مدير الاعلام حته الكل يعرفون بالموضوع

[angie-dawood]

اذا تكدر دزلي تلفون المنظمة واسم الشخص شون هو مكتوب با لجواز حتى اخابرهم وافهم شنو الموضوع وليش مضيعين المعاملة اذا تحب طبعا ؟

[الهندي الشاطر]

الف شكر للاخت انجي على العرض الاخوي الكريم دائما سباقة بفعل الخير ... الصراحة اني اتصلت بيهم ( اطكطك شوية انكولوزي ) وكذلك الكثير من الاصدقاء وردهم دائما انه المعاملة ما ضايعة وانها موجودة في مكان ما وجاري البحث زين احنا نكلهم انطونا الرسشيبت نمبر مال فايله يكولون مو كل مرة دوائر الهجرة تنطي رسيبت نمبر وهاي اتصور فلم هندي من عدهم والكلام وياهم ما بيه نتيجه لان الكثير منا حاول وهم اجاباتهم غير مقنعة ابدا ... علواه لو بقية الاخوة والاخوات يفيدونا بمعلومات حول الجهات التي يمكن اي شخص باي ولاية يلجأ الها في حالات مماثلة لما حصل للشخص المذكور

[ســـرى]

اخوية العزيز زين من قدم عالسوشيال راح وية ابو المنظمة لدائرة السوشيال غير؟

[الهندي الشاطر]

شكرا اخت سرى للتفاعل والمساعدة التي تميزكم .. لا اختي هم دزوا فايله للمعاملة المذكورة قبل ما يودوه لدائرة السوشل ضنا منهم ان شغلته مجرد اسبوعين او ثلاثة حتى تفض ويقدموله عل السوشل ( دتلاحظين اخطاء المنظمة ) وهسه هو في حيره من امره لان السوشل هو اساس كل شيئ في امريكا علما انه يملك نسخة من الاي 94 يعني كابي وجوازه مؤشر بالختم الاحمر الي ينختم بيه جواز الجي عند وصوله

[ســـرى]

زين يعني هو عمليا ما مقدم عالسوشيال مو صحيح؟ والفايل على شنو كان يحتوي؟اكو اوراق اصلية تخصه؟

[الهندي الشاطر]

شكرا اختي سرى هسه اني خابرته يكول لا هو ما مقدم بالنسبة للاوراق الي بالمعاملة اذا تذكرون اول ما يوصل الشخص المنظمة تفتح فايلة الي بيه اجه من العراق ويحتفضون هم باوراق ويسلمون المواطن الباقي هاي كلها بالمعاملة بالاضافة الى الاي 94 الاصلي وياها الي اعتقد لازم يكون من ضمن المتطلبات الاساسية اذا قدم عل السوشل لان هو عنده كابي فقط ارجو ان اكون وضحت الصورة اذا اكو استفسارات اخرى فاني حاضر وبارك الله بيكم لفعل الخير

[ســـرى]

هااااااا يعني الاصلي بقى يمهم هاي مشكلة لان على الاقل لو عنده كان هو يروح للدائرة يقدم ويتركهم.زين ممكن يتصل بالفرع الرئيسي للمنظمة ويكوللهم المشكلة مالته وية الفرع اللي بولايته بلكي هم يتصرفون وياهم لان هاي الاوراق الرسمية مشكلة اذا طلعوا مضيعيها لازم معاملة ومدري شنو.الله يكون بعونه بس لا يسكت خلي يظل يتصل بيهم وهاي مسؤولية قانونية عليهم.

[ســـرى]

هذا الويبسايت مال المنظمة وبيه رقم التليفون للمكتب الرئيسي واكو ايميل للاستفسارات

http://www.catholiccharitiesusa.org/NetCommunity/Page.aspx?pid=1434

وهذا حسب الولاية

http://www.catholiccharitiesusa.org/NetCommunity/Page.aspx?pid=292

ان شاء الله يوصل لنتيجة.

[الهندي الشاطر]

شكرا للاخت سرى هسه انشالله اجيكله الويبسايتات الي حضرتك دزيتيها .. واكيد ما راح نسكت ودندرس مع مجموعة من الاخوة والاصدقاء الخيارات المتاحة واني اقترحت طرح الموضوع بالمنتدى حتى تكثر الحلول الي امامنا بس والله هي حاليا اقواها هو الولد معرف منو قاري براسه ويريد يبلغ الشرطة ويتهمهم رسميا بالسرقة ... والله كريم انشالله

[ســـرى]

خلي يتعامل وية الموضوع بعقلانية وبهدوء ولايتصرف بناء عالمعطيات الحالية رأسا خلي يوصل لمكتبهم الرئيسي ويشوف يسووله شي لو لا.الله كريم

[(بغدادي)]

اذا صديقك متاكد مية بالمية انو اوراقة ضايعة وخصوصا ال I-94 فلازم ايروح لدائرة الهجرة بمنطقته واللي همة مسؤولين عن اي وثيقة تخص دخول وخروج الشخص ويبلغ عن فقدانهة وانو المنظمة هية اللي ضيعتها ويقدم شكوى وعلى هالاساس تتفعل قضيته لان الكاثوليك جارتي عبارة عن متعاقد ولا يمثل الدولة يعني حاله حال اي مقاول فطبعا يريد يستر على نفسه سواء كان الموظف او المدير..يعني عصفور يكفل زرزور وثنينهم طيارة..

بغدادي

[** يدكو **]

شكرا للاخت سرى والاخوة والاخوات الادارين على مساعدة اللاجئيين اما بخصوص موضوعك اخي راح اتص باخي بكاليفورنيا لان الو فترة هناك والو علم بهيجي مواضيع واردلك الجواب

         تقبل مروري وبالموفقية للجميع

[حديقة]

اذا تكدر دزلي تلفون المنظمة واسم الشخص شون هو مكتوب با لجواز حتى اخابرهم وافهم شنو الموضوع وليش مضيعين المعاملة اذا تحب طبعا ؟

انجي عفية الامنية مالتي

[الهندي الشاطر]

شكرا للاخ البغدادي للنصيحة وبالنسبة للمثل هو بالضبط ما يحصل بين موظفي المنظمة الواحدة خصوصا اذا ( كروب مكسيكان ) بيناتهم محد ينطي باللاخ من باب اني واخوي على ابن عمي واني وابن عمي عل الغريب


شكرا للاخ حديقة ويدكو

[(بغدادي)]

بخدمتك اخي العزيز واذا تحتاج شي اتصل بيه عالخاص..وازيدك من الشعر البيت على سوء الادارة والتنسيق بالكاثوليك جارتي صارت وياية بالنسبة للفحوص الطبية لان المفروض اول اسبوعين من الوصول اكملهة اشو خلص شهر وشهرين وتلاثة وكل ما احجي وية الكيس منيجير ايكولي علينه ضغط وراهة رحتلهم وحجيت وية مسؤول اللقاحات وهوة شخص فلبيني جان يكولي اصلا الكيس منيجير "العراقي الشريف اللي اني اشوفه بين فترة واخرى" كايله هذا انتقل لغير ولاية وعلى هالاساس غلقوا ملفي..بشرفك هاي تصدكهة عاد كللي هسة اخلصلك اللقاحات كلهة وانطيك الكارت الاصفر وراهة كلبتهة عليهم حتى رحت للمكتب الرئيسي بس اكتشفت انو همة عبارة عن عصابة منظمة وما راح تستفيد شي اذا بقة الفايل يمهم..

بغدادي

[angie-dawood]

اخي الشاطر اليوم كان عندي موعد بالمنظمة وجتي ببالي كلت خلي اسالهم عن فقدان white catd 
انطوني هاي الخطوات راح اكتبها الك بلكن تفيد


1- go to www.uscis   Gov
2- go to    Info paass
3- take the   appointment 
4- print the   appointment form

واكو شي اخر كال هاي الورقة الي بيها صورة ملونه للاجئ هي بيها رقم الوايت كارت خلي يتاكد منها
وانشاءلله تنحل مشكلته

[الهندي الشاطر]

الف شكر للاخت انجي يكفي ان المشكلة جتي على بالك وانتي في المنظمة وهذا من حبك لمساعدة الاخرين وفعلا منذ فترة دخلت هذا الموقع واخذنا له موعد ( حتى بدون ما نطبعه سجلنا المعلومات ورقم تثبيت الموعد على ورقة عادية ) وذهبنا لدائرة الهجرة وعرضنا قضيته ولا يسعني الا ان اقول واضيف على كلام اخونا بغدادي المسألة تفاقمت بسبب او عدة اسباب منها عدم مبالاة المنظمة ورعونتها كل علم بقوانين الدوائر الامريكية الرسمية ما عدهم اضافة الى اجتهاداتهم الشخصية الي تزيد الطين بلة وفي احيان قليلة تعمدهم بفعل ذلك وخصوصا اذا كان بعض العاملين في المنظمة من ( ........ ) وراح نمشي على الي فهمونا ياه دائرة الهجرة ويصير خير انشالله

[ســـرى]

رفع